Gayaraati san hóunabuni álügüdahani burí le luáguti ariñahani le áfuachubei tidan Garüdia Awisahatu to lánina irumu 2019?

Ka mini lubéi lani Bungiu füramasei le: “Úagili ni aban adügütu áruma to lunboun tagünrinchagunibu”? (Isa. 54:17).

Gayaraati wachoururuni lóunigirubadiwa lan Bungiu luéi furumiñeguarügü erei gagünrinchaguaditi, luéi “here wügüriña hanarimetiña” (Isa. 25:4, 5). Siñabei hadügün wáganiñu dañu woun lun sun dan (w19.01, páhina 6, 7).

Ida liña larihín richá lan Bungiu lidan ligaburi lóuseruniña kananna hama ísüraelina maganbaditiña?

Bei lumutiña Bungiu ha adügübaña magíaguni le hanarimeti liwiye ani bei lumutiña giñe ha óuserubaliña würiña hama irahüñü lau marichaü. Ánhañati ha gaganbadibaña lun, óusera hagía lau irichaü, biní lumutiña (w19.02, páhina 22, 23).

Kaba wadüga dan le lafurieidun somu gürigia le mama Gefenti warugabu?

Gayaraati werederun maniñu ani ábame wóuserun lau inebesei mariñagunga “ítaralá”, márügüdün wameime háhabu amu. Anhein busén wabéi gayaraati wafurieidun wagía woungua maniñu (w19.03, páhina 31).

Darí halía lébeda luriban ladügǘn iwiyei hau irahüñü?

Aban figóu ladügǘn iwiyei hau irahüñü, houn ha asufurirubalin, houn lílana damuriguaü, houn gumadimatiña luma lun Bungiu. Lidan burí fulasu le ñein lubéi lúrudu luáguti lunti lan habuyarúniwa ha adügübaña wuribani houn irahüñü, gaganbaditiña wéiyaaña lidan afiñeni lun (w19.05, páhina 9, 10).

Ida luba wasansiruni o wabuiduragüdüni ligaburi wasaminan?

Mosu wadügün ǘrüwa katei súdiniti: wafurieidun lun Heowá, wararamagun asaminara luáguti wasansiruni le tídanbei wanigi luma lun wanúadahaniña wamadagu buidu (w19.06, páhina 11).

Ka gayaraabei wadügüni guentó lun waranserun lubá éibaahouni?

Mosu wederebudagüdüni wamadagua luma Heowá, wachoururuni hínsiñe wamá lun ani maweiyasunbei lan ígirawa, luma lun waliihanu Bíbülia sagü weyu ani furíei wagíame súnwandan. Mosu wachoururuni lagunfuliruba lan abiniruni le lunbei lanügüni Larúeihan Bungiu ani adüga wamá lun lerederun bérusu luma uremu lánina alawahani lun Heowá le hínsiñetimabei woun wachügüwagu (w19.07, páhina 2 darí 4).

Ka gayaraabei wadügüni lun wíderaguniña waduheñu lun hasalbarun?

Súdiniti lun warufudun gudemehabu, warufudun aban lubuidun igaburi, gaguraasun wamá luma lun hínsiñehabu wamá (w19.08, páhina 15 darí 17).

Ítara kei füramasewa lan lidan Matéu 11:28, ida liña lemeraaguagüdüniwa Hesusu?

Añahein óunigirutiña ha buítiña wama ani hínsiñehabutiña, añahein paaná buítiña wama lidan eseriwiduni lun Bungiu luma lidan dasi le buídutimabei le lunbei wadügüni (w19.09, páhina 23).

Ida liña ladügün Bungiu lun busén wamá ru ligía erei woun lun wídehan lidan ladügǘn somu katei? (Fili. 2:13).

Dan le waliihanu Lererun Bungiu ani ráramagua wagía asaminara luagu le waliihabei, aban líchugun Bungiu bandi erei woun lun busén wamá wadügüni lugundan luma lun wadügüni. Gayaraati ladügün Heowá lau lani sífiri sandu lun wayusuruni ubafu le wawagubei lun wadügün somu wadagimanu (w19.10, páhina 21).

Ka katei lunbei wadügüni lubaragiñe wanúadiruni le lunbei wadügüni?

Anihein seingü: wakutihani katei buidu, wamuriaha lichú au luma Bungiu, wakutihani lébuna le lunbei wadügüni, wadügün aransehani buiti luma wasubudiruni gádantiwa (w19.11, páhina 27 darí 29).

Dan le lariñagunbei Satanási tun Ewa móunweboun lan, layanuhaña san tun luagu furumiñeti wéiyaasu tuagu uani móunwedaditu?

Genegeti uá lan. Mariñagunti Satanási tun Ewa tasigiruba lan tuani wínwanñu anhoun ounwe. Le lariñagunbei tun móunwenboun lan. Masigiti arufudahani tánina relihión mama inarünitu aburuchagua lárigiñe Guran. Másiñati gumese lan arufudahani luáguti móunwedadi tan uani aburuchagua lubaragiñe lachagaraguagüdüniña Bungiu gürigia ha ábunagubalin luayelesin Babeli (w19.12, páhina 15).