1. Ka dasi líchugubei Heowá houn agübürigu?

ADÜGA lumuti Heowá Adán tuma Ewa lun gasaanigu hamá. Ligía tariñagubei Bíbülia: “Wasaanigu [...], aban abiniruni rísiti hagía lun Aburemei” Heowá (Sal. 127:3). Lun gunfuranda wamani le mini lubéi dimurei burí le, samina wamá aba lan lamuriahan aban wamada wama lun wóunigiruni saragu seinsu le lúmabei. Ma gúndaabadiwa hamuga lau lafiñerun wawagu? Lidan le aban oubaü wadiheriduba yebe ladüga ibidiñebei lan woun ida luba lan wóunigiruni. Aban katei ítarati ladügübei Heowá, le besi wamada, ru laali dasi le houn agübürigu, aban dasi le gebegitimabei sügǘ luéi seinsu: lun hóuseruniña hasaanigu buidu luma lun hadügün lun gunda hamá.

2. Kaba álügüdahani ounabúa lidan arütíkulu le?

² Ka lúnbaña harihin anhein gasaanigubaña lubéi maríeitiña luma átiribaña lan? Ani, ka lunbei hadügüni agübürigu lun gunda hamá hasaanigu? Ariha wamá fiu adundehani tídangiñeti Lererun Bungiu le gayaraabei líderaguniña maríeitiña kristiánugu lun buidu lan le lunbei hadügüni.

3. a) Kátaña lúnbaña hariñaguni anhein gasaanigubaña lubéi maríeitiña o masaanigubaña lan? b) Ka adundehani tídangiñeti Bíbülia lunbei haritaguni umadagu hama haduheñu maríeitiña?

³ Añahein gagaburi hamuti lárigiñe lan hamarieidun gürigia agurabatiña lun gasaanigu hamá lau lóufudagun. Másiñati gayara lan hadügüdarun haduheñu hama amu gürigia hawagu lun hafalaruni échuni le. Afuranguagüda lumuti aban íbiri asiana gíriti Jethro, ariñagati: “Lidan damuriguaü, añahein hádangiñe  íbirigu ha gasaanigubaña dǘgüdatiña hawagun ha masaanigubaña lun gasaanigu hamá”. Abahüdahati Jeffrey aban íbiri le giñe asiana, aba lariñagun: “Añahein ariñagutiña houn íbirigu maríeitiña ha masaanigubaña kaba lan óunigiraña danme le haweiyadun”. Le linarün katei, kada maríeitiña hagía lun harihini anhein gasaanigubaña lubéi lumoun masaanigubaña lan. Hagía guánarügü lúnbaña harihin luagu lira (Gal. 6:5). Inarüni busén hamá umadagu hama iduheñu lun gunda hamá maríeitiña, gama lumoun lunti haritaguni umadagu hama iduheñu maríeitiña lan lúnbaña harihin anhein gasaanigubaña lubéi lumoun masaanigubaña lan (1 Tim. 5:13).

4, 5. a) Ka bián katei lunbei hayanuhani adarigu? b) Afuranguagüda huméi ka lan dan buídubei lun hayanuhan adarigu libügürü katei le?

⁴ Ánhaña asaminara aban feru maríeitiña gasaanigu hamá, mosu hayanuhan luagu bián katei súdiniti: furumiñe, kaba lan dan gasaanigu hamá ani le libiaman, átiribaña lan. Ábaya katei, ka dan buídutimabei lun layanuhóun luagu katei le? Ani ka uagu súdini lubéi lun layanuhóun luagu bián katei le?

⁵ Buídutimabei hayanuhani adarigu lubaragiñe hamarieidun anhein gasaanigubaña lubéi lumoun masaanigubaña lan, súdiniti lun hebelurun lidan úarani lidan kesi le. Mosu giñe hasaminarun anhein aranse habéi lubá buligasion le. Añahein gürigia ha sun liña hamarieidun himei hamuti lásügürün aban o bián irumu lubá gasaanigu hamá, lugundun mégeiwati saragu dan luma erei lun letenirún houn isaanigu. Gunfuranda hamuti lau lan hagurabahan líchuguba lan dan houn lun héchudun luagu iseri habagari keisi maríeitiña luma lun hederebudagüdüni habagari (Efe. 5:33).

6. Lau gabaroun wamani dan le ídanbei wawinwanda, ka hadügübei fiu maríeitiña?

⁶ Añahein kristiánugu yusu hamuti hénpulu hani ǘrüwa lisaanigu Noé hama hánigu weiriou, luagu marahüñü hamá lau lóufudagun (Agu. 6:18; 9:18, 19; 10:1; 2 Fe. 2:5). Góubaguagüda lumuti Hesusu wadaani lumoun “lidaani Noé”, ani inarüni wawinwanduña lan lidan “weyu hénrenguti” (Mat. 24:37; 2 Tim. 3:1). Lau gabaroun wamani le, añahein hádangiñe maríeitiña himei hamuti masaanigu hamá guentó lun gayara lan haganwoundagüdüni heseriwidun lun Bungiu.

7. Ida luba líderaguniña adundehani le lídanbei Lúkasi 14:28, 29 maríeitiña luma le lídanbei Ariñawagúni 21:5?

⁷ Lau hañuurun asaminara anhein gasaanigubaña lubéi lumoun masaanigubaña lan ani átiribaña lan, maríeitiña ha saminabaña lunti  hasaminarun furumiñe “átiribei lan [h]agastarun” (aliiha huméi Lúkasi 14:28, 29). Agübürigu ha barühañabaña saragu irumu agüriaha irahüñü subudi hamuti mámarügüñein lan seinsu agastarua, gástawati giñe dan luma erei lidan hagüriahóun irahüñü. Ligía, súdini lubéi lun hálügüdagun maríeitiña houngua: “Mosu san wawadigimaridun biángubei lun wibihini le hemegeirubei wasaanigu? Ligiaméme san wasaminan luagu le súdinitimabei? Ánhawa hamuga ayabuha biángubei wagía, kaba óunigiraña wasaanigu? Kaba igaburi o échuni háyeiha?” Maríeitiña ha añuurubaña akutihei álügüdahani le gabaroun hamuti dimurei le lídanbei Ariñawagúni 21:5 (aliiha huméi).

8. a) Ka lénrengunga lunbei hasaminaruni agübürigu kristiánugu luagu? b) Kaba ladüga wügüri maríeiti le hínsiñetu lani weiriou lun?

⁸ Dandu úguchili kei úguchuru mégeitiña saragu dan luma erei lun hetenirun houn hasaanigu. Ligíati, ánhaña gasaanigu saragu ani gabügürügua, gayaraati hénrengubei lan lun letenirún lun kada aban. Añahein maríeitiña ha ásügürübaña lídangiñe sügǘ le ariñagatiña sandigua hamá houngua lau lubucha uagu. Másiñati súnwandan lan buchá lan tuagu úguchuru, adügati le lun mere tan lun taturiahan, lun tafurieidun luma lun tapurichihan gabügürügua. Gayaraati giñe adüga lan katei le lun gaturobulin tan lun tíchugun arigei lidan adamuridaguni luma lun tasagarun buiti lídangiñe. Inarüni wügüri lan maríeiti le hínsiñetu lani weiriou lun ladügübei sun liyaraati lun líderagunu lidan damuriguaü luma múnada. Kéiburi, lídehan lau fisiu múnada ani láfaaguba lun hagundaarun súngubei lidan áhuduraguni hadan iduheñu sagü dimaasu ani héchubei lun láfuridun apurichiha tuma lani weiriou habu lisaanigu.

9, 10. Ka katei súdiniti lunbei hadügüni agübürigu ha busenbaña híderaguniña hasaanigu?

⁹ Ka gayaraabei hadügüni agübürigu lun harufudahan houn hasaanigu lun línsiñedun Heowá houn? Ida luba hounigirún isaanigu luéi denchaü le ubouagubei? Ariha wamá fiu adundehani?

¹⁰ Amuriaha huméi lídehan Heowá lidan furíei. Ariha waméi le ladügübei Manóa úara tuma lani weiriou. Dan le tíchugubei fe luagu gasaani tubéi lan Sansón, aba tayumuragun lun Heowá lun lariñaguni tun ida luba lan tagüriaruni.

11. Ka lunbei hadügüni agübürigu lun háyeihani Manóa, ítara kei larufuduni Alidihati 13:8?

¹¹ Áyeiha lumuti Nihad tuma Alma, ha Bósünia luma Érüsegowina, le ladügübei Manóa. Abahüdahati Nihad: “Ítara kei Manóa, ayumuraguatiwa lun Heowá lun larufudahan woun lun agübürigu wamá ha buítiña. Óunaba lumutiwa  lidan ámuñegueinarügü igaburi: tau Bíbülia, tau agumeiraguagüdüni, lidan adamuridaguni luma lidan adamurini” (aliiha huméi Alidihatiña 13:8).

12. Ka larufudahabei Hosé tuma María houn hasaanigu?

¹² Arufudaha humá lau le hadügübei. Agübürigu, le hariñagubei houn hisaanigu súdiniti. Másiñati le lan hadügübei ligíaba lan ánhingichoun hanigi. Gayaraati wachoururuni arufudaha lan Hosé tuma María houn hasaanigu ani Hesusu haganagua. Mama nadagimeinrügüti Hosé saragu lun lanúriahaniña lisaanigu tabu lani weiriou, ínchaha lumutiña giñe lun gebegi lan áhuduraguni lun Heowá houn (2 Lur. 4:9, 10). “Ságüha irumu” lanügüniña lisaanigu tabu lani weiriou Herusaléun lun hefeduhani Luéyuri Esefuruni, íbini mafosurun lániña Lúrudu (Luk. 2:41, 42). Gayaraati añahein lan agübürigu lidan dan ligía asaminarutiña gürewei lan wéiyaasu ligía, migife ligía ani seru. Ánheinti lun Hosé, gebegiti meha lumadagua luma Bungiu lun ani arufudahati houn lisaanigu lun hadügüni ligiaméme. Ánhounti María luéigiñe tóubadina, subudi tumutu Sandu Bürütu. Chóuruti arufudaha tan houn tisaanigu lau le tadügübei luma le tariñagubei lun hínsiñe tan Lererun Bungiu houn.

13. Ka hadügübei aban feru maríeitiña lun háyeihani Hosé tuma María?

¹³ Nihad tuma Alma, ha uágubaña wayanuhan lidan párafu 11, áfaaguatiña lun háyeihani Hosé tuma María lun gayara lan híderaguni hasaani lun hínsiñe lan Heowá lun ani seriwi ligíame lun. Abahüdaha hamuti le hadügübei, ariñagatiña: “Áfaaguatiwa lun lafurendeirun wasaani arihei buiti le ibihúbei lau lafalarún adundehani le tídanbei Bíbülia lau larihini ligaburi wawinwandun”. Ani ariñagati Nihad: “Mosu wáfaagun lun gürigia wamá ha buiti hagaburi, igaburi le wabusenrubei lun wasaani”.

14. Ka uagu mosu lubéi hasubudiruni agübürigu ka lan uma gamadagua hamá hasaanigu?

¹⁴ Íderagua humaaña hisaanigu lun hanúadahan umadagu buintiña. Mosu lasubudiruni úguchili tuma úguchuru ka lan uma hóundaragua hasaanigu ani ka lan hadügübei. Mosu giñe hasubudiruni ka lan uma hayanuha o habürüha lidan gágamuru luma lidan páhina le ñein lubéi hadügǘwa umadaguaü. Hadügüba burí umadagu ha lun lasansirun ligaburi hasaminan luma hagaburi (1 Ko. 15:33).

15. Ka gayaraabei hafurendeirun agübürigu lídangiñe le ladügübei Jessie?

¹⁵ Ka lunbei hadügüni agübürigu anhein ibidiñe lubéi tuáguti konputadora luma gágamuru houn? Ariñagati aban úguchili filipinana gíriti Jessie: “Íbini ibidiñe lan tuáguti teknolohía woun saragu, madügünti lira lun siñá lan wayanuhan hama wasaanigu luagu burí gayara lan dencha lan katei le”. Mariñagunti houn lun mayusurun hamani ladügarügü siñá lani ligía tuma lani weiriou ayusura. Ariñagati: “Ariñagatina houn nisaanigu gayara lan leseriwidun gágamuru lun hafurendeirun amu iñeñe, lun haturiahan lubá adamuridaguni, luma lun haliihanu Bíbülia sagü weyu”. Agübürigu, ayanuhadün san hama hisaanigu luáguti lóunahoun lirahüñü uganu tuma burí iyawaü le áfuachubei lidan seksióun “Nibureintiña” lidan jw.org^®? Akutiha humaali san bidéu burí Maguchatibu san luéi gágamuru o tuéi konputadora? luma Buidulá bayusuruni páhina hounti umadagu hama? * Gayaraabei lahuudun ariñahani le hun lun harufuduni houn hisaanigu ida luba lan layusurún gágamuru buidu (Ari. 13:20).

16. Ka hadügübei fiu agübürigu ani ida liña lidin houn?

¹⁶ Saragu agübürigu adüga hamuti sun hayaraati lun hásügürün hasaanigu dan hama  gürigia ha eseriwidubaña lun Bungiu. Ligía ladügübei N’Déni tuma Bomine, aban feru maríeitiña lídangiñetiña Kosu Marüfíli. Héchutiña meha agunbirahei óunigiruti sirkuitu hábiñoun. Abahüdaguati N’Déni: “Buiti ladüga katei le lun wasaani. Aba prekursoru lan ani guentó leseriwiduña kei óunigiruti sirkuitu heweñegua amu óunigirutiña”. Agübürigu, gayaraati san hadügün aban katei libe le hawagu hisaanigu?

17, 18. Ka dan lunbei hagumeserun agübürigu arufudaha houn hasaanigu?

¹⁷ Gumese humá arufudaha houn hisaanigu lau lóufudagun. Buídutimabei gumese giñe humá arufudaha houn hisaanigu (Ari. 22:6). Ítara liña tadüga Eunise to lúguchu Timotéu, tuma Loida to lagütü, hagía arufudahabei lun lúmagiñe lagüriahóun (2 Tim. 1:5; 3:15). Lau lásügürün dan, aweiyasuhati Timotéu luma apostolu Pábulu.

¹⁸ Arufudahatiña giñe amu feru maríeitiña ha lídangiñetiña Kosu Marüfíli, gíritiña Jean-Claude tuma Peace, houn sisi hasaanigu lun línsiñedun Heowá houn luma lun heseriwidun lun. Ka íderagubaliña lun hibihini? Áyeiha hamuti le tadügübei Eunise tuma Loida. Ariñagatiña: “Aba wagumeserun arufudaha houn wasaanigu dan meha le figigiña” (2 Lur. 6:6, 7).

19. Ka mini lubéi dimurei arufudahabei Lererun Bungiu houn isaanigu?

¹⁹ Ka mini lubéi dimurei arufudahabei Lererun Bungiu houn isaanigu? Dimurei arufudahabei, mini lan, danbei arufudahani lichügüwagun irahü lau báguyuguagüdüni dimurei lun saragu wéiyaasu. Lun ítara luba lan, mosu lasügürǘn dan hamá isaanigu. Anihein dan gayaraabei lasandiragun gürigia lungua siñá lan lun lau láguyuguagüdün aban katei saragu wéiyaasu. Íbini ítara, gayaraabei harihini kei aban chansi lun híderaguniña hasaanigu gunfurandoun Lererun Bungiu luma lun gaganbadi hamá tun.

20. Afuranguagüda huméi ida luba lan ladügǘniwa le lariñagubei Sálumu 127:4.

²⁰ Subudi humaaña hisaanigu buidu. Lidan Sálumu 127 ariñagati ítara haña lan isaanigu kei aban “gimara” (aliiha huméi Sálumu 127:4). Ítara kei gayara lan tadügǘn gimara lau ámuñegueinarügü umegeguni luma ámuñegueinarügü iseisini, ámuñegueinarügütiña giñe isaanigu hawariuagua. Ligía lunti lubéi  harihin agübürigu ida luba lan harufudahan houn kada aban hádangiñe hasaanigu. Ariñagatiña aban feru maríeitiña íbirigu ísüraelina ka lan hadügübei lun heseriwidun bián hasaanigu lun Heowá, ariñagatiña: “Aturiaha wamutu Bíbülia luma kada aban”. Inarüni hachügüdinaba lan iduheñu arihei anhein ladügǘba lubéi ítara.

21. Ka ídemuei lúmagiñeti Heowá gayaraabei hagurabuni agübürigu?

²¹ Anihein dan másiñati sandigua hamá agübürigu houngua lau saragu katei hachügüwagu ladüga saragu lénrengunga le úmabei hagagibudagua lidan hagüriahaniña hasaanigu, lau sun lira, aban idewesei hagía lúmagiñeti Heowá. Aranseñu liña lun líderaguniña agübürigu. Ruti arigei lun hafurieidun ani óunaba lumuti tau Bíbülia, tau agumeiraguagüdüni, sügǘ luma adundehani le híchugubei agübürigu kristiánugu ha subudi haali luáguti hagüriahóun isaanigu houn.

22. Ka katei buídutimabei gayaraabei híchuguni agübürigu houn hasaanigu?

²² Ariñawagúati hagüriahóun lan isaanigu aban lan kónpeni to aduraruboun 20 irumu, le linarün katei, mítaranti, lugundun magumuti agübürigu hamá agübürigu. Aba lídangiñe katei le gayaraabei híchuguni agübürigu houn hasaanigu ínsiñeni, dan, luma aban lubuidun arufudahani tídangiñeti Bíbülia. Ámuñegueinarügüti hóunabun isaanigu lun le arufudahóubei houn. Saragu hádangiñe ha aweinamudubaña hama agübürigu ha hínsiñehabubaña lun Heowá sandiguatiña houngua kei Joanna Mae, aban íbiri Asiana to ariñaguboun: “Dan le nasaminarun luagu harufudahan nagübürigu nun, seremei numutiña luagu hadundehanina luma harufudahan nun lun hínsiñe lan Heowá nun. Mama rúrugu hamuti nibagari nun, adügatiña giñe lun gasuuni lan” (Ari. 23:24, 25). Saragu míñunu lubúeingu Heowá sandi hamuti ligiaméme.