1. Ka uagu yu lubéi lun lúnrügü lan Heowá wáhuduragua?

YUUTI lun lúnrügü lan Heowá wáhuduragua ladüga ligía adügübaliwa ani ligía giñe íchugubei ibagari woun (Aruf. 4:11). Íbini hínsiñe lan Heowá woun ani inebe ligía woun, anihein katei le gayaraabei lachawahaniwa luma lun ladügün lun máhuduragun wamá lun. Lun masuseredun lan le, lunti gufuranda wamani ida liña lan. Furumiñe ariha waméi ka lan mini lubéi lúnrügüba lan Bungiu wáhuduragua.

2. Según Matéu 4:10, ka katei maweiyasunbadiwa adügei anhein lúnrügüba lubéi Heowá wáhuduragua?

² Góubaguagüda tumuti Bíbülia lanarime ínsiñeni le wasandirubei luagu Heowá luma wáhuduragun lun. Dimurei lúnrügü lan, mini lan máhuduragunbadiwa lan lun ni aban bungiu luéidigia lun Heowá. Mígirunbadiwa lun leberesehani somu katei wáhuduragun lun Bungiu (aliiha huméi Matéu 4:10).

3. Ka lébunabei lúnrügü lan Heowá wáhuduragua?

³ Lébubei wáhuduragun lun Heowá ladüga le wafurendeirubei luagu. Wéiritu wanigi luagu lubuidun burí ligaburi. Subuditi woun le hínsiñebei lun lumoun le mínsiñebei lun ani gúndaatiwa lau. Gunfuranda wamuti ka lan lisuunibei wabá ani ídehatiwa luma lau wawinwandun úaragua luma lugumadin. Ani Sandiguatiwa woungua buidu ladüga líchuguni chansi woun lun gamadagua wamá luma (Sal. 25:14). Sun le wafurendeirubei lúmagiñe le Adügübaliwa yarafagüda lumutiwa lun (Sant. 4:8).

4. a) Ka layusurubei Mafia lun máhuduragun wamá lun Heowá? b) Kaba wariha lidan arütíkulu le?

 ⁴ Mafia abugurubalin ubóu le ani yusu lumuti lun lagadeiruni wayumahan luma wadebilin (Efe. 2:1-3; 1 Huan 5:19). Busenti lun hínsiñe lan amu katei woun lun máhuduragun wamá lun Heowá. Wariha bián katei le ídanbei gayara lan ladügün lun wéiguadun tidoun lisadaran. Furumiñe, Hóuchagua lumutiwa lun wibihin irisini. Ani le libiaman, álugati lun wanúadirun isebáhari le mabuidunti.

5. Ka uagu mosu lubéi wóunigiragun woungua luéi línsiñedun seinsu woun?

⁵ Sun wagía busentiwa lun ñein lan éigini nófuti wama, daüguaü to buitu luma aban fulasu le maribanti lun wawinwandun. Gama lumoun lunti duari wamá luéi línsiñedun seinsu woun. Uguñe weyu ‘hínsiñeti seinsu houn’ saragu gürigia luma katei le hagañeihabei lau (2 Tim. 3:2). Subudi lumuti meha Hesusu gayara lan línsiñedun seinsu houn ha afalarubalin, ligía lariñagubei houn: “Úati ni aban gayaraati leseriwidun houn bián iyubudirigu, ladüga línsiñeduba aban hádangiñe lun, liyereegudáme le aban lun; úaraguabei luma aban hádangiñe, líchigame mebereseni luagu le aban. Siñati leseriwidúniwa lun Bungiu luma lun seinsu” (Mat. 6:24). Ha áhuduragubaña lun Bungiu ani híchuguñein sun hadaani luma here lun harisidun háfaaguña lun heseriwidun houn bián iyubudirigu. Mama háhuduraguña lúnrügü Heowá.

6. Ka wafurendeirubei luagu le lariñagubei Hesusu lun damuriguaü le lídanbei uburugu Laodiséa?

⁶ Lidan lagumuchagüle furumiñeti sígulu, aba meha hapantahan kristiánugu ha lídanbaña uburugu Laodiséa luagu risi hamá, ibihaaña lan irisini ani memegeirun hamá ni kata. Ani ligibugiñe lagu Heowá luma Hesusu ítara haña meha kei gürigia ha fugiabugu, gudemetiña, marihintiña ani surusu hagía.  Mama ladüga risi hamá lererehanbei Hesusu houn, lererehanbei houn ladüga ínsiñeni le hasandirubei luagu irisini ani lagadeiruñein meha katei le hamadagua luma Bungiu (Aruf. 3:14-17). Ánhawa íchiga fe láhüchüña lan ayumahani tidan wanigi lun busén wamá umegeguni, adüga wamá somu katei lun wagidaruni katei le tídangiñe wanigi (1 Tim. 6:7, 8). Anhein magida wamá katei le wawariua fánreinguañu tuba wanigi ábame lamahadun Heowá lun wáhuduragun, lugundun busenti Heowá lun hínsiñebei lan woun ‘tau sun wanigi’ (Mar. 12:30). Ka gayaraabei ladügün lúntima hínsiñe lan seinsu woun?

7-9. Ka wafurendeirubei lídangiñe le asuseredubei lun aban wéiyaali lidan afiñeni gíriti David?

⁷ Ariha waméi le asuseredubei lun aban wéiyaali lidan afiñeni Meriga le gíribei David. Subudiwati íbiri le kei aban nadagimeinti le rúguati lungua lun luadigimari. Tidan kónpeni to ñein lubéi lawadigimarida, aba hiñuruni lubara, ani barǘ wati meha kei aban hádangiñe nadagimeintiña ha buítiña lidan ageiraü ladüga wadagimanu le ladügübei. Abahüdahati: “Saminatina meha buidu lubéi lidin nun ladüga labiniruñadina lan Heowá”. Gama lumoun, ítara liña funa san?

⁸ Aba lagumeserun David íchiga fe ladügüña lan luadigimari dañu lun lumadagua luma Heowá. Afuranguagüdati: “Súnwandan meha nasaminarun luagu turobuli le lídanbei wadagimanu dandu lidan adamuridaguni kei lidan apurichihani. Gáñeitina meha saragu seinsu, ani eibu dan gíbetima lan nidiheri aba nagumeserun gaturobulin lidan nibagari keisi maríeiti”.

⁹ Ábati líchugun David fe mosu lan lasaminarun ka lan súdinibei lun. Ariñagati: “Aba nasaminarun naranseruni turobuli le”. Aba ladügün fiu asansiruni lidan luáguti lóurate  lawadigimaridun ani aba lariñaguni lun lábuti. Le asuseredubei aba leferidiruni David luadigimari. Kati ladügübei? “Larugan aban nederegerunu gárada lun neseriwidun gabügürügua kei prekursoru le ídehati”. Lun lanuriagun Dawidi lungua ligía tabu lani weiriou aba hagumeserun awadigimarida arumadaha. Lárigiñe fiu dan, aba lagumeserun eseriwida kei prekursoru ha adügübaña 70 oura lidan hati ani dan lárigiñe, aba giñe prekursora tan lani weiriou. Anúadahatiña aban wadagimanu le mínsiñebei houn saragu gürigia, ani mama meha ligía súdinibei houn. Íbini rarí lan hafayeiti diisi wéiyaasu luéi le meha hagañeirubei, sagü hati anihein lan seinsu le hemegeirubei hama lun hagañeihani hemegeirun. Busentiña lun híchuguni heseriwidun lun Heowá lóugiñe sun katei, ani hariha hamaali houngua góunigi lániña Heowá ha áluahabalin Larúeihan furumiñe (Mat. 6:31-33).

10. Ida luba wóunigirunu wanigi?

¹⁰ Gibe lan yebe wámati o lougua lan, lunti wóunigirunu wanigi. Ida? Lau wadireirun luéi ínsiñeni le asandirúbei luagu irisini ani mígira wamá lun súdini lan wawadigimari sügǘ luéi weseriwidun lun Heowá. Lun wasubudiruni anhein lasusereduña lubéi katei le woun, álügüdagua wamá woungua: “Gabügürüguati san nasaminarun luagu wadagimanu dan le lídanñadina lan damuriguaü o apurichihani? Gabügürüguati san nadiheridun luagu lunti lan gaseinsun nan lubá ámuñegü? Gaturobulintina san lidan nibagari keisi maríeiti ladüga seinsu luma umegeguni? Aranseñu niña san lun nánharun lun aban wadagimanu le mínsiñeti houn amu, lun gayara lan neseriwidun lun Heowá” (1 Tim. 6:9-12). Dan le wakutihagun woungua, haritagua waméi hínsiñe wamá lun Heowá ani aba ladügüni füramasei le houn ha eseriwidubaña lun tídangiñe sun hanigi: “Nóunigirubadibu; mígirun nubadibu”. Ligía líchugunbalin apostolu Pábulu eweridihani le: “Míchiga huméi hínsiñehabu luagun seinsu” (Ebü. 13:5, 6).

11. Ka gayaraabei ladügüni isebáhari woun?

¹¹ Busenti Heowá lun gunda lan wabagari, ani adügati isebáhari lun ítara lan. Ligía tariñagubei Bíbülia: “Le lunbei ladügüni gürigia, lun leigin, latun luma lun lefeduhani le lagañeirubei luagu luadigimari” (Apur. 2:24). Liibe-agei isebáhari le ubouagubei mabuidunti, gadei lumuti lubuidun igaburi ani ádaha lumutiña gürigia lun hánharun o lun línsiñedun katei le uágubei tariñaga Lererun Bungiu mabuidun lan.

12. Según le lariñagubei 1 Korintuna 10:21, 22, ka uagu mosu lubéi wanúadiruni wisebáhari buidu?

 ¹² Busentiwa lúnrügü lan Heowá wáhuduragua, ligíati ‘siñati weigin luagu lidabulan Heowá’ awanhame “eiga luagu hadabulan máfianu” (aliiha huméi 1 Korintuna 10:21, 22 *). Liibe-agei dan, dan le leigin gürigia luma somu gürigia mini lan gamadagua hamá. Dan le lanúadirun gürigia isebáhari le gaganati anarimeni, katei hani máfianu, magíaguni o amu burí ayumahani luma burí igaburi le lánina layumahan ǘgürügü lañuuruña eiga luagu hadabulan láganigu Bungiu ani lárügüdüña lídangiñe le haranserubei. Ánhawa adügei lira, wadügüña dañu wóuniwagua ani wagadeiruñein wamadagua luma Heowá.

13, 14. a) Ka ida gayara lan wagoubaguagüdüni isebáhari luma éigini? b) Lau gabaroun wamani le lariñagubei Santiagu 1:14, 15, ka uagu mabuidun lubéi wayumahan katei wuribati?

¹³ Ida liña gayara lan wagoubaguagüdüni isebáhari luma éigini? Dan le weigin góunigi wamuti le wádarubei wayumulugun. Dan le hulú wamaali aba lagumeserun éigini le awadigimarida lidan wágubu. Adügati aba lubuidun éigini lun buidu lan wátuadi, ánhawati eiga éigini le mabuidunti gádeirügü lubéi wátuadi. Dan lárigiñe ligía larihín le ladügübei.

¹⁴ Ligiaméme asuseredubei dan le wanúadirun isebáhari, wóunigiruñein le wádarubei lidoun wachügü. Lárigiñe aba lagumeserun awadigimarida, ani gániti luagu le wasaminarubei luma le wasandirubei. Adügati isebáhari le buiti lun wasandiragun woungua buidu, ánheinti le mabuidunbei adügati dañu woun (aliiha huméi Santiagu 1:14, 15). Gayaraati marihín lan luadigimaridun katei le lau lóufudagun, gama lumoun, larihúba lau lásügürün dan. Ligía teweridirubadiwa Bíbülia: “Meyeedagua humá hungua, úati adügüti bula lau Bungiu. Le lábunagubei gürigia, ligíaba giñe lalubaha. Anhein ábunagua aban gürigia katei le layumahan ǘgürügü, líchuguba aban alubahani le lánina óunweni lun” (Gal. 6:7, 8). Ligíati súdini lubéi lun wamaharun lun sun isebáhari le gaganati katei le iyereegubei lun Heowá (Sal. 97:10).

15. Ka idewesei líchugubei Heowá woun?

¹⁵ Hínsiñeti houn saragu lubúeingu Heowá harihin JW Broadcasting^®, lidan wani programa le lídanbei Internet. Ariñagatu aban íbiri gíritu Marilyn: “Íderagua láadina programa le lun gúndaatima nan ani mama mosu nóunigiruni le naríagubei. Dan le nasandiragun nungua nábugua o lau maguraasuni, súnwandan nadarirun yanu o programa lánina áhuduraguni le adügǘbei binaafin le adügübei lun labuidurun nasandiragun nungua. Adügati katei le lúntima nayarafadun lun Heowá luma tun lóundarun. Sansi laali JW Broadcasting nibagari sunsuinagubei”. Wasagaruña san buiti lídangiñe idewesei le líchugubei Heowá woun? Amu burí luéi programa le áfuridubei sagü hati, gayaraati warihin furumiñeguarügü dan saragu bidéu, ítara kei waganbahan programa le aganbahóuarügüti luma uremu le ruti gurasu.

16, 17. Ka uagu mosu lubéi wóunigiruni dan le wásügürübei lidan isebáhari, ani ida luba wadügüni?

¹⁶ Mámarügüñein ka lan luwuyeri isebáhari lunbei wanúadiruni buidu. Mosu giñe wóunigiruni dan le wásügürübei lidan, ladüga, anhein madügün wamá, gayaraabei wásügürün saragu dan lidan isebáhari sügǘ luéi weseriwidun lun Heowá. Hénrenguti houn saragu hárügüdagun houngua luéi isebáhari. Kei  hénpulu, abahüdahatu aban íbiri 18 irumu tau gíritu Abigail: “Lárigiñe násügürün aban weyu bereseguñu, buiti nasandiragun nungua nañuurun aríagua bigibigitu. Ánhana móunigi, gayaraabei násügürün saragu oura aríagua bigibigitu”. Ariñagati aban nibureinti gíriti Samueli: “Anihein dan násügürün aríagua bidéu chátiti lidan Internet. Gumesetina aríagua aban ani, dan le níchugun fe, sügǘ haali ǘrüwa o gádürü oura nau aríagua”.

¹⁷ Ida luba wóunigiruni dan le wásügürübei lidan isebáhari? Le lunbei wadügüni furumiñe, wasubudiruni átiriñein lan dan wásügürün lidan. Lun lira, gayaraabei wabürüdüni tidan aban kalendáriu oura burí le wásügürübei lidan Internet, aríagua bigibigitu o áhurera lidan gágamuru. Anhein wásügürüña lubéi saragu dan lidan burí katei le, áfaagua wamá lun wadügün aban lísüta luagu kábatima lan oura wetenira lun katei le. Bürǘ huméi katei le súdinitimabei tidan, lárigiñe bürǘ waméi kaba lan dan wetenira lun isebáhari. Lárigiñe amuriaha wamá luma Heowá lun líderaguniwa agunfulira lau le wabürüdübei. Ítara luba gadaani wamá ani gaguraasun báadiwa lun waturiahanu Bíbülia wábugua, wáhuduragun Keisi iduheñu, wadamuridagun luma lun wapurichihan ani adüga wagíame disipulugu. Gama lumoun, masandiragunbadiwa woungua wuriba lau wásügürün murusun dan lidan isebáhari.

18, 19. Ida luba warufuduni lúnrügüñein lan Heowá wáhuduragua?

¹⁸ Lárigiñe labürühan apostolu Féduru luagu lagumuchagüle ubóu le lábugiñebei lubafu Satanási luma luagu iseri ubóu le anitebei, aba lariñagun: “Ligía lubeiti, niduheñu hínsiñetiña nun, sun aünha lan agurabahei burí katei le, houcha humá lun ladarirunün Bungiu lidan darangilaü ligibugiñe, harumañu, madurunga” (2 Fe. 3:14). Dan le wafalaruni adundehani le ani adüga waméi sun wayaraati lun haruma lan wabagari luma lidan wamadagua luma Heowá, warufuduña lúnrügüñein lan Heowá wáhuduragua.

¹⁹ Lasigiruba Satanási luma ubóu le lábugiñebei lubafu óuchaguawa lun wasansiruni le hime wabéi (Luk. 4:13). Gama lumoun, meberesenga ka lan turobuli úmabei wagagibudagua, mígira wamá lun lagidaruni ni aban lilugaarun Heowá tídangiñe wanigi. Aransetiwa lun wíchuguni le yuubei lun Heowá: lun lúnrügü lan wáhuduragua.