1, 2. Ka lunbei gabaroun hamani agübürigu dan le hadügün hasaanigu álügüdahani luagu hafiñen?

 ARIÑAGATIÑA saragu agübürigu hénrengu lan hagüriarúniwa irahüñü. Ligíati, anhein háfaaguña lubéi lun hagüriaruniña hisaanigu ha ñǘbürigiñabaña ani híderaguñanu lun derebugu lan hafiñen, busentiwa wariñagun hun buidu lan hadüga (2 Lur. 6:​6, 7). Dan le aweinamudeina hamá irahüñü, másiñati hadügüba lan fiu álügüdahani súdiniti luagu hafiñen, kéiburi, ka lan uagu tarufudahan Bíbülia wuriba lan ladügǘn somu katei.

² Háfuga saminatiña agübürigu lóuguagili lan hafiñen hasaanigu ladüga álügüdahani le burí hadügübei. Le linarün katei, mosu hadügün irahüñü o isaanigu álügüdahani gayara láamuga lederebugudun hafiñen (1 Ko. 13:11). Ligíati, moun lumuti taweiridun hanigi agübürigu luagu burí álügüdahani le hadügübei hasaanigu luagu hafiñen. Lunti harihini agübürigu katei le kei aban chansi lun híderaguniña hasaanigu asaminara hulili, ítarati, gayaraabei lederebugudun hafiñen hasaanigu.

3. Kaba wakutiha lidan aturiahani le?

³ Lidan aturiahani le, wakutihaba ida luba lan híderaguniña agübürigu hasaanigu 1) lun derebugu lan hafiñen luagu Bungiu luma tuagu Lererun, 2) lun gunfuranda hamani ka lan uagu buidu lubéi lun gaganbadi hamá lun lilurudun Bungiu, luma 3) lun hafurendeirun afuranguagüdei hafiñen houn amu. Wakutihaba giñe ka lan uagu buidu lubéi lun hálügüdahan isaanigu luma ka burí lan katei gayaraabei hadügüni agübürigu hama hasaanigu gayara láamuga hayanuhan hámagua luagu hafiñen.

 ÍDERAGUA HUMAÑA HISAANIGU LUN DEREBUGU LAN HAFIÑEN LUAGU BUNGIU LUMA TUAGU LERERUN

4. Ka burí álügüdahani gayaraabei hadügün hisaanigu houngua, ani ka uagu?

⁴ Mama ladüga afiñe humá luagu Bungiu lun hafiñeruba lan giñe hisaanigu luagu. Haritagua huméi mama lan lau afiñeni luagu Heowá wágurahoun. Ligíati, lau lásügürün dan, gayaraati hadügün hisaanigu álügüdahani hóuniwagua, kéiburi: “Ida luba nachoururuni anihein lan Bungiu? Gayaraati san nafiñerun luagu le tariñagubei Bíbülia?”. Le linarün katei, ínchaha tumutiña Bíbülia kristiánugu lun hayusuruni hasaminan luma lun hóuchaguni sun arufudahani (Rom. 12:1; 1 Tesa. 5:21). Ligíati, agübürigu, ida luba hederebudagüdüni hafiñen hisaanigu?

5. Ida luba híderaguniña hisaanigu lun laganwoundun hafiñen tuagu Bíbülia? (Rómana 12:2).

⁵ Ínchaha humaña hisaanigu lun háluahan ariñahani le arufudubalin inarüniti lan le tarufudahabei Bíbülia (aliiha huméi Rómana 12:2). Danme le hadügün hisaanigu álügüdahani, meferidira huméi chansi lun harufudahan houn lun hagía lan adarirei óunabagülei houngua lau hayusurunu tulu kei burí garüdia Adundehani lun haturiahan gefentiña luagu Heowá. Tidan garüdia to, hadarirubei fánreinti le gíribei “Bíbülia” ani lábugiñe, áluaha huméi fánreinti “Labürügüdün Bungiu”, ñein hafurendeirubei gayaraati lan lafiñerúniwa tuagu Bíbülia, ani mámarügüñoun lan aban líburu to habürüdüboun wügüriña, lubaragiñe lira aban tan líburu to ídanboun ladarirúa “luganute Bungiu” (1 Tesa. 2:13). Gayaraati giñe háluahani hisaanigu ariñahani luáguti binadu uburugu Níniwe. Luagu aban dan, saminatiña meha fiu wügüriña ha aturiahatiña Bíbülia iyeeni lan anihein lan meha aban uburugu Asiria gíriti Níniwe. Gama lumoun, kei burí lidan irumu 1850 ligía ladarirún uburugu Níniwe, arufudati katei le inarüniti lan le tariñagubei Bíbülia (Sof. 2:​13-15). Gayaraati giñe hakutihani hisaanigu ida liña lan lagunfulirún profesía le tídanbei Bíbülia luáguti lagünrinchawagun Níniwe, lidan fánreinti le gíribei “Subuditi san hun?” tidan Garüdia Awisahatu to lánina unsu-hati, irumu 2021. Ítarati, danme le hagoubaguagüdüni hisaanigu le tarufudahabei wani agumeiraguagüdüni lumoun le tariñagubei amu burí líburu to gayaraaboun lafiñerúniwa tuagu, ábame laganwoundun hafiñen luagu le tariñagubei Bíbülia.

6. Ida luba híderaguniña agübürigu hasaanigu lun hachoururuni inarüniti lan le tarufudahabei Bíbülia? Ru humá aban hénpulu. (Ariha humóun giñe iyawaü).

⁶ Íderagua humaña hisaanigu asaminara ka lan uagu inarüniti lubéi le tariñagubei Bíbülia. Agübürigu, áluaha humá chansi lun hayanuhan hama hisaanigu tuagu Bíbülia, luma luagu afiñeni luagu Bungiu. Gayaraabei harufudahani katei burí le houn hisaanigu dan le hanügüniña abisidahei aban párüke, aban muséu o aban sukursáli to hani gefentiña luagu Heowá. Ánheindügü ñüdün  abisidaha aban muséu o habisidahani luéigiñe Internet, gayaraati harufuduni houn hisaanigu ida liña lan gani lan ítaga sügǘ o somu katei luma le tariñagubei Bíbülia. Gayaraabei ladügün katei le lun lederebugudun hafiñen hisaanigu tuagu Bíbülia. Másiñati gayara lan harufudahan houn hisaanigu luagu aban dübü le gíribei piedra moabita. Ani 3,000 irumu lau dübü le ani dariwati liri Bungiu bürüwañu luagu. Gayaraati larihín dübü le lidan muséu le gíribei Louvre, uburugu Parisi (Faransu). Gayaraati giñe larihín lidan muséu le gíriti “Bíbülia luma liri Bungiu” lidan muséu le hani gefentiña luagu Heowá, Warwick (Newayóru). Ariñawagúati lidan piedra moabita aba lan liñuragun urúei Mesá le moábüna luagun lurúeite Ísüraeli. Ani úaraguati ariñahani le luma le tariñagubei Bíbülia (2 Uru. 3:​4, 5). Danme le hachoururuni hisaanigu luagu inarüniti lan le tarufudahabei Bíbülia, lederebudagüdübei hafiñen (ariha huméi giñe 2 Krónikasi 9:6).

7, 8. a) Ka larufudahabei lubuidun lesetirun katei le geyegubei wau woun? Ru humá aban hénpulu. (Ariha humóun giñe iyawaü). b) Ka burí luwuyeri álügüdahani lunbei hadügüni houn hisaanigu lun híderaguniña ederebudagüdei hafiñen luagu anihein lan Bungiu?

⁷ Ínchaha humaña hisaanigu lun hetenirun lun le adüga láalibei Heowá. Danme le hidin hama hisaanigu asariñaha lidan somu párüke o dan le hawadigimaridun lidan hichari, arufuda huméi houn ligaburi lesetirun katei le ladügübei Bungiu. Afuranguagüda huméi houn ladügün lan Bungiu sun katei le lau lichú aau. Kei hénpulu lau warihini fiu lubana nadü, fiu fuluri kéiburi girasol, fiu lídangiñe lagei wadabu kéiburi lesetirun lagei Nautilu hama burí waruguma (galaxia), arihatiwa buíduburi lan lesetirun ani aturiaha hamaali laburiña siensia katei le luagu saragu irumu. a

⁸ Tidan leskuela tidan külase lánina siensia, hafurendeiruba hisaanigu anihein lan lúrudu luagu ligaburi lesetirun katei. Arihúati katei le, lidan burí tídibu wewe lugundun gagudinatu, galimutu, ani lidan limu anihein ámuñegueinarügü liseisin limu subudiwati katei burí kei fractales. Arihúati giñe igaburi burí le lidan burí amu katei le geyegubei wau. Gama lumoun, ka adügübalin katei buíduburiti le? Anhein hadüga hisaanigu álügüdahani kei burí le houngua, ladügüba lun chóurutima lan houn Bungiu lan adügübalin sun katei (Ebü. 3:4). Ani danme le aweirideina hamá hisaanigu, lachülürüba dan lun hálügüdüniña: “Anhein Bungiu lubéi adügübaliwa, ma gayaraati wafiñerun rúhali lan adundehani luma burí lúrudu woun lun gunda wamá?”. Lárigiñe gayaraati hafuranguagüdüni houn darí wamuti lan adundehani gebegiti le tidan Bíbülia.

ÍDERAGUA HUMAÑA HISAANIGU GUNFURANDEI KA LAN UAGU BUIDU LUBÉI LUN GAGANBADI HAMÁ LUN LILURUDUN BUNGIU

9. Kaba hamuga lébuna hadügün hisaanigu álügüdahani hun luagu somu lúrudu le tídanbei Bíbülia?

⁹ Anhein machourun habéi hisaanigu luagu gebegi lan lúrudu le tídanbei Bíbülia, houcha humá  lun hálügüdüniña ka lan uagu hasaminara ítara. Le san lúgubu mafiñen hamá luagu le tariñagubei Bíbülia? Odi ladügarügü siñá lan hafuranguagüdüni hafiñen houn amu? Aban katei le gayaraabei líderaguniña lun harihini buidu lan le tarufudahabei Bíbülia lau haturiahanu líburu Winwan humá lau ugundani hama. b

10. Ida luba híderaguniña hisaanigu lúntima yarafa lan hamadagua luma Heowá?

¹⁰ Íderagua humaña hisaanigu lúntima buidu lan hamadagua luma Heowá. Danme le haturiahanu Bíbülia hama hisaanigu tau líburu Winwan humá lau ugundani, yusu humá álügüdahani, hénpulu tuma burí iyawaü, gayara láamuga hayanuhan hisaanigu luagu le hasaminarubei (Ari. 20:5). Kei hénpulu, lidan arufudahani 8 góubaguagüdawati Heowá luma aban umadaü buiti le aritaguagüdübaliwa luagu le lunbei wadügüni lun buidu lan lidin woun luma lun masuseredun lan ni kata wuribati woun. Lárigiñe hakutihani 1 Huan 5:​3, gayaraabei hadügüni álügüdahani le houn hisaanigu: “Kei Heowá lan aban umadaü buiti, ida luba warihini le lamuriahabei wama lun wadügüni?”. Háfuga genege lan hun aban lan álügüdahani le ménrengunti, lau sun lira gayaraati líderaguniña hisaanigu gunfurandei ru lan Heowá lúrudu woun lugundun hínsiñe wamá lun (Isa. 48:​17, 18).

11. Ka gayaraabei hadügüni lun gunfuranda hamani hisaanigu le tarufudahabei Bíbülia? (Ariñawagúni 2:​10, 11).

¹¹ Ayanuha humá hama hisaanigu luagu buiti le weresibirubei dan le wafalaruni le tarufudahabei Bíbülia. Danme le hóundaragun úara lun haliihanu Bíbülia o bérusu le lánina sagü weyu, ariñaga huméi houn hisaanigu ida liña lan líderagunün hafalaruni le tarufudahabei Bíbülia. Gayaraati hayusuruni dan burí le lun hafuranguagüdüni houn sun buiti le weresibirubei dan le benefa wamá ani meyeeha wagía (Ebü. 13:18). Adügati giñe lafalarún adundehani le tídanbei Bíbülia lun buidu lan wátuadi luma lun wagundaarun saragu (Ari. 14:​29, 30). Anhein ibiha hubéi lun gunfuranda hamani hisaanigu buidu lan lun gaganbadi hamá lun le tarufudahabei Bíbülia, másiñati busenbaña lan hafalaruni lidan habagari (aliiha huméi Ariñawagúni 2:​10, 11).

12. Ka hadügübei aban feru maríeitiña lun gunfuranda lani hasaani buiti le lanügübei lafalarúniwa tadundehan Bíbülia?

¹² Ariñagati Steve, aban íbiri le awinwandubei Faransu úara tuma lani weiriou luma aban hasaani nibureingili gíriti Ethan, ida liña lan híderaguni hasaani gunfurandei ruti lan Heowá lúrudu woun ladüga hínsiñe wamá lun. “Ani adügatiwa álügüdahani lun kéiburi: ‘Ka uagu busén lubéi Heowá lun gaganbadi wamá lun lúrudu le? Ida liña larufuduni lúrudu le hínsiñe wamá lun Heowá? Kaba san asusereda anhein madügün wamá?’”. Lau hayanuhan luma Ethan, íderagua lumuti lun lachoururuni le lan lariñagubei Heowá ligía lan katei le buídutimabei woun. Ariñagati giñe Steve: “Le wabusenrubei lun gunfuranda lani Ethan buídutima lan lichú lau Heowá sügǘ lau lichú aau le hawagubei gürigia”.

13. Ida luba gayara lan harufudahan houn hisaanigu lun hafalaruni le tariñagubei Bíbülia? Ru humá aban hénpulu.

¹³ Arufudaha humá houn hisaanigu lun hafalaruni adundehani le tídanbei Bíbülia. Gachansinbadün lun hadügüni katei le danme le hálugun máisturugu hama hisaanigu lun hadügün aban dasi le ídanbei mosu lan haliihan aban líburu. Másiñati tarufuduba lan líburu tuguya gürigia ha adügübaña katei wíyeti o gürigia ha furundetiña kei hénpulu buítiña. Gayaraati hínchahaniña hisaanigu lun hagoubaguagüdüni ligaburi hóuserun gürigia ha lumoun hagaburi gürigia ha uágubaña tayanuha Bíbülia (Ari. 22:​24, 25; 1 Ko. 15:33; Fili. 4:8). Ítarati, anhein hadüga máisturugu o aturiahatiña álügüdahani houn hisaanigu gachansinbaña lun hayanuhan luagu hafiñen.

 ARUFUDAHA HUMÁ HOUN HISAANIGU LUN HAFURANGUAGÜDÜNI HAFIÑEN HOUN AMU

14. Ka katei gayaraabei ladügün lun hanufudedun nibureintiña, ani ka uagu?

¹⁴ Arufudaha humá houn hisaanigu lun hafuranguagüdüni hafiñen houn amu. Anihein dan hanufudetiña nibureintiña kristiánugu lun hayanuhan houn amu luagu hafiñen. Másiñati le lan hanufude habéi dan le mosu lan hafuranguagüdüni houn hapanaagu leskuelarugu ka lan uagu mafiñen habéi luagu ewolusión. Ka uagu? Ladüga ariñaga hamá hamaisturungu aban lan katei chóuruhali arufudahani le. Ida lubati híderaguniña hisaanigu lúntima hafiñerun inarüni lan le tarufudahabei Bíbülia?

15. Kaba íderaguaña nibureintiña lun hachoururuni inarüni lan le hafiñerubei?

¹⁵ Íderagua humaña hisaanigu lúntima hafiñerun luagu le tariñagubei Bíbülia. Moun lumuti hasandirun hisaanigu busiganu lau hafiñerun anihein lan aban Bungiu le adügübalin sun katei (2 Tim. 1:8). Le linarün katei, añahein saragu aturiahatiña siensia gunfuranda hamuti mama lan saliguarügüti ibagari ítaraguarügü. Dan le haríaguni katei burí le ubouagubei, furanguti harihini anihein lan aban Adügüti sun katei. Ligía maha habéi gürigia ha lun arufudahani lánina saliguarügü lan ibagari ítaraguarügü le arufudahóubei tidan saragu leskuela lidan sun Ubóu. Gayaraati ladügün hararamagun hisaanigu asaminara luagu le íderagubaliña amu íbirigu achoururei anihein lan aban le Adügübalin sun katei lun hederebudagüdüni hafiñen. c

16. Ida luba híderaguniña agübürigu hasaanigu lun hafuranguagüdüni houn amu hafiñen luagu Bungiu? (1 Féduru 3:15; ariha humóun giñe iyawaü).

¹⁶ Íderagua humaña hisaanigu gayara láamuga hafuranguagüdüni hafiñen luagu Bungiu houn amu (aliiha huméi 1 Féduru 3:15). Háfuga buídubei lan lun hakutihan ariñahani hama hisaanigu kei burí “Lunti san nafiñerun saliguarügü lan sun katei?” le tídanbei garüdia “Lóunabagüle 10 hálügüdahan nibureintiña”, le áfuridubei lidan jw.org. Lárigiñe álügüdagua humaña hisaanigu ida luba lan híderaguniña amu lun gunfuranda hamani anihein lan Adügüti sun katei ani ábameti hasayahani úara hama hisaanigu le lunbei hariñaguni. Haritaguagüda humañame mama lan mosu hasigenehan hama hapanaagu leskuelarugu luagu hafiñen. Ínchaha humaña lun hafuranguagüdüni katei lidan aban igaburi le ménrengunti houn ha busenbaña haganbun. Kei hénpulu, anhein ariñaga aban hapaaná hisaanigu leskuelarugu luágurügüñein lan katei le gayara lubéi ariha lafiñera ani marihin lágili lan Bungiu,  gayaraabei hóunabun: “Saminabá béibuguña lan lidan aban dabíara ani aba barihin aban welu lauti dübü. Ma basaminaruña hamuga luagu adügǘwarügü lan, adián? Ligíati, anhein samina bubéi luagu adügǘwarügü lan welu, gúbudigiameti Ubóu lau sun le geyegubei wau létima gíbebei lácharagun. Arufudati hénpulu le anihein lan aban le Adügübalin sun katei”.

17. Ida luba híderaguniña agübürigu hasaanigu lun háluahan chansi lun hayanuhan houn amu tuagu Bíbülia? Ru humá aban hénpulu.

¹⁷ Íderagua humaña hisaanigu lun háluahan chansi lun hayanuhan houn amu tuagu Bíbülia (Rom. 10:10). Ítara liña layanuhóun tuagu Bíbülia kei hamuga dan le wafurendeirun áfara gidara, garanwoun o katei líbeina lira. Lidan bagumeserun afurendeira áfara músika, hénrenguti, lau sun lira, lau lásügürün dan, aba ménrenguntimahali lan. Ítarameme, dan le latatirun aban nibureinti ayanuha luagu lafiñen houn amu, buídutimati lun lagumeserun ayanuha luagu katei le ménrengunti. Kei hénpulu, gayaraati lálügüdüni aban lupaaná leskuelarugu: “Subuditi san bun áyeiha hamani inhenierugu katei burí le harihibei geyegu wau lun hadügün ámuñegueinarügü katei? Arihabéi lubuidun bidéu le”. Ábameti harufudun aban bidéu lun lídangiñe fánreinti le gíribei “Adügǘwarügüti san?” ani ábameti hálügüdüni: “Anhein resibi habéi wügüriña ha uéiriguni lau houchun háyeihani katei burí le lídanbei ubóu, kátima un yu lan wíchugun uéiriguni luagu sun katei le warihubei lidan ubóu?”. Ítarati, lau lubuidun igaburi le, másiñati busenbaña lan hapanaagu nibureintiña hasubudirun luagu Heowá.

AGÜBÜRIGU, SIGÍ HUMÁ ÍDERAGUAÑA HISAANIGU EDEREBUDAGÜDEI HAFIÑEN

18. Ida luba hasigirun agübürigu ederebudagüdei hafiñen hasaanigu luagu Bungiu?

¹⁸ Wawinwanduña lidan aban ubóu le buinbei hau gürigia ha mafiñentiña luagu Heowá (2 Fe. 3:3). Ligíati, agübürigu, danme le haturiahanu Bíbülia hama hisaanigu, ínchaha humaña lun hakutihan ariñahani le lunbei líderaguniña lúntima hasandirun inebesei tuagu Lererun Bungiu luma luagu lilurudun. Ani íderagua humaña lun hararamagun asaminara luagu le adüga láalibei Heowá lun lederebugudun hafiñen luagu. Íderagua humaña giñe gunfurandei lubuidun burí profesía le gúnfulihalibei. Ani létima súdinibei, furíei humá hama ani furíei huguyame hawagu. Ligíati, anhein hadüga sun katei le, chouru huméi labinirubei lan Heowá sun áfaaguni le hadügübei lun híderaguniña hisaanigu lun derebugu lan hafiñen (2 Kro. 15:7).