1. Ka ubafu espechaliti líchugubei Heowá houn gürigia?

ADÜGA lumutiña Heowá gürigia lau fiú ubafu espechaliti. Adügati lun gayara lan wasaminarun, ani íderagua lumutiwa le lun gayara lan waransehani waturobulin luma lun wadügün aransehani lubá ámuñegü (Ariñawagúni 2:11). Ruti giñe ubafu woun lun wadügüni o wagunfuliruni le wasaminarubei wadügün (Filipuna 2:13). Ruti giñe aban saminaü woun, ítara liña wasaminan kei aban umalali le wádanbei le ariñagubalin woun le buídubei luma le wuribabei. Wasaminan adügübei lun wadisedun luéi figóu ani lun wáfaagun lun machararun wamá (Rómana 2:15).

2. Ka labusenrubei Heowá lun wadügüni lau ubafu le líchugubei woun?

² Busenti Heowá lun wayusuruni ubafu burí le líchugubei woun buidu ladüga hínsiñe wamá lun ani busenti lun gunda wamá. Kéiburi lidan Abürüdǘni Ebüréu ariñagati woun ánhawa lan asaminara buidu, buídubei lan lasalirun le lunbei wadügüni. Ariñagati giñe  woun: “Sun le gayaraabei badügüni, adügabéi” (Ariñawagúni 21:5; Apurichihati 9:10). Ani lidan Abürüdǘni Güriegu ru lumuti adundehani burí le woun: “Adüga waméi lubeiti le buídubei houn súngubei sagü gayara lan” ani kada aban wádangiñe lunti layusuruni “luwuyerigu idewesei le [l]eresibirubei lúmagiñe Bungiu [...] lun leseriwidun houn amu” (Galasiana 6:10; 1 Féduru 4:10). Kei aubei warihei, busenti Heowá lun wadügüni sun wayaraati hawagu amu luma wawougua.

3. Ka burí katei hásiñarubei gürigia adüga?

³ Inarüni busén lan Heowá lun wayusuruni wabafu, gama lumoun subudi lumuti anihein lan katei le siñá wamuti adüga. Kei hénpulu subudi lumuti siñá lan machara wamá, ani siñá lan wagumuchun lau figóu luma óunweni (1 Urúeigu 8:46). Siñati giñe wariñaguni houn amu kaba lan hadüga, ladüga kada gürigia líbüreti lun desidírü lani kaba lan ladüga. Ani meberesenga anhein gibe lubéi wasubudin, chútimaati lau Heowá wawéi (Isaíasi 55:9).

4. Kaba wariha lidan arütíkulu le?

⁴ Mosu wígirun lun ladundehaniwa Heowá súnwandan. Mosu giñe wafiñerun luagu líderagubadiwa lan ani ladügübei lan katei burí le wásiñarubei adüga. Gama lumoun, busenti giñe Heowá lun wasaminarun ida luba lan waransehani waturobulin luma ida luba lan wíderagun amu (aliiha huméi Sálumu 37:3). Lidan amu dimurei, mosu wafiñerun luagu Heowá, wadügüni le buídubei ani óusera wagíame lau úaraguni. Lun wasubudiruni ida luba lan wadügüni, lidan arütíkulu le warihibei hénpulu lani Noé, Dawidi hama amu lubúeingu Bungiu úaraguatiña ha afiñerubaña luagu. Warihibei anihein lan meha katei  le siñá hamuti adüga, gama lumoun, aba desidírü hamá hetenirun lun le gayarabei hadügüni.

5. Afuranguagüda huméi le meha gádanbalin Noé?

⁵ Ariñagatu Bíbülia wínwanti lan meha Noé geyegu hau gürigia wuribatiña ani ha adügütiña figóu lánina agamariduni (Agumesehani 6:4, 9-13). Subudi lumuti meha lachülürüba lan weyu lun lagumuchun Heowá hau gürigia wuribatiña hagía. Gama lumoun, lidan lagurabahani lachülürün weyu ligía, chóuruti hiru lan meha luagu larihini le hadügübei gürigia hagía. Lidan dan ligía, ruti meha Noé fe anihein lan katei le siñá lumuti adüga, gama lumoun, ruti giñe fe anihein lan katei le gayarabei ladügüni.

6, 7. a) Ka burí meha katei siñabei ladügüni Noé? b) Ka idan genegegua lan gádantiwa luma lidaani Noé?

⁶ Katei burí le meha siñá lubéi Noé adüga. Apurichiha lumuti meha Noé uganu lánina eweridihani le líchugubei Bungiu. Gama lumoun, siñati meha lafosuruniña gürigia lun haganbuni. Siñati meha giñe lafuresehani luéyuri liabin Guran. Mosu meha lafiñerun Noé lagunfulirubei lan Heowá lani füramasei lun lagumuchun lau wuribani ani ladügübei lan lidan dan (Agumesehani 6:17).

⁷ Wawinwanduña giñe lidan aban ubóu buin hau gürigia wuribatiña ani subudi wamuti füramase haali lan Heowá lagumuchaguagüdüni (1 Huan 2:17). Gama lumoun, siñati wafosuruniña gürigia lun hánharun lun “uganu buiti le luáguti larúeihan Bungiu”. Siñati giñe wadügün lun lagumeserun “saragu asufuriruni”  lubaragiñe lidaani (Matéu 24:14, 21). Ítara kei meha Noé, mosu here lan wafiñen ani lun wafiñerun málühali lan Heowá agumucha lau wuribani (Sálumu 37:10, 11). Chouru wamuti mígirunbei lan Heowá lun ladurarun ubóu wuribati le lóugiñe le desidírü láalibei (Abakúku 2:3).

8. Ka un letenira Noé? (Ariha huméi dibuhu le lídanbei lagumeseha arütíkulu).

⁸ Katei burí le meha gayara lubéi Noé adüga. Lubaragiñe meha leferidiruni Noé liguraasun ladüga siñá lan ladügün fiú katei, aba letenirun lun le gayarabei ladügüni. Kei hénpulu, apurichiha lumuti meha uganu lánina eweridihani le lúmagiñeti Heowá lau afiñeni (2 Féduru 2:5). Chóuruti íderagua lani katei le lun lakipurun aban afiñeni héreti. Apurichihati Noé ani sigí lumuti adundehani le líchugubei Heowá lun lun ladügün aban árüka (aliiha huméi Ebüréu 11:7).

9. Ida luba wáyeihani lani Noé hénpulu?

⁹ Ítara kei meha Noé, beresegutiwa giñe “lidan luadigimari Wabureme” (1 Korintuna 15:58). Kei hénpulu, fiú wádangiñe ídehatiwa lidan tábunawagun luma tounigirún Luban Adamuridaguni tuma burí Muna lun Adamurini Wéinamuti. Fiú wádangiñe nadagimeintiwa ídeha lidan burí adamurini, tidan burí sukursáli o tidan somu Áfisi lánina lásügürawagüdün ariñahani lidoun amu iñeñein. Gama lumoun le súdinitimabei wakipuragun woungua beresegu lidan apurichihani, ligía adügübei lun héretima lan wemenigin lubá ámuñegü. Ariñagatu aban íbiri úaraguatu dan le lan tayanuhan hama gürigia luagu abinirúni le lunbei lanügüni Larúeihan Bungiu, aba tíchugun fe memenigin hamá gürigia hagía ladüga saminatiña máranina lan haturóbulin. Ánheinti wagía gemenigintiwa, ani héretimati wemenigin dan le wapurichihan. Íderagua lumutiwa wemenigin lun wasigirun áfaagua luagu ibagari magumuchaditi (1 Korintuna 9:24).

10. Afuranguagüda huméi ka lan meha ladügübei Dawidi?

¹⁰ Arufuda lumuti meha urúei Dawidi lafiñen, ani hínsiñeti meha lun Heowá saragu (Adügaü 13:22). Íbini ítara, adügati Dawidi aban figóu wéiriti dan le larounrun tuma aban würi maríeitu gíritu Betüsawé. Ani le wuribatimabei, aba lan láluahan laramuduni lifigoun lau ladügün aransehani lun lounwen Uríasi le tani würi tuguya weiriei lidan wuribu. Adügati Dawidi lun Uríasi guánarügü lan anügoun gárada to ídanboun líchiga lúrudu lun lafarún Uríasi hilagubei (2 Samueli 11:1-21). Lau lásügürün dan, aba lachülaagun sun lifigoun Dawidi (Márükosu 4:22). Kati ladügübei Dawidi?

11, 12. a) Ka meha lásiñarubei Dawidi adüga lárigiñe lafigouhan? b) Kaba ladüga Heowá wawagu ánhawa asaküriha?

¹¹ Katei burí le lásiñarubei Dawidi adüga. Siñati meha ladügün Dawidi lun masubudirúniwa lan figóu burí le ladügübei. Le linarün katei, mosu meha lasufuriruni lani lifigoun resultóu lidan sun libagari (2 Samueli 12:10-12, 14). Gama lumoun, mégeiti meha afiñeni. Mosu meha lafiñerun luagu feruduna lubéi lan Heowá ani líderagubei lan awandei lani lifigoun  resultóu anhein asaküriha tídangiñe sun lanigi.

¹² Súngubei wagía afigouhatiwa ladüga galagante wamani figóu. Gama lumoun, anihein figóu wéinamutimati luéi le líbiri. Anihein dan siñabei lan marihín lan le wadügübei. Háfuga mosu lanme wasufuriruni lani wafigoun resultóu (Galasiana 6:7). Gama lumoun afiñetiwa luagu lani Bungiu füramasei luagu líderagubadiwa lan dan le lídanñadiwa lan lénrengunga ánhawa asaküriha. Líderagubadiwa íbini anhein ladüga lubéi figóu le wadügübei wasufurirunbei (aliiha huméi Isaíasi 1:18, 19 luma Adügaü 3:19).

13. Ka meha ladügübei Dawidi lunya labuiduragüdüni lumadagua luma Heowá?

¹³ Katei burí le meha gayara lubéi Dawidi adüga. Kei le busén lan meha Dawidi laransehani lumadagua luma Heowá, ígirati lun líderaguni Heowá. Ánhati lun lererehan Natán le lani Heowá profeta (2 Samueli 12:13). Gúfese lumuti meha giñe Dawidi lifigoun lun Heowá. Ítara liña meha larufuduni busén lan lunya gamadagua lan luma Heowá (Sálumu 51:1-17). Lubaragiñe meha lígirun lun ladügün lidurun lun meseriwidun lan lun Heowá, furendeiti lídangiñe lidurun. Ani aba madügündigia laali lan figóu ligía. Saragu irumu lárigiñe, aba lounwen keisi aban wügüri le wéiriti lafiñen, ani ítara liña laritaguni Heowá (Ebüréu 11:32-34).

14. Ka wafurendeirubei lídangiñe lani Dawidi hénpulu?

¹⁴ Ka wafurendeirubei lídangiñe lani Dawidi hénpulu? Ánhawa lan adüga aban figóu wéiriti, mosu wasakürihan tídangiñe sun wanigi, wagufeseruni wafigoun lun Heowá ani amuriaha wagíame luma lun feruduna lániwa (1 Huan 1:9). Mosu giñe wayanuhan hama wéiyaaña lidan afiñeni, ladüga gayarabei híderaguniwa lunya gamadagua wamá luma Heowá (aliiha huméi Santiagu 5:14-16). Anha wamá lun lídehan Heowá. Ítara luba warufuduni afiñe wamá luagu lani füramasei luagu feruduna lubadiwa lan. Furendei wamá lídangiñe wachara ani sigí wamá eseriwida lun Heowá lau afiñeni (Ebüréu 12:12, 13).

15. Ka wafurendeirubei lídangiñe tani Ana hénpulu?

¹⁵ Chóuruti haritagua wamá hawagun amu lubúeingu Bungiu ha úaraguatiña lidan binadu dan ha afiñerubaña luagu ani adüga haméi sun hayaraati lidan lidaani lénrengunga. Ariha waméi tani Ana hénpulu. Luagu fiú dan, siñati meha gasaanigu tan. Íbini siñati lan meha tasansiruni gádantu, afiñetu meha líchuguba lan Heowá dǘgüdaguaü tun. Ligía aba lubéi meha tasigirun abasiiha tidoun tawernákulu lun táhuduragun lun Heowá luma lun tabahüdaguni lun ida liña lan tasandiragun tungua (1 Samueli 1:9-11). Rutu Ana aban hénpulu buiti woun sun wagía. Háfuga sandi wamá o gadan lániwa amu luwuyeri turóbuli, ani siñati wasansiruni gádantiwa. Ka gayarabei wadügüni? Ígira waméi sun katei lúhaburugu Heowá afiñeñu luagu berese lan wau (1 Féduru 5:6, 7). Adüga waméi sun wayaraati lun wasagarun buiti lídangiñe adamuridaguni luma lídangiñe  amu burí ídemuei le tíchugubei lóundarun Heowá woun (Ebüréu 10:24, 25).

16. Ka gayarabei hafurendeiruni agübürigu lídangiñe lani Samueli hénpulu?

¹⁶ Ka gayarabei hadügüni agübürigu úaraguatiña dan le hígiruni hasaanigu heseriwidun lun Heowá? Gayarati líderaguniña lani profeta Samueli hénpulu. Siñati meha lafosuruniña Samueli lisaanigu ha wéinamuhaña lun úaragua hamá lun Bungiu (1 Samueli 8:1-3). Ligía aba lubéi lígiruni sun katei lúhaburugu Heowá. Gama lumoun, áfaaguati lun úaragua lan lun lagundaaragüdüni Lúguchi le siélubei (Ariñawagúni 27:11). Gíbetiña agübürigu kristiánu uguñe weyu hásügürüña lídangiñe ligiaméme turóbuli. Ka hadügübei? Afiñetiña aranseñu liña lan Heowá lun leresibiruniña afigouhatiña ha asakürihabaña, ítara kei lúguchi isaani le agiribudubei lúbiñoun lúguchi le uágubei layanuha Hesusu (Lúkasi 15:20). Lidan hagurabahan lun hagiribudun hasaanigu lun Heowá aba hasigirun eseriwida lun Heowá lau úaraguni ani agurabatiña lun líderaguniña hani hénpulu hasaanigu lun hagiribudun lidoun damuriguaü.

17. Ka uagu ru lubéi hénpulu le tíchugubei würi gudemetu to hilaaruboun úmari gurasu woun?

¹⁷ Rutu giñe würi gudemetu to hilaaruboun úmari to awinwanduboun lidan lidaani Hesusu aban hénpulu buiti (aliiha huméi Lúkasi 21:1-4). Siñati meha tadügün ni kata lun tasansiruni hagaburi gürigia múarantiña ha ténpulurugubaña. Ani siñati meha giñe tadügün ni kata lun magudemen tan (Matéu 21:12, 13). Gama lumoun afiñetu meha luagu Heowá, ani ligía meha tasigirunbei lidan áhuduraguni inarüniti. Areidatu meha ligía tíchugunbalin lagumuhóun “bián gáwanaü” le meha túmabei. Wéiriti meha tafiñen luagu Heowá! Subudi tumuti meha anhein lan tíchiga teseriwidun lun Heowá lidan furumiñeti lúgaaru, líchugubei lan le temegeirubei tun lun tawinwandun. Ítara kei würi tuguya, afiñetiwa giñe líchugubei lan Heowá le wemegeirubei woun anhein wíchiga Larúeihan lidan furumiñeti lúgaaru (Matéu 6:33).

18. Ayanuha humá luagu aban íbiri le arufudubei aban igaburi buiti.

¹⁸ Gíbetiña giñe íbirigu uguñe weyu ha íchugubalin hafiñen luagu Heowá ani aba hetenirun lun le gayarabei hadügüni, lubaragiñe hetenirun lun le hásiñarubei adüga. Samina wamá luagun aban íbiri gíriti Malcolm, úaraguati íbiri le lun Heowá darí lounwen lidan irumu 2015. Lidan sun irumu le leseriwidunbei lun Heowá úara tuma lani weiriou, sügütiña dan buiti luma dan wuribati. Ariñagati: “Lidan wabagari gayarati lasuseredun katei woun le magurabuntiwa lasusereduba lan ani gagibuguatiwa giñe luma turóbuli, gama lumoun biní lumutiña Heowá ha afiñerubaña luagu”. Ka adundehani líchugubei Malcolm? “Mosu wamuriahan luma Bungiu lun líderaguniwa lun beresegu wamá adügei sun wayaraati lidan weseriwidun lun. Teni wamá lun le gayara wabéi adüga, mama lun le wásiñarubei adüga” * (ariha huméi abürüdǘni).

19. a) Ka uagu buidu lubéi bérusu lánina irumu 2017? b) Ida liña hasaminarun hagunfuliruni le lariñagubei bérusu lánina irumu 2017 lidan hibagari?

¹⁹ Kei le wuribatimarügaali lubéi ubóu le, eibu dan gíbetimabei waturobulin (2 Timotéu 3:1, 13). Uguñe weyu súdinitimati lun mígirun wamá lun ladügün turóbuli lun weferidiruni waguraasun. Lubaragiñe lira, lunti wafiñerun luagu Heowá ani ábame wetenirun lun le gayarabei wadügüni. Ligía buidu lubéi lasagarún bérusu lánina irumu 2017 lídangiñe Sálumu 37:3, le ariñagubei: “Hemenigibá luagu Heowá ani adügabéi le buídubei”.