1, 2. Ka burí katei gayaraabei ladügün lun wayahun?

 SUN wagía ayahuatiwa. Gayaraati wayahun le wagundan ladüga lasuseredun katei burí buiti woun, kei burí dan le nasirua lan aban isaani. Háfuga labulachagun wáguira dan le liabin somu saminaü o dan le waritagun aban lubuidun sügǘ le winwan wamaalibei o dan leeya wadunragun luma aban wamada le lüha marihin wamani.

² Lau sun lira, liibe-agei dan, ayahuatiwa ladüga wasufuriruña lan. Háfuga adügaali aban gürigia lun wasandirun aban óunwenbu igarigu o ladüga somu sandi le wéiriti o ladüga wegeburihaña lan. Lidan burí dan ítarati, gayaraati wasandiragun woungua kei profeta Heremíasi dan meha le hagünrinchagunbalin babilóniana uburugu Herusalén. Ariñagati Heremíasi: “Áwiyuhati saragu águiraü nágurugugiñe [ . . . ]. Memeraagunti nayahun” (Aya. 3:​48, 49).

3. Ida liña lasandiragun Heowá lungua dan le larihiniña lubúeingu asufurira? (Isaíasi 63:9).

³ Subudi lumuti Heowá átiriñein lan wéiyaasu wayahuahan ladüga wasufuriruña lan. Ariñagatu Bíbülia woun aríagu liña lan Heowá lun wasufurirun ani aganba lániwa dan le wayumuragun lun lun líderaguniwa (Sal. 34:15). Ani, mama ariharügü lumuti Heowá ani aganbaléi wayahuahan, adügati giñe amu katei. Kei Wáguchi lan ligía ani wéiriti wínsiñe lun, híruti dan le wasufuriruña lan, wagía le lisaanigu. Ligíati furese lubéi líderaguniwa (aliihabéi Isaíasi 63:9).

4. Kaba burí sügǘ tídangiñeti Bíbülia wakutiha, ani kaba wafurendeira luagu Heowá?

⁴ Arufuda tumuti Lererun Heowá woun ka lan meha ladügübei dan le larihiniña lumutuniña ayahuaha. Samina wamá luagun  tikesin Ana, Dawidi, luma urúei Esekíasi. Ka meha adügübei lun hayahun? Ida liña meha líderaguniña Heowá? Ka uagu ru lubéi le asuseredubei houn dǘgüdaguaü woun dan le wayahun ladüga íruni, lachararun somu gürigia woun o ladüga ibidiñe lan woun kaba lan wadüga?

ÁGUIRA LÁNINA ÍRUNI

5. Ida liña meha tasandiragun Ana tungua?

⁵ Gíbeti meha katei híruti ídangiñeti tásügüra Ana darí lun tayahun saragu wéiyaasu. Mámarügüñoun meha tuguya lúmari Elikaná, maríeiti giñe meha tuma amu würi gíritu Peniná, to meha iyereehabúboun tun ani wéiriti meha luriban tóuserunu. Lanwoun lira, gíbetiña meha tisaanigu Peniná, ánhounti Ana, maraüheitu meha (1 Sam. 1:​1, 2). Ligía meha tadaahanbei Peniná bula tau Ana. Ida luba hamuga meha basandiragun bungua lun hamuga buguya lan awinwandubalin sügǘ le? Buin tiña meha Ana “lau igarigu”, “ábatiha tayahun […], ani méigintuha” (1 Sam. 1:​6, 7, 10).

6. Ka meha tadügübei Ana lun tasandiragun tungua buidu?

⁶ Ka tadügübei Ana lun tasandiragun tungua buidu? Furumiñe, aba tidin tidoun sanduariu, fulasu le meha ñein lubéi láhudurawagua lun Heowá. Ñein, háfuga yarafa lun tebelaagüle sanduariu, “aba tafurieidun Ana [ . . . ] tídangiñe sun tanigi ayahuaheina lau igarigu”. Ayumuraguatu lun Heowá lun laritagun tuagun “luma lun larihini lanarime tasufurirun” (1 Sam. 1:10b, 11). Aba tabahüdaguni sun le tasandirubei lun Heowá. Gayaraati san basaminarun luagu íruni le lasandirubei Heowá dan le larihinbarun liráü ayahuaha?

7. Ida liña meha tasandiragun Ana tungua lárigiñebei tabahüdaguni lun Heowá ida liña lan tasandiragun tungua tidan tanigi?

⁷ Ida liña meha tasandiragun Ana tungua lárigiñebei tabahüdaguni sun le tasandirubei tídangiñe sun tanigi lun Heowá, aganbatéi dimurei gíchigaditi gurasu le lariñagubei Elí tun, fádiri le íñutimati? Ariñagatu Bíbülia: “Aba tidin eiga, aba mírudundigiaaru lan” (1 Sam. 1:​17, 18). Lau sun meha masansirungili lan le gádanbarun, aba tasandirun Ana awalidaguni. Ígira taali meha tigarigu lúhaburugu Heowá. Ariha lumuti meha lueirin íruni le tasandirubei, aganba lumuti tayumuragun lun ani biní lumutu lárigiñe lau lígirun lun garahüñü tan (1 Sam. 1:​19, 20; 2:21).

8, 9. Según Ebüréu 10:​24, 25, ka uagu lunti lubéi wadügüni sun wayaraati lun wabasiihan lidoun adamuridaguni? (Arihabóun giñe iyawaü).

⁸ Ka wafurendeirubei? Básügürüña san lídangiñe aban sügǘ le adügübei lun bayahun? Másiñati begeburihaña lan ani mabusenruntibu barihin ni aban gürigia. Anhein ítara liña lubéi, haritaguabei tikesin Ana. Ñǘdüntu tidoun sanduariu, ani ñein líchiga Heowá gurasu tun. Gayaraati giñe líchugun Heowá gurasu bun lidan adamuridaguni, íbini hiru lan basandiragun bungua  ani maguraasun buguya (aliihabéi Ebüréu 10:​24, 25). Ñein, aganbatiwa sügǘ tídangiñeti Bíbülia le ruti dǘgüdaguaü. Ítara, líderagubadibu Heowá lun basansiruni ligaburi bisaminan. Ábameti abuidureina lan basandiragun bungua íbini maranserungili lan biturobulin.

⁹ Lidan burí adamuridaguni, rútiña wíbirigu gurasu woun lau harufudun ínsiñeni woun ani rútiña dǘgüdaguaü woun (1 Tesa. 5:​11, 14). Ariha waméi le lariñagubei aban prekursoru espechaliti lárigiñebei tounwen lani weiriou: “Anahagua ayahuahei tounwen, anihagua dan nañuurun lidan aban kaaná, aba nerederun ayahuaha. Lau sun lira, íderagua lumutina adamuridaguni lun nibihini erei le nemegeirubei lun nasigirun lun nubaruaguóun. Adügati óunabagülei le híchugubei íbirigu luma lubuidun burí dimurei le hariñagubei nun lun nagalumarun. Dan le nachülürün tidoun Luban Adamuridaguni, liibe-agei dan, buin niña lau idiheri. Ánheinti dan le náfuridun ñéingiñe, hóucharaühali nasandiragun nungua”. Dan le wadamuridagun, gayaraati layusuruniña Heowá wíbirigu lun híderaguniwa.

10. Ida luba wáyeihanu Ana dan le wasandirun saragu íruni?

¹⁰ Aba meha tasandirun Ana awalidaguni lárigiñebei tawaragun luma Heowá. Gayaraati giñe badügüni le lariñagubei 1 Féduru 5:7 lau bígiruni sun katei lúhaburugu Heowá afiñeñu luagu laganbubadibu lan. Afuranguagüda tumuti aban íbiri ida liña lan tasandiragun tungua dan le háfarunbalin fiu híwerutiña tani weiriei: “Wéiriti igarigu le nasandirubei tidan nanigi darí lun nasaminarun magundaarundigiaadina lanme”. Ka íderagubarun? Ariñagatu: “Aba nayanuhan lun Núguchi hínsiñehabuti le siélubei, ábati nasandiruni gurasu le líchugubei sagü nafurieidun lun. Anihein meha dan ibidiñe lan nun ida luba lan nafuranguagüdüni lun ida liña lan nasandiragun nungua. Lau sun lira, gunfuranda lumutina meha. Dan meha le weiri lan íruni le nasandirubei, ibidiñe ligía nun kaba lan nadüga, aba namuriahan luma lun líchugun darangilaü nun. Lau lóufudagun, aba nasandirun darangila lan nisaminan tuma nanigi, ani ábaha nárügüdüni erei le nemegeirubei lun nasigirun nubaruaguóun”. Dan le bariñaguni lun Heowá ida liña lan basandiragun bungua, gunfuranda lumuti bigarigu, ani subuditi lun buidu buidu ida liña lan basandiragun bungua. Íbini magumuchun lan biturobulin, líchuguba Heowá darangilaü bun (Sal. 94:19; Fili. 4:​6, 7). Ani labinirubadibu luagu bawandun (Ebü. 11:6).

ÁGUIRAÜ LADÜGA HAGARABAAGUN AMU BUAGUN

11. Ida liña meha lasandiragun Dawidi lungua dan le hóuseruni amu gürigia wuriba?

¹¹ Lidan meha sun libagari Dawidi, gagibuguati luma saragu sügǘ le adügübei lun layahun. Iyereeguti meha houn saragu gürigia, ani íbini liduheñu hama lumadagu anihein meha dan hagarabaagun luagun, áluga hagía hadügün wuribani lun (1 Sam. 19:​10, 11; 2 Sam. 15:​10-14, 30). Lidan aban dan lidan libagari, abürühati: “Buchá nuagu ayahua, áriebu lárigi áriebu nayahuña darí lun tadüdürün nichügübarari lau náguira”. Ka meha uagu lasandiragua Dawidi lungua ítara? Ligía guánarügü ariñagei: “Hadüga náganiñu” (Sal. 6:​6, 7). Wéiriti meha lanarime wuribani le hadügübei amu gürigia lun Dawidi darí lun labulachagun láguira.

12. Según Salumu 56:​8, ka meha lachoururubei Dawidi?

¹² Íbini meha hénrengu lan libagari Dawidi, chouru lumuti meha hínsiñe lan lun Heowá. Abürühati: “Aganba laali Nabureme nayahuahan” (Sal. 6:8). Lidan amu dan, abürüha lumuti lubuidun burí dimurei le wadarirubei lidan Salumu 56:8 (aliihabéi). Lau lubuidun burí dimurei le larufudei weiri lan wínsiñe lun Heowá ani berese lan lau le wasandirubei. Ariñagati  Dawidi ítara liña lan meha kéigubeirügü labudahañein lan Heowá kada aban lídangiñe wáguira areida lidan aban ágeidinaü o abürüha lani tidan aban líburu. Chouru lumuti meha aríagu liña lan Lúguchi le siélubei lun lasufurirun ani haritagua lani. Subudi lumuti meha giñe Dawidi, subudi lani Heowá ka lan liturobulinbei luma ida liña lan ladügün turobuli burí ligía lun lasandiragun lungua.

13. Ka gayaraabei líchugun gurasu bun anhein garabaguaali lubéi somu biduhe o bumada buagun? (Arihabóun giñe iyawaü).

¹³ Ka wafurendeirubei? Garabaguaali san aban bumada o aban biduhe buagun? Gáriti san basandirunu banigi ladüga günringua lan bibagari kei maríeiti o kei maríeitu o dürügua lan hidaradun? Hírutibu san ladüga ígirala lan aban biduhe o aban bumada leseriwidun lun Heowá? Ariha wamá aban sügǘ. Ariñaga lumuti aban íbiri ida liña lan meha lasandiragun lungua dan le tagabarahanbalin lani weiriou: “Mafiñen numuti yebe, aba nasandirun igañi luma íruni, sandigua au nungua kamá le meseriwíntina lun ni kata”. Ka gayaraabei líchugun gurasu bun dan le garabaguaali lan aban gürigia buagun? Gabaroun bani maweiyasunbei lan Heowá ígirabu. Ariñagati íbiri ligía: “Aba níchugun fe, íbini lan hachararun gürigia bun, maweiyasunbei lan Heowá adügei lira. Águdaha lumutiwa ani súnwandan líderaguniwa meberesenga le asusereduti. Mágurun lumutiña ha gúnfulibaña luma” (Sal. 37:28). Mabulieidabéi ua lan hínsiñehabutimati bun sügǘ luéi Heowá. Háfuga adügaaña gürigia saragu wuribani bun, lau sun lira, mígiraba lun ladügün katei le lun míchugun ban fe berese lan Heowá bau (Rom. 8:​38, 39). Íbini wuriba lan lóuserunibu aban gürigia, gayaraati bachoururuni le: Hínsiñetibu lun Heowá!

14. Ka lachoururubei Salumu 34:18 woun?

¹⁴ Anhein garabaguaali lubéi biduhe o bumada buagun, gayaraati bárügüdün gurasu lídangiñe le labürüdübei Dawidi lidan Salumu 34:18 (aliihabéi). Ariñagatu aban líburu luagu dimurei “ha féridi hamaalibei hemenigin” gayara lan lásügüragüdüniwa kei “ha magurabunbaña katei buiti”. Ida liña líderaguniña Heowá gürigia ha asandiragubaña houngua ítara? Ariñagati bérusu guánarügü le yarafa lan houn “ha gáribei hasandirunu hanigi”, háfuga ladüga garabaguaali lan somu gürigia hawagun. Ítara liña Heowá keisi aban úguchili le óuyuahabalin liráü dan le larihini ayahuaha ani aba lámalihani. Sandí lumuti Heowá wagarigu ani ñǘbuinti lau lóufudagun lun líderaguniwa. Busenti lun lagalumarunu wanigi luma lun lawalidaguagüdüniwa dan le wasufurirun. Ani ruti saragu emenigini woun le íderagubaliwa lun wawanduni turobuli le úmabei wagagibudagua uguñe weyu (Isa. 65:17).

 ÁGUIRAÜ LADÜGA LIBIDIÑE BUN KABA LAN BADÜGA

15. Ka sügǘ adügübei lun láhügüchün Esekíasi ayahuaha?

¹⁵ Darandi meha nefu irumu lau Esekíasi, le lurúeite Hudá, dan le ladagarunbei aban lanarime sandi luagu. Óunaha lumuti Heowá profeta Isaíasi ariñaga lun sandiba lan ligía áfarei (2 Uru. 20:1). Genegeti meha ua lan ni murusun emenigini lun Esekíasi. Adügati le ariñawagúbei lun lun láhügüchün ayahuaha, ábati layumuragun lun Heowá lun líderaguni (2 Uru. 20:​2, 3).

16. Ka lasandirubei Heowá dan le laganbunbalin layumuragun Esekíasi, arihaléi láguira ani ka ladügübei luagu?

¹⁶ Dan le laganbunbalin Heowá lafurieidun Esekíasi, arihaléi láguira, aba lagudemedagun lun ani óunaha lumuti Isaíasi ariñaga lun: “Aganba naali bafurieidun, ani ariha naali giñe báguira, nareidaguagüdaadibu”. Ábati füramase lan lun lachawaraguagüdübei lan libagari sefuláñame lílana uburugu Herusalén hawéi asiriana (2 Uru. 20:​4-6).

17. Ida liña líderaguniwa Heowá dan le anihein lan somu sandi wéiriti wawagu? (Sálumu 41:3; arihabóun giñe iyawaü).

¹⁷ Ka wafurendeirubei? Ka gayaraabei badügün anhein anihein lubéi aban sandi buagu le genegeti máraninaali lan? Awaragua ban luma Heowá, íbini lau bagu buin lau águiraü. Ariñagatu Bíbülia woun ligía lan “Wáguchibei le gudemehabubei woun; ani aranseñu liña lun líchugun gurasu woun […] lidan sun wasufurirun” (2 Ko. 1:​3, 4). Furanguti magidarun lubéi lan Heowá sun waturobulin uguñe weyu. Lau sun lira, chouru wamuti líchugubei lan sun erei le wemegeirubei woun (aliihabéi Sálumu 41:3). Kéiburi dan le líchuguni lani sífiri sandu woun lun wibihini erei, lichú aau luma darangilaü le wemegeirubei (Ari. 18:14; Fili. 4:13). Ani ru lumuti giñe emenigini woun luagu lachülürüba lan aban dan lun úaali lanme sandi (Isa. 33:24).

18. Ka bérusu tídangiñeti Bíbülia huuhalibei bun dan le bagagibudagun luma sügǘ le wéiriti lénrengun? (Arihabéi rekuáduru “ Dimurei burí le aubei laragahei Heowá wáguira”).

¹⁸ Ruti meha dimurei le lariñagubei Heowá gurasu lun Esekíasi. Gayaraati giñe layusurunu Heowá Bíbülia lun líchugun gurasu woun. Adügati meha lun labürüdǘn dimurei tidan Bíbülia le ruti gurasu woun dan le lidan wamá lénrengunga (Rom. 15:4). Ariha waméi tikesin aban íbiri to lídanboun aban ageiraü lídangiñeti Áfürika, to meha gabügürüguabei tayahun ladüga ladarirún kánserü tuagu. Ariñagatu: “Isaíasi 26:3 ábanbei lídangiñe bérusu le íchugubei gurasu nun. Lau sun mabafu wamá luagu sun le asuseredubei woun, arufudati bérusu le gayara lan líchuguni Heowá darangilaü le wemegeirubei woun lun wárügüdagun woungua dan le wagagibudagun luma lénrengunga”. Anihein san bérusu tídangiñeti Bíbülia le rúhali gurasu bun dan le básügürüña lan lídangiñe óunwenbu burí lénrengunga ani ibidiñe ligía bun kaba lan badüga?

19. Kaba abiniruni weresibira?

 ¹⁹ Wawinwanduña lidan lagumuchagüle lagumuhóun dan, ligía gayara lubéi wagurabun eibu lanme lásügürün dan gíbetimabei lan katei adügüti lun wayahun. Lau sun lira, kei warihini lidan tikesin, Ana, Dawidi luma urúei Esekíasi, ariha lumuti Heowá wáguira ani sandí lumuti wagarigu. Haritagua lumuti kada aban lídangiñe águiraü le ayahua wamaalibei. Ligíati, danme le básügürün lídangiñe sügǘ le hénrenguti, ariñagabéi sun le basandirubei tídangiñe sun banigi lun Heowá, sigiba adamuridagua hama bíbirigu, ha wéiribei bínsiñe houn. Sigiba áluahei gurasu le líchugubei Heowá tidan Lererun. Gayaraati bachoururuni ánhabu lan awanda lau úaraguni, líchuguba lan bafayeiruaha. Yarafa madise, warihibei weyu le ídanba lubéi laragahei Heowá sun águiraü wágurugugiñe (Aruf. 21:4). Ligíati, ánhawame ayahua lidan iseri ubóu, águiraü háalime le lánina ugundani!