1, 2. a) Ka machouruni gayaraabei lebelurun woun? b) Kaba wariha lidan aturiahani le?

 CHÜLÜTI dan lun hasandirun sun gürigia machouruni. a Samina wamá luagun aban nibureinti le machoururunbalin anhein berese lubéi Heowá lau, ábati ladügün machouruni le lun mabadiserun lan. Guentó samina wamá luagun aban íbiri le eseriwidubei lun Heowá lúmagiñe nibureingili lubaragiñe letenirun awadigimarida lun lagañeirun saragu seinsu. Guentoti gasaanigu haali ani sanditi móustarun hali lan liseinsun lun lanúriahaniña tílana luban, háfuga álügüdagua lan lungua anhein buidu lubéi le meha lanúadirubei ladügün. Samina wamá tuagun ábaya íbiri to derebuguharu ani lóuguaali tere, másiñati wuriba lan tasandiragun tungua ladüga siñá lan tadügün saragu lidan teseriwidun lun Heowá kéiñaha tadügüni. Gayaraati adügaadün lan álügüdahani kei burí le húniwagua: “Bereseti san Heowá nau? Gebegiti san áfaaguni le nadügübei lun Heowá lidan neseriwidun lun? Húugidina san lun?”.

² Gayaraati ladügün saminaü mabuidunti le lun ledebilidun wafiñen darí lun lásiñarun weseriwidun lun Heowá. Lidan aturiahani le, warihibei ida luba lan tíderaguniwa Bíbülia anhein samina wabéi meberesen lan Heowá wau, o anhein samina wabéi wuriba lan wadüga dan le márügüdün wabalin chansi lun meha wawadigimaridun lun wagañeirun saragu seinsu o anhein samina wabéi móunihadiwa lan lun Heowá.

 IDA LUBA WAGIDARUNI MACHOURUNI WAWARIUA?

3. Kaba íderaguawa agidarei machouruni wawariua?

³ Anhein sandí wabéi machouruni, tíderagubadiwa Lererun Bungiu agidarei wawariua. Lau tídehan, lederebuguduba wafiñen luagu Heowá ábatimaame labuidurun wamadagua luma, ítara ábame werederun ‘lidan wafiñen’ (1 Ko. 16:13).

4. Ida luba wóuchaguni sun arufudahani ítara kei lariñaguni 1 Tesalónikana 5:21?

⁴ (Aliiha huméi 1 Tesalónikana 5:21). Ariñagatu Bíbülia woun: “Hóuchagua huméi sun arufudahani”. Ida lubati wadügüni? Lau wagoubaguagüdüni le wasaminarubei luma le tariñagubei Bíbülia. Samina humá luagun aban nibureinti le machoururunbalin anhein berese lubéi Heowá lau. Lunti san lerederun lau machouruni ligía? Uá, buídutimati lun lóuchaguni sun katei lau laliihanu Bíbülia lun larihini ka lan lisaminanbei Heowá.

5. Ida luba “waganbuni” óunabagülei le líchugubei Heowá woun?

⁵ Dan le waliihanu Lererun Bungiu ítara liña kamá hamuga layanuhaña Heowá wama. Lun gayara lan “waganbuni” le lunbei lariñaguni luagu somu machouruni le wawagubei, anihein amu katei lunti wadügüni. Mosu waríaahan bérusu tídangiñeti Bíbülia le ayanuhabei luagu le adiheridagüdübaliwa ani mosu giñe wayusurunu sun tulu to tíchuguboun lóundarun Heowá woun lun wakutihan libügürü le adiheridagüdübaliwa (Ari. 2:​3-6). Buídubei lun wafurieidun lun Heowá lun ladundehaniwa lun wadarirun óunabagülei lun katei le adiheridagüdübaliwa. Áluaha wamá adundehani buiti le gayaraabei líderaguniwa lidan le gádanbaliwa. Gayaraati giñe wakutihan ariñahani tidan Bíbülia hawaguti gürigia ha sügühañabaña lídangiñe libe sügǘ le wásügürübei.

6. Ida liña líderaguniwa adamuridaguni lun lagidarún machouruni wawéi?

⁶ “Aganba wamuti” giñe Heowá lidan adamuridaguni. Anhein gabügürügua wabasiihan lidoun adamuridaguni másiñati waganbun aban yanu o aban óunabagülei le líchugun aban íbiri le gayaraabei líderaguniwa agidarei machouruni le wawagubei (Ari. 27:17). Guentó, wayanuha luagu fiu machouruni le gayaraabei liábingua woun luma le lunbei wadügüni lun wagidaruni wawariua.

“BERESETI FUNA SAN HEOWÁ NAU?”

7. Ka álügüdahani gayaraabei wadügüni wóuniwagua?

⁷ Másiñati álügüdaguañahaadün lan hungua: “Le san lúgubu berese lan Heowá nau?”. Anhein sandigua hubéi hungua mebegi humá, háfuga hasandirun siñabei lan gamadagua humá luma Bungiu le adügübalin sun katei, Heowá. Gayaraati ítara liña lan meha lasaminarun urúei Dawidi. Wéiritu lanigi lau larihin teni lan Heowá houn gürigia, ligía lálügüdahanbei: “Aburemei, kátañanu san wügüriña, basaminarunbei hawagun? Kátañanu san gürigia, lanarimebei hínsiñe bun?” (Sal. 144:3). Ariha waméi ida luba lan wadariruni lóunabagüle álügüdahani burí le.

8. Kei larufuduni 1 Samueli 16:​6, 7, 10-12, ka un letenira Heowá?

⁸ Ariñagatu Bíbülia woun ru lani Heowá larihin hawagun gürigia ha arihúbaña kei mebegitiña. Kei hénpulu, óunaha lumuti Heowá Samueli lúbiñoun Hesé lun meha lanúadirun aban hádangiñe lisaanigu lun urúeibei lan Ísüraeli. Adügati Hesé lun hayabin sedü lirahüñü lun larihiniña Samueli, lau sun lira magúati lun Dawidi le amuleñein. b Gama lumoun, Dawidi lanúadirubei Heowá (aliiha huméi 1 Samueli 16:​6, 7, 10-12). Ka uagu Dawidi lunbei lanúadira Heowá? Ladüga ariha lani Heowá buiti le tídanbei lanigi Dawidi, ariha lumuti weiri lan ínsiñeni le lasandirubei nibureinti le luagu.

9. Ka uagu gayara lubéi hachoururuni berese lan Heowá hau? (Ariha humóun giñe iyawaü).

 ⁹ Samina humá luagu le adüga láalibei Heowá lun larufuduni berese lan hau. Ru lumuti adundehani létima hemegeirubei hun (Sal. 32:8). Líchugunbalin ladüga subudi lanün buidu, adián? (Sal. 139:1). Anhein hafalara adundehani burí le ani ariha huméi buiti le lanügübei, hachoururubei berese lan Heowá hau (1 Kro. 28:9; Adü. 17:​26, 27). Aríagu liña Heowá lun sun le hadügübei luagu lufulesein, ani ariha lumuti giñe lubuidun higaburi (Her. 17:10). Busenti lun humada lan ani busén ligía lun hánharun lun agunbirahani le ladügübei hun (1 Huan 4:19).

“BUITI FUNA SAN LE NANÚADIRUBEI LIDAN NIBAGARI?”

10. Lau wasaminarun luagu dan le sügühalibei, ka álügüdahani gayaraabei wadügüni wóuniwagua?

¹⁰ Lau lásügürün dan, másiñati lálügüdagun gürigia lungua anhein buidu lubéi le lanúadirubei lidan libagari. Háfuga ígira lan aban wadagimanu buiti o aba madararun lan somu bísinisi lun gayaraabei lan leseriwidun lun Heowá. Guentó, lau lásügürün dan, másiñati larihiniña lasubudiragun ha íchaagubaña houngua lun hagañeirun seinsu ani genegeti buidu lan dan houn. Gayaraati ladügün katei le lun lálügüdagun lungua: “Le san lúgubu gebegi lan sun áfaaguni le nadügübei lun neseriwidun lun Heowá? O buítimati hamuga meha san lidin nun ánhana hamuga etenira lun nagañeirun seinsu?”.

11. Ka uéigiñe wuriba lubéi lasandiragun le abürüdübalin Sálumu 73 lungua?

¹¹ Anhein adügañaha humaali lubéi álügüdahani le húniwagua, samina humá luagu ida liña lan meha lasandiragun abürühati Sálumu 73 lungua. Dan meha le larihiniña ha meseriwidunbaña lun Heowá, genegeti meha lun buidu lan hátuadi, risi hamá ani darangilu lan habagari (Sal. 73:​3-5, 12). Kei genege lan buidu lan lidin houn gürigia ha, saminati abürühati Sálumu mebegi lan sun áfaaguni le ladügübei lidan leseriwidun lun Heowá. Sun oura lau liibe saminaü lichügüwagun  asaminara luagu katei le (Sal. 73:​13, 14). Ka íderagubalin?

12. Kei warihini lidan Sálumu 73:​16-18, ka íderagubalin abürühati sálumu asaminara buidu?

¹² (Aliiha huméi Sálumu 73:​16-18). Aba lidin abürühati sálumu tidan lani Heowá sanduariu. Kei darangiluga lan ñein, aba gayara lan lasaminarun buidu luagu katei le. Íbini ariha lan meha añahein lan hádangiñe buiti lidin houn, aba gunfuranda lani lídanba lan günringuaü hagumucha. Aba larihini furangu leseriwidun lan lun Heowá buídutimabei lidan libagari, ruti katei le darangilaü luma erei lun, lun lasigirun eseriwida lun Heowá (Sal. 73:​23-28).

13. Ka lunbei hadügüni anhein asaküriha hubéi luagu madügün humá meha ítaga katei? (Ariha humóun giñe burí iyawaü).

¹³ Ítara kei abürühati sálumu, gayaraati hibihin darangilaü dan le hagagibudagun luma luriban saminaü. Ida? Luagu aban oubaü, samina wamá luagu sun buiti le ibiha humaalibei luma luagu irisini le óundaragua humaalibei sielu lidan heseriwidun lun Heowá kei burí lubuidun humadagua luma. Kati hámabei ha meseriwidunbaña lun Heowá? Lérügü líchugubei ubóu. Ani sun hemenigin lídanrügüñein le gayaraabei hibihin guentó, memenigintiña ni murusun lubá ámuñegü. Gama lumoun, füramaseti Heowá líchuguba lan saragu katei woun sügǘ lau le wasaminarubei (Sal. 145:16). Luagu le aban oubaü, lun hamuga adüga humá meha amu katei ibidiñewabei yebe ida luba lan hibagari. Le wasubudirubei: ha lan eseriwidubaña lun Heowá ladüga línsiñe houn ani hínsiñe hagía gürigia háledigu houn, súnwandan hibihiba lan katei buiti.

“HÚUTINA FUNA SAN LUN HEOWÁ?”

14. Ka gádanbaliña fiu lubúeingu Heowá, ani háfuga ka álügüdahani hadügübei hóuniwagua?

¹⁴ Añahein lubúeingu Heowá hínsiñeti hamuga  houn lun haganwoundagüdüni heseriwidun lun, gama lumoun, siñati hadügüni ladüga harumudiri, hátuadi o ladüga somu danimaü. Gayaraati ladügün katei le lun hasandirun mouni hamá lun Heowá luma lun hálügüdagun houngua: “Húutina funa san lun Heowá?”.

15. Ka lachoururubei le abürüdübalin Sálumu 71?

¹⁵ Sandí lumuti giñe le abürühabalin Sálumu 71 katei le. Ariñagati lun Heowá mígira bana “danme le méreedina!” (Sal. 71:​9, 18). Lau sun lira, chouru lumuti abürühati sálumu anhein lan eseriwida lun Heowá lau úaraguni, ladundehabei lan ruleime ídemuei le lemegeirubei lun. Furendeiti gunda lan Heowá hau sun ha adügübalin sun hayaraati lidan heseriwidun lun íbini lóuguaali lan le hayaraabei adüga (Sal. 37:​23-25).

16. Ka uagu wariñaga weiri lan hahuudun íbirigu derebuguhaña lun Heowá? (Sálumu 92:​12-15).

¹⁶ Anhein aban hubéi kristiánu derebuguhali, áfaagua humá lun haríagun hungua kei larihinün Heowá. Lau sun siñaali lan hadügün saragu lidan heseriwidun lun Heowá, gayaraati líderagunün Heowá lun hadügün saragu lidan heseriwidun lun (aliiha huméi Sálumu 92:​12-15). Lubaragiñe híchuguni hisaminan lidoun le hásiñarubei adüga, rugua humá hungua lun le hiyaraabei adüga. Gayaraati giñe hederebudagüdüni hafiñen íbirigu lau lubuidun hani hénpulu luma lau berese humá hau. Gayaraati giñe habahüdahan houn ida liña lan líderagunün Heowá lidan sun hibagari luma lanarime hayumahan lun lagunfuliruni sun le füramase lubéi. Maweiyasun humá abulieidei gabafu lan furíei le hadügübei hawagu íbirigu (1 Fe. 3:12). Meberesenga le gádanbaliwa, gayaraati wadügün saragu lidan weseriwidun lun Heowá luma hawagu wábirigu.

17. Ka uagu lunti lubéi wáfaagun lun magoubaguagüdün wamá woungua hama amu?

¹⁷ Anhein wuriba lubéi hasandiragun hungua ladüga siñá lan hadügün saragu lidan heseriwidun lun Heowá kei hamuga habusenrun, chouru  huméi ani haritagua humeime weiri lan lebegi sun áfaaguni le hadügübei lun Heowá. Luagu le aban oubaü, másiñati busén humá hagoubaguagüdüni le hiyaraabei adüga lidan heseriwidun lun Heowá luma le hadügübei amu. Houcha humá lun madügün humani. Ka uagu? Lugundun maweiyasunti Heowá agoubaguagüdawa hama amu (Gal. 6:4). Kei hénpulu, huruguatu María aban ibiñein séruti luagu lugudi Hesusu (Huan 12:​3-5). Ánhounti würi to hilaalibei tani weiriei, biánrügüñein gáwanaü tíchugun tidoun gafu to ténpuluruguboun (Luk. 21:​1-4). Lun Hesusu, harufuduñein bián würiña ha hafiñen lau katei le hadügübei. Furumiñeguarügü katei le hadügübei luagu Heowá ladüga línsiñe hun, íbini genege lan lougua lan, wéiriti lebegi lun.

18. Ka gayaraabei líderagunün lun lagidarún machouruni huéi? (Ariha huméi giñe rekuáduru “ Íderagua tumutün Lererun Bungiu lun lagidarún machouruni huéi”).

¹⁸ Chülüti dan lun lebelurun machouruni woun. Lau sun lira, kei le aubei warihei, íderagua tumutiwa Lererun Bungiu lun lagidarún machouruni wawéi. Ligíati, aríaaha huméi óunabagülei le hemegeirubei tidan, hasandiruba aba lanme lagidarún machouruni tídangiñe hanigi ábame habuinchun lau afiñeni. Aríagu liña Heowá lun sun áfaaguni le hadügübei ani gebegiti lun, füramaseti luagu líchuguba lan hafayeiruaha. Maweiyasun humá abulieidei le: hínsiñetiña sun lubúeingu Heowá ha úaraguabaña lun ani góunigi lumutiña giñe.