ARÜTÍKULU LÁNINA ATURIAHANI 41
Ida luba wíderaguniña aturiahatiña lun habadiseirun (fánreinti 1)
“Furanguti larihíniwa luagu ítara hiña lan keisi aban gárada lúmagiñeti Kristu to wabürühaboun keisi minisi” (2 KO. 3:3 TNM).
UREMU sjj 70 Áluaha wamaña ánhatiña lun uganu
LE LUNBEI WATURIAHANI *
Úati amu katei le agundaaragüdübalin aban damuriguaü kei dan le labadiseirun aban aturiahati Bíbülia le hínsiñebei houn sun lílana damuriguaü (ariha huméi párafu 1).
1. Ida liña líderaguniwa 2 Korintuna 3:1-3, ariha aban lan lubuidun chansi lúmagiñe Heowá wíderaguniña aturiahatiña lun habadiseirun?
IDA liña san wasandiragun woungua dan le warihin habadiseirun aturiahatiña ha lídangiñetiña fulasu le ñein lubéi wapurichiha? Chóuruti gunda wamá (Mat. 28:19). Ani gúndaatimatiwa dan le wagía lan íchugubei aturiahani houn (1 Tesa. 2:19, 20). Ítarahaña disipulugu ha badiseihaña kei aban gárada to ayanuhaboun buidu hawagu ha aturiahabaña luma luagu damuriguaü (aliiha huméi 2 Korintuna 3:1-3).
2. a) Ka álügüdahani súdiniti lunbei wadügüni wóuniwagua, ani ka uagu? b) Ka san mini lubéi aturiahani tídangiñeti Bíbülia? (Ariha huméi abürüdǘni).
2 Gúndaatiwa warihini lidan lan gádürü irumu le sügühalibei ibihatiña yarafa lun 10,000,000 gürigia aturiahani tídangiñeti Bíbülia * lidan sun ubóu. Ani lidan gádürü irumu le, badiseitiña yarafa lun 280,000 gürigia sagü irumu. Kei warihini, añahagua saragu míñunu aturiahatiña ha gayaraagili habadiseirun. Ida luba wíderaguniña? Gaguraasunti Heowá, anihagua íchiga chansi houn gürigia lun hadügagun houngua lánime Hesusu disipulugu. Lagumuchuña dan, ligíati busentiwa wadügüni sun wayaraati lun wíderaguniña awansera lau lóufudagun ani lun habadiseirun (1 Ko. 7:29a; 1 Fe. 4:7).
3. Kaba wakutiha lidan arütíkulu le?
3 Ladüga súdini lan hadügǘn disipulugu guentó, aba ladügün Musu Úaraguati álügüdahani tun burí sukursáli lun lasubudiruniwa ka lan gayaraabei ladügǘn lun híderawagun aturiahatiña Bíbülia lun hawanserun lun habadiseirun. Lidan arütíkulu le luma le lunbei liabin lárigiñe, warihiba ka lan gayaraabei wafurendeirun hámagiñe íbirigu ha subudihabúbaña luáguti lichugún aturiahani tídangiñeti Bíbülia, ha eseriwidubaña keisi prekursorugu, misionerugu hama óunigirutiña sirkuitu (Ari. 11:14; 15:22). * Afuranguagüdati óunabagülei le híchugubei íbirigu ha, ka lan gayaraabei hadügün dandu aturiahatiña kei ha íchugubaña aturiahani, lun hawanserun aturiahatiña. Lidan arütíkulu le, wakutiha seingü katei le lunbei hadügüni aturiahatiña lun hawanserun lun habadiseirun luma ida luba lan híderaguniña ha íchugubaña aturiahani houn.
HATURIAHAN SAGÜ DIMAASU
Álügüda wamaña aturiahatiña Bíbülia anhein gayara lubéi wañuurun lun wayanuha tuagu Bíbülia hama. (Ariha huméi párafu 4 darí 6).
4. Ka lunbei gunfuranda wamani luagu aturiahani tídangiñeti Bíbülia le ichugúbei lidan tubenari haban gürigia?
4 Rútiña saragu íbirigu aturiahani tídangiñeti Bíbülia lidan tubenari haban gürigia. Lau sun buidu lan le lun hasigirun gürigia afurendeira, madurati aturiahani burí le saragu ani másiñati madügǘnwa lan sagü dimaasu. Ani lun hasigirun íbirigu ha íderaguaña aturiahatiña ha afurendeira, amuriaha hamuti linumerun hagagamurun ani wátiña houn o abürühatiña houn luáguti somu katei tídangiñeti Bíbülia lubaragiñe houdin abisidahaña. * Gayaraati lasigirun aturiahani le ítara luagu saragu hati sin hawanserun aturiahatiña. Gama lumoun, mosu gunfuranda wamani mawanserubaña lan aturiahatiña ani mabadiseirubaña anhein madireirun hamá dan lun haturiahanu Lererun Bungiu.
5. Ka larufudahabei Hesusu lidan Lúkasi 14:28-33, le gayaraabei wayusurun lun wíderaguniña ha aturiahabaña wama?
5 Yúsuti meha Hesusu bián hénpulu lun larufudahan ka lan lunbei ladügün aban gürigia lun aban lan lani disipulu. Ayanuhati luagu aban gürigia le meha busenbei ladügün aban wáyelesi luma aban urúei le meha busenbei lidin awuribuha luma amu urúei. Ariñagati le lan busenbei ladügün aban wáyelesi, lunti lan lañuurun “furumiñe asaminara átiribei lan lagastarun lun larihini anhein gabafubei lubéi lun lagumuchuni”, ani anhein busén lubéi aban urúei lun lawuribuha luma amu urúei lunti lan lañuurun furumiñe lun lasaminarun anhein gayaraabei lubéi hagunfulirun lisudaranigu lau le labusenrubei (aliiha huméi Lúkasi 14:28-33). Ítarameme, subudi lumuti meha Hesusu mosu lan meha lasaminarun aban gürigia buidu buidu ka lan lunbei ladügüni lun lafalaruni. Ligíati mosu lubéi wínchahaniña ha aturiahabaña wamá lun haturiaha súnwandan. Ida luba wadügüni le?
6. Ka gayaraabei wáfaagun wadügün lun hawanserun aturiahatiña Bíbülia?
6 Gayaraati wagumeserun lau wáfaagun lun wamigifedagüdüni dan le waturiahabei hama lidan tubenari haban. Kei hénpulu, lubaragiñe wakutiha ábanrügü bérusu hama sagü wabisidahaniña, akutiha wamá lóugiñe aban. Dan le héchuhaña aturiahatiña luagu dan le wásügürübei hama, álügüda wamaña anhein anihein lubéi somu fulasu le ñein lubéi gayara lan wañuurun lun wasigirun ayanuha. Larufudubei hóunabagüle anhein súdini lubéi haturiaha houn. Ani, lau lásügürün dan, gayaraati wálügüdüniña anhein busén habéi haturiahan bián wéiyaasu lidan dimaasu, lun furesetima lan hawanserun. Ariha wamá amu katei le lunbei hadügüni aturiahatiña.
HARANSERUN LUBÁ KADA ATURIAHANI
Aranse wamá buidu lubá wíchugun aturiahani ani arufudaha waméi houn aturiahatiña ida luba lan hadügüni. (Ariha huméi párafu 7 darí 9).
7. Ida luba haranserun íchugutiña aturiahani sagü lubá híchugun aturiahani?
7 Súdiniti lun haranserun íchugutiña aturiahani sagü lubaragiñe híchugun aturiahani. Gayaraati wagumeserun lau waliihani ariñahani le lunbei waturiahani luma burí bérusu tídangiñeti Bíbülia le lídanbei. Samina wamá luagu liri leksióun ligía, lani subtítulu, álügüdahani burí, bérusu le lunbei laliihóuniwa, iyawaü burí luma furumiñeguarügü bidéu le gayaraabei líderaguniwa afuranguagüdei tema houn aturiahatiña. Lárigiñe lira, samina wamá hawagu aturiahatiña luma ida luba lan wafuranguagüdüni ariñahani houn lidan aban igaburi ménrengunti ani furanguti, lun gayara lan gunfuranda hamani buidu luma lun gayara lan hawinwanduni le hafurendeirubei (Neem. 8:8; Ari. 15:28a).
8. Según le lariñagubei Pábulu lidan Kolosana 1:9, 10, ka lunbei wadügüni hawagu aturiahatiña?
8 Dan le waranserun lubá wíchugun aturiahani, furíei wamá lun Heowá hawagu aturiahatiña luma luagu le hemegeirubei aturiahatiña. Amuriaha wamá luma Heowá lun líderaguniwa ayusuroun Bíbülia lidan aban igaburi le adügübei lun wachülürün tidoun hanigi aturiahatiña (aliiha huméi Kolosana 1:9, 10). Samina wamá anhein aniheinbei lubéi somu katei le hénrengubei houn lun gunfuranda hamani o le hénrengubei houn lun hánharun lun. Mabulieida waméi le lan wabusenrubei, lun wíderaguniña lun habadiseirun.
9. Ida luba wíderaguniña aturiahatiña lun haranserun lubá haturiahan?
9 Agurabatiwa dan le lan hagumeserun aturiahatiña aturiahoun Bíbülia súnwandan, gebegibei lan le ladügübei Heowá luma Hesusu houn ani agurabatiwa giñe busén hamá hasigirun aturiaha (Mat. 5:3, 6). Lun hibihin aturiahatiña buiti lídangiñe le haturiahabei mosu hetenirun buidu lun le hafurendeirubei. Ligíati, haritaguagüda wamaña súdini lan lun haranserun luba kada aturiahani, lau haliihani ariñahani samina hagía ida luba lan hawinwanduni le hafurendeirubei. Gayaraati wíderaguniña lau waranserun aban leksióun úara lun harihini ida liña lan ladügǘn. * Arufuda waméi houn ida luba lan hadariruni óunabagülei luma lun hamakürüni dimurei le gayaraabei líderaguniña aritaguei óunabagülei. Lárigiñe lira, amuriaha wamá hama lun háfaagun lun híchuguni hóunabagülei lau hererun guánarügü. Ítara luba wasubudiruni anhein gunfuranda habalin ariñahani buidu. Ariha waméi lǘrüwan katei le lunbei hafurendeiruni aturiahatiña.
HAFURIEIDUN LUN HEOWÁ SAGÜ WEYU
Arufudaha wamá houn aturiahatiña lun hafurieidun lun Heowá. (Ariha huméi párafu 10 luma 11).
10. Ka uagu súdini lunbei lun hafurendeirun aturiahatiña aliihoun Bíbülia ani ka lunbei hadügün lúntima hasagarun buiti lídangiñe haliihanu?
10 Lanwoun aturiahani le hibihibei aturiahatiña sagü dimaasu, buiti giñe lun hadügün fiu katei sagü weyu houngua. Lunti hayanuha luma Heowá luma lun haganbuni. Lun haganbuni Heowá mosu haliihanu Bíbülia sagü weyu (Hos. 1:8; Sal. 1:1-3). Arufudaha wama houn ida luba lan hayusuruni programa lánina taliihoun Bíbülia le lídanbei jw.org ani gayaraati imprimírua tan. * Lúntima hasagarun aturiahatiña buiti lídangiñe haliihanu Bíbülia, ínchaha wamaña lun hararamagun asaminara luagu le hafurendeirubei luagu Heowá lídangiñe haliihanu Bíbülia luma ida luba lan hawinwanduni le hafurendeirubei (Adü. 17:11; Sant. 1:25).
11. Ida luba hafurendeirun aturiahatiña afurieida, ani ka uagu súdini lubéi lun hadügüni súnwandan?
11 Ínchaha wamaña aturiahatiña lun hafurieidun sagü weyu lun Heowá. Furíei wamá tídangiñe sun wanigi dan le wagumeseruni aturiahani luma dan le wagumuchuni ani írida waméi hiri aturiahatiña lidan furíei. Ítara luba hafurendeirun afurieida tídangiñe sun hanigi luma lun hafurieidun lun Heowá lidan liri Hesukrístu (Mat. 6:9; Huan 15:16). Samina wamá luagu hayarafadun aturiahatiña lun Heowá dan le haganbuni lau haliihanu Bíbülia sagü weyu luma dan le hafurieidun lun (Sant. 4:8). Anhein hadüga le sagü weyu gayaraabei hawanserun darí hederegeragun houngua lun Heowá luma lun habadiseirun. Ka amu katei gayaraabei líderaguniña?
GAMADAGUA HAMÁ LUMA HEOWÁ
12. Ida luba wíderaguniña aturiahatiña lun gamadagua hama luma Heowá?
12 Lunti lachülürün le hafurendeirubei aturiahatiña tidoun hanigi luma lidoun hasaminan. Ka uagu? Ladüga wanigi —mini lan le, le wayumahabei, le wasaminarubei luma le wasandirubei— tuguya ínchahabaliwa lun wadügün somu katei. Arufudahati meha Hesusu houn saragu gürigia ani hínsiñeti meha houn hafurendeirun lúmagiñe. Gama lumoun, falá hamuti meha gürigia ladüga chülǘ lan meha le larufudahabei tidoun hanigi (Luk. 24:15, 27, 32). Lunti harihini aturiahatiña Heowá kei aban Bungiu inarüniti le úmabei gayara lan gamadagua hamá, luma giñe harihini kei Habungiute luma Háguchi (Sal. 25:4, 5). Dan le waturiahan íderagua wamaña aturiahatiña lun harihini lubuidun ligaburi Heowá (Afu. 34:5, 6; 1 Fe. 5:6, 7). Meberesenga ka lan uágubei wayanuha, íderagua wamaña lun harihini ka lan luwuyeri Bungiu Heowá. Íderagua wamaña lun gebegi lan línsiñehabu, lareini luma lugudemehabu houn. Ariñagati Hesusu ‘gumadi lan le wéirigutimabei, ligía furumiñeti lídangiñe sun lugumadin Bungiu’ lun ‘hínsiñela Wabureme le Wabungiute woun’ (Mat. 22:37, 38). Áfaagua wamá lun wíderaguniña aturiahatiña lun línsiñedun Heowá houn.
13. Afuranguagüda huméi ida luba lan wíderaguniña aturiahatiña lun hafurendeirun luáguti lubuidun burí ligaburi Heowá?
13 Dan le wayanuha hama aturiahatiña, ariñaga waméi le wasandirubei luagu Heowá houn. Másiñati líderagubaña lan le wariñagubei lun harihini mosu lan giñe gamadagu hama luma Heowá lun línsiñedun houn (Sal. 73:28). Kei hénpulu, anihein san somu katei luáguti línsiñehabu, lichú lau, liricha o lubafu Heowá tidan agumeiraguagüdüni o lidan aban bérusu tídangiñeti Bíbülia le wakutihabei le achülürübei tidoun wanigi? Ariñaga waméi houn aturiahatiña ligía lan aban lídangiñe katei le adügübei lun línsiñedun Wáguchi le siélubei woun. Guentó, ariha waméi liseingün katei le lunbei hadügüni aturiahatiña lun habadiseirun.
HABASIIHA ADAMURIDAGUA
Ínchaha wamaña aturiahatiña Bíbülia lun gumesegiñe hamá abasiha lidoun adamuridaguni. (Ariha huméi párafu 14 luma 15).
14. Según le lariñagunbei Ebüréu 10:24, 25, kaba íderaguaña aturiahatiña lun hawanserun?
14 Sun wagía busentiwa lun habadiseirun ha aturiahabarun Bíbülia wamá. Gayaraati wíderaguniña anhein wínchahaña lun habasiiha lidoun adamuridaguni. Ariñagatiña íbirigu ha subudihabúbaña luáguti lichugún aturiahani tídangiñeti Bíbülia, furesetimati lan hawanserun aturiahatiña ha gumesegiñebaña abasiha lidoun adamuridaguni (Sal. 111:1). Afuranguagüdatiña fiu íbirigu houn ha aturiahabaña hama, hafurendeiruba lan saragu lídangiñe haturiahan úara, gama lumoun lídanba adamuridaguni hafurendeirei liibe-agei katei le lunbei hafurendeiruni. Aliiha waméi Ebüréu 10:24, 25 hama aturiahatiña, ani afuranguagüda waméi buiti le lanügübei wabasihan lidoun adamuridaguni houn (aliiha huméi). Gayaraati giñe warufuduni bidéu Ka adügǘbei lidan wadamuridagun? * houn. Íderagua wamaña aturiahatiña lun háfaagun lun habasiihan lidoun sun adamuridaguni.
15. Ka gayaraabei wadügün lun wínchahaniña aturiahatiña lun habasiiha lidoun sun adamuridaguni?
15 Kaba wadüga anhein magumeserungiña lubéi aturiahatiña abasiha lidoun adamuridaguni o díseguati houdin? Abahüdaha humá houn lau ubebeni, luáguti somu katei le hafurendeirubei lidan adamuridaguni. Másiñati ladügüba lan harihini aturiahatiña ugundani le hasandirubei ha íchugubaña aturiahani houn, lun busén hama hadamuridagun. Ru wamóun Garüdia Awisahatu o ubanaü Habagari Kristiánugu luma Heseriwidun to lunboun taturiahóun dimaasu ligía houn. Arufuda waméi houn, kaba lan akutihóua lidan leweñegua adamuridaguni ani álügüda wamaña ka lan fánreinti hínsiñetimabei houn. Buídutimabei le lunbei haganbuni luma le lunbei harihini lidan furumiñeti hadamuridagun wama luéi furumiñeguarügü katei le haganbubei o le harihinbei lidan amu adamuridaguni lánina relihión (1 Ko. 14:24, 25). Hasubudiruba aturiahatiña amu íbirigu ha gayaraabei háyeihaniña ani gayaraabei giñe híderaguniña lun hawanserun darí habadiseirun.
16. a) Ka lunbei wadügüni lun wíderaguniña aturiahatiña lun habadiseirun? b) Kaba wafurendeira lidan leweñegua arütíkulu?
16 Ida luba wíderaguniña aturiahatiña lun habadiseirun? Gayaraati wíderaguniña lun harihini súdini lan lun haturiahan sagü dimaasu luma lun haranserun luba kada aturiahani. Arufudaha wamá houn lun hayanuha luma Heowá sagü weyu luma lun gamadagua hama luma. Ani ínchaha wamaña lun habasiiha lidoun sun adamuridaguni. (Ariha huméi rekuáduru le lídanbei “ Le lunbei hadügüni aturiahatiña Bíbülia”). Lafuranguagüdüba leweñegua arütíkulu seingü katei le lunbei hadügüni íchugutiña aturiahani lun habadiseirun aturiahatiña.
UREMU sjj 76 Ida liña basandiragun bungua?
^ par. 5 Dan le warufudahan lun aban gürigia, mini lan wíderaguni asaminara, o wíderaguni óusera lidan amu igaburi. Haritaguagüda lumutiwa Matéu 28:19, bérusu lánina irumu 2020, súdini lan taturiahóun Bíbülia hama gürigia luma lun warufudahani houn le lunbei hadügüni lun habadiseirun lun lani hamá Hesusu disipulugu. Lidan arütíkulu le, luma le lunbei liabin lárigiñe, warihuba ida luba lan wabuiduragüdüni ligaburi wadügüni dasi le.
^ par. 2 ARIÑAHANI SÚDINITI: Mini lan aturiahani tídangiñeti Bíbülia, dan le wayanuhan hama gürigia luagu le tídanbei Bíbülia lau wayusurun agumeiraguagüdüni o ariñahani tídangiñe súnwandan. Gayaraati wabahüdüni aturiahani keisi aban aturiahani tídangiñeti Bíbülia, lárigiñe arufuda wamaali houn aturiahatiña ida liña lan laturiahoun ani aturiahaaña bián wéiyaasu ani afiñetiwa busén hamá hasigirun afurendeira.
^ par. 3 Lidan bián arütíkulu le, anihein adundehani lídangiñeti arütíkulu gabügürüguati, le áfuachubei tidan Nuestro Ministerio del Reino Sagü hati, lúmagiñe sedü-hati, widü-hati, unsu-hati luma duusu-hati lidan irumu 2004 darí eneru, bián-hati, ǘrüwa-hati, sisi-hati luma seingü-hati lidan irumu 2005, fuati aban fánreinti lídangiñeti arütíkulu gabügürüguati le gíribei,“Dirijamos estudios bíblicos progresivos”.
^ par. 4 Lunti hagunfulirun íbirigu luma lilurudun ageiraü luáguti ichouruni, lidan sun le hadügübei lidan hani ministeriu.
^ par. 9 Ariha huméi bidéu le gádürüti minutu lidura, le gíribei Arufuda waméi houn aturiahatiña ida luba lan haranserun. Lidan JW Library®, belú humá lidoun MULTIMEDIA > NUESTRAS REUNIONES Y MINISTERIO > MEJORE SUS HABILIDADES EN EL MINISTERIO.
^ par. 10 Belú humá lidoun AGUMEIRAGUAGÜDÜNI > LÍBURU BURÍ & GARÜDIA.
^ par. 14 Lidan JW Library®, belú humá lidoun MULTIMEDIA > NUESTRAS REUNIONES Y MINISTERIO > AYUDAS PARA LA PREDICACIÓN.
