Mariñagunti Mafia tun Ewa anhoun lan ounwe tasigiruba lan tuani awinwanda anhoun eiga tídangiñe tin wewe to uáguboun leweridiraña Bungiu. Tídangiñe hewe lariñaga Satanási tun Ewa móunweboun lan. Mini lan lira tasigiruba lan lau ibagari ani tagundaaruba lan lau aban lubuidun ibagari ya ubouagu, aba ibagari sin Bungiu (Agu. 2:17; 3:3-5).

Subudi wamaali arufudahani lan iyeeniti luagu móunwedadi tan uani le wasubudirubei uguñe weyu mama Edén lagumesera, ídabugati lagumesera? Siñati wariñaguni lau saragu ichouruni. Subudi wamuti aba lan tagumuchagun relihión mama inarünitu lidan Guran lidan lidaani Noé. Kei Noérügüñein lan hama liduheñu asigira wínwanñu lárigiñe Guran ani lubúeingu Bungiu hagía, sun saminaü le tánina relihión mama inarünitu aban lagumuchagun.

Ligíati, arufudahani le uguñebei weyu luagu móunwedadi tan uani másiñati gumese lan lárigiñe Guran. Dan le lámuñedaguagüdüni Bungiu hererun lílana Babeli ani aba “lachagaraguniña Bungiu lidoun sun ubóu”, chóuruti barǘ hamani saminaü le hámagua luagu anuhein lan aban uani móunwedaditu hawagu gürigia (Agu. 11:8, 9). Ligíati ibidiñeti woun lau ichouruni ida buga lan lagumesera arufudahani iyeeniti le. Le wachoururubei Satanási lan le “lúguchibei iyeeni” ligía lan gadurunbei ani gunda lan luagu laburuchagun saminaü le lidan sun fulasu ubouagu (Huan 8:44).