SÚDINITI meha uremu houn binadu ísüraelina. Ayanuhatu Bíbülia saragu wéiyaasu hawagu gürigia ha geremuhadibaña o hawagu ha gáfaradibaña somu umegeguni le lánina uremu. Ani diisi lídangiñe san le bürüwañubei tidan Lererun Bungiu, uremu. Kéiburi Sálumu, líburu to gíriboun Uremu, túmati to gíriboun Ayahuni, bürüwatu líburu burí to lun leremuhóuniwa lun Bungiu. Ariñagatu líburu Music in Biblical Life (La música en la vida bíblica) “hechu hamá ísüraelina eremuha dan le bereseguñanu lan”.

Héchutiña meha eremuha. Eremuhatiña meha ísüraelina lun harufuduni le hasandirubei (Isa. 30:29). Eremuhatiña meha würiña ísüraelina lau ugundani, abinaha hagía, áfara hagía panderu dan le liridún aban iseri urúei, dan le ladügǘn fedu lun Bungiu luma dan le hagañeirun súdaragu somu wuribu (Ali. 11:34; 1 Sam. 18:​6, 7; 1 Uru. 1:​39, 40). Arufuda hamuti giñe ísüraelina hagarigu lau heremuhan dan le lounwen aban gürigia (2 Kro. 35:25). Ariñagatu aban líburu “weiri lan meha línsiñe uremu houn ísüraelina” (Cyclopedia, de McClintock y Strong).

Hínsiñeti meha uremu houn urúeigu ísüraelina. Anúadira lumuti meha urúei Saulu Dawidi lun láfarun árüpa lun (1 Sam. 16:​18, 23). Dan meha le urúei lubéi Dawidi adügati saragu umegeguni lun eremuhani ani adügati saragu uremu buíduburiti ani anúadira ligía gürigia lun háfarun úara luma uremu tidan litenpulun Heowá (2 Kro. 7:6; Amos. 6:5). Ani añahein meha giñe wügüriña hama würiña luma urúei Salomón eremuha tidan palasiu (Apur. 2:8).

Uremu lidan áhuduraguni lun Heowá. Tidan meha ténpulu to Herusalénboun añahein meha 4,000 geremuhaditiña, áfaratiña pülatíyu, áfaratiña ámuñegueinarügü tuwuyeri árüpa tuma burí fidu (1 Kro. 23:5; 2 Kro. 5:12). Lau sun lira, mámarügüñanu meha hagía ayusura uremu lidan háhuduragun lun Heowá. Dan burí meha houdin ísüraelina áhuduragua lun Heowá Herusalén eremuheina haña meha Uremu lánina Amudeiruni (Sal. 120-134). Según aban líburu huríu, eremuha hamuti meha ísüraelina uremu Hallel a lidan adineruni le lánina Luéyuri Esefuruni.

Súdinigili uremu houn lumutuniña Bungiu uguñe weyu (Sant. 5:13). Eremuhatiwa lun walawahani Heowá (Efe. 5:19). Adügati giñe uremu lun wóundarun hama wábirigu, ruti giñe erei woun lun wawandun lénrengunga (Adü. 16:25; Kol. 3:16). Adügati uremu lun wariñagun lun Heowá lau aban lubuidun igaburi afiñe wamá luagu ani weiri lan línsiñe woun.