KA UAGU lasusereda le nun? Nafuranguagüdaali hun. Wein-nefu lidan sedü-hati irumu 1929 nágurahoua ani lidan aban aüdü lani Bulacan, Filipína naweirida. Lidan dan ligía, anihein meha gudemei lidan ageiraü ani úati meha saragu katei wama. Fiú irumu lárigiñe, dan le aweirideina nubéi, aba lagumeserun wuribu. Aba hebelurun súdaragu hapónna Filipína, gama lumoun, kei weiri lubéi lidise fulasu le ñein lunbei wawinwanda, madagati wuribu ñeinhin. Maradiuntiwa meha, úatu meha bigibigitu wamá ni periodiku, hámagiñe amu waganbei ñunsu luagu le asuseredubei.

Widüñadiwa, au habiaman. Aba hanügünina nárugutinu awinwanda hama dan le widü lubéi irumu nau. Íbini meha katoliku wamá, mama meha aban gürigia daruti lisaminan náruguti, anuhein meha agumeiraguagüdüni luma to hedewehan lumadagu lun ha lídangiñetiña amu relihión. Haritagua nágili arufuda lanu garüdia Protección, Seguridad tuma Descubierta nun lidan iñeñein tagalo, * tuma giñe aban Bíbülia. Hínsiñeti meha nun naliihanu Bíbülia, tótima gádürü Ewanhéliu. Íderagua lumutina katei le lúntima nafalaruni le ladügübei Hesusu (Huan 10:27).

Gumuti lawuribuhan Hapón lidan irumu 1945. Ábati hamuriahan nagübürigu numa lun nagiribudun wábiñoun. Aba lariñagun náruguti nun lun nagiribudun, ítara liña nagiribudun awinwanda hama nagübürigu.

Murusun dan lárigiñe, lidan duusu-hati irumu 1945, aba hachülürün fiú gefentiña luagu Heowá Angatügiñe apurichiha le ñein lubéi wawinwanda. Aba lidin aban wügüri derebuguhali wábiñe aba lafuranguagüdüni woun le tariñagubei Bíbülia luagu “lagumuhóun dan” (2 Tim. 3:1-5). Aba lamisurahaniwa aturiahoun Bíbülia hama lílana aban sétanu ha adamuridagubaña lidan aban aüdü yarafa woun. Mídintiña nagübürigu, au ñǘdüntina. Añahein meha kéiburi 20 gürigia ñein ani adügatiña fiú hádangiñe álügüdahani tuáguti Bíbülia.

Úati meha gunfuranda nani sun le ariñawagúbei, ábagubei naranserun lun náfuridun. Dan le náfurida lan yebe, aba hagumeserun eremuha. Wéirigüda lumutu uremu ligía nanigi darí lun nerederun. Dan le lagumuchunbei  heremuhan, aba hadügün aban furíei ani aba hamisurahaniwa lidoun aban adamuridaguni le lunbei meha ladügǘn Angat leweñegua dimaasu.

Mosu meha wéibugun kéiburi widü kilómeturu (seingü maili) lun gayara lan wachülürün hábiñe iduheñu Cruz, le ñeinba lubéi ladügǘwa adamuridaguni. Añahein meha kei 50 gürigia ñein ani wéirigüda lumutu nanigi narihiniña irahüñü íchiga óunabagülei luagu tema hénrenguti le tídanbei Bíbülia. Lárigiñe nabasiihan fiú dan adamuridagua, aba lamisurahanina aban íbiri gíriti Damián Santos, aban prekursoru derebuguhali ani seriwihali meha kei gálidi, amisuraha lumutina arumuga lúbiñe. Sun áriebu wau adimureha tuagu Bíbülia.

Lidan dan ligía gíbetiña awanserutiña lau lóufudagun dan le hafurendeiruni inarüni le tídanbei Bíbülia. Málügidiwa meha abasiha adamuridagua dan le hálügüdünbadiwa anhein busén wabéi wabadiseirun. Aba nariñagun anha, ladüga furanguti meha nun busén nan neseriwidun lun Kristu (Kol. 3:24). Aba woudin lidan aba duna yarafa ñein, ani ñein habadiseira bián wádangiñe weyu 15 lidan bián-hati lidan irumu 1946.

Gunfuranda wamuti kei lan badiseihadiwa lubéi, mosu lan meha wáyeihani Hesusu ani apurichiha wagíame. Mínsiñeti meha saminaü le lun núguchi ani aba lariñagun: “Nibureingidibu lun bapurichihan. Lau habuluchagüdünibu dúnarugu madügünti lira lun bapurichihan”. Aba nafuranguagüdüni lun busén lan Bungiu lun wapurichihani uganu buiti luáguti Larúeihan (Mat.24:14). Ani aba nariñagun lun: “Mosu nagunfuliruni le füramase nubéi lun Bungiu”. Ligía lasiadirunina kei buga nabahüdaguni hun lidan lagumeseha abahüdaguni le. Mabusenrunti meha lun napurichihan. Ligía meha furumiñeti wéiyaasu nígiruni sun katei lun naganwoundagüdüni neseriwidun lun Bungiu.

Aba hamisurahanina iduheñu Cruz lun nawinwandun hama hábiñe Angat. Aba hínchahanina au tuma Nora, to tagumuhóun hasaani, lun weseriwidun kei prekursorugu. Biángubei wagía aba wagumeserun eseriwida kei prekursorugu 1 lidan unsu-hati irumu 1947. Aba tidin Nora eseriwida lidan amu fulasu, anhein au aba nerederun ídeha lidan apurichihani Angat.

Ǘrüwa meha irumu nau eseriwida kei prekursoru dan le líchugunbei Earl Stewart, aban íbiri tídangiñeti Beteli, aban yanu houn hóugiñe seingü san gürigia lidan párüke lani Angat. Lidan inglesi líchigei yanu ligía ani dan le lagumuchun aba násügüragüdün murusun lídangiñe yanu ligía lidoun iñeñein tagalo. Sedürügüñei meha irumu nidin leskuela, gama lumoun, lidan meha inglesi hayanuha máisturugu wama súnwandan. Ábaya katei le íderagubadina afurendeira inglesi buidu, naturiahan saragu agumeiraguagüdüni to tídangiñetu Bíbülia lidan iñeñein le, ladüga míbetu meha lidan tagalo. Íderagua lumutina le nafurendeirubei lun násügüragüdüni yanu ligía luma ámuya yanu lídangiñe inglesi.

Weyu le nasügüragüdübalin yanu le líchugubei íbiri Stewart, ariñagati lun damuriguaü táluahaña lan sukursáli aban o bián íbirigu lun tamisurahaniña lun heseriwidun Betelirugu. Mégeitiña meha ídemuei ladüga héibuga lan misioneru lidan aban adamurini le gíribei “Aumento de la Teocracia”, le adügǘbei lidan irumu 1950 Nueva York (Meriga). Au meha aban hádangiñe ha amisurahóubaña, ítara liña ábaya lan nígiruni fulasu le meha subudi naalibei, guentó lun nídehan Betelirugu.

Gumesetina lidan iseri neseriwidun Betelirugu weyu 19 lidan sisi-hati lidan irumu 1950. Tídanñoun meha aban binadu muna wéiritu Beteli ani geyegutiña meha tau tídibu wewe to wéinamutu, lidan aban fulasu 10,000 méturu lueirin. Añahein meha kéiburi aban dúsenu nibureintiña eseriwida ñein. Ídehatina meha gusinarugu binaafin. Lárigiñe, kéiburi ladaünrün nefu aba nidin asumuduha ñein lubéi tachibawagúa daüguaü. Ani aban katei ítarati nadügübei rábounweyu. Sigitina eseriwida betelirugu íbini lárigiñe hagiribudun misioneru lídangiñe adamurini. Aranseha numutu meha agumeiraguagüdüni lun nóunahanu tidan koréu, au meha arihibei lau tamuriahóun garüdia ani au meha giñe eresibirubaliña gürigia ha achülürütiña Betelirugu óunabahanei gágamuru, adüga numuti sun le amuriahóubei numa.

Lidan irumu 1952, aba lichugún aban lubuidun ñunsu nun luma houn sisi íbirigu filipinana. Hamisurahañadiwa meha lun woudin lidoun külase númeru 20 tidan Galaadü. Saragu lídangiñe katei le warihibei Meriga iseri meha woun ani ámuti meha warihini. Le linarün katei, ámuti meha luéi le nasubudirubei lidan liraüraü aüdü le meha ñein lubéi nawinwanda.

Kei hénpulu, mosu meha wafurendeirun ayusura ílagu le lauti elekütrisida luma burí umegeguni  le meha ibidiñeti woun. Ámuti meha giñe ligaburi dan ñein. Aban weyu, aba náfuridun bóugudin binaafin ani sun üma buin liña lau katei haruti. Ligía meha furumiñe wéiyaasu narihin niewe. Aba níchugun fe luagu weiri lan tidili.

Sun katei le narihinbei úati konparárua lan luma lubuidun chansi le nibihibei lun nidin tidan Leskuela Galaadü. Ha arufudahabaña buiti meha ligaburi harufudahan. Íderagua hamutiwa lun wasagarun saragu buiti lídangiñe le waturiahabei luma lídangiñe le wakutihabei. Íderagua lumutina le nafurendeirubei tidan Galaadü lúntima labuidurun numadagua luma Bungiu.

Lárigiñe eresibihani, aba hóunahanina eseriwida luagu murusun dan kei prekursoru espechaliti Bronx, uburugu Nueva York. Ligíati, lidan sedü-hati irumu 1953 ñǘdüntina lidan Adamurini le gíribei “Sociedad del Nuevo Mundo”, le adügǘbei ñeinmeme. Lárigiñe lagumuchun adamurini, aba nagiribudun lun Filipína agunfulira lau aban iseri dasi.

Aba hariñagun íbirigu ha tídanbaña Beteli nun lun lan nabisidahani burí damuriguaü le lídanbei aban sirkuitu. Líchugubei meha eseriwidúni le chansi nun lúntima nafalaruni lupasun Kristu, le aweiyasuhabei lidoun burí aüdü luma uburugu le díseti lun lóunigiruniña lumutuniña Heowá (1 Fe. 2:21). Sirkuitu le meha unbei netenira lídanñein Luzón ubouhu le wéiritimabei Filipina. Anihein meha giñe amu fulasu laganagua kei Bulacan, Nueva Écija, Tarlac luma Zambales. Lun nidin lidoun fiú aüdü mosu meha namudeiruni wübü le raramatimabei. Machülütü meha ugunei to anügüboun pasaheru lidoun burí fulasu ligía, ítara liña namuriahan hama abugahatiña durugu lun hígirunina lun nidin ligibuagu durusu le hanaahabei. Barǘ hamutina meha libe-agei dan, íbini gürewei lan laweiyasuhóun ítara.

Libe-agei damuriguaü iseri meha ani ñǘraüti. Gúndaatiña meha íbirigu lau níderaguniña lun buídutima lan haransehan luba adamuridaguni luma lubá apurichihani.

Lárigiñe, aba hóunahanina lidoun amu sirkuitu ani abisidaha numuti sun damuriguaü le lídanbei fulasu le gíribei Bicol ani anihein meha lirahüñü sétanu le díseti lidan sirkuitu ligía. Añahein meha prekursorugu espechalitiña ñein ha apurichihabaña lidan iseri fulasu. Tidan aban muna to ñein lubéi meha neredera ábanrügüñoun meha kumú ñein lau bián fulansu lun hefederagun gürigia. Dan le nadügürünbei luagu aba léiguadun lidoun huyu ani aba giñe néiguadun ñeinhin. Lǘtina arumadaguagüda nungua luba nidin ata bachati.

Lidan dan ligía nagumesera asaminara tuagun Nora. Bulaca meha tagumesera eseriwida kei prekursora ani guentó teseriwiduña kei prekursora espechalitu lidan uburugu Dumaguete. Ñǘdüntina abisidahóun, lárigiñe aba wagumeserun abürüha gárada wámagua. Lidan irumu 1956 aba wamarieidun. Sügǘ wamuti furumiñeti dimaasu lárigiñe wamarieidun abisidaha aban damuriguaü lidan ubouhu Rapu Rapu. Mosu meha wamudeihan wübü ani éibugatiwa  meha saragu, gama lumoun, aba meha ugundani nun neseriwidun houn íbirigu úara tuma nani weiriou lidan fulasu díseti kei fulasu ligía.

Barühadiwa meha gádürü irumu abisidahei burí damuriguaü dan le weresibirunbei gárada lun weseriwidun Betelirugu. Enerurugu lidan irumu 1960 wachülüra Betelirugun, lúmagiñe dan ligía awanhagua eseriwida ñein. Furendeihadina saragu lárigi nawadigimaridun hamá íbirigu ha gánibaña buligasion wéinamuti. Ánhounti Nora, adügaaru ámuñegueinarügü wadagimanu Betelirugu.

Íderagua láadina neseriwidun Betelirugu lun narihini átirihali lan lawanserun apurichihani Filipína. Dan meha le niábinbei furumiñeti wéiyaasu dan le mamarieidungidina, añahein meha kéiburi 10,000 apurichihatiña lidan sun ageiraü. Ani guentó, añahein kéiburi 200,000, ani haganagua añahein saragu san eseriwidutiña Betelirugu ha ídehabaña lun lawanserun apurichihani.

Kei le hanarime lubéi lawanserun apurichihani, aba warihin megei wamá aban fulasu le wéiritimati. Aba lamuriahan Musu Úaraguati wamá lun wáluahan aban fulasu lun tábunawagun aban Beteli to wéiritimatu. Aba nidin luma íbiri le arihibei lau imprimírua tan agumeiraguagüdüni álügüdaña wabesinanigu anhein busén habéi haluguruni hafulasun. Úatiña ni aban busentiña halugurahan, anihein aban hádangiñe ariñaguti woun: “Malugurahantiwa wagía le cheiní, agañeiharügütiwa”.

Aban weyu, aba lálügüdüniwa aban wabesina anhein busén wabéi wagañeihani lufulasun ladüga léibuga lan awinwanda Meriga. Adügati le lun lasuseredun saragu katei le buíduburiti. Aba giñe labusenrun ámuya wabesina laluguruni lufulasun ani aba layanuhan hama ha híbiri lun giñe hadügüni ligiaméme. Agañeiha wamuti íbini lufulasun wügüri cheiní le meha mabusenrunbei lalugurahan. Lidan murusun dan, aba laweiridun wafulasun ǘrüwa wéiyaasu. Furanguti nun luagu anihán lan meha le labuserunbei Heowá.

Lidan irumu 1950 au meha nibureintimagilibei hadan iduheñu Betelirugu. Ani guentó, au tuma nani weiriou wéiyatimahañabaña. Masakürihantina luagu nafalaruni Kristu lidan nibagari. Inarüni aba lan habugunina nagübürigu múnadagiñe, gama lumoun, rúhali Heowá saragu íbirigu nun niduheñume. Chouru naali ru lani Heowá sun le wemegeirubei woun, meberesenga ka lan idan weseriwida lun. Au tuma Nora seremei wamuti Heowá luagu sun katei buíduburiti le líchugubei woun, ani ínchaha wamutiña amu lun hóuchaguni Heowá (Mal. 3:10).

Luagu aban weyu, aba lamisurahani Hesusu aban aguburahati liseinsuna gumadi gíriti Matéu Lewí lun lafalaruni. Ida liña lóunabun? Ariñagati abahüdaguni: “Ábati lásaarun Lewí, aba lígiruni sun katei lánina binadu libagari, aba lidin luma Hesusu keisi lani disipulu lúmagiñe oura ligía” (Luk. 5:27, 28). Gíbeeli chansi nibihin lun nígiruni sun katei narigiñegua lun gayara lan nafalaruni Hesusu, ani amisuraha numutiña súngubei tídangiñe sun nanigi lun hadügüni ligiaméme lun hibihin saragu abiniruni.