Abürühati meha apostolu Pábulu lun Timotéu le wéiyaali lidan afiñeni kei ligía, lariñaga lun: “Ayumuraguatina bun ligibugiñe Bungiu luma Wabureme Hesukrístu, luma hagibugiñe ánheligu ha lanúadirubaña Bungiu, lun bagunfulirun luma burí gumadi le, lun aban lan la[b]u hanügǘniwa sun gürigia” (1 Tim. 5:21). Kátaña san ha uágubaña lariñawagúa “ánheligu ha lanúadirubaña”?

Furanguti mama lan layanuhaña hawagu 144,000 kristiánugu anuadirúaaña. Lugundun dan meha le layanuhanbei Pábulu luma Timotéu, magumeserungili meha háguyugun kristiánugu anuadirúaaña sielu. Mámagiña meha sífirigu apostolugu, ni ha híbiri kristiánugu anuadirúaaña. Ligíati, mama meha layanuhaña 1 Timotéu 5:21 hawagu kristiánugu anuadirúaaña (1 Ko. 15:​50-54; 1 Tesa. 4:​13-17; 1 Huan 3:2).

Mama giñe layanuhaña hawagu ánheligu ha ebedaagubaña lidan lidaani Guran. Lugundun ánheligu hagía aba houdin luéigiñe lóubadina Satanási ábati máfianu haña lan ani láganigu Hesusu (Agu. 6:2; Luk. 8:​30, 31; 2 Fe. 2:4). Ámuñegü, ládarubaña Hesusu máfianu ha lidoun fusu le mébehabei luagu 1,000 irumu, ani lárigiñe ábame lagünrinchaguniña labu sun Mafia (Hud. 6; Aruf. 20:​1-3, 10).

Kei lurugabuñanu lan Bungiu luma Kristu Hesusu ánheligu ha iridúbaña lidan 1 Timotéu 5:​21, chóuruti ánheligu lan úaraguatiña ha hagía lan ídehabaña dandu luma Heowá kei luma Hesusu.

Añahein saragu milu ánheligu úaraguatiña (Ebü. 12:​22, 23). Mama sun ánheligu lun ligiaméme lan hadasin (Aruf. 14:​17, 18). Haritagua waméi rua lan dasi lun aban ánheli lun láfaragun 185,000 súdaragu asiriana (2 Uru. 19:35). Luagu aban oubaü, según lariñaguni Hesusu másiñati hayusurúba lan ánheligu kei sétanu lun hasagaruniña “sun ha afigougüdübaña amu, hama ha adügübaña wuribati”, lídangiñe Larúeihan (Mat. 13:​39-41). Háfuga ámuba lan ánheligu ‘óundaraña lánigu Hesusu ha anúadira láañabaña lídangiñe gádürü larigei ubóu’ lun houdin lumoun sielun (Mat. 24:31). Hati híbiri ánheligu, lichugúba adundehani houn lun hóunigiruniwa lidan sun wéibugun kei lariñawagún lidan Sálumu 91:11 (Mat. 18:10; ariha huméi giñe Matéu 4:11 luma Lúkasi 22:43).

Kei le aubei warihei, ʻánheligu ha anuadirúabaña’ ha uágubaña layanuhóua lidan 1 Timotéu 5:​21, másiñati hagía lan adügübaña ítaga dasi luáguti damuriguaü. Lidan kapítulu le lubaragiñebei kapítulu 5 lidan 1 Timotéu, ruti Pábulu adundehani houn wéiyaaña lidan afiñeni ani ariñaga ligía houn íbirigu lun lan inebe hamá wéiyaaña lidan afiñeni houn. Luagu le ábaya oubaü, lunti hagunfulirun wéiyaaña lidan afiñeni lau hadasin, lun aban lan labu hanügǘniwa sun gürigia lúmati lun maweiyasun hamá óufudaha hadügün somu katei. Ka uagu? Ariñagati Pábulu lau lubafu Bungiu fiu dimurei súdiniti lau lariñagun heseriwiduña lan wéiyaaña lidan afiñeni houn íbirigu “ligibugiñe Bungiu luma Wabureme Hesukrístu, luma hagibugiñe ánheligu ha lanúadirubaña”. Lidan amu dimurei, aríagu liña Heowá, Hesusu hama “ánheligu ha lanúadirubaña” houn wéiyaaña lidan afiñeni ida liña lan hetenirun houn lílana damuriguaü. Ligíati, añahein ánheligu ha únbaña lichugúa dasi le lánina damuriguaü, ídehatiña kei burí óunigiraña lubúeingu Bungiu, ariha lau apurichihani luma lun hariñaguni lun Heowá le anügübei burí fulasu (Mat. 18:10; Aruf. 14: 6).