1. Ka lasandirubei Heowá hawagu lubúeingu?

 TÉNITI Heowá lun sun le ásügürübei woun. Subudi lumuti Heowá dan le gunda wamá luma dan le hiru wamá (Sal. 37:18). Dan le wáfaagun lun weseriwidun lun íbini dan le gagarigu wamá, gúndaati wau. Ani mámarügüñein lira ladüga; busenti giñe líderaguniwa luma lun líchugun gurasu woun.

2. Ka ladügübei Heowá hawagu ha asandirubaña igarigu tidan hanigi, ani ka lunbei wadügüni lun wasagarun saragu buiti lídangiñe ligaburi lóunigiruniwa?

² Dan le layanuhóun hawagu gürigia ha asandirubaña igarigu tidan hanigi, ariñagati Sálumu 147:3 güragua lani Heowá “biti le hawagubei”. Arufuda lumuti bérusu le ida liña lan lóunigiruniña Heowá lau ínsiñeni ha asufurirubaña somu igarigu. Ka lunbei wadügüni lun wasagarun saragu buiti lídangiñe ámuñegueinarügü igaburi le ídanbei lóunigirawa Heowá? Ru wamá aban hénpulu. Gayaraati lídehan aban surusia buiti lun lareidagun aban gürigia le gawaguti somu biti. Lau sun lira, lun lareidagun, mosu lasigiruni adundehani le líchugubei surusia ligía lun buidu buidu. Lidan aturiahani le, warihubei ka lan lariñagubei Heowá tidan Lererun houn ha asufurirubaña igarigu tidan hanigi luma ida luba lan hafalaruni adundehani le líchugubei lau saragu ínsiñeni.

CHÓURUGÜDA LUMUTI HEOWÁ WOUN GEBEGI WAMÁ SARAGU LUN

3. Ka uagu añahein lubéi gürigia sanditiña mebegi hamá?

³ Híruti wawinwanduña lan lidan aban ubóu le ñein lubéi ua lan ínsiñeni. Añahein saragu gürigia wuribati hóuseruniña amu ani adügatiña lun hasandiragun houngua mebegi hamá ni kata. Ariñagatu aban íbiri gíritu Helen a: “Hadan iduheñu ha marufuduntiña ínsiñeni naweirida. Furundeti meha núguchi ani sagü weyu lariñagun woun meseriwín wamá lun ni kata”. Susereeli san aban katei ítarati hun? Másiñati wuriba lan houserún, anabúa huguya,  ani adügǘwa ligía lun hasandirun mebegi humá lun ni kata. Anhein ítara liña lubéi houserún, másiñati hénrengu lan hun hafiñerun anihein lan somu gürigia le beresebei hau.

4. Ka lachoururubei Heowá woun lidan Sálumu 34:18?

⁴ Íbini añahein lan gürigia ha wuribati hóuserunibu, gayaraati bachoururuni hínsiñe ban lun Heowá ani wéiriti bebegi lun. Ariñagatu Bíbülia: “Yarafati Aburemei lun lesefuruniña ha gáribei hasandirunu hanigi” (aliihabéi Sálumu 34:18). Anhein buguya lubéi aban hádangiñe gürigia “ha féridi hamaalibei hemenigin”, haritaguabá ariha lan Heowá katei buiti tidan banigi ani ligía labusenrunbei lun aban ban hádangiñe lubúeingu (Huan 6:44). Súnwandan ñeinbei lan lun líderagunibu ladüga hínsiñe ban lun saragu.

5. Ka wafurendeirubei lídangiñe igaburi le aubei lóuseraña Hesusu gürigia ha mabahüdǘnbaña?

⁵ Íderagua lumutiwa lani Hesusu hénpulu lun gunfuranda wamani le lasandirubei Heowá. Dan ya lubéi Hesusu ubouagun, téniti meha houn gürigia ha mabahüdǘnbaña ani aba larufudun gudemehabu houn (Mat. 9:​9-12). Dan le taguurunbei aban würi sanditu tuagu ladouragun Hesusu lau emenigini lun tareidagun, aba líchugun dǘgüdaguaü tun ani aba lariñagun tun: “Areidaguaadibu ladüga bafiñen” (Mar. 5:​25-34). Arufuda lumuti Hesusu ligaburi Lúguchi (Huan 14:9). Ligíati, gayaraati bachoururuni gebegi ban lun Heowá ani téniti lun igaburi buiti le barufudubei kei burí afiñeni le buágubei luma ínsiñeni le basandirubei luagu.

6. Ka gayaraabei wadügüni ánhawa asandira mebegi wamá lun ni kata?

⁶ Ka gayaraabei badügüni ánhabu asigira asaminara luagu mebegi ban lun ni kata? Gayaraati baliihani bérusu tídangiñeti Bíbülia le achoururagüdübalin bun luagu gebegi ban lun Heowá ani ráramagua buguyame asaminara luagu (Sal. 94:19). b Anhein mibihin bágili lubéi le babusenrubei bibihin lidan beseriwidun lun Heowá  o siñá lan badügüni le hadügübei amu, mábürühan lan barüna ani metenirabá lun le básiñarubei adüga. Gunfuranda lumutiwa Heowá ani magurabunti wadügün lóugiñe le wayaraabei adüga (Sal. 103:​13, 14). Anhein ouserúaadibu lubéi wuriba o súfurihadibu lan somu marichaü, míchigaba duru buougua luagu le hadügübei amu gürigia bun. Mama bidurun. Haritaguabá ha lan adügübaña katei wuribati laguseragüda Heowá, mama ha asufurirubalin wuribani ligía (1 Fe. 3:12). Ariñagatu Sandra, to wuribabei touserún dan meha le ñǘgiru: “Amuriahatina luma Heowá lun líderagunina arihei lubuidun igaburi le larihibei nuagu”.

7. Ida liña gayara lan líderaguniwa le winwan wamaalibei lun weseriwidun lun Heowá?

⁷ Afiñebá gayara lan layusurunibu Heowá lun bíderagun amu. Ru laali lubuidun chansi bun lun bídehan luma lidan apurichihani (1 Ko. 3:9). Másiñati adüga lan sun katei le winwan báalibei lun gunfurandatima bani le hasandirubei amu. Gayaraati badügün saragu katei lun bíderaguniña. Helen, to uáguboun layanuhóua lidan párafu 3, resibitu ídemuei ani guentó aranseru lun gayara lan tíderagun amu. Ariñagatu: “Sanditina meha mebegi nan lun ni kata, lau sun lira, adügaali Heowá lun nasandirun hínsiñewa nan ani yusu lumutina lun líderagun amu”. Seriwitu Helen kei prekursora ani gúndaati tasandiragun tungua.

BUSENTI HEOWÁ LUN WÁNHARUN LUN FERUDUN LE LÍCHUGUBEI

8. Ka lachoururubei Heowá woun lidan Isaíasi 1:18?

⁸ Añahein hádangiñe lubúeingu Heowá wuribamémegili hasandiragun houngua ladüga figóu le meha hadügübei, másiñati lubaragiñe lan o lárigiñe lan habadiseirun. Lau sun lira gabaroun waméi ru laali lan Heowá lebegi esefuruni ladüga óunwenbu ínsiñeni le lasandirubei wawagu. Ligíati gayara lubéi wachoururuni busén lan wánharun lun idewesei le líchugubei woun. Ariñagati Heowá woun: “Higougu, wadimureha libügürü katei le”. c Ani chóurugüda lumuti woun, dan le lan wadügüni katei le, feruduna lubéi lan wafigoun sunsuinagubei (aliihabéi Isaíasi 1:18). Wéiriti weteingiruni Wáguchi le hínsiñehabubei lau labulieiduni katei wuribati le meha wadügübei, lau sun lira mabulieidun lumuti katei buiti le adüga wamaalibei (Sal. 103:​9, 12; Ebü. 6:10).

9. Ka uagu buidu lubéi wetenirun lun le gayaraabei wadügün lúmagiñe guentó lun lubaruaguóun mama luagu le winwan wamaalibei?

⁹ Ka gayaraabei líderagunibu anhein wuriba lubéi basandiragun bungua ladüga charati le meha badügübei? Houchabá betenirun lun le gayaraabei badügüni lúmagiñe guentó lun lubaruaguóun. Saminabá luagu lani apostolu Pábulu hénpulu. Wuribati meha lasandiragun apostolu Pábulu lungua ladüga léibaahaniña kristiánugu lau furundei, lau sun lira subudi lumuti luagu feruduna laali lan meha Heowá (1 Tim. 1:​12-15). Ligíati, meredeti asaminara luagu figóu le meha ladügübei, masaminarunti giñe luagu ubaraü le libihubei dan meha lafalaruni hafiñen huríu (Fili. 3:​4-8, 13-15). Lubaragiñe lira, ábaha lapurichihan lau ubebeni ani aba letenirun lun le gayaraabei ladügüni lúmagiñe dan ligía lun lubaruaguóun. Ítara kei Pábulu, siñati basansiruni le winwan báalibei. Lau sun lira, gayaraati betenirun lun bíchugun uéiriguni lun Heowá según le gádanbalibu lúmati lun basaminarun luagu lubuidun füramasei le líchugubei Heowá woun lubá ámuñegü.

10. Ka gayaraabei wadügüni anhein adügaadiwa lubéi damichi houn amu gürigia?

¹⁰ Másiñati wuriba lan basandiragun bungua luagu katei wuribati le meha badügübei le adügübei damichi houn amu gürigia. Ka gayaraabei badügün? Amuriahabá ferudun tídangiñe sun  banigi ani adügabéi sun biyaraati lun baranseruni damichi le meha badügübei (2 Ko. 7:11). Amuriahabá luma Heowá lun líderaguniña ha asufurirubaña ladüga le badügübei. Líderagubadibu Heowá íderagua láañame ha asufurirubaña lun habaruaguóun hamá luma lun ñein lan darangilaü haganagua.

11. Ka wafurendeirubei lídangiñe lani Honasi hénpulu? (Ariha humóun giñe iyawaü).

¹¹ Furendeibá lídangiñe bichara ani ígiraba lun layusurunibu Heowá kei aubei labusenra. Haritaguabei le ladügübei profeta Honasi. Lubaragiñe lidin Níniwe, kei lariñaguni Heowá lun, aba lanurahan lidoun amu fulasu. Arihagüda lumuti Heowá lichara lun ani furendeiti lídangiñe katei le (Hon. 1:​1-4, 15-17; 2:​7-10). Yúsumeme lumuti Heowá Honasi, ábaya líchugun aban chansi lun lun lidin Níniwe, ani gaganbaditi lun Heowá ani aba lidin. Íbini wuriba lan lasandiragun Honasi lungua luagu le meha ladügübei, mígirunti lun ladügün katei le lun magunfulirun lan lau dasi le líchugubei Heowá lun (Hon. 3:​1-3).

RUTI HEOWÁ GURASU WOUN LAU LANI SÍFIRI SANDU

12. Ida liña líchugun Heowá darangilaü woun dan le wasufurirun aban lamiselu o dan le wásügürün lídangiñe somu sügǘ wéiriti luriban? (Filipuna 4:​6, 7).

¹² Dan le wasufurirun aban lamiselu o wásügürün lídangiñe somu sügǘ le wéiriti luriban, yusu lumuti Heowá lani sífiri sandu lun líchugun gurasu woun. Ligía asuseredubei lun Ron tuma Carol dan le láfaragunbei haráü lungua. Ariñagatiña: “Mama furumiñeti wéiyaasu wagagibudagun luma sügǘ hénrenguti, lau sun lira nihántima wuribatimabei lídangiñe súngubei. Kei le sügǘ wabéi saragu áriebu marumugunga, ábaha wafurieidun lun Heowá, ábati wasandiruni darangilaü le úagubei layanuha Filipuna 4:​6, 7” (aliihabéi). Anhein básügürüña lubéi lídangiñe somu lénrengunga o sandiba igarigu tidan banigi, ariñagabéi lun Heowá ida liña lan basandiragun bungua. Gayaraati bayanuhan luma le oura babusenrun (Sal. 86:3; 88:1). Mabuchadalá buagu amuriaha sífiri sandu luma. Chóurubei laganbubei lan bafurieidun (Luk. 11:​9-13).

13. Ida liña gayara lan líderaguniwa sífiri sandu lun wasigirun eseriwida lun Heowá lau úaraguni? (Éfesuna 3:16).

¹³ Sügühadibu san lídangiñe aban turobuli hénrenguti ani guentó sanditibu luagu méredibu lan? Gayaraati líchuguni sífiri sandu erei le bemegeirubei bun lun basigirun eseriwida lun Heowá lau úaraguni (aliihabéi Éfesuna 3:16). Ariha waméi le tásügürübei aban íbiri gíritu Flora. Misionéra meha tuguya luma tani weiriei, gama lumoun, aba lagabarahanu ani aba hígiragun. Ariñagatu Flora: “Sanditina aban lanarime íruni luagu le ladügübei nun, saminatina luagu katei le wéyuagu áriebu. Ligíati namuriahanbei luma Heowá lun líchugun sífiri sandu nun lun nasigirun nubaruaguóun. Ru lumuti Heowá sun le nemegeirubei nun lun niñuragun lídangiñe le gádanbalina, íbini samina nan yebe siñabei lan niñuragun lídangiñe”. Sanditu Flora íderagua lanu Bungiu lúntima tafiñerun luagu ani chouru tumuti líderaguboun lan meberesenga le ásügürüti. Ariñagatu: “Adügati Heowá lun lagunfulirún le lariñagubei Sálumu 119:32 nuagu, le ariñagubei: ‘Deregeguatina nungua le gumuti lun bugumadin, ladüga rútibu gunfurandaü nun’”.

14. Ka gayaraabei wadügüni lun weresibiruni lani Bungiu sífiri?

¹⁴ Lárigiñe bamuriahan luma Heowá lun líchugun sífiri sandu bun, ka lunbei badügüni? Beresegubá lidan dasi le gayaraabei lígirun lun beresibirun sífiri sandu, kéiburi adamuridaguni luma apurichihani. Aliihabóun Bíbülia sagü weyu, ítara gayaraabei babuinchagüdüni bichügü lau ariñahani lúmagiñeti Heowá (Fili. 4:​8, 9). Sun abunha lan aliihoun, tenibá houn gürigia ha uágubaña tayanuha ha agagibudagubaña luma lénrengunga ani ráramaguaba asaminara ida liña lan líderaguniña Heowá lun hawandun. Sügütu Sandra, to iridúboun lidan párafu 6,  lídangiñe saragu turobuli wéinamuti. Ariñagatu: “Hingí lumutu nanigi abahüdaguni luáguti Hosé. Mígirunti lun lagadeiruni sun le lasufurirubei lumadagua luma Heowá” (Agu. 39:​21-23).

YUSU LUMUTIÑA HEOWÁ WÁBIRIGU LUN LÍCHUGUN GURASU WOUN

15. Kátaña gayaraabei híchugun dǘgüdaguaü woun, ani ida luba hadügüni? (Ariha humóun giñe iyawaü).

¹⁵ Dan le wasufurirun, gayaraati híchugun wábirigu “óunwenbu dǘgüdaguaü” woun (Kol. 4:11). Yusu lumutiña Heowá wábirigu lun larufuduni woun weiri lan wínsiñe lun. Gayaraati híchugun gurasu woun dan le hásügürün dan wama o dan le haganbuniwa ani gunfuranda haméi ida liña lan wasandiragun woungua. Másiñati híchugun dǘgüdaguaü woun lau aban bérusu tídangiñeti Bíbülia o hadügün aban furíei wama (Rom. 15:4). d Másiñati haritaguagüdüniwa íbirigu ida liña lan larihini Heowá katei, ani gayaraati ladügün lira lun darangilu wamá. Gayaraati giñe híderaguniwa íbirigu lau hadügün amu katei, kei burí hanügün éigini woun.

16. Ka lunbei wadügüni lun weresibirun ídemuei hámagiñe amu?

¹⁶ Lun beresibirun ídemuei, mosu bamuriahani. Hínsiñetibu houn íbirigu ani busentiña híderagunibu (Ari. 17:17). Másiñati ibidiñe lan houn ida liña lan basandiragun bungua o ka lan bemegeirubei (Ari. 14:10). Anhein wuriba lubéi basandiragun bungua, aluahabá umadagu ha derebugu tafiñen ha gayaraabei bayanuhan hama. Buiti lun bariñaguni houn ka lan gayaraabei hadügüni  buagu. Gayaraati bayanuhan luma aban o hama bián wéiyaaña lidan afiñeni ha uágubaña bafiñera. Ani añahein fiu íbirigu würiña buítimati hasandiragun houngua lun hayanuhan tuma aban íbiri würi to derebugu tafiñen.

17. Ka katei gayaraabei ladügün lun meresibirun wamá dǘgüdaguaü ani ida luba wagagibudagun luma?

¹⁷ Merederabá bábugua. Anhein hiru bubéi, másiñati mabusenrun ban básügürün dan hama gürigia. Gayaraati úabei lan gunfuranda hamanibu íbirigu o hariñagun somu katei le moun lumuti hariñaguni bun (Sant. 3:2). Mígiraba lun ladügün katei le lun meresibirunbani gurasu le bemegeirubei. Ariñagati aban wéiyaali lidan afiñeni gíriti Gavin, le asufurirubei lanarime íruni: “Liibe-agei dan, mabusenruntina hama nan numadagu”. Lau sun lira, áfaaguati lun hama lan amu gürigia, ani adügati le lun buidu lan lasandiragun lungua. Ariñagatu aban íbiri gíritu Amy: “Ladüga katei le násügürübei, hénrenguti nun nafiñerun hawagu gürigia. Lau sun lira nafurendeiruña lun hínsiñedun níbirigu nun luma lun nafiñerun hawagu, ítara kei ladügüni Heowá. Adügati katei le lun gunda lan ani gúndaagüda lumutina giñe”.

RUTI LE FURAMASEI LUBÉI HEOWÁ LUBÁ ÁMUÑEGÜ DǗGÜDAGUAÜ WOUN

18. Kaba lubuidun ibagari wibiha ámuñegü ani ka lunbei wadügüni guentó?

¹⁸ Ruti ugundani woun wasubudiruni yarafaali lan dan lun lagidaruni Heowá sun le íchugubei igarigu woun gidaléime sun le adügübei lun wasufurirun (Aruf. 21:​3, 4). Lidan iseri ubóu, “úaalime aritaguti luagun” sun le adügübei lun wasufurirun uguñe weyu (Isa. 65:17). Kei le aubei warihei, íbini guentó góunigi lumutiwa Heowá dan le wasufuriruña lan. Lau ínsiñeni rúhali saragu katei le íchuguti awalidaguni luma dǘgüdaguaü woun. Meferidira waméi chansi burí le! Chourubéi weiri lan bínsiñe lun Heowá (1 Fe. 5:7).