Lidan irumu 1927 nagüriahóua lidan aban liraüraü aüdü yarafa lun Chicago (Illinois, Meriga). Séingüñanu hasaanigu nagübürigu: Jetha, Don, au, Karl, tuma Joy. Sun wagía busentiwa meha weseriwidun lun Heowá tau sun wanigi. Lidan irumu 1943, aba tagunbirahóun Jetha, to nitu, tidoun tibiaman leskuela tani Galaadü. Agunbirahóuati Don eseriwida tidan Beteli to Brooklynboun, Newayóru lidan irumu 1944, ánheinti Karl, agunbirahóuati lidan irumu 1947 ani lidan irumu 1951, agunbirahóuatu giñe Joy. Ínchaha lumutina lubuidun hénpulu le híchugubei níbirigu hama nagübürigu nun lun naganwoundagüdüni neseriwidun lun Heowá.

Héchutiña meha nagübürigu aliihoun Bíbülia ani hínsiñeti meha Bungiu houn, ínchaha hamutiwa giñe, wagía le hasaanigu, lun línsiñedun Bungiu woun. Gama lumoun, féridi laali meha núguchi lafiñen tuagu relihión lárigiñebei lidin ageindagua lidan Furumiñeti Wuribu Wéiriti. Keiti le gunda tubéi núguchu lau lagiribudun núguchi lau ibagari lídangiñe wuribu, aba tariñagun lun: “Karl, keimoun ligilisirugu, kei meha luagu aban dan”. Aba lóunabunu núguchi: “Nídiba buma, lau sun lira, mebelubadina ligilisirugun”. Ábati tálügüdüni: “Kati uagu mebelubadibu lubéi?”. Aba lóunabunu: “Lidan wuribu, ariha numuti ida liña lan habiniruniña tábutigu relihión sun súdaragu ha ageindagubaña hámagua íbini tílana hamá tuguyaméme relihión. Ida luba san hámagiñebei lan súdaragu ha luéigiñebaña aban oubaü Bungiu, anihame hámagiñe súdaragu ha áganiñu!?”.

Dan lárigiñe, aba hachülürün bián gefentiña luagu Heowá wábiñoun dan le anungura lubéi núguchu ligilisirugu. Aba híchugun bián líburu to gíriboun Luz lun núguchi, to ayanuhaboun tuagu líburu to gíriboun Arufudúni ani aba lárügüdünu. Dan le tarihinbarun núguchu líburu tuguya, aba taliihanu. Dan lárigiñe, aba tarihin aban awisahani tidan periodiku luagu hagunbirahóuña lan gürigia lun haturiahanu líburu burí to, ábati tidin ñeinhin. Dan le tachülürünbei, aban weiriou mutu adaaruboun tubá. Ábati tarufudun núguchu aban tídangiñe líburu tuguya tun ani aba tálügüdünu: “Ya san taturiahóua líburu to?”. Aba tóunabun gürigia tuguya: “Anha, namulelua, ya taturiahóua, beluba”. Barǘ tumutiwa núguchu túmagua dan le tagiribudunbei aban dimaasu lárigiñe, ani sigitiwa abasiiha lidoun aturiahani ligía sagü dimaasu.

Aban weyu, aba lamuriahan íbiri le alidihabalin adamuridaguni numa lun naliihani Sálumu 144:​15, le ayanuhabei luagu gunda hamá ha eseriwidubaña lun  Heowá. Ma línsiñe bérusu ligía nun! Hínsiñeti giñe le lariñagubei 1 Timotéu 1:11 nun, le ariñagubei luagu aban lan Bungiu gúndaati Heowá, lúmati Éfesuna 5:​1, le ínchahabaliwa lun wáyeihani Bungiu. Ligíati nasaminarunbei lunti lan neseriwidun lau ugundani lun Nubungiute ani teinkineime luagu chansi le. Anihán bián katei le uágubei náfaagua lidan sun nibagari.

Chikaguñein meha damuriguaü létima yarafabei woun, 32 kilometuru (20 maili) lidise luéi fulasu le ñein lubéi meha wawinwanda. Lau sun lira, abasiihatiwa meha lidoun adamuridaguni ani aganwoundeina liña meha nisubudin tuagu Bíbülia. Haritagua nágili dan le lichugúnbei chansi tun Jetha lun tíchugun óunabagülei. Dan le naganbunbalin óunabagülei le tíchugubei, aba nasaminarun: “Subudi numuti giñe óunabagülei le. Ka san uagu miñurun nubalin núhabu?”. Ligíati, lúmagiñe dan ligía, aba nagumeserun aransera buidu lubá adamuridaguni lun gayara lan níchugun óunabagülei. Le súdinitimabei, aba lan abuidureinatima lan numadagua luma Heowá, ítara kei níbirigu. Ani lidan irumu 1941, aba nabadiseirun.

Haritagua nágili adamurini wéiriti le adügǘbei Cleveland Ohio, Meriga lidan irumu 1942. Rédeitina úara hama niduheñu tidan kianpu yarafa lun fulasu le ñein lubéi adamurini le, ani aganbúati programa luéigiñe gágamuru lidan lóugiñe 50 uburugu Meriga. Keiti anihagua lubéi meha Libiaman Wuribu Wéiriti ageindawagúa ubouagu, aganwoundeina liña giñe hamahadun gürigia houn gefentiña luagu Heowá. Ligía aba lubéi meha hesetirunu íbirigu hakarün guñoun lun luagun lan üma ladunrangua tilanpun. Adügaaña meha íbirigu aransehani lun ñein lan aban gürigia tidan kada karü lun hounigirún sun ha tídanbaña kianpu-agei. Ánhaña hamuga meha ariha íbirigu gürigia wuribatiña, hébedubei hamuga tilanpun hakarün hawagun ani híñaagüdüboun hamuga giñe. Ítara, gayaraabei meha hayabin amu íbirigu lau lóufudagun íchiga ídemuei houn. Ábati nariñagun núnguarügü: “Aranseñuhaña lubúeingu Heowá buidu buidu lubá furumiñeguarügü katei”. Ani kei masuseredun lan ni kata wuribati, chóuruti nasandiragun nungua sun dan le naubei ñein ani arumugatina buidu.

Fiu irumu lárigiñe, dan le naritaguni le asuseredubei lidan adamurini wéiriti ligía, aba níchugun fe manufudedun tan meha núguchu, madiheridun tuguya. Afiñetu meha sunsuinagubei luagu Heowá luma tuagu lóundarun. Mabulieidun nubéi lubuidun tani hénpulu.

Murusun dan lubaragiñe adamurini ligía, aba tagumeserun núguchu eseriwida kei prekursora. Ligíati tíchugunbei arigei lun burí yanu luáguti eseriwiduni lidan dan dayarüti. Dan le wagiribudunbei wábiñoun, aba tariñagun wáguchu woun: “Hínsiñeti hamuga nun lun nasigirun kei prekursora. Gama lumoun, siñabei nasigirun ladüga gíbeti nuberesegun múnada”. Aba tálügüdüniwa anhein gayara lubéi wíderagunu, aba wariñagun tun anha lan. Lúmagiñeti dan ligía, aba tíchugun dasi lun kada aban wádangiñe lun warumadahan aban o biama rumu lubaragiñe watun bachati binaafin. Lárigiñe woudin leskueloun, aba techekürünu sun muna lun tarihini anhein buidu lubéi lerederun sun katei, lárigiñe, aba tidin apurichiha. Íbini weiri lan meha tuberesegun múnada, súnwandan meha tóunigiruniwa buidu. Dan meha le wagiribudun eiga múnada, súnwandan meha anuhein lan ñein agurabahawa. Anihein burí dan woudin apurichiha tuma lárigiñe wáfuridun leskuelarugugiñe, adügati le lun gunfuranda wamani hadasin prekursorugu.

Disisi meha irumu nau dan le nagumeserunbei apurichiha kei prekursoru. Lau sun mámagili lan meha gefenti luagu Heowá núguchi, busenti meha lasubudiruni ida liña lan lidin nun lidan napurichihan. Aban guñoun, aba nabahüdahan lun luagu íbini lan weiri lan náfaagun,  madarigidina lan aban gürigia le busenti laturiahanu Bíbülia numa. Aba wámanichagun murusunraü, lárigiñe, aba nálügüdüni: “Hínsiñeti hamuga san hun lun haturiahan numa?”. Lárigiñe lasaminaruni, aba lánharun. Ligíati, núguchi furumiñetibei gürigia le aturiahabarun Bíbülia numa. Aban lubuidun chansi lira nun.

Aba waturiahanu líburu “La verdad los hará libres”. Lárigiñe fiu dan, aba níchugun fe líderaguñadina lan núguchi lun aban nan aturiahati Bíbülia le buiti luma lun garufudahadi nan. Kei hénpulu, aban guñoun lárigiñe waliihan aban párafu, aba lálügüdünina: “Anihán le tariñagubei líburu. Ida liñati basubudiruni inarüni lan ariñahani le?”. Maranseruntina meha lun nóunabuni álügüdahani le, ligía nariñagunbei lun: “Siñati níchuguni óunabagülei hun guentó. Níchugubei hun leweñegua dimaasu danme le waturiahan úara”. Ani gúnfuli numuti! Daritina fiu bérusu le íderagubalina afuranguagüdei le meha uágubei wayanuha. Lúmagiñe dan ligía, furendeitina meha aransera lubá níchugun aturiahani. Adügati le lun lederebugudun dandu nafiñen kei lafiñen núguchi. Winwan lumuti sun le lafurendeirubei ani aba labadiseirun lidan irumu 1952.

Disedü meha irumu nau dan le náfuridunbei wábiñegiñe. Lídounmeme dan ligía tagumesera Jetha a eseriwida kei misionéra, agunbirahóua ligía Don eseriwida Betelirugu. Wéiriti meha línsiñe hadasin houn biángubei hagía, adügati katei le lun nabusenrun nadügüni ligiaméme. Ligía nabuinchagüdünbei gárada lun lan yebe nagunbirahóun eseriwida Betelirugu o tidoun leskuela Galaadü ani aba nígirun lun Heowá lan anúadirei halíaba lan neseriwida. Kati asuseredubei? Aba nagunbirahóun Betelirugun lidan irumu 1946.

Gúnfulihadina lau ámuñegueinarügü dasi lidan 75 irumu le naubei eseriwida Betelirugu. Ligía furendeihadina lubéi saragu katei, kei burí tadügǘn líburu, lahandilihóun seinsu, lagañeihóun luma lounahóun umegeguni. Ani létima hínsiñebei nun, sun arufudahani tídangiñeti Bíbülia le weresibirubei Betelirugu, lakutihóun aban bérusu sagü binaafin, yanu luma amu burí programa.

Furendeitina giñe saragu lúmagiñe Karl, le namulen, le achülürübei Betelirugun lidan irumu 1947. Aban meha aturiahati buiti ligía ani garufudahaditi. Haritagua nágili amuriaha nan ídemuei luma aban weyu lun naranseruni niyanun. Ariñagatina lun Karl luagu ibidiñe lan nun kaba lan nadüga ladüga gibe lan ariñahani numa. Ábati lálügüdünina: “Hoeli, kaba san uagu bayanuha?”. Aba gunfuranda nani lau lóufudagun ka lan labusenrubei lariñagun: lunti lan nayusuruni ariñahani le gánibei luma niyanun ani lun mayusurun nani le líbiri. Mabulieidun nubéi le nafurendeirubei lúmagiñe.

Lun gunda wamá Betelirugu, mosu wadügüni sun wayaraati lidan wapurichihan. Anhein wadüga ítara, wawinwanduba sügǘ le buíduburiti. Haritagua nágili le  asuseredubei aban weyu dan le wáfuridunbei apurichiha guñoun lidan aban fulasu gíriti Bronx, Newayóru úara luma aban íbiri. Aba woudin abisidaha aban gürigia to meha erederuboun tau garüdia La Atalaya tuma ¡Despertad! Dan le wachülürünbei ñein, aba wariñagun tun: “Wayanuhaña hama gürigia luagu aban ariñahani tídangiñeti Bíbülia le ruti gurasu”. Aba tóunabun: “Anhein hayanuhaña lubéi tuagu Bíbülia, belú humá”. Aliihatiwa saragu bérusu luagu Larúeihan Bungiu luma luagu iseri Ubóu le lunbei liabin yarafa madise. Menefánti meha hínsiñe lan le tafurendeirubei tun, ladüga aban dimaasu lárigiñe, dan le wagiribudunbei abisidahoun, agunbiraha tumutiña saragu hádangiñe tumadagu lun giñe hafurendeirun. Dan lárigiñe, dandu tuguya kei tani weiriei, aba hadügagun houngua gefentiñame luagu Heowá.

Lau sun meha busén nan namarieidun, sügüti 10 irumu lubaragiñe nasubudirunu nani weiriou. Ka íderagubadina adarira aban paaná to buitu? Amuriahatina luma Heowá lun líderagunina ani aba nálügüdagun nungua: “Kaba san nadüga lau nibagari lárigiñeme namarieidun?”.

Lárigiñe adamurini le adügǘbei lidan irumu 1953, lidan Estadiu Yankee, Newayóru, aba nasubudirun aban íbiri gíritu Mary Aniol. Tupaaná meha nitu tidan tibiaman leskuela Galaadü ani heseriwiduña meha úara. Ayanuhatu meha Mary lau ubebeni luagu tidasin kei misionéra, luagu fulasu le ídounbei tounahóua luma luagu burí aturiahani le tíchugubei houn gürigia lidan burí irumu le sügühalibei. Eibu wasubudiragun woungua, aba wíchugun fe busén wamá biángubei wagía lun wasigirun eseriwida lun Heowá lidan dan dayarüti. Aba laweiridúntima ínsiñeni le wasandirubei wámagua, ábati wamarieidun lidan gádürü-hati, irumu 1955. Aban meha idewesei lúmagiñetu Heowá Mary nun, rutu giñe buiti hénpulu nun lidan saragu igaburi. Súnwandan meha gunda tan lau furumiñeguarügü dasi le ichugúbei tun. Benefatu meha, hínsiñe hagía gürigia tun, ani súnwandan meha tíchuguni Larúeihan Bungiu furumiñe lidan tibagari (Mat. 6:33). Seriwitiwa lidan lounigirún sirkuitu luagu ǘrüwa irumu. Ani lidan irumu 1958, aba wagunbirahóuniwa lun weseriwidun Betelirugu.

Furendeitina saragu túmagiñe Mary. Lúmagiñebei wamarieidun gumesetiwa aliiha 15 bérusu tídangiñe Bíbülia úara sagü weyu. Lárigiñe meha waliihani, aba meha wayanuhan luagu ida luba lan wafalaruni lidan wabagari. Anihein meha dan tayanuhan Mary nun luagu le tafurendeirubei tidan Galaadü luma lídangiñe le tawinwandubei lidan burí irumu le tásügürübei eseriwida kei misionéra. Íderagua lumutina le nafurendeirubei túmagiñe lun buídutima lan ligaburi níchugun yanu luma gurasu houn íbirigu würiña (Ari. 25:11).

Aba tounwen Mary lidan irumu 2013. Ani nayumahaña lunya narihinu lídanme iseri Ubóu. Sunme anaha lan agurabahei weyu ligía, busentina nasigirun afurendeira luma afiñera luagu Heowá tau sun nanigi (Ari. 3:​5, 6). Dan le nasaminarun luagu sun le lunbei hadügüni lubúeingu Heowá lídanme iseri Ubóu, sanditina ugundani ani ruti gurasu nun. Lídanme dan ligía, lasigiruba Wamaisturun arufudaha saragu katei woun ani gachansinbadiwa lun wasigirun afurendeira luagu. Magumubei neteingiruni Heowá luagu sun le arufudaha láalibei nun lidan sun dan le sügühalibei luma luagu larufuduni línsiñehabu nun lidan ámuñegueinarügü igaburi.