1. Ka gayaraabei ladügüni Heowá lun lagunfulirun lisuuni?

GAYARAATI ladügüni Heowá le mégeiwabei lun lagunfuliruni lisuuni. Fiu lídangiñe katei le ladügübei lau leseriwidun kei máisturu, úguchili le íchuguti dǘgüdaguaü luma apurichihati (Isa. 48:17; 2 Ko. 7:6; Gal. 3:8). Íbini ítara, gabügürüguati burí layusuruniña gürigia lun lagunfulirun le labuserunbei (Mat. 24:14; 28:19, 20; 2 Ko. 1:3, 4). Gayaraati líchugun Heowá lichú-aau luma erei lun furumiñeguarügü wádangiñe, lun gayara lan wadügüni le mégeiwabei lun lagunfulirun lugundan. Sun le, aban lídangiñe le mini lubéi liri Heowá, kei hariñaguni fiu sásaamu.

2. a) Ka uagu anihein lubéi dan machourun wamá layusuruñadiwa lan Heowá? b) Kaba wakutiha lidan arütíkulu le?

² Sun wagía busentiwa lun hu wamá lun Heowá, gama lumoun, añahein machourun hamuti anhein layusuruñanu lubéi. Ka uagu? Ladüga genege lan houn madügünhaña lan saragu ladüga harumudiri, le gádanbaliña, o lóuguaali lan here. Añahein híbiri másiñati buídurügü lan houn le hadügübei lidan heseriwidun ani marihin hamuti megei hamá lun hawanserun. Lidan arütíkulu le, wakutihabei ida luba lan gayara lan líderaguniwa Heowá lun wagunfulirun lau lisuuni. Warihibei giñe hénpulu hani fiu wügüriña hama würiña ha lánina binadu dan ha layusurubaña Heowá lun busén hamá hadügüni lugundan ani ruti erei houn lun hadügüni. Ani lagumuhóun wakutihabei, kaba lan wadüga lun layusuruniwa Heowá.

3. Según füramasei le lídanbei Filipuna 2:13, ka gayaraabei líchuguni Heowá woun?

³ (Aliiha huméi Filipuna 2:13). * Gayaraati ladügün Heowá lun busén wamá wídeha. Ida? Másiñati lau lan wíchugun fe mégeiwa lan ídemuei lidan adamuridaguni le ñein wabéi o lau laliihan aban wéiyaali lidan afiñeni gárada to tóunahan Beteli luagu awisahani mégeiwa hamá íbirigu lun hídehan lidan somu fulasu. Háfuga aban wálügüdagun woungua kaba lan wadüga lun wídehan. O másiñati resibi haadiwa lan somu dasi le hénrenguti ani aba wálügüdagun woungua anhein gayaraabei lubéi wadügüni. Gayaraati giñe lasuseredun dan lan le waliihan somu fánreinti tídangiñe Bíbülia, aba wasaminarun ida luba lan wayusuruni lun wíderaguniña amu. Mafosurun lumutiwa Heowá lun wadügün somu katei. Gama lumoun, ariha lumuti gayara lan waganwoundagüdüni weseriwidun lun ábati ladügün lun busén wamá wadügüni.

4. Ida luba líchugun Heowá erei woun lun wadügüni lugundan?

⁴ Gayaraati giñe líchugun Heowá erei woun lun wídeha (Isa. 40:29). Gayaraati ladügün Heowá lau lani sífiri sandu lun wayusuruni ubafu le wawagubei lun wadügün somu wadagimanu (Afu. 35:30-35). Gayaraati larufudahan woun tidan lóundarun ida luba lan wadügün fiu wadagimanu. Anhein siñá wabalin ítaga wadagimanu adüga amuriaha wamá ídemuei. Manufudeda wamá giñe lun wayarafadun lun Wáguchi le siélubei ani amuriaha wamá “óunwenbu ubafu” luma (2 Ko. 4:7; Luk. 11:13). Aliihatiwa tidan Bíbülia ida liña lan larufudahan Heowá houn saragu wügüriña hama würiña lau líchugun erei houn luma lun busén hamá hadügüni lugundan. Akutiha wamá fiu hénpulu ani samina wamá ida luba lan layusuruniwa kei meha layusuruniña binadu lubúeingu.

5. Ka wafurendeirubei luagu dan luma ligaburi layusuruni Heowá Moisesi lun lesefuruniña lumutuniña?

⁵ Adügati Heowá lun lesefuruniña Moisesi ísüraelina. Gama lumoun, ka dan ladügei? Dan meha san lasandiragunbei Moisesi lungua aranseeli lan ladüga lafurendeiruni “lichú hau Ehiptuna”? (Adü. 7:22-25). Úa, yusu lumuti Heowá Moisesi lárigiñe larufudaha ǘnabuguni lun (Adü. 7:30, 34-36). Ani ruti Heowá ganigi lun lun larufudagun lungua ligibugiñe gumadimati le gabafutimabei Ehiptu (Afu. 9:13-19). Ka wafurendeirubei luagu dan luma ligaburi layusuruni Heowá Moisesi? Yusu lumutiña Heowá gürigia ha arufudubaña aban igaburi le aubei lagundaara ani afiñe hagía luagu erei le líchugubei houn (Fili. 4:13).

6. Ka wafurendeirubei lídangiñe ligaburi layusuruni Heowá Bárüsilai lun líderaguni urúei Dawidi?

⁶ Saragu sígulu lárigiñe aba layusuruni Heowá Bárüsilai lun líderaguni urúei Dawidi. Dan le lanurahanbei urúei hau luwügüriña luéi Abüsalón, le liráü, anihán meha lubucha uagu luagu Dawidi, ilamaü luma mágürabu. Íbini meha hanarime lan derebuguhali lan Bárüsilai, áhurera lumuti libagari, ligía hama amu lun híderaguni Dawidi. Masaminarungubeiti meha Bárüsilai, siñá haali lan leseriwidun lun Heowá. Gíchigaditi ani yusu lumuti le lúmabei lun líderaguniña lubúeingu Bungiu ha meha mégeihabubaña (2 Sam. 17:27-29). Ka wafurendeirubei? Furendeitiwa meberesenga lan ka lan warumudiribei, gayaraabei layusuruniwa Heowá lun wíderaguniña wíbirigu meberesenga halía lan heredera ha siñabei hibihini le hemegeirubei (Ari. 3:27, 28; 19:17). Íbini anhein siñá lubéi woudin íderaguaña, gayaraati wíchugun budagia  lun wadagimanu lánina apurichihani le adügǘbei lidan sun ubóu lun gayara lan hiderawagún íbirigu ha lidan dan luma fulasu le ñein lubéi lemegeirúa (2 Ko. 8:14, 15; 9:11).

7. a) Ida liña layusuruni Heowá Simeón? b) Ka uagu líchiga katei le gurasu woun?

⁷ Aba meha wügüri Herusalénna úaraguati ani wéiyaali Simeón ani füramaseti meha Heowá lun lubaragiñe lanme lounwen larihibei lan Mesíasi. Chóuruti ru lan füramasei le gurasu lun saragu, lugundun lagurabahañein meha luagu saragu irumu lachülaagun Mesíasi. Ruti Heowá lafayeiruaha luagu lafiñen luma lawandun. Luagu aban weyu, lau “ladundehani sífiri sandu” aba lidin Simeón ténpulurugu ani ñein larihei Hesusu. Ábati layusuruni Heowá Simeón lun lariñagun aban profesía luagu irahü le, le lunbei meha Krístubei lan (Luk. 2:25-35). Másiñati marihin laali lan meha Simeón lani Hesusu ministeriu, íbini ítara gúndaati lau chansi le libihubei. Lídanme iseri ubóu larihibei wügüri úaraguati le, ida luba lan labiniruniña Hesusu sun iduheñu ha ubouagubaña ha lúnbaña hawinwandun lábugiñe larúeihan (Agu. 22:18). Wagía giñe sun gayaraati weteingiruni Heowá lau líchugun chansi woun lun weseriwidun lun.

8. Ida luba layusuruniwa Heowá?

⁸ Lidan furumiñeti sígulu, aranseñu liña meha aban wügüri gíchigaditi gíriti Hosé lun layusuruni Heowá (Adü. 4:36, 37). Berünawé háchuni apostolugu, mini lan lira, “le Íchugubei dǘgüdaguaü”, másiñati ladüga lan gíchigadi lan dǘgüdaguaü houn amu. Kéiburi, dan le ladügagubei Pábulu lungua kristiánume, hanufudetiña meha saragu íbirigu hayarafadun lun, ladüga subudi hamani éibaaha lániña lílana damuriguaü. Gama lumoun, aba lidin Berünawé íderaguei. Chóuruti seremei lani Saulu Berünawé saragu lau areida lan lun (Adü. 9:21, 26-28). Dan lárigiñe aba híchugun wéiyaaña lidan afiñeni ha Herusalénbaña fe megei hamá kristiánugu ha lídanbaña Antiokía le Siriabei, aba fulasu le díseti, dǘgüdaguaü. Ka hóunahabei? Berünawé hóunahabei. Aba katei buiti lira lugundun, ariñagatu Bíbülia: “Aba líchugun dimurei houn súngubei lun hafalaruni Wabureme Bungiu tau sun hanigi” (Adü. 11:22-24). Uguñe weyu gayaraati líderaguniwa Heowá lun wíchugun dǘgüdaguaü houn wíbirigu, kéiburi, houn ha eferidirubaña haduheñu lidan óunweni. Másiñati línchahaniwa lun wabisidahani o lun wagúarun lun somu gürigia le sanditi o le híruti lun wariñagun dimurei le ruti dǘgüdaguaü. Aranseñubadiwa san lun layusuruniwa Heowá ítara kei layusuruni Berünawé? (1 Tesa. 5:14).

9. Ka wafurendeirubei lídangiñe ligaburi líderaguni Heowá aban íbiri le gíribei Vasily?

⁹ Íderagua lumuti Heowá aban íbiri gíriti Vasily lun aban lan wéiyaali lidan afiñeni le gíchigaditi dǘgüdaguaü. Dan le líridunbei íbiri kei wéiyaali lidan afiñeni, 26 meha irumu lau, aba meha lasandiragun lungua maranserungili lan lun lídehan lidan damuriguaü, dántima le gaturobulin hamá íbirigu. Gama lumoun, resibiti aban lubuidun arufudahani seremei hídehan wéiyaaña lidan afiñeni ha subudihaña saragu tuma giñe Leskuela houn Wéiyaaña hama Ídehatiña. Aba láfaagun saragu lun labuiduragüdüni ligaburi. Kei hénpulu, aba ladügün aban tiraüraü lísüta lau katei le lunbei labuidurun lidan. Lau libihini kada aban lídangiñe katei le, aba leferidiruni anufudei murusun murusun. Ariñagati: “Le meha anufudedagüdübadina, guentó gúndagüda láadina. Dan le líderagunina Heowá adarira bérusu buiti lun níchugun gurasu houn íbirigu wügüriña hama würiña, sandiguatina nungua buidu”. Íbirigu, anhein ítara hubéi kei Vasily ani aranseñu hiña lun layusurunün Heowá, larufudahaba hun lun gayara lan gani humá buligasion le wéiritimati lidan damuriguaü.

10. Ka tadügübei Awigaili ani ka wafurendeirubei túmagiñe?

¹⁰ Lidan meha anihán lan urúei Saulu éibaahei Dawidi luma éibaahaña luwügüriñanigu Dawidi ha úaragubaña lun, mégeitiña meha ídemuei. Luagu aban dan, aba hamuriaha luwügüriñanigu Dawidi murusun éigini luma aban ísüraelina rísiti gíriti Nawali. Sandiguati Dawidi lungua gayara lan lamuriahan éigini luma wügüri ligía ladüga góunigi lumutiña lilügüniña mudún lidan fulasu mageirawati. Máhati meha Nawali líchugun ni kata houn, hángiti meha. Adügati le lun lagañidun Dawidi, ligía laransehabei lun lidin áfarei wügüri ligía hau sun gürigia ha lúbiñebaña (1 Sam. 25:3-13, 22). Ábati tídeha aban würi magadiñetu gíritu Awigaili, lúmari Nawali, arufudatu würi to lichú-au luma ganigi, ñǘdüntün lubaroun Dawidi aba tabuluchagun ligibugiñe aba tamuriahan luma lun madügün lan wuribani ni lun láwiyuragüdün hitaü. Aba tariñagun lun lun lan lígiruni sun katei lúhaburugu Heowá. Hingí lumutu dimurei le tariñagubei lau lichú aau luma ǘnabuguni lanigi Dawidi ani aba harufuduni tun lóunahan lan Heowá tuguya (1 Sam. 25:23-28, 32-34). Arufudaaru meha Awigaili igaburi le meha huubei lun Heowá. Ítarameme gayaraati layusuruniña Heowá kristiánugu würiña ha arufudubaña lichú aau ani gufuranda hagía lun hederebudagüdüni damuriguaü hama haduheñu (Ari. 24:3; Titu 2:3-5).

11. Ka hadügübei lisaanigu Salumu würiña, ani kátaña áyeihabalin le hadügübei uguñe weyu?

¹¹ Saragu sígulu lárigiñe, añahein meha lisaanigu Salumu würiña hadan ha layusurubaña Heowá lun laransehóun lubarieirun Herusalén (Neem. 2:20; 3:12). Íbini aban lan meha ábuti Salumu, aranseñu haña meha lisaanigu würiña lun hadügüni wadagimanu hénrenguti ligía ani denchati (Neem. 4:15-18). Amu meha hagaburi luéi hagaburi wügüriña ha wéirigutimabaña Tekóa ha meha mabusenrunbaña hǘnabudaguagüdün houngua adügei wadagimanu (Neem. 3:5). Samina wamá luagu ugundani le hasandirubei würiña hagía dan le lagumuchubei wadagimanu lídanrügü 52 weyu (Neem. 6:15). Uguñe weyu, añahein íbirigu würiña hínsiñeti houn heseriwidun lidan somu eseriwiduni lidan dan dayarüti: lidan bunaguaü, luma lidan taransehóun burí muna to ñein lubéi láhuduragua lun Heowá. Adügati benefa hamá, hawadigimaridun lau ubebeni luma úaragua hamá lun buidu lan hawadigimaridun.

12. Ítara kei lidan tikesin Tabita, ida luba layusuruniwa Heowá?

¹² Ínchaha lumutu Heowá Tabita lun tídehan, “súnwandan tau adüga buiti, íderagua tuguya gudemetiña” hátima hilaañabaña hani weiriei (Adü 9:36). Ayahuaha hamuti saragu tounwen, ladüga lanarime areida tan ani mangi tuguya. Gama lumoun sanditiña saragu ugundani dan le láguyuguagüdünu apostolu Féduru (Adü. 9:39-41). Ka wafurendeirubei tuagu Tabita? Anhein nibureingidiwa lubéi o derebuguhadiwa lan, wügüriña o würiña, sun wagía gayarati wadügün somu katei lun wíderaguniña wíbirigu (Ebü. 13:16).

13. Ida liña layusurunu Heowá aban íbiri haburitu gíritu Ruth, ani ka tariñagubei dan lárigiñe?

¹³ Busentu meha aban íbiri haburitu gíritu Ruth lun misionera tan. Dan meha nibureingiru, lau meha lufuresen tederegeha tratadu tidan burí muna. Ariñagatu: “Hínsiñeti meha nun nadügüni lira”. Gama lumoun, hénrenguti meha tun tayanuhan hama gürigia luagu Larúeihan Bungiu. Íbini meha haburi tan Ruth, aba prekursora tan hádangiñe ha adügübaña 70 oura lidan hati dan meha le 18 lubéi irumu tau. Lidan irumu 1946 aba tidin tidan Leskuela Galaadü to tani Watchtower ani seriwitu Hawái luma Hapón. Yusu lumutu Heowá lun tanügüni uganu buiti houn saragu gürigia  ha awinwandubaña lidan burí ageiraü ligía. Lárigiñe teseriwidun kei burí 80 irumu, aba tariñaguni Ruth dimurei le: “Heowá nérebei. Íderagua láadina lun ua lan haburi nan. Afiñetina gayara lan layusurun Heowá furumiñeguarügü íbirigu ha ru hamuti hafiñen luagu”.

14. Según Éfesuna 3:16, 17 ka lunbei wadügüni anhein busén wabéi lun layusuruniwa Heowá?

¹⁴ Lidan sun dan le sügühalibei yusu lumutiña Heowá lubúeingu lidan saragu igaburi. Lidan wakesin, kaba ladüga lun layusuruniwa? Según áfaaguni le lunbei wadügüni (aliiha huméi Éfesuna 3:16, 17). Anhein aranseñu waña lubéi, gayaraati ladügün Heowá lun wapurichiha lau ubebeni, lun máisturu wamá ha buítiña, lun gíchigadi wamá gurasu houn amu, lun benefa wamá lidan wawadigimari, lun umadagu wamá ha gunfurandabáliña amu o furumiñeguarügü amu katei le mégeiwabei lun lagunfuliruni lisuuni.

15. Kei lariñaguni 1 Timotéu 4:12, 15, ka lunbei hamuriahani nibureintiña luma Heowá?

¹⁵ Aban san nibureinti buguya le ayarafadeina liña lun wügüri lan? Mégeiwati hídeha wügüriña ha buínbaña lau erei ha busenbaña hídehan luma lun heseriwidun kei ídehatiña lidan damuriguaü. Lidan saragu damuriguaü añahein saragu wéiyaaña lidan afiñeni sügǘ hau ídehatiña lidan damuriguaü. Gayaraati san báfaagun lun laganwoundun bani buligasion lidan damuriguaü? Anihein dan ariñagatiña fiu íbirigu: “Gúndaatina láurügü aban nan apurichihati”. Anhein ítara liña lubéi basandiragun bungua, amuriaha ban ídemuei luma Heowá lun líderagunibu lun busén ban lun ídehati ban lidan damuriguaü luma lun líchuguni erei le emegeirubei lun badügüni sun biyaraati lidan beseriwidun lun (Apur. 12:1). Megei wamutibu (aliiha huméi 1 Timotéu 4:12, 15).

16. Ka lunbei wamuriahani luma Heowá, ani ka uagu?

¹⁶ Gayaraati ladügün Heowá lun busén wamá wídehan lidan lagunfuliruni lugundan. Ligíati, amuriaha wamá luma lun ladügün lun busén wamá wadügüni wawadigimaridun lun, luma lun wamuriahan erei luma lun wadügüni. Meberesenga anhein nibureingidiwa lubéi o derebugu háadiwa lan, yusu waméi wadaani, wayara luma wámati lun wíchugun uéiriguni lun Heowá guentó (Apur. 9:10). Maweiyasun wamá ígira lun lásügürün chansi lun wadügüni sun wayaraati lidan weseriwidun lun Bungiu ladügarügü anufudei o wasaminarun mouni wamá. Gibe lan yebe wadüga lidan weseriwidun lun Heowá o mibe lan, sun wagía anihein aban lubuidun chansi wama lun wíchuguni uéiriguni le yuubei lun Wáguchi le hínsiñehabubei.