1. Ida liña harihini saragu gürigia wadagimanu?

IDA liña harihini hiibe-agei gürigia ha lídanbaña fulasu le ñein lubéi wawinwanda wadagimanu? Lidan saragu ageiraü nadagimeintiña gürigia saragu. Saragu hádangiñe bereseguñanu darí lun madaani hamá lun hemeraagun, ni lun hásügürün dan hama haduheñu ni lun hetenirun lun katei le lánina Bungiu (Apur. 2:23). Luagu le aban oubaü, añahein gürigia mínsiñeti houn hawadigimaridun, ásuhatiña lúnrügü madügün hamá ni kata (Ari. 26:13, 14).

2, 3. Ka hénpulu líchugubei Heowá luma Hesusu woun?

² Marufudunti igaburi le ariha hamani gürigia ha wadagimanu lau lubudubu. Gama lumoun, ka lasaminarubei Heowá luma Hesusu luagu wadagimanu? Chóuruti, hínsiñe lan wadagimanu lun Heowá. Afuranguagüda lumuti Hesusu lau lariñagun: “Nadagimeinti Núguchi chülǘ lumoun dan le, au nadagimeintina giñe” (Huan 5:17). Samina wamá hawagun saragu sífirigu ha ladügübaña Heowá sielu, luma saragu katei le ladügübei lidan ubóu le ñein lubéi wawinwanda. Ligía lariñagubei abürühati sálumu: “Gíbeti burí katei le adüga báalibei Aburemei! Lau lichú aau badügei súngubei; arihúati sun katei le badügübei lidan sun fulasu!” (Sal. 104:24).

³ Hesusu le arufudubalin lichú lau Bungiu, áyeiha lumuti. Íderagua lumuti Hesusu Lúguchi ani ñeinñein meha luma dan le ‘ladügünbalin sielu’, nadagimeinti úara luma kei aban nadagimeinti hemeniti (Ari. 8:27-31). Saragu dan lárigiñe, dan meha le ya lubéi ubouagu, adügati aban wadagimanu buiti.  Barǘ lumuti meha wadagimanu ligía keisi aban éigini, lidan sun le ladügübei arufuda lumuti luagu Bungiu lan óunahabalin (Huan 4:34; 5:36; 14:10).

4. Ka wafurendeirubei luagu Heowá luma luagu Hesusu libügürü emeraaguni?

⁴ Arufudati san hénpulu le líchugubei Heowá luma Hesusu luagu mama lan mosu wemeraagun? Uá. Mabuchadaditi luagu Heowá, ligía memegeirun lubéi lun lemeraagun kei wagía. Ani ariñagatu Bíbülia lárigiñe lan ladügüni sielun luma Ubóu aba “lásurun luadigimari, aba lemeraagun” (Afu. 31:17). Genegeti le lan mini lubéi dimurei le aba lan lararamuni Heowá luadigimari ani aba ladireirun dan lun lagundaarun lau le adüga láalibei. Ánheinti Hesusu íbini nadagimein lan meha saragu dan, dan le ya lubéi ubouagu, emeraaguati ani hou ligía hama lumadagu (Mat. 14:13; Luk. 7:34).

5. Ka san hénrengubei houn saragu gürigia?

⁵ Ariñagatu Bíbülia woun wagía lubúeingu Bungiu, lun wawadigimaridun, lun ua lan magúali wamá (Ari. 15:19). Gayaraati wawadigimaridun lun wanuriahaniña waduheñu. Ani sun kristiánugu gani wamuti buligasion lun wapurichihani uganu buiti. Ani luagu le aban oubaü, mégeitiwa giñe wemeraagun saragu. Hénrenguti san woun wasubudiruni átiribei lan dan wau nadagimein, átiribei lan dan wau lidan ministeriu luma emeraagua? Ida luba wasubudiruni átiribei lan dan wau nadagimein luma emeraagua?

6. Ida liña larufuduni Márükosu 6:30-34 ariha lani Hesusu wadagimanu luma emeraaguni lau lubudubu?

⁶ Súdiniti lun wasubudiruni átiribei lan dan wau nadagimein. Abürüha lumuti urúei Salomón dimurei le lau lídehan Bungiu: “Gadaaniti sun katei ya ligibuagu ubóu le”, ayanuhati luagu lidaani ábunaguni, aransehani, ayahuni, éherahani luma efeduhani (Apur. 3:1-8). Furanguti súdini lan bián katei le lidan ibagari, wadagimanu luma emeraaguni. Ariha lumuti Hesusu bián katei le lau lubudubu. Lidan aban ókaasion dan le hagiribudunbei apostolugu lídangiñe apurichihani hanarimeti meha lubucha hawagu “darí lun madaani lan Hesusu hama lani disipulugu ni lun heigin”, aba lariñagun Hesusu houn: “Higougu, keimoun wemeraagua lidan aban fulasu le darangilati” (aliiha huméi Márükosu 6:30-34). Ni ligía ni lani disipulugu memeraaguntiña kei le aubei habusenra. Gama lumoun, subudi lumuti Hesusu sun lan hagía megei hamá hemeraagun.

7. Ida luba líderaguniwa waturiahani lúrudu luáguti luéyuri emeraaguni?

⁷ Anihein dan mégeiwati lun lemeraawagun murusun o wadügün amu katei. Arufuda lumuti gumadi le líchugubei Heowá houn ísüraelina lidan Lilurudun Moisesi: mosu lan meha inebe lan weyu lánina emeraaguni houn. Mámaadiwa lábugiñe Lilurudun Moisesi, íbini ítara, gayaraati wasagarun buiti lídangiñe waturiahan luagu le ariñawagúbei luagu weyu lánina emeraaguni. Le lunbei wafurendeiruni líderagubadiwa lun wakutihani ida liña lan warihini wadagimanu luma emeraaguni.

8. Según Áfuriduni 31:12-15, ka meha lunbei hadügüni ísüraelina lidan luéyuri emeraaguni?

⁸ Ariñagatu Lererun Bungiu lárigiñe lan lisisin “weyu” aba lararamuni Heowá ladügüni katei ubouagu (Agu. 2:2). Ligíati, hínsiñeti lun Heowá luadigimaridun, ani aniheingua awadigimarida lidan amu igaburi (Huan 5:17). Aban hénpulu, lúrudu le lánina luéyuri emeraaguni le wadarirubei lidan Agumesehani, mini lan le lawadigimariduniwa sisi weyu ani le lisedün lun lemeraawagun. Ariñagati Bungiu  luagu luéyuri emeraaguni ligía lan liseininbei hama ísüraelina. Aban meha weyu lánina emeraaguni ani sagüráuti meha lun Heowá (aliiha huméi Áfuriduni 31:12-15). Moun lumuti meha hawadigimaridun gürigia, ni irahüñü, ni idamuni. Nírügü ibiñanigu (Afu. 20:10). Íderagua lumutiña katei le ísüraelina lun hetenirun lun hamadagua luma Bungiu.

9. Ka saminaü charati hawagubei gürigia luáguti luéyuri emeraaguni lidan lidaani Hesusu?

⁹ Buiti meha luéyuri emeraaguni houn lubúeingu Bungiu. Gama lumoun, saragu alidihatiña relihión lidan lidaani Hesusu rútiña meha lanarime lúrudu luáguti ida luba lan inebe lan weyu ligía houn gürigia. Ariñagatiña siñá lan nírügü hátügürün türigu o hareidaguagüdün aban sánditi (Mar. 2:23-27; 3:2-5). Marufudun lumuti saminaü le ligaburi lisaminan Heowá, ani afuranguagüda lumuti Hesusu houn ha aganbubalin.

10. Ka larufudahabei Matéu 12:9-12 luáguti ida liña lan larihini Hesusu luéyuri emeraaguni?

¹⁰ Dandu Hesusu hama ha afalarubalin emeraaguatiña meha lidan luéyuri emeraaguni ladüga gaganbadi hamá lun Lilurudun Moisesi. * Arufuda lumuti Hesusu luagu le ladügübei luma le lariñagubei lunti lan lasaminarun gürigia hawagu amu ani gayara lan ladügün gürigia katei buiti hawagun amu weyu ligía. Ariñagati furangu: “Ka lunbei ladügǘniwa lidan luéyuri emeraaguni, buiti odi wuribati?” (Aliiha huméi Matéu 12:9-12). Masaminarungubeiti ladüraaguñein lan lúrudu le lánina luéyuri  emeraaguni lau ladügün aban katei le buiti. Arufuda lumuti buiti le ladügübei súdini lan lébuna lun mawadigimariduniwa lan weyu ligía. Kei hemeraaguña lan ísüraelina luéigiñe hawadigimari le lánina sagü weyu, gayaraabei meha hetenirun lun katei le lánina hamadagua luma Bungiu. Yusu hamuti meha liduheñu Hesusu luéyuri emeraaguni lun háhuduragun lun Bungiu, kei lachoururuni le waliihabei luagu le ladügübei Hesusu uburugu Nasarétü. Ariñagatu Bíbülia: “Aba lebelurun tidoun haligilisin huríu lidan luéyuri emeraaguni kei ligaburi, aba lararamun lun laliihan tidan Lererun Bungiu” (Luk. 4:15-19).

11. Ka íchugubei aban hénpulu buiti lun Hesusu luáguti wadagimanu dereti?

¹¹ Chóuruti dan le lan meha aniha lan Hosé arufudahei hawadigimari sarafangei lun Hesusu, le lanuriahan, meferidirun lumuti Hosé chansi lun larufudaha lun ida liña lan larihini Bungiu wadagimanu (Mat. 13:55, 56). Chóuruti ariha lani Hesusu Hosé nadagimein sagü weyu lun lanúriahaniña liduheñu. Ani dan lárigiñe aba lariñagun Hesusu houn lani disipulugu: “Garichati nadagimeinti lun lafayeiruaha” (Luk. 10:7). Ligíati subudi lubéi lidere wadagimanu lun Hesusu.

12. Ka bérusu arufudubalin le tarufudahabei Bíbülia luagu wadagimanu dereti?

¹² Subudi lumuti meha apostolu Pábulu ka lan mini lan lawadigimariduniwa here. Téniti meha lúntima lapurichihan luagu liri luma luagu luganute Hesusu. Gama lumoun, nadagimeinti meha lun lanuriagun lungua. Subudi hamuti meha tesalónikana nadagimein lan ani áfaagua ligía ‘áriebu wéyuagu, lun mámabei lan aban ihürügu lun ni aban’ (2 Tesa. 3:8; Adü. 20:34, 35). Lau dimurei le, másiñati layanuhaña lan luagu le ladügübei Korintu. Rédeiti luma Akila luma tuma Pürisíla nadagimein úara lugundun “aban lan lifisiute hama —tadaawagun kianpu”. Lau lariñagun nadagimein lan “áriebu wéyuagu” úati mini lan le memeraagun lan. Kei hénpulu, yusu lumuti luéyuri emeraaguni lun lapurichiha houn huríu, ha giñe mawadigimaridunbaña weyu ligía (Adü. 13:14-16, 42-44; 16:13; 18:1-4).

13. Ka gayaraabei wafurendeirun lúmagiñe Pábulu?

¹³ Ruti apostolu Pábulu aban hénpulu buiti. Íbini mosu lan meha lawadigimaridun, hóuchati meha lun lapurichihani “uganu lúmagiñeti Bungiu” (Rom. 15:16; 2 Ko. 11:23). Ínchaha lumutiña amu lun hadügüni ligiaméme. Ligíati, Akila tuma Pürisíla íderagubalin ‘lidan leseriwidun lun Hesukrístu’ (Rom. 12:11; 16:3). Ruti Pábulu adundehani houn korintuna lun bereseguñu hamá “lidan luadigimari Wabureme” (1 Ko. 15:58; 2 Ko. 9:8). Ani abürühati lau lídehan Bungiu: “Le máhabei luadigimaridun, meigalá” (2 Tesa. 3:10).

14. Ka labuserunbei Hesusu lariñagun lau dimurei burí le lídanbei Huan 14:12?

¹⁴ Wadagimanu le súdinitimabei lidan lagumuhóun dan le lapurichihóun luma lun hadügǘn disipulugu. Ariñagati Hesusu hadügüba lan ha afalarubalin katei wéinamutimati sügǘ lau (aliiha huméi Huan 14:12). Mama lariñaguña hadügüba lan milaguru kei ligía, le labuserunbei lariñagun hapurichihaba lan ani arufudaha hagíame lidan lidise-agei fulasu ubouagu houn saragu gürigia luagu saragu irumu.

15. Ka álügüdahani lunbei wadügüni ani ka uagu?

¹⁵ Anhein anihein lubéi aban wadagimanu wama álügüdagua wamá woungua: “Subudiwatina san kei aban nadagimeinti buiti? Gumú numuti san nuadigimari lau dan, ani adüganéi buidu?”. Anhein óunaba wabéi anha, másiñati lafiñeruba lan wábuti wawagun ani aranseñu haba wánigu paaná lun haganbuni uganu buiti. Luagu le aban oubaü, luagu apurichihani  le wadügübei luma hadügǘn disipulugu, álügüdagua wamá woungua: “Subudiwatina san kei gürigia ha áfaagubaña saragu lidan ministeriu? Aransetina san lubá nagiribudun abisidahaña gürigia? Giributina san abisidahaña gürigia lau lóufudagun ha arufudubaña busén hamá hafurendeirun? Ani apurichihatina san lidan ámuñegueinarügü igaburi?” Ánhawa óunaba anha, másiñati minisi wamá ha buítiña ani gunda wagía lau wadasin.

16. Ida liña amu lan larihini Hesusu hama apostolugu emeraaguni lumoun ligaburi harihini saragu gürigia ha lídanbaña wadaani?

¹⁶ Subudi lumuti meha Hesusu dandu lan ligía kei lani apostolugu anihein lan dan megei hamá hemeraagun. Ani lidan meha dan ligía, ítara kei uguñe weyu, añahein meha saragu gürigia ha ítarabei hagaburi kei ligaburi wügüri rísiti le uágubei labahüdahan Hesusu. Ariñagati wügüri ligía luougua “emeraaguabá, houba, guraba, gundaaguabá” (Luk. 12:19; 2 Tim. 3:4). Le meha súdinitimabei lun wügüri ligía lemeraagun luma lun lagundaarun lau lúmati. Ánheinti Hesusu hama apostolugu metenitiña lun ugundani le lánina ibagari.

17. Ka wadügübei lidan lidaani wemeraagun?

¹⁷ Álugatiwa wáyeihani Hesusu lau wayusuruni wadaani mámarügü lun wemeraagun, yusu wamuti lun wapurichiha luma lun woudin adamuridagua. Ligíati, ariha wamuti bián katei le kei katei sagüráuti, ligía wadügübalin sun wayaraati lun gadan lániwa súnwandan (Ebü. 10:24, 25). Ñǘdüntiwa adamuridagua ani áluahatiwa chansi lun wayanuhan luagu inarüni houn gürigia íbini dan le wasariñahaña lan, meberesenga halía lan (2 Tim. 4:2).

18. Ka labuserunbei Hesukrístu le Warúeite lun wadügüni?

¹⁸ Seremei wamuti Hesukrístu le Warúeite, luagu marabachun lan luagu ni aban oubaü luma lau líderaguniwa lun warihini katei lau lubudubu luáguti wadagimanu luma luáguti emeraaguni (Ebü. 4:15). Busenti lun wemeraagun buidu. Ani busenti giñe lun wawadigimaridun buidu lun wibihini le wemegeirubei luma lun wáfaagun lun wagunfulirun lau lubuidun dasi le lánina hadügǘn disipulugu. Lidan leweñegua arütíkulu, warihibei ka lan ladügübei Hesusu lun lesefuruniwa lídangiñe aban lanarime luriban amudirawaguni.