Lidan kesi le lunti hakutihani maríeitiña ida liña lan lawadigimaridun DIU (subudiwati giñe kei “T”) ani akutiha hameime adundehani tídangiñeti Bíbülia luáguti katei le, lárigiñe ábame desidírü hamá aba katei le lunti líderaguniña lun hakipurun aban saminaü harumati ligibugiñe Bungiu.

Dan le meha Adánrügügili tuma Ewa ubouagu, aba líchuguni Heowá gumadi le houn: “Garahüñügua humá saragu, buíngüda huméi ubóu hau hirahüñü”. Ani lárigiñe Guran, aba lariñaguni Heowá ligiaméme lun Noé hama liduheñu (Agu. 1:28; 9:1). Gama lumoun, mariñaguntu Bíbülia mosu lan gaganbadi hamá kristiánugu lun gumadi le. Ligíati, kada feru maríeitiña lun desidírü hamá anhein hayusuruba lubéi somu katei lun magibedun hamá hasaanigu o lun hanúadahani ídaba lan gasaani hamá. Ka burí katei lunbei hakutihani?

Lubá desidírü hamá kristiánugu lunti habadülerun luagu adundehani le tídanbei Bíbülia. Ligía maha habéi lun haragahóun irahüñü. Múaranti haragahóun irahüñü luma le tariñagubei Bíbülia luagu inebesei luagu ibagari. Máluguntiña kristiánugu hadüraaguni hadageinan lau haragachuni hasaani (Afu. 20:13; 21:22, 23; Sal. 139:16; Her. 1:5). Ka gayaraabei wariñaguni luagu layusurún DIU?

Akutihóuati ariñahani le lidan páhina 31 luma 32 tidan garüdia La Atalaya to lánina 15 lidan nefu-hati lidan irumu 1979. Libe-agei DIU le aniheinbei lidan dan ligía, aban meha pülastiku le adarúbei tidoun tagei würi lun madageinadun tan. Ariñagatu meha garüdia tuguya ibidiñewati lan ida liña lan lawadigimaridun DIU. Ariñagatiña meha saragu surusiagu ha subuditiña luagu katei le luagu adüga lan DIU somu katei tidan  tagei würi lun madunragun lan esperma lani wügüri luma tani würi óvulo. Anhein madunragun bián katei le, magumeserunti aban iseri ibagari.

Gama lumoun, genegeti arufuda lumuti lan fiu akutihani luagu anihein lan dan chülǘ lan esperma le áfuridubei lídangiñe wügüri lun ladunragun luma tani würi óvulo ani aba lagumeserun aban ibagari. Gayaraati laweiridun óvulo le sun liñabei ladunragun luma lani wügüri esperma bóugudi tuéi tagei würi (embarazo ectópico) o lawanserun darí lachülürün tidoun tagei. Lidan lagumuhóun kesi le, gayaraati ladügün DIU lun lásiñarun lebelurun óvulo ligia tidoun tagei würi lun laweiridun ñein, kei lasuseredun lidan aban dageinaü. Ítara liña katei le kei haragachun gürigia haráü. Gumuti meha arütíkulu ligía ítara: “Aban kristiánu le inarüniti ani le nidiheriti luagu anhein gayara lubéi hayusurun kristiánugu DIU lunti lakutihani ariñahani le buidu según ariñahani le tídanbei Bíbülia luáguti sandu lan ibagari” (Sal. 36:9).

Gama lumoun, lúmagiñebei láfuridun arütíkulu le lidan irumu 1979, aniheinhali saragu awanseruni lidan luáguti agaranihani tuma siensia.

Uguñe weyu, biámañein luwuyeri bagü le o DIU. Anihein aban gaganati kóbüre, ani ménrengunti ladarirún Meriga lúmagiñe irumu 1988. Le aban ígiragüdati aban hormona, ani gumeseti alugurahóua lidan irumu 2001. Ka wasubudirubei luagu ligaburi lawadigimaridun katei burí le?

DIU lauti kóbüre. Kei aubei wariñagei, genegeti adüga lan DIU lun hénrengu lan lawinwandun espermatozoide dan le lásügürün tídangiñe tagei würi lun lachülürün lumoun tani würi óvulo. Luagu amu oubaü, gayaraati ladügün DIU lauti kóbüre lun lounwen espermatozoide. * Saminawati giñe adüga lan DIU somu asansiruni tidan tagei würi.

DIU le gaganati hormona. Anihein ámuñegueinarügü luwuyeri DIU le gaganati aban hormona tibe to tídanboun saragu tídangiñe pili to hátuboun würiña lun madageinadun hamá. Ígiragüdati luwuyeri DIU le aban hormona tidan tagei würi. Genegeti adüga lan katei le lun máfunadun lan ni aban óvulo harageirugu fiú würiña. Ani anhein ua lubéi óvulo siñati tadageinadun würi. Ariñawagúati giñe adüga lan luwuyeri DIU le lun labibiñedun bóugudigiñe tun tagei würi. * Adügati giñe lun ladurudun katei guyeguyeti le lídanbei tumegegun würi ani adügati lun siñá lan lawanserun esperama le ñǘdünbei lídangiñe tani würi vagina lun tidoun tagei.

Kei aubei warihei, genegeti adüga lan biángubei luwuyeri DIU somu asansiruni tidan tagei würi. Gama lumoun, anhein áfurida óvulo ani aba ladunragun luma esperma, gayaraati lebelurun tidoun tagei würi ani mabadülerunti ñein ladüga débilitu tagei. Gayaraati ladüraaguni katei le dageinaü dan le lagumeseruña lan. Gama lumoun, ariñagatiña aturiahatiña siensia luagu ua lan kamani lan lasuseredun le ani gayaraati lan giñe lasuseredun somu dan tau pili.

Ligíati, úati lunti lariñagun lau ichouruni adüga lan bagü lun madunragun lan óvulo luma esperma. Íbini ítara, anihein ariñahani tani siensia arufuduti luagu hénrenguti lan tadageinadun würi dan le tayusurun DIU ladüga sun katei le asuseredubei ani le uágubei ayanuhaadiwa lan.

Anhein hasaminaruña lubéi somu maríeitiña kristiánugu hayusuruni DIU, gayaraati háluahan aban surusia lun hasubudiruni ka burí lan luwuyeri DIU aniheinbei ani ka lan buiti luma wuribati gayaraabei lanügüni layusurún katei le tun würi. Moun lumuti hígirun lun desidírü hamá amu gürigia hawagu, ni surusia (Rom. 14:12; Gal. 6:4, 5). Maríeitiña hagía lúnbaña desidírü hamani úara kaba lan hadüga lun gayara lan hagundaaragüdüni Bungiu ani kipu hameime hasaminan harumañu (ariha huméi giñe 1 Timotéu 1:18, 19; 2 Timotéu 1:3).