1. Ka katei buídutimabei gayaraabei wanúadirun?

ANIHEIN dan gani lan le hanúadirubei agübürigu hawagu hasaanigu luagu saragu dan. Anhein wuriba lubéi le hanúadirubei agübürigu lanügüba wuribani houn hasaanigu. Gama lumoun, anhein buidu lubéi le hanúadirubei gúndaabaña hasaanigu. Inarüni, mosu lan giñe buidu lan le hanúadirubei isaanigu. Katei le buídutimabei lun wanúadiruni lun weseriwidun lun Heowá Wáguchi hínsiñehabuti le siélubei (Sal. 73:28).

2. Según le tariñagubei Bíbülia ka buiti lanúadirubei Hosé, María luma Hesusu?

² Busentiña meha lagübürigu Hesusu lun híderaguniña hasaanigu lun heseriwidun lun Heowá, ani arufuda lumuti meha le hanúadirubei ligía lan meha katei le súdinitimabei houn lidan habagari (Luk. 2:40, 41, 52). Íderagua lumuti meha le lanúadirubei Hesusu lun lagunfulirun lau dasi le lánina lisuuni Heowá (Mat. 4:1-10). Aban meha wügüri buiti Hesusu, úaraguati ani ganigiti, aba meha isaani le aubei gúndaabaña lan hamuga furumiñeguarügü agübürigu ha hínsiñeti Heowá houn.

3. Kaba álügüdahani wóunaba lidan arütíkulu le?

³ Lidan arütíkulu le, wóunabubei álügüdahani burí le: Ka buiti lanúadirubei Heowá lun Hesusu? Ka gayaraabei hafurendeirun agübürigu kristiánugu lúmagiñe le lanúadirubei Hosé tuma María? Ka gayaraabei hafurendeirun nibureintiña kristiánugu lúmagiñe le lanúadirubei Hesusu?

4. Ka katei súdiniti lanúadirubei Heowá lun Lisaani?

⁴ Anúadirati Heowá agübürigu buítiña lun Hesusu (Mat. 1:18-23; Luk. 1:26-38). Dimurei buíduburiti le meha tariñagubei  María tídangiñe sun tanigi le waliihabei tidan Bíbülia arufudati hínsiñe lan Heowá tun saragu tuma Lererun (Luk. 1:46-55). Ani ligaburi meha lóunabun Hosé lun ladundehan Heowá arufuda lumuti hínsiñe lan lun ani busén lan lun lágundaraguagüdüni (Mat. 1:24).

5, 6. Ka sügǘ lígirubei Heowá lun lásügürün lisaani lídangiñe?

⁵ Ariha wamuti manúadirun lan Heowá agübürigu rísitiña lun hagía lan meha lagübürigu Hesusu. Arufuda lumuti adagaragüdüni le ladügübei Hosé tuma María lárigiñe lagüriahóun Hesusu luagu gudeme hamá (Luk. 2:24). Másiñati giñe anihein lan meha aban liraüraü bísinisi lani sarafangei luma Hosé tóubagiñe luba uburugu Nasarétü. Míbeti meha hámati lugundun añahein meha kei burí sedü irahüñü hama (Mat. 13:55, 56).

⁶ Góunigi lumuti meha Heowá lisaani luéi fiu denchaü, gama lumoun ígirati lun lagagibudagun Hesusu luma fiu sügǘ hénrenguti (Mat. 2:13-15). Kei hénpulu añahein meha liduheñu Hesusu mafiñentiña meha luagu. Samina wamá luagu lirun añahein lan meha hádangiñe liduheñu mafiñe hamá luagu ligía lan Mesiasibei (Mar. 3:21; Huan 7:5). Másiñati giñe gagibugua lan luma lounwen Hosé le lúguchi le agüriarubalin. Keiti Hesusu lan íbugañaünbei háfuga mosu lan meha larihin lau liraüraü bísinisi le lígirubei Hosé (Mar. 6:3). Lau lásügürün dan aba lafurendeirun etenira houn lamulenu luma tun lúguchu. Gayaraati nadagimein lan saragu lun lanúriahaniña. Ligíati subudi lumuti ka lan lubuchabei uagu lárigiñe sun weyu awadigimarida.

7. a) Ka álügüdahani gayaraabei líderaguniña maríeitiña ha gasaanigubaña? b) Según Ariñawagúni 2: 1-6, ka lunbei harufudahani agübürigu houn hasaanigu?

⁷ Anhein busén hubéi huguya maríeitiña gasaanigu humá, álügüdagua humá hungua: “Wagía san aban hádangiñe gürigia ǘnabugutiña ha buiti hamadagua luma Bungiu ha lúnbaña hamuga lanúadiruniña Heowá lun hóunigirun aban irahü figigili?” (Sal. 127:3, 4). Luagu le aban oubaü, ánheinti agübürigu haadün lubéi álügüdagua humá hungua: “Arufudahatina san houn nisaanigu súdini lan lawadigimariduniwa?” (Apur. 3:12, 13). “Adüga numuti san sun niyaraati lun nóunigiruniña nisaanigu luéi denchaü luma luéi katei wíyeti le lídanbei ubóu le lábugiñebei lubafu Satanási?” (Ari. 22:3). Inarüni siñá lan  hóunigiruniña agübürigu hasaanigu luéi sun turobuli le lunbei hagagibudagun lidan habagari. Hénrengubei hamuga. Gama lumoun, gayaraati harufudaha houn lau ínsiñehabuni lun gayara lan hagagibudagun luma turobuli. Ida? Lau harufudahan houn lun háluahan adundehani tidan Bíbülia (aliiha huméi Ariñawagúni 2:1-6). Kei hénpulu, anhein lanúadira aban hádangiñe hiduheñu lun lígiruni inarüni arufuda huméi houn hisaanigu tídangiñe Bíbülia ka lan uéigiñe súdini lubéi lun úaragua wamá lun Heowá (Sal. 31:23). Anhein, ounwe aban iduhei, arufuda humá bérusu tídangiñeti Bíbülia houn hisaanigu le gayaraabei líderaguniña agagibudagua luma igarigu luma lun darangilu hamá (2 Ko. 1:3, 4; 2 Tim. 3:16).

8. Ida liña láyeihani Hosé tuma María gumadi le lídanbei 2 Lúrudu 6:6, 7?

⁸ Ladüga lafalaruni Hosé tuma María adundehani le líchugubei Heowá houn agübürigu, aba hagüriaruni Hesusu lun gayara lan lagundaarun Heowá lau (aliiha huméi 2 Lúrudu 6:6, 7). Hínsiñeti meha Heowá houn biángubei hagía ani le meha súdinitimabei houn, híderaguniña hasaanigu lun giñe línsiñedun Heowá houn.

9. Ka katei súdiniti lanúadirubei Hosé tuma María?

⁹ Súnwandan meha láhuduragun Hosé tuma María hau hasaanigu lun Bungiu. Sagü meha luéyuri emeraaguni houdin tidan sinagoga to Nasarétüboun ani sagü irumu houdin Herusaléun lun hefeduhani luéyuri Esefuruni (Luk. 2:41; 4:16). Másiñati yusu hamani meha dan, dan le haweiyasuha Herusaléun lun harufudaha lun Hesusu luma houn lamulenu luagu le meha hásügürübei lumutuniña Heowá lidan dan le sügühalibei. Háfuga dan le lan haweiyasuha bisida hamá fiu fulasu le uágubei tayanuhan Bíbülia. Másiñati giñe dan le lan hagibedagunbei hasaanigu aba lan lagüreweidun lun Hosé tuma María lun hasigirun áhuduragua lun Heowá. Íbini ítara, ru hamuti háhuduragun lun Heowá lidan furumiñeti lúgaaru, ani adügati lira lun buidu lan hamadagu luma Heowá hau sun hasaanigu.

10. Ka gayaraabei hafurendeiruni agübürigu kristiánugu lúmagiñe Hosé tuma María?

¹⁰ Ka gayaraabei hafurendeirun agübürigu kristiánugu lúmagiñe Hosé tuma María? Lóugiñe  sun katei arufuda hamuti meha houn hasaanigu lau le hariñagubei luma lau le hadügübei hínsiñe lan Heowá houn tídangiñe sun hanigi. Híderaguniña agübürigu hasaanigu lun línsiñedun Heowá houn ligía idewesei le súdinitimabei le gayaraabei híchuguni houn. Aban lídangiñe katei le súdinitimabei le gayaraabei harufudahan houn hisaanigu lun haturiahanu Bíbülia, hafurieidun lun Heowá, houdin lidoun adamuridaguni luma hapurichihan (1 Tim. 6:6). Inarüni mosu lan híchuguni le hemegeirubei hisaanigu houn (1 Tim. 5:8). Lau sun lira aritagua huméi le lan lunbei líderaguniña hisaanigu lun hesefurun lídangiñe binadu ubóu le luma lun hebelurun lidoun iseri ubóu, lubuidun hamadagu luma Heowá mama umegeguni le híchugubei houn (Ese. 7:19; 1 Tim. 4:8). *

11. a) Ida luba líderaguniña 1 Timotéu 6:17-19 agübürigu lun hanúadirun buidu? b) Ka gayaraabei hanúadirun agübürigu habu hasaanigu ani kaba buiti lanüga houn? (Ariha huméi rekuáduru “ Kaba hanúadira agübürigu habu hasaanigu?”).

¹¹ Ma wagundan warihiniña agübürigu kritiánugu anúadira buidu lun híderaguniña hasaanigu lun buidu lan hamadagua luma Heowá. Huduguatiña lun Heowá súnwandan meferidirunga adamuridaguni, ni adamurini ni apurichihani. Añahein giñe agübürigu hau hasaanigu ñǘdüntiña apurichiha lidoun burí fulasu le ñein lubéi hemegeirua apurichihatiña. Añahein hádangiñe rúguatiña houngua lun heseriwidun Betelirugu o lun hawadigimaridun lidan tábunawagun muna to ñein lunbei láhudurawagun lun Heowá. Lun hadügüni le, mégeitiña seinsu ani anihein dan hénrenguti houn. Íbini ítara labinirubaña Heowá lau le hadügübei (aliiha huméi 1 Timotéu 6:17-19). Liibe-agei dan, irahüñü ha agüriarubaña hama agübürigu kei burí ha meferidirun hamuti lubuidun igaburi le, le hafurendeirubei dan le ñǘbürigiña ani gúndaatiña lau hagüriaruniña hagübürigu ítara (Ari. 10:22). *

12. Ka lunbei meha ladügüni Hesusu eibu aweirideina lan?

¹² Súnwandan lanúadahan Lúguchi Hesusu le siélubei buidu, ani adüga hamuti meha giñe lagübürigu ha yáabaña ubouagu. Gama lumoun, dan meha le aweirideina lan Hesusu mosu meha lanúadirun ligía lungua kaba lan ladüga (Gal. 6:5). Ítara kei wagía gayaraati meha giñe lanúadirun ladügüni le labusenrun, íbini ítara anúadira lumuti ladügüni lugundan Heowá le lúguchi (Huan 8:29). Uguñe weyu gayaraati hafurendeirun nibureintiña lídangiñe ligaburi Hesusu.

13. Ka katei súdiniti lanúadirubei Hesusu ladügün dan meha le nibureingili?

 ¹³ Dan meha le nibureingili Hesusu anúadirati gaganbadi lan houn lagübürigu. Mebedaagunti meha houn lagübürigu, masaminarungubeiti meha chu lan lau luéi Hosé tuma María. Lubaragiñe lira aba “lasigirun laumeme laganbadi houn” (Luk. 2:51). Chóuruti meha barǘ lani lidasin keisi íbugañaü kei katei sériuti. Lun lanuriahanu lúguchu hau sun lamulenu áfaaguati saragu lun lafurendeiruni luadigimari Hosé le lúguchi le agüriarubalin.

14. Ida liña wasubudiruni aturiaha lanu Hesusu Lererun Bungiu buidu?

¹⁴ Másiñati abahüdaha hamá lagübürigu lun aban lan milaguru lágurahoun luma giñe le hariñagubei ánheligu luagu (Luk. 2:8-19, 25-38). Gama lumoun, úati meha gufuruma lan Hesusu lau lira aturiaha lumutu meha Lererun Bungiu lungua. Ida liña wasubudiruni aban lan meha aturiahati buiti Hesusu? Ladüga lúmagiñe meha nibureingili ‘wéiritu hanigi máisturugu ha herusalénbaña luagu lichú lau luma luagu burí lóunabagüle’ (Luk. 2:46, 47). Chóuruti lúmagiñe lan meha 12 irumu lau Hesusu subudi laali meha Heowá lan Lúguchibei (Luk. 2:42, 43, 49).

15. Ida liña larufuduni Hesusu anúadiraali lan meha lun ladügüni lugundan Heowá?

¹⁵ Dan le gunfuranda lubalin Hesusu ka lan labusenrunbei Heowá lun ladügüni aba lanúadiruni ladügüni lugundan Heowá (Huan 6:38). Subudi lumuti meha iyereegubei lan houn saragu gürigia íbini mabusenrun lan yebe lun ítara lan. Gama lumoun, aba lanúadirun lun gaganbadi lan lun Heowá. Dan meha le labadiseirunbei Hesusu lidan irumu 29, aba líchuguni ladügüni lugundan lúguchi lidan furumiñeti lúgaaru (Ebü. 10:5-7). Súnwandan ligía lan meha súdinitimabei lun íbini dan le aniha lan lidan lagumuhóun lóurate luagu wagabu (Huan 19:30).

16. Ka gayaraabei hafurendeirun isaanigu lúmagiñe Hesusu?

¹⁶ Gaganbadibá houn bagübürigu. Charatiña bagübürigu ítara kei Hosé tuma María. Íbini chará hamá, ru laali Heowá dasi houn lun hóunigirunibu, lun harufudahan bun luma lun hadundehanibu. Mosu baganbuniña dan le hadundehanibu inebe ligíame hagumadin bun buidu láamuga lidin bun (Efe. 6:1-4).

17. Según le lariñagubei Hosué 24:15, ka lunbei hanúadiruni nibureintiña houngua?

 ¹⁷ Anuadirabá kaba lan un beseriwida. Mosu bachoururuni bungua ka lan Heowabei, ka lan lugundanbei luma ida luba lan badügüni lugundan (Rom. 12:2). Ítararügüba banúadiruni katei le súdinitimabei lidan bibagari, beseriwidun lun Heowá (aliiha huméi Hosué 24:15; Apur. 12:1). Ánhabu aliihoun Bíbülia súnwandan, lederebuguduba ínsiñeni luma afiñeni le basandirubei luagu Heowá.

18. Ka katei lunbei hanúadiruni nibureintiña, ani ida luba lidin houn?

¹⁸ Rúguaba bungua lun badügüni lugundan Heowá. Füramaseti ubóu le lábugiñebei lubafu Satanási ánhabu lan ayusurei iyaraani le buágubei lun bubuidun guánarügü gúndaabadibu lan. Le linarün katei ha etenirubaña lun háluahan umegeguni héiguatiña lidoun saragu “asufuriruni” (1 Tim. 6:9, 10). Ánhabu gaganbadi lun ladundehan Heowá ani aba bíchuguni lugundan lidan furumiñeti lúgaaru, buídubei lidin bun ani “Ítara luba lasalirun sun le badügübei bun buidu” (Hos. 1:8).

19. Ka lunbei haritaguni agübürigu?

¹⁹ Agübürigu, adüga huméi sun hiyaraati lun híderaguniña hisaanigu eseriwida lun Heowá. Afiñe humá luagu, ani líderagubadün anúadira buidu (Ari. 3:5, 6). Aritagua huméi le lan hadügübei gani lan saragu hawagu hisaanigu sügǘ luéi le hariñagubei. Ligíati anúadira huméi buidu le gayaraabei líderagunün lun lagundaarun Heowá hau.

20. Kaba abiniruni heresibira nibureintiña ánhaña anúadira heseriwidun lun Heowá?

²⁰ Nibureintiña gayaraabei híderagunün hagübürigu lun buidu lan le lunbei hanúadiruni. Gama lumoun, lun lagundaarun Bungiu hau huguya lunbei hanúadiruni lira. Ligíati, áyeiha huméi le ladügübei Hesusu ani anúadira humá heseriwidun lun Húguchi le siélubei le hínsiñehabubei. Ánhaadün adügei, gúndaabei hibagari (1 Tim. 4:16). Ani buídubei lidin hun lidan hibagari ámuñegü.