ARÜTÍKULU LÁNINA ATURIAHANI 41
Úaragua wamá lídanme “saragu asufuriruni”
“Hínsiñela [Heowá] houn sun ha gúnfulibaña luma, góunigi lumutiña ha furangubaña” (SAL. 31:23).
UREMU sjj 129 Seriwi wamá lau awanduni
LE LUNBEI WATURIAHANI *
1, 2. a) Kaba awisahani híchiga néchanigu yarafa madise? b) Ka álügüdahani lunbei wóunabuni?
SAMINA wamá sun liña lan hariñagun néchanigu “lídanñein darangilaü luma achoururuni sun katei”. Másiñati hapantahan úagili lan saragu darangilaü ubouagu keime lidan dan ligía. Ani busenbaña hafiñeragüdüniña gürigia anihein lan sun katei lábugiñe habafu. Le linarün katei, mabafubaña luagu le lunbei lasuseredun. Ka uagu? Ladüga ariñagatu Bíbülia “ligíame liabin günringuaü hawagun sódini [...]; siñabeiti hesefurun” (1 Tesa. 5:3).
2 Ladüga katei le, anihein fiu álügüdahani súdiniti lun lounabún: Kaba asusereda lídanme “saragu asufuriruni”? Kaba lagurabahan Heowá lun wadügüni? Ida luba waranserun guentó lun úaragua wamá lídanme “saragu asufuriruni” (Mat. 24:21).
KABA ASUSEREDA LIDAN “SARAGU ASUFURIRUNI”
3. Según Arufudúni 17:5, 15-18, ida luba lagünrinchagunu Bungiu “Babilónia to Wéiriboun”?
3 (Aliiha huméi Arufudúni 17:5, 15-18). Tagünrinchawaguba “Babilónia to Wéiriboun”. Kei le aubei wariñagei, mabafubaña néchanigu luagu le lunbei lasuseredun. Ka uagu? Ladüga líchugubei lan “Bungiu tidoun hanigi lun hadügüni le labusenrubei”. Ka katei? Lun hagumuchun tau sun relihión to mámaboun inarünitu íbini to ariñaguboun tuougua kristiánu tan ani mama kristiánu ladüga marufudahan tan houn gürigia lun háhuduragun lun Heowá según lugumadin. Ládarubei Bungiu saminaü le tidoun lanigi “diisi ganchu” le luágubei “mónsturu funati”. Diisi ganchu ligía, mini lan, sun urúeigu polítiku ha íchugubalin hídehan lun “mónsturu” mini lan le, tun “Óundaruni hani Néchani” (Aruf. 17:3, 11-13; 18:8). Lagumeseruba “saragu asufuriruni” danme hábürühan urúeigu ha tuagu relihión mama inarünitu. Ábanbei sügǘ hanarimeti ani hanufunati lídanme sun ubóu.
4. a) Kaba san lébuna gayara lan hálugun néchanigu hábürühan tuagu relihión mama inarünitu? b) Ka katei gayaraabei hadügübei lan binadu tílana relihión burí to?
4 Ibidiñeti woun kaba lan lébuna hábürühan néchanigu tuagu Babilónia to Wéiriboun. Másiñati hariñagun teberesehaña lan relihión houn lun ñein lan darangilaü luma tádaraguña lan tungua saragu lidoun polítika. O másiñati hariñagun gíbeeli lan tirisin luma tufulasun (Aruf. 18:3, 7). Luagu le aban oubaü, moun lumuti wasaminarun háfarawaguba lan sun tílana relihión. Genegeti, tauba lan óundaruni to tani relihión hagumucha néchanigu. Danme le gumuguagüda hamaaru, ábame híchugun binadu tílana fe luagu charaaña lan alidihatiña relihión houn ani chóuruti háluguba lan lun hadisedun tuéi.
5. Ka füramasei ladügübei Heowá luáguti saragu asufuriruni, ani ka uagu?
5 Mariñagun tumuti Bíbülia átiribei lan dan lidura tagünrinchawagun Babilónia to Wéiriboun, le wasubudirubei murusunrügüba lan dan lidura (Aruf. 18:10, 21). Füramaseti Heowá ‘ladüraagubei’ lan asufuriruni lun gayaraabei lan hesefurun kristiánugu ‘anuadirúaaña’ tuma giñe relihión inarünitu (Mar. 13:19, 20). Ani guentó, ka lagurabahabei Heowá lun wadügüni lidan lagumeserun “saragu asufuriruni” luma wuribu Arümahedón?
SIGÍ WAMÁ ESERIWIDA LUN HEOWÁ
6. Ka lagurabubei Heowá lun hadügüni lubúeingu?
6 Kei wakutihani lidan arütíkulu le lubaragiñebei le, busenti Heowá lun wígiruni sun katei le gánibei tuma Babilónia to Wéiriboun. Mégeiwati wadügün ámuya katei. Lunti aranseñu wamá lun wasigirun eseriwida lun Bungiu. Ariha wamá bián katei le lunbei wadügüni.
Mígira waméi wadamuridagun, ni lidan dan hénrenguti. (Ariha huméi párafu 7). *
7. a) Ida luba warufuduni luagu gaganbadi wamá lun lugumadin Heowá luáguti laruma ibagari? b) Según Ebüréu 10:24, 25, ka uagu súdini lubéi lun wadamuridagun guentotima?
7 Furumiñe, mosu gaganbadi wamá buidu buidu lun lugumadin Heowá le richabei. Siñati wánharun lun igaburi luma gumadi le lani ubóu luáguti ida luba lan wanügüni wabagari. Kéiburi, máhatiwa lun ni aban luwuyeri magíaguni, kei burí lamarieidun wügüri luma wügüri líledi o würi tuma würi tíledi luma ámuya igaburi le hadügübei gürigia burí ha, le mabuidunbei (Mat. 19:4, 5; Rom. 1:26, 27). Libiaman, Lunti giñe wasigirun áhuduragua lun Bungiu hama wíbirigu. Adüga wamuti le ñein lubéi gayara lan wadügüni, dandu tidan Luba Wadamuridagun kei tidan haban íbirigu íbini aramudaguarügü. Meberesenga kaba lan asusereda, siñati wígiruni wadamuridagun ni weseriwidun lun Bungiu. Mosu wadügüni “guentotima lau ariha wamani luagu yarafaali lan luéyuri Wabureme” (aliiha huméi Ebüréu 10:24, 25).
8. Kaba asansira lidan uganu le wapurichihabei?
8 Másiñati lasansiruba lan ligaburi wariñaguni uganu lídanme “saragu asufuriruni”. Guentó wapurichihañein uganu buiti luáguti Larúeihan Bungiu ani álugatiwa lun wadügün disipulugu. Gama lumoun danme le lachülürün weyu ligía másiñati hǘrübei lan léiguadun uganu le lunbei wíchuguni, agoubagüagüda tumuti Bíbülia luma óunwenbu burí lúbara huya dereguati (Aruf. 16:21). Háfuga wawisahan lagünrinchawagúa lan ubóu le lábugiñebei lubafu Satanási. Lau lásügürün dan, wasubudirubei buidu ka lan uganu ligía ani ida luba lan wíchuguni. Wayusurubei funa san ligiaméme ligaburi wapurichiha le wayusurubei lóugiñe san irumu guentó, o wasansirubei? Mosu wagurabahan lun wasubudiruni. Meberesenga ida luba lan, genegeti gachansin báadiwa lan wapurichihani uganu lánina lasiadihan Heowá lau ganigi (Ese. 2:3-5).
9. Ida luba san hóunabun néchanigu danme le haganbuni uganu le wíchugubei, ani kaba wachourura?
9 Chóuruti ladügüba lan uganu le lunbei wapurichihani lun hálugun néchani hámanichagüdüniwa sunsuinagubei. Mósume wafiñerun luagu líderagubadiwa lan Heowá lídanme wíchuguni uganu le, ítara kei líderaguniwa lidan wapurichihan. Chouru waméi, líchuguba lan Wabungiute erei woun lun wadügüni lugundan (Mik. 3:8).
ARANSE WAMÁ LUBÁ LÁBURUHOUN HAWAGUN LUMUTUNIÑA HEOWÁ
10. Kei lariñawagún lidan Luk. 21:25-28, ida luba hóunabun hiibe-agei gürigia danme le arihini le lunbei lasuseredun lidan saragu asufuriruni?
10 (Aliiha huméi Lúkasi 21:25-28). Lídanme saragu asufuriruni, halouchuba gürigia danme le harihini lagumeserun sun le uágubei híchigei hemenigi acharaha. Hawinwanduba gürigia lidan “idiheri” ani hanufudedaguba danme le harihini hawinwanduña lan lidan aban dan lánina lanarimenouga (Sof. 1:14, 15). Ani chóurubei, güreweibei lan ibagari, íbini houn lubúeingu Bungiu. Háfuga wasufuriruba lan lénrengunga ladüga mama wamá ubouaguna. Másiñati úabei lan fiu katei le wemegeirubei wama lun wawinwandun.
11. a) Ka uagu wawagunba lubéi lágura ubóu agu? b) Ka uagu moun lubéi lun wanufudedun luéi saragu asufuriruni?
11 Lachülürüba aban dan lun hagañidun ha arihibalin tagünrinchagun hani relihión danme le harihiniwa wagía gefentiña luagu Heowá awanhagua lan tidan wani relihión. Chóuruti ladügüba lan katei le lun hiñuragun wawagun lidan saragu fulasu, íbini lidan Internet. Iyereegubadiwa lun Satanási hau sun néchanigu ladüga anuhagua lanme wani relihión. Mibihin lubéi le labuserunbei lun lagumuchun tau wani relihión ligibuagugiñe Ubóu le. Ligíati, wawagun halime hágura agu. Lídanme dan ligía ábame hárügüdünu néchanigu ligaradan Gogu le Magoguna. * Ábame hóundaragun lun hawügürihóun lau furundei, hama lumutuniña Heowá (Ese. 38:2, 14-16). Kei le ibidiñe lubéi sun katei woun, másiñati wadiheriduba lan luagu sun le gayaraabei lasuseredun. Gama lumoun, anihein aban katei le chóuruti: moun lumuti wanufudedun luéi saragu asufuriruni, lariñagubei Heowá woun kaba lan wadüga lun gayara lan wásügürün lau ibagari (Sal. 34:19). Wiñurubei wachügü ladüga “madiseelime luéyuri [w]asalbarun”. *
12. Ida liña laransehaniwa “musu úaraguati ani gunfuranda ligía” lubá le lunbei lasuseredun ámuñegü?
12 Laransehañadiwa “musu úaraguati ani gunfuranda ligía” lun úaragua wamá lídanme saragu asufuriruni (Mat. 24:45). Aranseha láadiwa lidan saragu igaburi, samina wamá luagu fiu lídangiñe: aranseha láadiwa lidan burí adamurini le wéiriti le adügǘbei lidan irumu 2016 darí 2018. Íderagua láadiwa adamurini le lun wederebudagüdüni igaburi le wemegeirubei lídanme ayarafadeina lan luéyuri Heowá. Akutiha wamá murusunraü lídangiñe.
SIGÍ WAMÁ ARUFUDA ÚARAGUNI, AWANDUNI LUMA GANIGI
Aranse wamá lun wásügürün lau ibagari lídangiñe “saragu asufuriruni”. (Ariha huméi párafu 13 darí 16). *
13. Ida luba wederebudagüdüni úaragua wamá lun Heowá, ani ka uagu mosu lubéi wadügüni guentó?
13 Úaraguni. Adamurini le adügǘbei lidan irumu 2016 le gíribei “Úaragua wamá lun Heowá”. Arufudahati woun úaraguabadiwa lan anhein derebugu wamadagua luma Heowá. Haritaguagüda lumutiwa yarafagüda lániwa wafurieidun tídangiñe sun wanigi lun Heowá luma lun waturiahanu Lererun lau ubebeni. Líchuguba katei le erei woun lun wawanduni turobuli le wéinamuti. Eibu ayarafadeina lan lagumuchagüle ubóu le lábugiñebei lubafu Satanási, lóuchawaguba sügǘ luéi amu dan úaragua wamá lun Bungiu luma lun Larúeihan. Másiñati hadügüba lan gürigia bula wau (2 Fe. 3:3, 4). Létima lébunabei wawandun ladüga úaragua wamá. Mosu wederebudagüdüni úaraguni le wawagubei guentó lun gayara lan úaragua wamá lídanme saragu asufuriruni.
14. a) Kaba asansiruni heresibira íbirigu ha arihibaña lau apurichihani Ubouagu? b) Ka uagu mosu lubeime úaragua wamá?
14 Lídanme óunwenbu asufuriruni, ladügǘba aban lanarime asansiruni hau íbirigu ha adundehabalin apurichihani lidan sun Ubóu. Lachülürüba dan lunme houdin sun kristiánugu anuadirúaaña ha yáabaña Ubouagu sielun lun lidan hamá wuribu lidan Arümahedón (Mat. 24:31; Aruf. 2:26, 27). Mini lan le, úaali lanme Musu Úaraguati wama. Íbini úaali lanme, ñeinbei aransehani buiti hadan saragu gürigia. Íbirigu ha aranserúwaaña ha hádangiñebaña amu mudún hagíaba adundehei wadagimanu. Mósume warufuduni úaragua wamá lau wíderaguniña íbirigu ha luma lau gaganbadi wamá lun adundehani le lunbei híchuguni woun lúmagiñe Bungiu. Segunme gaganbadi wamá ítara luba lidin woun buidu.
15. Ka lunbei wadügüni lun wasigirun awanda, ani ka uagu súdini lubéi lun wadügüni guentó?
15 Awanduni. Le líribei adamurini le adügǘbei lidan irumu 2017, “Mabuchadalá huagu!”. Íderagua lumutiwa lun wederebudagüdüni awanduni le wawagubei lídanme wagagibudagun luma lénrengunga. Furendei wamuti igaburi le mama ladüga buidu lan lidin woun, ladüga wafiñerun luagu Heowá (Rom. 12:12). Maweiyasun wamá abulieidei le füramase lubéi Hesusu: “le áfaaguti darí lumoun lagumuhóun, ligíaba asalbara” (Mat. 24:13). Arufudati dimurei le woun lunti lan úaragua wamá meberesenga ka lan turobuli úmabei wagagibudagua. Lau wawandun guentó, ladügüba lun héretima wamá lubá liabin saragu asufuriruni.
16. Ka adügübei lun ganigi wamá, ani ida luba wederebudagüdüni ganigi le wawagubei guentó?
16 Ganigi. Le líribei adamurini le adügǘbei lidan irumu 2018, “Ganigi humá!”. Haritaguagüda lumutiwa ganigi lan le inarüniti mama ladüga iyarani le wawagubei, ladüga wafiñerun luagu Heowá, ítara kei awanduni. Ka lunbei wadügüni lúntima wafiñerun luagu Heowá? Waliihanu Bíbülia sagü weyu luma lun wararamagun asaminara hulili luagu lesefuruniña Heowá lubúeingu lidan dan le sügühalibei (Sal. 68:20; 2 Fe. 2:9). Danme le hábürühan néchanigu wawagun lidan saragu asufuriruni, mósume ganigi wamá luma lun wafiñerun luagu Heowá sügǘ luéi amu dan (Sal. 112:7, 8; Ebü. 13:6). Ánhawa íchigei wafiñen luagu Heowá guentó, wárügüdüba ganigi danme le lábürühan Gogu wawagun. *
AYUMAHATIWA WARIHINI WESEFURÚNIWA
Yarafa madise, lagünrinchaguniña Hesusu hama lisudaranigu ha siélubaña láganigu Bungiu lidan Arümahedón (Ariha huméi arütíkulu lánina aturiahani 41, párafu 17).
17. Ka uagu moun lumuti lubéi wanufudedun luéi Arümahedón? (Ariha huméi dibuhu le luágunbei tidáü garüdia).
17 Kei lariñaguni arütíkulu le lubaragiñebei le, hiibe-agei wádangiñe winwan wamaali sun wabagari lidan lagumuhóun dan le. Agurabatiwa giñe wásügürün lau ibagari lídangiñe saragu asufuriruni. Wuribu lidan Arümahedón ligíaba agumucha lau ubóu le. Gama lumoun, moun lumuti wanufudedun, ladüga wuribu le, luwuribun Bungiu (Ari. 1:33; Ese. 38:18-20; Sak. 14:3). Danme le lariñagun Heowá gayaraahali lan lawuribuhóun, Hesusuba anügei ubaraü lidan wuribu le. Añaheinbaña kritiánugu anuadirúaaña luma ha águyugubaña sielu, añaheinbaña giñe saragu milu ánheligu luma. Sun hagía hawuribuhaba luma Satanási, hama máfianu luma hama lisudaranigu Satanási ha ubouagubaña (Dan. 12:1; Aruf. 6:2; 17:14).
18. a) Ka ichouruni líchubei Heowá woun? b) Ida liña líderaguniwa Arufudúni 7:9, 13-17 lun wafiñerun luagu ámuñegü?
18 Ru laali Heowá ichouruni le woun: “úagili ni aban adügütu áruma to lunboun tagünrinchagunibu” (Isa. 54:17). Hásügürüba “saragu gürigia” lau ibagari lídangiñe “óunwenbu asufuriruni” ani hasigiruba áhuduragua lun Bungiu (aliiha huméi Arufudúni 7:9, 13-17). Ma inarüni ru tan Bíbülia saragu resun woun lun wafiñerun luagu wesefuruba lan ámuñegü? Subudi wamuti luagu góunigi lumutiña lan Heowá ha “gúnfulibaña” (Sal. 31:23). Sun wagía ha hínsiñehabubaña lun Heowá gúndaabadiwa saragu danme le larumadahani Heowá liri (Ese. 38:23).
19. Ka lubuidun emenigini lunbei lagunfulirun yarafa madise?
19 Samina wamá kaba lan hamuga lariñaga 2 Timotéu 3:2-5 hawagu gürigia ha lúnbaña hawinwandun lidan iseri ubóu, sin lubafu Satanási le mafia (ariha huméi rekuáduru “Ida luba hagaburi gürigia ámuñegü”). Ariñagati íbiri George Gangas, * le meha aban hádangiñebei lílana Murusun Úaraguati: “Mame lubuidun ubóu danme le íbirigu haaña sun gürigia! Yarafa madise gachansinbaña lun hawinwandun lidan aban iseri ubóu. Hawinwanduba saragu dan kei Heowá. Hawinwanduba lun súnwandan”. Ma buiti emenigini le?
UREMU sjj 123 Falá waméi tadundehan lóundarun Heowá
^ par. 5 Subudi wamuti, yarafa madise lan, hagagibudaguba lan sun gürigia luma “saragu asufuriruni”. Kaba asusereda woun wagía lubúeingu Bungiu? Ka lagurabubei Heowá lun wadügüni? Ka igaburi lunbei wederebudagüdüni guentó lun úaragua wamá? Wadarirubei óunabagülei lidan arütíkulu le.
^ par. 11 ARIÑAHANI SÚDINITI: Dimurei Gogu le Magoguna lidan dimurei le chátiti, Gogu, mini lan saragu néchanigu ha lúnbaña hábürühan hawagun lubúeingu Heowá lidan óunwenbu asufuriruni.
^ par. 11 ABÜRÜDǗNI: Rúwati lanwoun ariñahani lidan kapítulu 21 tidan líburu El Reino de Dios ya está gobernando luagu le lunbei ladügün lun lagumeserun wuribu Arümahedón. Rúwati giñe amu ariñahani tidan Garüdia Awisahatu to lánina 15 lidan sedü-hati, 2015, páhina 9 darí 15, luma lidan kapítulu 17 luma 18 tidan líburu Pure Worship of Jehovah—Restored At Last!, luagu Gogu le Magoguna luma giñe ida luba lan lageindagun Heowá haweigiñe lumutuniña lidan Arümahedón.
^ par. 16 Chóurugüda lumuti adamurini wéiriti woun, le lánina irumu 2019 le gíribei “Magumuchagunbei ínsiñeni”, luagu lóunigirubadiwa lan Heowá súnwandan lau ínsiñehabuni (1 Ko. 13:8).
^ par. 19 Ariha huméi arütíkulu “Sus obras lo siguen”, tidan garüdia La Atalaya to lánina 1 lidan duusu-hati, 1994.
