1. Ka burí idewesei ru laalibei Hesusu woun?

 ÚATI ni aban gürigia ya ubouagu le gíchigaditi kei Hesusu. Kei hénpulu, dan meha le ya lubéi ubouagu yusu lumuti lubafu lun ladügün milaguru, ítara liña líderagun saragu gürigia (Luk. 9:​12-17). Ru lumuti idewesei létima wéiribei lídangiñe súngubei lau líchuguni libagari wawagu (Huan 15:13). Lúmagiñe láguyugun ítaramemegili lau gíchigadi lan. Ítara kei füramase lani, aba lamuriahan luma Heowá lun líchuguni lani sífiri sandu lun larufudahan luma lun líchugun dǘgüdaguaü woun (Huan 14:​16, 17; 16:13). Lanwoun lira, yusu lumuti Hesusu adamuridaguni lun larufudahan woun ida luba lan wadügün disipulugu lidan sun ubóu (Mat. 28:​18-20).

2. Kátaña san wügüriña ha ítarabaña kei “idewesei”? (Éfesuna 4:​7, 8, TNM).

² Lau sun lira mámarügüñein idewesei le líchiga Hesusu woun. Abürühati apostolu Pábulu dan lan le lamudeirunbei Hesusu iñun, ruti lan “wügüriña ha ítarabaña kei idewesei” (aliiha huméi Éfesuna 4:​7, 8, TNM a). Afuranguagüdati Pábulu ru lániña Hesusu wügüriña ha lun híderaguni damuriguaü lidan ámuñegueinarügü igaburi (Efe. 1:​22, 23; 4:​11-13). Uguñe weyu, añahein ídehatiña lidan damuriguaü, wéiyaaña lidan afiñeni hama óunigirutiña sirkuitu lidan “idewesei” le. b Inarüni chará hamá wügüriña burí ha (Sant. 3:2). Gama lumoun, aban idewesei hagía ha layusurubaña Hesukrístu lun líderaguniwa.

3. Afuranguagüda huméi ida luba lan wídehan lidan dasi le hadügübei wügüriña ha líchugubaña Hesusu kei idewesei woun.

³ Ru lumutiña Hesusu “wügüriña ha ítarabaña kei idewesei” lun hederebudagüdüni burí damuriguaü (Efe. 4:12). Ligíati, sun wagía gayaraati wíderaguniña agunfulira lau dasi súdiniti le. Lun gunfuranda  wamani katei le, samina wamá hawagu fiu íbirigu ha ábunagubarun aban Luban Wadamuridagun. Añahein hádangiñe nadagimeintiña lidan ábunaguni, ha híbiri hídehaña lau híchugun éigini, ugunei, luma burí amu katei le emegeirúbei. Ítarameme, wügüriña ha eseriwidubaña kei ídehatiña lidan damuriguaü, wéiyaaña lidan afiñeni hama óunigirutiña sirkuitu rúwati somu dasi houn lun hadügüni ani sun wagía gayaraati wíderaguniña lau le wadügübei luma lau le wariñagubei. Akutiha waméi ida luba lan wasagarun saragu buiti lídangiñe wadagimanu le hadügübei wügüriña ha, luma ida luba lan warufuduni weteingiradi houn luma lun Hesusu lau líchuguniña wügüriña ha woun.

RÚTIÑA HA ESERIWIDUBAÑA KEI ÍDEHATIÑA LIDAN DAMURIGUAÜ SARAGU ÍDEMUEI

4. Ka ídemuei híchugubei ídehatiña lidan damuriguaü lidan furumiñeti sígulu?

⁴ Lidan furumiñeti sígulu añahein meha íbirigu iridúatiña kei ídehatiña lidan damuriguaü (1 Tim. 3:8). Genegeti hagía lan meha ídehatiña ha uágubaña layanuha apostolu Pábulu lidan 1 Korintuna 12:28. Kei le aubei warihei, hagía etenirubaña lun fiu dasi le mégeiwabei lun gayara lan hetenirun wéiyaaña lidan afiñeni lun arufudahani luma lun habisidahaniña íbirigu lun híchugun dǘgüdaguaü houn. Kei hénpulu, háfuga ídehatiña lidan damuriguaü adügübarun kopia tau Lererun Bungiu o hagía lan ñǘdünbaña agañeiha le mégeiwabei lun gayara lan tadügǘniwa kopia burí tuguya.

5. Ka fiu dasi hadügübei ídehatiña lidan damuriguaü uguñe weyu?

⁵ Ka dasi hadügübei ídehatiña lidan damuriguaü uguñe weyu? (1 Fe. 4:10). Háfuga hagía arihibaña lau ligaburi layusurún budagia le ichugúbei lidan damuriguaü, o lau burí fulasu le ñein lubéi lapurichihóua, lau tamuriahóun agumeiraguagüdüni luma lau tafanreinhóun, hagía arihibaña lau amuri luma lau lichugún bidéu luma lun híchugun buiti achülürüni houn achülürütiña lidoun damuriguaü, ídehatiña giñe lidan tounigirún luma tarumadahóun Luban Adamuridaguni. Hu buriti sun katei le lun buidu lan léibugun sun katei lidan damuriguaü (1 Ko. 14:40). Luagu aban oubaü, rúwati dasi houn ídehatiña lidan damuriguaü lun gafanran hamá lidan adamuridaguni le adügǘbei labadinagua dimaasu luma giñe lun híchugun yanu houn sun gürigia. Ani gayaraati lamuriahan aban wéiyaali lidan afiñeni luma aban ídehati lun lidin luma abisidahaña íbirigu lun híchugun dǘgüdaguaü houn.

6. Ka uagu gunda wabéi lau dasi le hadügübei ídehatiña lidan damuriguaü?

⁶ Ka uagu gunda wabéi lau dasi le hadügübei ídehatiña lidan damuriguaü? Ariha waméi le hariñagubei fiu íbirigu. Ariñagatu aban íbiri boliwiana gíritu Beberly c: “Seremei houn ídehatiña lidan damuriguaü, gayara lubéi nasagarun saragu buiti lidan adamuridaguni sunsuinagubei. Seremei dasi burí le hadügübei gayara lubéi neremuhan, níchuguni nóunabagüle lidan adamuridaguni, naganbahani burí yanu luma nafurendeirun lídangiñe bidéu luma lídangiñe dibuhu o iyawaü. Ani hagía arihibaña luagu ichouruni lun buidu lan hasandiragun íbirigu houngua luma giñe lau zoom lun gayara lan hebelurun íbirigu. Dan le lagumuchun adamuridaguni, ídehatiña lidan tarumadahóun Luban Wadamuridagun luma lidan labudahóun budagia le ichugúbei, áfaaguatiña giñe lun ñein tan agumeiraguagüdüni to emegeirúboun. Seremei numutiña saragu!”. Ariñagatu Leslie to awinwanduboun Kolonbia ani wéiyaali lidan afiñeni tani weiriei: “Wéiriti ídemuei le híchugubei ídehatiña lidan damuriguaü lun nani weiriei. Lun hamuga meteni hamá ídehatiña lidan damuriguaü lun saragu dasi, wéiribei yebe luberesegun nani weiriei. Ligíati, seremei numutiña luagu ubebeni le harufudubei luma luagu aranseñu haña lan súnwandan lun hídehan”. Chóuruti sun lan wagía seremei wamutiña (1 Tim. 3:13).

7. Ida luba warufudun geteingiradi houn ídehatiña lidan damuriguaü? (Ariha humóun giñe iyawaü).

⁷ Másiñati sandí wamá eteingiruni luagu le hadügübei ídehatiña lidan damuriguaü, lau sun lira lunti warufudun geteingiradi, ligía tariñagunbei Bíbülia: “geteingiradi humá” (Kol. 3:15). Ariha wamá ida liña lan larufuduni aban wéiyaali lidan afiñeni gíriti David le awinwandubei Finlandia igaburi  le, ariñagati: “Aba nóunahan aban tárüheta o aban mensahe lun aban ídehati lidan damuriguaü le ñein lubéi nírida aban bérusu tídangiñeti Bíbülia, aba níridun aban igaburi le larufudubei ídehati ligía, le íchugubei dǘgüdaguaü nun ani ariñaganéi lun ka lan uagu gunda nubéi lau dasi le ladügübei”. Furíeitiña aban feru maríeitiña gíritiña Pascal tuma Jael ha awinwandubaña Nuewa Kaledonia hawagu ídehatiña lidan damuriguaü, aba hariñagun: “Rútiwa óunwenbu seremei lun Heowá hawagu ídehatiña lidan damuriguaü ha lídanbaña damuriguaü le ñein wabéi, ani furíeitiwa hawagu lun líderaguniña”. Aganba lumuti Heowá sun burí furíei le ani sagati sun damuriguaü buiti lídangiñe (2 Ko. 1:11).

NADAGIMEINTIÑA WÉIYAAÑA LIDAN AFIÑENI BUIDU

8. Ka uagu gayara lubéi lariñagun Pábulu nadagimein hamá wéiyaaña lidan afiñeni buidu lidan furumiñeti sígulu? (1 Tesalónikana 5:​12, 13).

⁸ Lidan furumiñeti sígulu nadagimeintiña meha wéiyaaña lidan afiñeni buidu (aliiha huméi 1 Tesalónikana 5:​12, 13; 1 Tim. 5:17). Hagía meha arihibaña lau damuriguaü kei burí lau ladügǘn adamuridaguni, luma kaba lan adügǘwa. Lanwoun lira rútiña giñe adundehani furanguti houn íbirigu dandu houn wügüriña kei houn würiña lau ínsiñehabuni, hadügünbalin lun gayara lan hóunigiruni damuriguaü (1 Tesa. 2:​11, 12; 2 Tim. 4:2). Áfaaguatiña giñe wéiyaaña lidan afiñeni lun derebugu lan hafiñen lau hóunigiruni hamadagua luma Bungiu luma giñe lun hóunigiruniña haduheñu buidu (1 Tim. 3:​2, 4; Titu 1:​6-9).

9. Ka burí lídangiñe dasi hadügübei wéiyaaña lidan afiñeni uguñe weyu?

⁹ Uguñe weyu wéiriti giñe heberesegun wéiyaaña lidan afiñeni. Luagu aban oubaü, bereseguñanu lidan apurichihani (2 Tim. 4:5). Rútiña aban lubuidun hénpulu lidan ministeriu, adügatiña aban buiti aransehani lun hapurichihan lidan fulasu le yuubei lun damuriguaü le ñein habéi ani arufudahatiña woun lun wapurichihan luma lun garufudahadi wamá buidu. Luagu le aban oubaü, seriwitiña giñe kei aguseragüdütiña ani adüga hamuti dasi le lau gudemehabu úouga himei hamá aban gürigia luéi aban. Dan le léiguadun aban íbiri lidoun figóu wéiriti, áfaaguatiña lun híderaguni íbiri ligía lunya gamadagua lan luma Heowá. Gama lumoun, létima habusenrunbei lun haruma lan damuriguaü (1 Ko. 5:​12, 13; Gal. 6:1). Hóunigiruñanu giñe wéiyaaña lidan afiñeni lumutuniña Bungiu (1 Fe. 5:​1-3). Rútiña yanu le aranserúati buidu, áfaaguatiña lun hasubudiruniña sun íbirigu ha lílana damuriguaü, ani bisida hamutiña lun híchugun dǘgüdaguaü houn. Lanwoun lira ídehatiña wéiyaaña lidan afiñeni lidan tábunawagun luma taransehóun Luban Adamuridaguni luma lidan laransehóun lubá adamurini wéiriti. Añahein hádangiñe lídanñanu burí Sétanu le Ídehabei lun Lagaranihóun houn Íbirigu Háspitalirugu o lidan Sétanu le Abisidahabaliña Sánditiña, ídehatiña giñe lidan amu burí dasi. Ma liibe dasi le hadügübei wawagu!

10. Ka lébubei hínsiñe hamá wéiyaaña lidan afiñeni ha arihibaña wau woun?

¹⁰ Ariñagati Heowá hóunigirubaña lan wéiyaaña lidan afiñeni lumutuniña buidu, ligía lariñagunbei manufudebaña lan lumutuniña, “memegeirunme ni aban hádangiñe” (Her. 23:4). Gúnfuliti dimurei le lidan tikesin aban íbiri filandiana gíritu Johanna dan le tasandirubei túguchu, ariñagatu: “Hénrenguti nun nayanuhani násügürün houn amu. Gama lumoun, aganba lumutina aban wéiyaali lidan afiñeni íbini ibidiñe nan lun buidu, ani chóurugüda lumuti nun, hínsiñe nan lun Heowá. Maritagun numuti le lariñagubei nun, le naritagubei, sandigua nan nungua chóuruñu. Afiñetina Heowá lan óunahabalin lun líderagunina lídantima dan le nemegeirunbalin”. Ati huguya? Ida liña híderagunün wéiyaaña lidan afiñeni ha lídanbaña damuriguaü le ñein hubéi?

11. Ida luba warufuduni houn wéiyaaña lidan afiñeni seremei wamaniña luagu dasi le hadügübei? (Ariha humóun giñe iyawaü).

¹¹ Busenti Heowá lun warufuduni wínsiñehabu houn wéiyaaña lidan afiñeni “luagu wadagimanu le hadügübei” (1 Tesa. 5:​12, 13). Ariñagatu Henrietta to awinwanduboun Finlandia: “Íderagua hamutiña wéiyaaña lidan afiñeni amu, mama ladüga here hamá ni ígiragua lan dan houn, ni ladüga maturobulin  hamá. Ligíati anihein lubéi dan aba nayarafadun lun aban hádangiñe aba nariñagun lun: ‘Busentina nariñagun aban katei bun, busenrügütina lun basubudiruni aban lan wéiyaali lidan afiñeni buiti buguya’”. Ariñagatu aban íbiri to awinwanduboun Turükía gíritu Sera: “Mégeitiña wéiyaaña lidan afiñeni gurasu lun gayara lan hasigirun lidan dasi le hadügübei. Gayaraati wabürühan aban tiraüraü gárada houn, wagunbirahaniña eiga ani apurichiha wagíame hama”. Saminatün san luagu somu wéiyaali lidan afiñeni le unbei busén humá híchugun seremei luagu dasi le ladügübei? Anhein ítara liña lubéi, áluaha humá chansi lun hadügüni (1 Ko. 16:18).

RÚTIÑA ÓUNIGIRUTIÑA SIRKUITU IDEREBUGU LUN DAMURIGUAÜ

12. Ka amu idewesei líchugubei Hesusu lun damuriguaü lun lederebudagüdüni? (1 Tesalónikana 2:​7, 8).

¹² Anihein ámuya idewesei le líchugubei Hesusu lun damuriguaü. Lidan furumiñeti sígulu lábugiñe ladundehan Hesusu, aba hóunahaniña wéiyaaña lidan afiñeni ha Herusalénbaña Pábulu, Berünawé hama amu kristiánugu kei óunigirutiña sirkuitu (Adü. 11:22). Kame? Lun hederebudagüdüni damuriguaü, ítara kei hadügüni ídehatiña lidan damuriguaü hama wéiyaaña lidan afiñeni (Adü. 15:​40, 41). Áfaaguatiña wügüriña ha saragu ani áhurera hamuti habagari lun harufudahan luma lun híchugun dǘgüdaguaü houn amu (aliiha huméi 1 Tesalónikana 2:​7, 8).

13. Ka burí lídangiñe dasi uágubei hariha óunigirutiña sirkuitu?

¹³ Súnwandan haweiyasuhaña lan óunigirutiña sirkuitu. Añahein hádangiñe aweiyasuhatiña saragu san kilometuru lun gayara lan hachülürün lidoun aban damuriguaü. Sagü dimaasu mosu híchugun lóugiñe aban yanu, ñǘdüntiña burí abisidahaña íbirigu lun híchugun gurasu houn ani damuriguatiña hama prekursorugu hama wéiyaaña lidan afiñeni ani hagía giñe adundehabalin adamuridaguni lubá háfuridun íbirigu apurichiha.  Hagía giñe adügübaña aransehani lubá adamurini sirkuitu luma lubá le wéiribei, ani mosu giñe haransehani hayanun. Lanwoun lira, hagía arihibaña tau leskuela houn prekursorugu; adügatiña giñe aransehani lun ladügǘn adamuridaguni espechaliti hama prekursorugu ha lídanbaña sirkuitu le ñein habéi ani ténitiña giñe lun ámuya dasi súdiniti, anihein dan lunti harihin lau lóufudagun lau dasi le burí tíchugubei sukursáli houn.

14. Ka uagu weiri lubéi lebegi dasi le hadügübei óunigirutiña sirkuitu woun?

¹⁴ Ka buiti hasagarubei lílana damuriguaü lídangiñe lubuidun dasi le hadügübei óunigirutiña sirkuitu? Ariñagati aban íbiri turkíana: “Ínchaha lumutina sun bisida le hadügübei óunigirutiña sirkuitu lun násügürün dan hama níbirigu luma lun nóunigiruniña. Subudihaña saragu óunigirutiña sirkuitu nun, gama lumoun, úati ni aban adügüti lun nasaminarun weiri lan luberesegun lun siñá lan hayanuhan numa”. Aban weyu, aba táfuridun Johanna, to uáguboun wayanuha lidan párafu 10, apurichiha luma óunigiruti sirkuitu, gama lumoun, madaritiña ni aban gürigia hábiñe. Ariñagatu: “Íbini madari wamá ni aban gürigia hábiñe, mabulieidun nubéi weyu ligía. Sun liña meha háguyun níbugañanu, ani wéiriti meha nálugun hawagu. Ayanuhati óunigiruti sirkuitu numa ani aba líderagunina lau saragu ínsiñeni lun narihini lau lan fiu dan nafanreinragua hawéi níbugañanu, ani lidan lanme iseri ubóu gachansibadina lan lun násügürün dan hama”. Chóuruti gunda hamá íbirigu hau óunigirutiña sirkuitu ha abisidahabaliña (Adü. 20:37–21:1).

15. a) Ida luba wadügüni le lariñagubei 3 Huan 5-8 lun warufuduni gebegi hamá óunigirutiña sirkuitu woun? (Ariha humóun giñe iyawaü). b) Ka uagu lunti lubéi wasaminarun hawagu hani wügüriña ha gadasinbaña tidan lóundarun Heowá weiriou, ani ida luba wadügüni? (Ariha huméi rekuáduru “ Samina wamá hawagu hani wügüriña ha weiriou”).

¹⁵ Ínchaha lumuti apostolu Huan íbiri Gayu lun leresibiruniña ha ñǘdünbaña abisidahei damuriguaü ani amuriaha ligía luma: “Íderagua baña lau le hemegeirubei lun hasigiruni haweiyasun lidan aban igaburi le auti lagundaara Bungiu” (aliiha huméi 3 Huan 5-8). Ida luba wáyeihani igaburi  le? Lau wagunbirahani óunigiruti sirkuitu eiga luma lau wadügün aransehani lun wáfuridun apurichiha dan le labisidahani damuriguaü le ñein wabéi. Ariha waméi le tadügübei Leslie, to uáguboun wayanuha lidan párafu 6, lun tarufuduni teteingiradi. Ariñagatu: “Amuriahatina luma Heowá lun líchuguni le hemegeirubei óunigirutiña sirkuitu houn. Nuguya luma nani weiriei abürühatiwa gárada houn le ñein lubéi wabahüdahei houn ru lan habisidahaniwa saragu dǘgüdaguaü woun”. Mabulieida waméi giñe gürigia hamá óunigirutiña sirkuitu. Anihein dan gagibuguatiña luma maguraasuni, luma idiheri o luma sandi. Anhaün ariñaga somu dimurei le lánina ínsiñeni houn ani ru huguya somu idewesei houn, másiñati ligía lan lóunabagülebei afurieiduni le ladügübei óunigiruti sirkuitu (Ari. 12:25).

MÉGEITIWA WÜGÜRIÑA HA ÍTARABAÑA “KEI IDEWESEI”

16. Ka buídubei lun hálügüdagun íbirigu wügüriña houngua? (Ariñawagúni 3:27).

¹⁶ Lidan sun ubóu mégeiti damuriguaü wügüriña ha ítarabaña “kei idewesei”. Anhein badiseihadibu lubéi, báfaaguña san lun aban ban wügüri ítarati? (aliiha huméi Ariñawagúni 3:27). Báfaaguña san lun aban ban ídehati lidan damuriguaü? Anhein ídehati lubéi lidan damuriguaü buguya, báfaaguña san lun aban ban wéiyaali lidan afiñeni? d Gayaraati san badügün asansiruni lidan bibagari lun gayara lan bidin tidan Leskuela houn Apurichihatiña Larúeihan Bungiu? Gayaraati tarufudahan leskuela to bun lun gayara lan layusurunibu Hesusu sunsuinagubei. Anhein genege lubéi bun hénrengubei lan lun bibihini, furieibá lun Heowá. Amuriahabá sífiri sandu luma lun líderagunibu adügei furumiñeguarügü dasi le ichugúbei bun buidu (Luk. 11:13; Adü. 20:28).

17. Ka larufudubei dasi le hadügübei wügüriña ha líridubaña Hesusu ha ítarabaña kei idewesei?

¹⁷ Arufudati dasi le hadügübei wügüriña ha ítarabaña “kei idewesei” luagu anihein lan Hesusu adundehawa lidan lagumuhóun dan le (Mat. 28:20). Wéiriti wínsiñe lun Warúeite le gíchigadibei teni ligía lun le wemegeirubei ani ruti wügüriña ha ítarabaña kei idewesei lun híderaguniwa. Ma seremei wamuti, adián? Áluaha wamá chansi lun warufuduni. Mabulieida waméi weteingiruni Heowá, lugundun lúmagiñe liabin “sun buiti le ichugúbei woun, le úabei mégeiti luagu” (Sant. 1:17).