Subuditi san hun?
Lidan tidaani Bíbülia, inarüni san bunagua hamá meha gürigia híduru wuribati lidan hachari amu gürigia?
Ayanuhatu kopia tani líburu Digesto to, to lani gumadimati Justiniano, to ladügüboun lidan irumu 1468 luagu saragu turóbuli le meha asuseredubei lidan binadu dan.
SEGÚN Matéu 13:24-26, ariñagati Hesusu: “Ítara liña arúeihani le lánina sielu kei aban wügüri le ábunagubei ilaü buiti licharirugu; dan le añaha lubéi sun ha ñéinbaña arumuga, aba lebelurun aban lágani labureme fulasu ligía, aba lábunun híduru wuribati labadinagua türigu, aba lidin. Dan le laweinamudunbei türigu aba legelewehan, aba giñe lachülaagun híduru wuribati”. Gíbetiña sásaamu mafiñetiña inarüni lan abahüdaguni le. Gama lumoun según fiú dugumedu to lauboun halurudun rómana lidan tidaani Bíbülia, gayarati meha lasuseredun katei ligía.
Según tafuranguagüdüni aban dimurei-agei, aba meha duru lidan halurudun rómana láguyuguagüdün gürigia wuribani lun gürigia líledi lau lábunagun híduru wuribati licharirugu. Anhein meha mégeiwa lubéi aban lúrudu ítara kei le, mini lan susere lan wuribani ligía. Ariñagati aban subudihabúti lun lúrudu gíriti Alastair Kerr lidan lan irumu 533 lárigiñe Kristu aba lan ladügün aban gumadimati rómana gíriti Justiniano aban líburu subudiwatu kei Digesto. Tidan líburu tuguya anihein saragu lúrudu rómana lau le hariñagubei saragu subudihabútiña lun lúrudu ha awinwandubaña lidan burí irumu 100 luma 250 lárigiñe Kristu. Ayanuhatu Digesto luagu aban sásaamu gíriti Ulpiano, le ayanuhabei luagu aban gürigia le ñǘdünbei ábunagua híduru wuribati lidan lichari amu gürigia ani aba lagadeiruni lalubahan. Ariñagatu giñe líburu tuguya luagu garicha lan meha labureme ichari lun leresibirun seinsu luagu dañu le adügǘbei lun lalubahan.
Kei aubei warihei, susereti meha katei burí le lábugiñe hagumadihan rómana. Arufuda lumuti katei le gayarati lan meha lasuseredun le lariñagubei Hesusu.