1, 2. a) Ka wasubudirubei luagu iri Irumu lánina Esefuruni? (Ariha huméi rekuáduru “ Katei meha san Irumu lánina Esefuruni?”). b) Ka uagu layanuhan Hesusu lidan Lúkasi 4:16-19?

LIDAN fiu ageiraü aransehatiña lílana lun hadügün fedu espechaliti lun haritaguni 50 irumu lúmagiñe lagumeserun aban urúei agumadiha. Subudiwati fedu le lau iri Irumu lánina Esefuruni (Hubileu). Gayaraati ladurarun fedu le aban weyu, aban dimaasu o lóugiñe. Lau sun lira, súnwandan lagumuchuba lan, ani aba lagumuchun hagunda gürigia.

² Lidan arütíkulu le, wayanuhaba luagu aban fedu espechaliti lánina Esefuruni le buídutimati. Aban Fedu le buídutimati sügǘ luéi fedu le lánina Irumu lánina Esefuruni le hadügübei Ísüraelina sagü dimí san irumu. Binadu fedu ligía durati meha aban irumu ani le mini lubéi esefuruni houn gürigia. Ka uagu mosu lubéi wafurendeirun luagu katei le uguñe weyu? Ladüga haritaguagüda lumutiwa luagu buiti le adüga láalibei Heowá lun wibihin esefuruni lun súnwandan. Adimurehati Hesusu luagu esefuruni le, aba esefuruni le gayara halibei lahuudun woun (aliiha huméi Lúkasi 4:16-19).

3. Según Fádirigu 25:8-12, ida liña hasagarun ísüraelina buiti lídangiñe Irumu lánina Esefuruni?

³ Gayaraabei gunfuranda wamani le labuserunbei Hesusu lariñagun dan le layanuhabei luagu esefuruni ánhawa akutihei le lóunahabei Bungiu ariñaga houn ísüraelina luagu le lunbei hadügüni lidan Irumu lánina Esefuruni. Ariñagati Heowá: “Irumu dimí-san, hanügübei keisi irumu sánduti; ábanbei irumu lánina esefuruni houn sun lílana ageiraü. Sun wügüriña hagiribuduba  hamoun haduheñu, ibiha hameime hamúan lárigoun” (aliiha huméi Fádirigu 25:8-12). Lidan arütíkulu le lubaragiñebei le, ariha wamuti ida liña lan lahuudun houn ísüraelina lau inebe lan luéyuri emeraaguni houn. Guentó, wariha ida liña lan lahuudun Irumu lánina Esefuruni houn. Samina wamá aban lan ladúeihan aban ísüraelina ani aba laluguruni lumúan lun lafayeiruni ladúeihan. Lidan Irumu lánina Esefuruni, aba lagiribudawagüdün lumúan lun. Aba libihini wügüri le lumúan, ani adügati le lun meferidirun hamani lisaanigu halagan. Saminaya wamá luagu aban ísüraelina le ásügürübei lídangiñe maseinsuni, lun lafayeiruni ladúeihan, mosu meha lalugurun aban hádangiñe lisaanigu o laluguragun lungua. Lidan Irumu lánina Esefuruni aba hagiribudun idamuni hamoun “haduheñu”. Ítara liñati meferidirun lubalin aban idamuni lemenigin luagu lachülürüba lan burí dan lun lígirawagüdün. Ma saminati Heowá hawagun lubúeingu?

4, 5. Ka uagu súdini lubéi woun wafurendeirun luagu Irumu lánina Esefuruni le meha adügǘbei Ísüraeli?

⁴ Ka amu buiti asagarúnbei lídangiñe Irumu lánina Esefuruni? Ariñagati Heowá: “Úabaña gudemetiña haganagua, labinirubadibu Wabureme le Bubungiute lidan ageiraü le lunbei líchuguni bun keisi balagante” (2 Lur. 15:4). Mítaranti katei le luéi le asuseredubei uguñe weyu ubouagu, le ñein lubéi eibu lan dan rísitimarügü hamá ha rísibaña ani gudemetimarügütiña ha gudemebaña.

⁵ Mámaaña lábugiñe Lilurudun Moisesi kristiánugu. Mini lan le masigi wamani gumadi luáguti hígirawagüdün idamuni, ni lun lafayeihóun dúeiti ni luáguti lagiribudagüdün lumúan aban gürigia houn liduheñu (Rom. 7:4; 10:4; Efe. 2:15). Gama lumoun, gébunati lun webereserun lau Irumu lánina Esefuruni, ka uagu? Lugundun haritaguagüda lumutiwa luagu le ladügübei Heowá lun lesefuruniwa lídangiñe figóu.

6. Ka uéi megei wamá wesefurún?

⁶ Sun wagía busentiwa lun wesefurúniwa ladüga lidamun lan figóu wagía. Ladüga figóu,  ligía waweiyadunbei, wasandirubei ani hilagua wagía. Rútiwa fe luagu lirun gádantiwa, dan le waríagun woungua tidan isubusei o dan le woudin lumoun surusia ladüga sándiñadiwa lan. Nidiheritiwa giñe dan le wafigouhan. Subudi lumuti meha apostolu Pábulu anihein lan aban lúrudu lidan lúgubu, “igaburi lánina figóu” le gámabalin dáüwañu. Ani ariñagati: “Fugiabu au! Kaba san esefurana lídangiñe igaburi lánina figóu le nídanbei, le anügübalina lidoun óunweni?” (Rom. 7:23, 24).

7. Ka lariñagubei Isaíasi luagu esefuruni?

⁷ Adügati Heowá aransehani lau sun lugundan lun wesefurun lídangiñe figóu. Súdinitu ligaradan Hesusu lidan aransehani le. Lidan sígulu widü lubaragiñe lidaani Hesusu abürühati profeta Isaíasi luagu aban óunwenbu esefuruni lubá meha ámuñegü le meha lunbei buídutimabei lan sügǘ luéi le meha adügǘbei lidan Irumu lánina Esefuruni. Abürühati: “Anihein lani Bungiu sífiri nuagu, lugundun anúadira láadina Bungiu; óunaha láadina apurichihei iseri uganu houn gudemetiña, awalidaguagüdaña ha nidiheribaña, adimureha houn adaürǘtiña ha furisunrugubaña luagu áfuriduni” (Isa. 61:1). Ariha waméi ka lan uagu layanuha profesía le.

8. Ka meha uagu layanuhan profesía le lídanbei Isaíasi dan le layanuhabei luagu esefuruni?

⁸ Gumeseti profesía súdiniti luáguti esefuruni le agunfulira dan le lagumeserunbalin Hesusu lani ministeriu. Dan le lídinbei tidan haligilisin huríu uburugu Nasarétü le ñein lubéi meha laweirida, aba laliihani ligiaméme profesía houn huríu ha óundaragubaña ñein weyu ligía. Aba layusuruni dimurei le luouguoun: “Anihein lani Bungiu [s]ífiri [s]andu nuagu, ladüga anúadira láadina lun níchuguni uganu buiti houn gudemetiña; óunaha láadina lun námalihaniña ha nidiheribaña tidan hanigi, lun náfuridagüdüniña adaürǘtiña, lun níchugun arihini houn marihintiña, lun nesefuruniña ha ouserúabaña wuriba, luma lun nadimurehan luagu lidan lufulesein Bungiu houn gürigia” (Luk. 4:16-19). Ida liña lagunfuliruni Hesusu profesía le?

9. Ka meha luwuyeri esefuruni hayumahabei saragu gürigia lidan lidaani Hesusu?

⁹ Lidan furumiñeti sígulu, aba hagumeserun gürigia eresibirei esefuruni le lariñagubei Isaíasi lidan aban profesía luma le uágubei laliihan Hesusu. Chóurugüda lumuti Hesusu dimurei le dan le lariñagun: “Gúnfulihali dimurei le higibugiñe uguñe” (Luk. 4:21). Saragu gürigia ha aganbubalin másiñati ayumaha  hamá lun ñein lan sánsiguaü lidan polítika dan ligía lun gayara lan hesefurun lídangiñe habafu rómana. Másiñati samina hamá kei hasaminarun bián wügüriña ha ariñagubaña: “Ru wamuti yebe wemenigin luagu ligíaba lan esefurei Ísüraeli” (Luk. 24:13, 21). Subudi wamuti mariñagun lan Hesusu houn lani disipulugu lun hebedaagun houn rómana ha meha amudiragubaliña. Ariñagarügüti houn lun híchuguni “lani urúei lun urúei” (Mat. 22:21). Ligíati, ida liña lesefuruniña Hesusu gürigia ha lídanbaña lidaani?

10. Ka ídangiñe lesefuraña Hesusu gürigia?

¹⁰ Ñǘbuinti Liráü Bungiu lun líderaguniña gürigia lun hibihin bián luwuyeri esefuruni. Furumiñe, íderagua lumutiwa lun wesefurun lídangiñe luriban arufudahani hani alidihatiña relihión. Saragu huríu lidamun meha échuni ani charati meha hafiñen (Mat. 5:31-37; 15:1-11). Ha meha arihúbaña kei alidihatiña lúmagiñetiña Bungiu meseriwiduntiña meha lun Bungiu, ligíati ítara haña keisi marihintiña. Lau hamaharun lun Mesíasi luma lun inarüni le larufudahabei, sigitiña lidan luburiga luma kei lidamun figóu (Huan 9:1, 14-16, 35-41). Arufuda lumuti Hesusu inarüni ani ruti aban hénpulu buiti, arufudati houn gürigia ha ǘnabugubaña ida luba lan hesefurun lídangiñe arufudahani le mama inarüniti (Mar. 1:22; 2:23–3:5).

11. Ka ida amu igaburi líchiga Hesusu esefuruni?

¹¹ Libiaman, adügati Hesusu lun hesefurun gürigia lídangiñe lamudihan figóu. Seremei lun lani sákürifisiu, gayara lubéi ferudunawa lan hafigoun ha afiñebaña luagu lebegi esefuruni ani arufuda haméi lau ligaburi hawinwandun. (Ebü. 10:12-18). Ariñagati Hesusu: “Anhaün lubeiti nesefura, au le [...] Irahü, hesefuruba le tímatimaati” (Huan 8:36). Wéiriti esefuruni le sügǘ luéi le hibihibei ísüraelina lidan Irumu lánina Esefuruni. Kei hénpulu, aba gürigia le esefurubei lidan Irumu lánina Esefuruni gayaraati meha idamunya lan. Ani lárigiñe aba lounwen.

12. Kátaña asagarubaña buiti lídangiñe esefuruni le uágubei layanuha Hesusu?

¹² Lidan weyu Pentekosutesi irumu 33, ligía lanúadiruniña Heowá lau lani sífiri sandu apostolugu hama amu gürigia úaraguatiña. Aba lanügüniña keisi lirahüñü, ligíati lau lásügürün dan aba láguyuguagüdüniña lun harúeihan luma Hesusu sielu (Rom. 8:2, 15-17). Hagía furumiñetibaña asagara buiti lídangiñe esefuruni le uágubei layanuhan Hesusu tidan haligilisin huríu uburugu Nasarétü. Mámaaña meha lidamun arufudahani mama inarüniti ni  lidamun échuni le úati tidan Bíbülia le hani alidihatiña relihión. Ariha lumutiña giñe Bungiu kei gürigia séfuhaña luéi óunweni le lanügübei figóu. Irumu lánina Esefuruni le hani kristiánugu le agumeserubei lau hanúadirun lánigu Kristu disipulugu lidan irumu 33 lidaaniwagu Hesusu, lagumuchuba lidan lagumuchagüle Milu irumu le lánina Larúeihan Hesusu. Kaba ibihúa?

13, 14. Kátaña gayaraabei habihini esefuruni le uágubei layanuhan Hesusu amu hawéi kristiánugu anuadirúaaña?

¹³ Lidan wadaani, añahein saragu míñunu gürigia ǘnabugutiña hádangiñetiña saragu néchanigu hadan “amu mudún” (Huan 10:16). Manúadirun lumutiña Heowá lun harúeihan luma Hesusu sielu, le hemenigibei hawinwandun lun súnwandan ya ubouagu. Ligía san wagurabubei?

¹⁴ Gumese haadiwa ibiha fiu katei huuti lídangiñe le hibihibei ha arúeihabaña luma Kristu sielu. Kei hénpulu gayaraati wamuriahan ferudun luma Bungiu seremei afiñeni le wawagubei luagu lebegi sákürifisiu le ladügübei Hesusu. Resibi wamuti lugundan Bungiu luma aban saminaü darangilati (Efe. 1:7; Aruf. 7:14, 15). Samina wamá luagu buiti le wasagarubei lídangiñe wesefurun lídangiñe afiñeni mama inarüniti le meha uágubei wafiñera luagu saragu irumu. Ariñagati Hesusu: “Ábame hasubudiruni inarüni, ábame lesefurunün inarüni”  (Huan 8:32). Adügati esefuruni le lun gunda wamá.

15. Kaba esefuruni wibiha ámuñegü, ani kaba abiniruni wibiha le lunbei wagundaarun lau?

¹⁵ Gayaraabei wibihin aban esefuruni wéiritimati ámuñegü. Yarafa madise lagidarunu Hesusu relihión mama inarünitu luma lagübüri arúeihani le lani wügüri. Lóunigirubaña Bungiu “saragu gürigia” ha lubúeingu ani líchuguba saragu abiniruni houn lídanme paraísu ubouagu (Aruf. 7:9, 14). Ani lásaragüdünbaña giñe saragu míñunu gürigia ha lúnbaña gachansin hamá lun hesefurun lídangiñe le lanügübei lifigoun Adán (Adü. 24:15).

16. Ka lubuidun esefuruni hagurabubei gürigia?

¹⁶ Lídanme Arúeihani le lánina Milu Irumu le lani Hesusu, ligía hama ha arúeihabaña luma híderagubaña gürigia lun hibihin lubuidun átuadi lúmaya lun lirahüñü hamá Bungiu. Lídanme dan ligía le lánina laransehóun sun katei luma esefuruni, ítara luba kei Irumu lánina Esefuruni le hani ísüraelina. Sunme ha úaragubaña lun Heowá danme ligía, mafigoun hañame. Sefu hañame lídangiñe figóu.

17. Ida luba habagari lubúeingu Bungiu según Isaíasi 65:21-23? (Ariha huméi dibuhu le luágubei tidáü garüdia).

¹⁷ Lidan Isaíasi 65:21-23 (aliiha huméi) ariñaga lumuti bérusu le ida luba lan ibagari ámuñegü lidan Ubóu. Másügürün habéi lubúeingu Bungiu dan madügünga ni kata. Ariñagatu Bíbülia hadügüba lan wadagimanu huuti ani buiti. Gayaraati wachoururuni danme lan lagumuchun dan ligía “lesefuruba [...] ubóu lídangiñe asufuriruni luma agadeiruni le gádanbalin lun gafanranbei lan lidan haweirigun lirahüñü Bungiu” (Rom. 8:21).

18. Ka uagu gayara lubéi wafiñerun luagu buiti le lunbei liabin ámuñegü?

¹⁸ Heowá meha arihibei lun gadaani hamá ísüraelina lun hawadigimaridun luma lun hemeraagun, ani ligiamémeba ladüga houn lubúeingu lídanme Arúeihani le lánina Milu Irumu le lani Kristu. Chóuruti heteniruba lan lun katei lánina hamadagua luma Bungiu, ítara kei uguñe weyu, ítara luba giñe lidan iseri ubóu, súdinibei láhudurawagun lun Bungiu lun libihín ugundani. Sun gürigia ha úaragubaña gúndaabaña ladüga buídubei lan hawadigimari ani heseriwiduba lun Heowá.