“Ru humá seremei” luagu sun katei
“SANDIGUATINA san nungua kei aban gürigia geteingiraditi?”. Ligía aban álügüdahani le lunbei wadügüni sun wagía. Ariñagatu Bíbülia lidan lanme wadaani meteingiradibaña lan saragu gürigia (2 Tim. 3:2). Chóuruti subudi wamá gürigia ha afiñebaña le lan hámabei o le lan heresibirubei yu lan houn ani marihin hamuti lunti lan híchugun seremei luagu. Úatiña ni aban hínsiñetiña hibe gürigia ha houn.
Ánheinti Heowá ariñagati houn lubúeingu: “Geteingiradi humá” ani “ru humá seremei” luagu sun katei (Kol. 3:15; 1 Tesa. 5:18). Le linarün katei, sagatiwa buiti dan le geteingiradi wamá. Ka uagu? Ariha wamá fiu resun.
DEREBUGÜDA LUMUTI GETEINGIRADI LIGABURI WASANDIRAGUN WOUNGUA
Aban katei le adügübei lun geteingiradi wamá ladüga adüga lan lun buidu lan wasandiragun woungua. Dandu le getengiradibei kei le eresibirubalin sandiguatiña houngua buidu. Ka uagu? Samina waméi le. Anhein aranseñu liña lubéi aban gürigia lun ladügün somu katei wawagu, ladüga samina lan yu lan woun ani ladüga berese lan wau. Ligía adügübei lun buidu lan wasandiragun woungua. Chóuruti anihán lan katei le asuseredubei tun Rudu. Dan le mangi lubéi Boosu tun, másiñati aban lan tasandiragun tungua lau ugundani lau tarihin anihein lan somu gürigia bereseti tau (Rudu 2:10-13).
Le linarün katei lunti geteingiradi wamá lun Bungiu. Chóuruti anihein lan dan samina wamá luagu saragu idewesei le líchugubei Bungiu woun luma luagu le aniheinguabei íchigei (2 Lur. 8:17, 18; Adü. 14:17). Le linarün katei, úati buídurügü lan lau wagundaarun lau sun le líchugubei Bungiu woun, mosu giñe wadireirun dan lun wasaminarun hulili luagu líchigadi woun luma houn waduheñu. Ítara luba wasandiragun woungua geteingiradi wamá ani chouru wameime weiri lan wínsiñe lun ani gebegi wagía lun (1 Huan 4:9).
Amu luéi wasaminarun hulili luagu líchigadi Heowá luma luagu labinihan, teinki waméi giñe luagu lareini (Sal. 100:4, 5). Ariñawagúati dan le lan “geteingiradi lan gürigia adüga lan katei le lun gunda lan”.
DEREBUGUDA LUMUTI GETEINGIRADI UMADAGUAÜ
Ábaya resun ka lan uéigiñe buidu lubéi lun geteingiradi wamá ladüga derebugugüda lumuti wamadagua. Sun wagía mégeitiwa lun wasandiragun woungua gebegi wamá. Dan le wíchugun eteingiruni tídangiñe sun wanigi lun aban gürigia le adügübei fulesei woun aba laganwoundun wamadagua luma (Rom. 16:3, 4). Luagu le aban oubaü gürigia le geteingiradibei másiñati aransetima lan lun líderagun amu. Kei le ariha lubalin ida liña lan líderawagun, sandiguati lungua mosu lan lóuseruniña amu lau areini. Gúndagüda lumutiwa wíderaguniña gürigia wáledigu kei lariñaguni Hesusu: “Gúndaatimáati le íchugubei sügǘ lau le erésibirubei”, (Adügaü [Hechos] 20:35, Lerérun Búngiu to lánina iséri darádu).
Ariñagati Robert Emmons, libiaman ábuti luagu aban aturiahani luáguti geteingiradi, le adügǘbei tidan aban Luban furendei Íñutu Kalifornia: “Lun geteingiradi lan gürigia, mosu larihín ida liña lan gamadagua lan hama amu; anihein dan ladügüba somu gürigia somu katei wawagu, aniheinbei giñe dan wagíaba lan adügei hawagun amu”. Ani le linarün katei lun gabagari wamá luma lun gunda wamá, mégeitiwa hámagiñe amu lidan 1 Ko. 12:21). Ha geteingiradibaña rútiña fe luagu le hadügübei amu hawagu. Anhein ítara liña lubéi, gagaburi wamuti san igaburi le lun geteingiradi wamá?
saragu katei. Kéiburi, gayaraati líchugun aban gürigia éigini woun o lanügüniwa lumoun surusia (ÍDERAGUA LUMUTIWA GETEINGIRADI LUN BUIDU LAN WASAMINAN
Ábaya katei le adügübei lun geteingiradi wamá íderagua lumutiwa lun buidu lan wasaminan. Anihein dan nadagimei lan wasaminan kamá aban áseigülei, ígirati lun lásügürün fiu katei ani mígirunti lun lásügürün ítaga katei. Gürigia le geteingiradibei héchuti etenira lun katei le buídubei ani lóuguati letenirun lun turobuli. Eibu geteingiradi wamá, eibu warihin katei buiti, ani adügati katei le lun geteingiraditima wamá. Íderagua lumutiwa ligaburi wagagibudagun luma ibagari lun wadügüni le lariñagubei apostolu Pábulu: “Gunda humá súnwandan, ladüga lídanñadün aban luma Wabureme” (Fili. 4:4).
Ánhawa geteingiradi, masaminarunbadiwa wuriba. Hénrenguti lun lasandirun gürigia gimugaü, íruni luma lareidahan igarigu anhein geteingiradi lubéi. Ábaya katei, gürigia ha geteingiradibaña manigitiña umegegu, lugundun gúndaatiña lau le hámabei ani máluguntiña lun hibihin lanwoun hámati (Fili. 4:12).
TENI WAMÁ LUN KATEI BUITI LE WAWAGUBEI
Subudi wamuti wagía le kristiánugu hínsiñe lan hamuga lun Satanási lun lábürüha warüna luma lun wírudagun ladüga lénrengunga le úmabei wagagibudagua lidan lagumuhóun dan le. Hínsiñeti hamuga lun lun wasaminarun wuriba súnwandan luma lun wekeharun luagu sun katei. Ladügüña hamuga igaburi le lun lougua lan were lidan wapurichihani uganu buiti. Le linarün katei, ánhawa geteingiradi, warufudubei anihein lan igaburi le líchugubei sífiri le lani Bungiu wawagu. Kéiburi, gúndaabadiwa ani wafiñeruba luagu Bungiu (Gal. 5:22, 23).
Wagía lubúeingu Bungiu darí guentó úaratiwa lau sun le ariñawagúbei luagu geteingiradi. Gama lumoun rútiwa giñe fe mama lan súnwandan geteingiradi wamá ni lun wasaminarun buidu. Mábürüha lan warüna. Gayaraati wadügün lun geteingiradi wamá luma lun gagaburi wamani igaburi le. Ligíati, samina wamá sagü weyu luagu katei le uágubei lunti lan wíchugun seremei. Éibutima wadügüni ménrenguntimabei woun geteingiradi wamá. Ani gúndaabadiwa sügǘ hau ha etenirubaña lun turobuli le lánina ibagari. Samina wamá luagu katei buiti le adüga láalibei dandu Bungiu kei amu gürigia lun hínchahaniwa lun gunda wamá. Gayaraati giñe wabürüdüni sagü weyu tidan aban tiraüraü kuadernu biama o ǘrüwa katei le uágubei lunti lan wíchigun seremei lun Heowá.
Ariha hamaali sásaamu dan le lan geteingiradi lan gürigia sansi lan ligaburi lawadigimaridun sesu ani ménrengunti giñe lun buidu lan wasaminan. Ani gürigia ha geteingiradibaña gúndaatimatiña. Ligíati teni wamá lun katei buiti le wámabei, sagá wamá buiti lídangiñe sügǘ buiti le lánina ibagari ani geteingiradi wamá. Lubaragiñe wabulieiduni katei, adüga waméi le tariñagubei Bíbülia: “Ru humá eteingiruni lun [Heowá], ladüga buiti”, “ru humá seremei lun luagu sun le asusereduti” (1 Kro. 16:34; 1 Tesa. 5:18).