ARÜTÍKULU LÁNINA ATURIAHANI 51
Subudi wamuti san Heowá buidu?
Heowá, “ha subudihabúbaña bun, hemenigitiña buagu, ladüga mágurun bumutiña ha áluahabalibu” (SAL. 9:10).
UREMU sn 34 Íchiga uéiriguni lun liri Heowá
LE LUNBEI WATURIAHANI *
1, 2. Ítara kei le asuseredubei lun Angelito, ka lunbei wadügüni kada aban wádangiñe?
GEFENTIÑA san luagu Heowá bagübürigu? Anhein ítara liña lubéi, haritaguabei luagu meresibirún lan umadaguaü luma Bungiu kei alagan. Ligíati, anhein heseriwiduña lubéi wagübürigu lun Heowá o meseriwidun hamá lun, kada aban wádangiñe lunti láfaagun lun gamadagua lan luma.
2 Ariha waméi likesin aban íbiri gíriti Angelito, le aweiridubei hadan iduheñu gefentiña luagu Heowá. Dan meha le nibureingili masandiragunti lungua yarafa lun Bungiu. Ariñagati: “Neseriwidubei lun Heowá ladüga busén nan nadügüni ligiaméme kei niduheñu”. Aba lagumeserun adireira dan lun laliihanu Bíbülia luma lun lasaminarun hulili luagu le laliihabei tidan, ani aba giñe lagumeserun afurieida gabügürügua. Aba lariñagun ida liña lan lidin lun: “Aba níchugun fe anhein lan nasubudira Núguchi Heowá le hínsiñebei nun buidu, ítararügüba lan nasandiragun nungua yarafa lun”. Adügati labahüdahan lun wadügün bián álügüdahani súdiniti: ida liña amu lan wasubudirun somu katei luagu Heowá lumoun wasubudiruni buidu? Ani ida liña wasubudiruni Heowá?
3. Ida liña amu lan wasubudiruni Heowá lumoun wasubudiruni buidu?
3 Másiñati afiñe wamá subudi lan Heowá woun ladüga subudi lan liri woun o fiu lídangiñe katei le lariñagubei o le ladügübei. Íbini ítara, úati buídurügü lan lira. Lunti wadireirun dan lun wafurendeirun luagu luma luagu lubuidun igaburi le luágubei. Ítararügüba wagumeserun gunfurandei
ka lan lébunabei lariñagun luma ladügün somu katei. Líderagubadiwa le lun wasubudiruni anhein hínsiñe lubéi le wasaminarubei lun luma le wadügübei. Danme gufuranda wamaali le lagurabubei Heowá wámagiñe, lunti wadügüni.4. Ida luba líderaguniwa wakutihan fiu hénpulu tídangiñeti Bíbülia?
4 Másiñati hadügün gürigia bula wau ladüga busén wamá weseriwidun lun Heowá, ani gayaraati híchuguba lan lidere dan woun danme le wagumeserun abasiha adamuridagua. Ánhawa afiñera luagu Bungiu, mígirun lubadiwa. Ítara luba wíchugun lébuna lun gamadagua wamá luma le lunbei ladurarun lun sun dan. Gayaraati san wasubudiruni Heowá buidu buidu? Anha. Arufudati le hadügübei wügüriña charatiña kei burí Moisesi luma urúei Dawidi luagu gayara lan. Ariha waméi le hadügübei ani warihibei ida liña lan hadüga lun hasubudiruni Heowá luma ka lan lunbei wafurendeiruni hámagiñe.
ARIHA LUMUTI MOISESI “BUNGIU LE MARIHÍNBEI”
5. Ka lanúadirubei Moisesi ladügün?
5 Ru lumuti Moisesi le lafurendeirubei lidan libagari. Dan meha le 40 lubéi irumu lau aba lidin luéigiñe hóubadina ebüréu, ha lumutuniña Bungiu, lubaragiñe “lanügǘniwa keisi tiráü liráü lurúeite Ehiptu” (Ebü. 11:24). Aba líchuguni Moisesi lanagan luagu aban ubaraü súdiniti. Lau lidin luéigiñe hóubadina Ebüréu, ha meha idamuni Ehiptun, láhüreruñein meha libagari lau lagañidagüdüni faraón, aban gumadimati gabafuti ani le hanügübei ehiptuna kei bungiu. Chóuruti arufuda lan Moisesi aban lanarime afiñeni luagu Heowá. Adügati katei le lun ñein lan aban umadaguaü hadan le durati (Ari. 3:5).
6. Ka wafurendeirubei lúmagiñe Moisesi?
6 Ka wafurendeirubei? Ítara kei Moisesi, sun wagía lunti wanúadiruni anhein weseriwiduba lubéi lun Bungiu o meseriwidunbadiwa lan luma anhein hádangiñebadiwa lubéi lumutuniña. Másiñati mosu lan wadügün sákürifisiu lun weseriwidun lun Heowá luma wasufuriruni héibaahaniwa ha ibidiñehabúbaña lun. Gama lumoun ánhawa afiñera luagu Wáguchi le siélubei chóuruti líderagubadiwa lan.
7, 8. Ka lasigirubei Moisesi afurendeira?
7 Sigiti Moisesi afurendeira luagu ligaburi Heowá luma lun ladügüni lugundan. Kéiburi dan le lamuriahabei Heowá luma lun lesefuruniña ísüraelina, mégeiti meha Moisesi lasandiragun lungua chóuruñu ani ariñagati lun Bungiu saragu wéiyaasu masandiragun lan lungua lau iyarani lun ladügüni dasi le. Arufudati Bungiu aba lanarime gudemehabu lun ani íderagua lumuti (Afu. 4:10-16). Kei le aubei warihei, ruti Moisesi aban uganu dǘgüdati lúmagiñeti Bungiu lun faraón. Lárigiñe, aba larihini Moisesi Heowá ayusurei lubafu dan le lesefurubaliña ísüraelina ani aba lagumuchun lau faraón luma hau lisudaranigu lidan barana Funati (Afu. 14:26-31; Sal. 136:15).
8 Lárigiñe lasagaruniña Moisesi ísüraelina Ehiptugiñe, súnwandan meha hekeharun. Sun dan ligía aríagu liña meha Moisesi lun lanarime gurasu le larufudubei Heowá lidan lóuseruniña lumutuniña ha lesefurubaña lídangiñe amudirawaguni (Sal. 78:40-43). Gefenti giñe Moisesi lau lubuidun ǘnabuguni le larufudubei Heowá, ladüga sansi lumuti meha Heowá lisaminan dan le lamuriahabalin Moisesi luma (Afu. 32:9-14).
9. Ida liña larufuduni Ebüréu 11:27 lumadagua Moisesi luma Heowá?
Ebüréu 11:27). Ani ariñagatu Bíbülia: “Ábaha ladimurehan Bungiu luma Moisesi gagibugu, kei ladimurehan aban gürigia luma lumada” (Afu. 33:11).
9 Lárigiñebei láfuridun Moisesi Ehiptugiñe aba gamadagua lan luma Heowá buidu buidu kamá hamuga aríagu liña lun Lúguchi le siélubei (aliiha huméi10. Ka lunbei wadügüni lun wasubudiruni Heowá buidu?
10 Ka larufudahabei le woun? Lun gayara lan wasubudiruni Heowá, amu luéi wafurendeirun luagu ligaburi, mosu wadügüni lugundan. Ani kati lugundanbei Heowá uguñe weyu? Óunabatu Bíbülia: “Le busenbei lun hasalbarun sun gürigia, lun giñe hayabin lun hasubudiruni inarüni” (1 Tim. 2:3, 4). Aba igaburi lun wadügüni lugundan lau warufudahan houn amu gürigia luagu.
11. Ka uagu wasubudirei Heowá buidu buidu dan le warufudahan houn amu luagu?
11 Liibe-agei dan subudi wamuti Heowá buidu dan le warufudahan houn amu luagu. Kéiburi, ariha wamuti lugudemehabu furangu dan le ladundehaniwa lun wapurichihan houn gürigia ha haruma tanigi (Huan 6:44; Adü 13:48). Gefentiwa giñe luagu tubafu Lererun Bungiu dan le hibihin gürigia ha aturiahabarun Bíbülia wama lun hígiruni luriban hechun luma lau híchuguni iseri hagaburi lidan habagari (Kol. 3:9, 10). Lau líchugun Heowá saragu chansi houn gürigia lun hasubudiruni luma lun hesefurun, ligía aban ichouruni lánina luguraasun (Rom. 10:13-15).
12. Según Áfuriduni 33:13, ka lamuriahabei Moisesi ani ka uagu?
12 Gebegiti meha lun Moisesi lau gamadagua lan luma Heowá. Íbini lárigiñe ladügün saragu milaguru lidan liri Bungiu aba lamuriahan lau inebesei luma lun lasubudiruni buidu (aliiha huméi Áfuriduni 33:13). Gádürü-wein meha irumu lau Moisesi, gama lumoun, subudi lumuti meha luagu aniheingua lan saragu katei lun lafurendeirun luagu Lúguchi le siélubei, le hínsiñehabubei.
13. Ida luba warufuduni gebegi lan wamadagua luma Bungiu woun?
13 Ka wafurendeirubei? Lunti lan gebegi lan wamadagua luma Heowá woun súnwandan, meberesenga átiri lan dan wau eseriwida lun. Aba igaburi lun warufuduni lun lau wayanuhan luma lidan furíei.
14. Ka uagu súdini lubéi furíei lun wasubudiruni Bungiu buidu?
14 Lun derebugu lan hamadagua bián gürigia mosu hayanuhan súnwandan. Ligíati, yarafa wamá lun Heowá lau wafurieidun lun súnwandan, masandirunga ni murusun anufudei lun wabahüdahani le wasaminarubei luma le wasandirubei lun (Efe. 6:18). Ariñagatu aban íbiri turukíana gíritu Krista: “Sagü nariñaguni lun Heowá le nasaminarubei, aba narihini líderagunina, ani hínsiñeti nun saragu ani eibu dan aba nafiñerun luagu. Lau narihini lóunabuni nafurieidun ábatima inarünitima lan nun. Ani guenlé barǘ numuti kei Núguchi ani kei Numada”.
“ABAN WÜGÜRI LE AUBEI NAGUNDAARA”
15. Ka lariñagubei Heowá luagu urúei Dawidi?
15 Lidan aban néchani le meha deregeguaali lungua lun Bungiu lagüriahóua urúei Dawidi. Mama falarügü lumuti échuni le tani relihión le ñein habéi lagübürigu. Ligía guánarügü aba gamadagua lan luma Bungiu, ani sanditi meha Heowá aban ínsiñeni espechaliti luagu. Heowá guánarügü ariñagubei luagu Dawidi: “Aban wügüri le aubei nagundaara” (Adü. 13:22). Ida liña ladüga Dawidi lun gamadagua lan buidu luma Heowá?
16. Ka lafurendeirubei Dawidi luagu Heowá lau laríaguni le ladügübei?
Sal. 19:1, 2). Ani ariha lumuti giñe lanarime lichú lau Heowá dan le lasaminarun ida liña lan hadügǘn gürigia (Sal. 139:14). Lidan lálugun lun gunfuranda lani lanarime lubafu Bungiu aba lasandiragun lungua kei ni kata (Sal. 139:6).
16 Seremei lun le ladügübei Heowá lafurendeirubei Dawidi luagu. Dan meha le nibureingili, sügüti meha saragu oura áraabu óunigiraña lilügüniña lúguchi mudún. Másiñati ligía lan dan lagumesera asaminara luagu le ladügübei Heowá. Kéiburi dan le larihiña saragu waruguma ha siélubaña, mámarügü ariharügüti bandi waruguma, saminati giñe luagu ligaburi le Adügübaliña. Ligía katei le ínchahabalin lun labürühani dimurei burí le ariñagubei: “Abahüdagua lumuti sielu luéirigun Bungiu, adimureha ligía woun luagu le ladügübei lau lúhabu” (17. Ka gayaraabei wafurendeirun lau wasaminarun luagu le ladügübei Heowá?
17 Ka wafurendeirubei? Teni wamá lun le ladügübei Bungiu. Magufurumada wamá láurugu wawinwandun lidan lubuidun ubóu le ladügübei Heowá; adüga wamá lun wagundaarun lau. Lau wadügüni wadasin le lánina sagü weyu, samina wamá luagu le larufudahabei sun le geyegubei wau woun luagu Bungiu kei burí: nadü burí, animaalugu, hama gürigia. Ítarati, sagü weyu buin waba lau arufudahani luáguti Wáguchi le hínsiñehabubei (Rom. 1:20). Ani warihibei laganwoundun ínsiñeni le wasandirubei luagu sagü weyu.
18. Ítara kei larufuduni Sálumu 18, ka lasubudirubei Dawidi?
18 Ariha lumuti Dawidi lídehan Heowá. Kéiburi dan le láfarubei aban liñún luma aban osu lun lóunigiruniña lilügüniña lúguchi mudún, subudi lumuti láfarunbaaliña lan animaalugu gáñitiña hagía seremei lan lun lídehan Bungiu. Dan le láfarunbalin Dawidi Goliadi le hígandei, furanguti larihini Heowá lan íderagubalin (1 Sam. 17:37). Ruti giñe fe luagu Heowá lan íderagubalin dan le lanurahanbei luéi urúei Saulu le gimugabei (Sal. 18). Aba gürigia le pántati aba hamuga lanügüni sun uéiriguni luouguoun. Ladüga ǘnabugu lan Dawidi ligía larihinbalin lúhabu Heowá lidan libagari (Sal. 138:6).
19. Ka larufudahabei lani Dawidi hénpulu woun?
19 Ka larufudahabei lani hénpulu woun? Amu luéi wamuriahan luma Heowá lun líderaguniwa, lunti wálugun lun warihini ida buga lan ani ida liña lan líderaguniwa. Ánhawa ǘnabugu subudi wabéi ka lan wayaraabei adüga, ménrengunbei woun warihini ru lani Heowá le wemegeirubei woun. Ani ságüme warihini lídehan, éibume dan derebugutimaabei lan wamadagua luma. Ítara liña lasuseredun lun aban íbiri gíriti Isaac, fíyina le barühalibei saragu irumu eseriwida lun Heowá. Ariñagati: “Dan le nasaminarun luagu ida liña lan meha nibagari, aba níchugun fe ida liña lan líderagunina Heowá lúmagiñe nagumeserun aturiahoun Bíbülia. Adügati le lun inarüni lan Heowá nun”.
20. Ka buiti lasagarubei Dawidi lau gamadagua lan buidu luma Bungiu, ani ka wafurendeirubei lúmagiñe?
20 Áyeiha lumuti Dawidi ligaburi Heowá. Adüga lumutiwa Heowá lau iyarani lun wáyeihani (Agu. 1:26). Éibume wasubudirun luagu ligaburi, éibutima genege wamani. Óusera lumutiña meha Dawidi amu gürigia kei ladügüni Lúguchi le siélubei ladüga subudi lani buidu. Samina wamá luagu le asuseredubei lun urúei le. Aba lafigouha ligibugiñe Heowá dan le lagabarahanbei tuma Betüsawé ani aba ladügün lun lafarún tani würi to weiriei. Íbini afigouha lan ligibugiñe Heowá, arufudati Heowá gudemehabu lun (2 Sam. 11:1-4, 15). Ka uagu? Ladüga áyeiha lumuti Dawidi ligaburi Bungiu lau meha larufudun gudemehabu houn amu gürigia. Kei gamadagua lubéi Dawidi luma Heowá chülüti lun aban lan urúei le hínsiñetimabei lun ani adimurehati buidu luagu dan le layanuha hawagu lurúeitegu Ísüraeli. (1 Uru. 15:11; 2 Uru. 14:1-3).
21. Según Éfesuna 4:24 luma 5:1, ka buiti asagarúbei lídangiñe wáyeihani ligaburi Bungiu?
21 Ka wafurendeirubei? Lunti wáyeihani Heowá. Mámarügü sagarügübadiwa buiti lídangiñe le, adügati giñe lun wasubudiruni buidu. Dan le wáfaagun lun ítara lan wagaburi kei ligaburi Bungiu, arufuda wamuti lirahüñü wamá (aliiha huméi Éfesuna 4:24; 5:1).
ÁFAAGUA WAMÁ LUN WASUBUDIRUNI HEOWÁ BUIDU BUIDU
22, 23. Kaba asusereda ánhawa awinwandei le wafurendeirubei luagu Heowá?
22 Kei le aubei warihei, arufudaguati Heowá lungua lau katei le ladügübei luma tau Lererun to Bíbülia. Buin tiña líburu móubatu to lau sügǘ le gayaraabei wáyeihani le hani burí lubúeingu Bungiu ha úaraguabaña, kei burí Moisesi luma Dawidi. Adüga laali Heowá lufanran. Guentó, woun latokara lun wadügüni sun wayaraati lun wasubudiruni.
23 Maweiyasunbadiwa ígirei wafurendeirun luagu Heowá (Apur. 3:11). Mama wasubudirun luagu súdinibei, le súdinibei wíchuguni lidan wabagari le wafurendeirubei luagu. Ánhawa awinwandei le wafurendeirubei ani áfaagua wagíame lun wáyeihani Wabungiute le hínsiñehabubei, lasigiruba ayarafada woun (Sant. 4:8). Chóurugüda lumuti woun tidan Lererun mígirun lubaña lan ha áluahabalin.
UREMU sjj 1 Ligaburi Heowá
^ par. 5 Saragu gürigia afiñetiña anihein lan Bungiu, lau sun lira, ibidiñeti houn buidu. Ka mini lubéi lasubudiruniwa Bungiu? Ani, ka lunbei wafurendeiruni lúmagiñe Moisesi, urúei Dawidi luma ida luba lan gayara lan gamadagua wamá woungua luma Bungiu? Lidan arütíkulu le, wóunabubei álügüdahani burí le.