1, 2. Ka katei hanarimeti asuseredubei weyu pentekosutesi irumu 33?

LIDAN irumu 33, aban weyu dimaasu binaafin luéyuri Pentekosutesi, añahein meha hawara 120 disipulugu óundaragu tidan aban rumu iñu tun aban muna Herusalén (Adü. 1:13-15; 2:1). Fiu weyu lubaragiñe, ariñagaali meha Hesusu houn lun herederun uburugu lugundun heresibiruba meha aban katei espechaliti (Adü. 1:4, 5). Kati asuseredubei weyu ligía?

² “Sódini aba laganbún aban areinchuni ñǘbuinti siélugiñe kei dan le láfurun aban garabali héreti, aba laganbún tidan sun muna to ñein habéi”. Ábati harihin disipulugu “lasaliragún watu gemeti kamá hamuga iñeñein lóugiñe hachügü, afanreinhóuañu lóugiñe kada aban hádangiñe. Aba habuinchun sun hagía lau [s]ífiri [s]andu” (Adü. 2:2-4). Lau aban igaburi libe le lóunahei Heowá lani sífiri sandu hawagu disipulugu hagía (Adü. 1:8). Hagía furumiñetiña anuadirúa lau sífiri sandu * ani resibi haméi chansi lun hagumadihan luma Hesusu sielu.

3. Ka meha uagu chouru habalin kristiánugu lidan pentekosutesi anuadirúaaña lan lau sífiri sandu?

³ Lun hamuga huguya lan aban hádangiñe disipulugu ha, mabulieidun hubéi yebe le asuseredubei weyu ligía. Larihíña hamuga aban katei lóugiñe hábulugu lenege ligemeri watu, ani  hayanuhaña hamuga lidan ámuñegueinarügü iñeñein (Adü. 2:5-12). Chóuruti hachoururuñein lan hamuga ibiha humaali lan sífiri sandu. Gama lumoun, anúadira lumutiña san Bungiu sun kristiánugu anuadirúaaña lau ligiaméme igaburi luma lidan ligiaméme dan? Uá. Ida liña wasubudiruni? Ariha waméi.

4. Lidan furumiñeti sígulu, resibi hamuti san sun kristiánugu anuadirúaaña emenigini lun hawinwandun sielu lidan ligiaméme dan? Afuranguagüda huméi.

⁴ Furumiñe, akutiha waméi dan le ídanbei lanuadirúa aban gürigia lau sífiri sandu. Mámarügüñanu meha hawara 120 kristiánugu anuadirúa lau sífiri sandu lidan Pentekosutesi irumu 33. Lídanmeme weyu ligía, ibiha hamuti 3,000 gürigia sífiri sandu le füramase lubéi Hesusu houn. Lidan kesi le, anuadirúatiña lárigiñe habadiseirun (Adü. 2:37, 38, 41). Irumu lárigiñe, mama meha dan le habadiseirun hanuadirúa kristiánugu ha lúnbaña houdin sielun. Lugundun ha meha samariana anuadirúatiña fiu dan lárigiñe habadiseirun (Adü. 8:14-17). Íbini aban lan kesi móubati, anuadirúati Korunéliu hama tílana luban lubaragiñe labadiseirun (Adü. 10:44-48).

5. Según 2 Korintuna 1:21, 22, ka asuseredubei dan le lanuadirún gürigia lau sífiri sandu?

⁵ Ariha waméi le asuseredubei dan le lanuadirún aban gürigia lau sífiri sandu. Másiñati hénrengu lan lun aban kristiánu lánharun anúadira laali lan Heowá ani álügüdagua ligía lungua ka lan uagu ligía lubéi anuadirúa. Añahein amu ámuti ligaburi hánharun lun. Meberesenga ida liña lan ligaburi hánharun kristiánugu ha, afuranguagüda lumuti apostolu Pábulu ka lan asuseredubei houn sun kristiánugu anuadirúaaña, ariñagati: “Dan le haganbunbalin uganu le lánina inarüni [...] aba hafiñerun, máküwatün * lau liseinin [s]ífiri [s]andu le füramasewabei. Sífiri [s]andu ligía achoururubalin woun luagu weresibirubei lan alagan le lunbei líchuguni Bungiu woun” (Efe. 1:13, 14). Le linarün katei, yusu lumuti Heowá lani sífiri sandu lun lafuranguagüdüni buidu luagu anúadira laaña lan. Ligíati, aban ichouruni sífiri sandu lun hachoururuni  luagu siéluba lan hawinwanda ámuñegü lun sun dan, mama ubouagu (aliiha huméi 2 Korintuna 1:21, 22).

6. Ka lunbei ladügüni aban kristiánu anuadirúaali lun lidin sielun?

⁶ Dan le lanuadirún aban kristiánu lau sífiri sandu, mini lan san le chouru haali lan luagu lídinba lan sielun? Uá. Le mini lubéi, anuadirúaali lan lun lidin sielun. Gama lumoun mosu laritaguni eweridihani le: “Niduheñu; áfaagua humá lun hederebuguduntima lau achoururuni luagu Bungiu lan agúarubalün ani anúadiralaün; anhein hadüga ítara, mábürühandügübadün” (2 Fe. 1:10). Ligíati, anhein anuadirúaali lubéi aban kristiánu o wáwaali lan luagu lun lidin sielun, lídiba ánheingubeirügü asigira úaragua lun Bungiu (Fili. 3:12-14; Ebü. 3:1; Aruf. 2:10).

7. Ida liña hasubudiruni kristiánugu anuadirúaaña, anuadirúaaña lan lun houdin sielun?

⁷ Ida liña lasubudiruni aban gürigia anuadirúaali lan? Dariwati óunabagülei furanguti lidan dimurei le labürüdübei Pábulu houn ha Rómabaña ha meha únbaña laguarúa ‘lumutuniña Bungiu’. Ariñagati houn: “Sífiri [s]andu le heresibirubei, mama aban sífiri lánina idamuni lunya hanufudedun; [s]ífiri le heresibirubei, ligía le adügübalün lun lirahüñü humá Bungiu. Ligía gayara lubéi wagúaruni Bungiu Baba: Gefenti lani Bungiu [s]ífiri woun luagu lirahüñühadiwa lan Bungiu” (Rom. 1:7; 8:15, 16). Kei aubei warihei, yusu lumuti Bungiu lani sífiri sandu lun lachoururagüdüni houn kristiánugu anuadirúaaña, anuadirúaaña lan lun houdin sielun (1 Tesa. 2:12).

8. Según 1 Huan 2:20, 27, ka uagu wasubudirei memegeirun hamá kristiánugu anuadirúaaña lun lariñawagún houn anuadirúaaña lan?

⁸ Adügati Heowá lun masandirun hamá ha agunbirahóubaña lun houdin sielun, ni murusun machouruni ni lidan hasaminan ni tidan hanigi (aliiha huméi 1 Huan 2:20, 27). Inarüni, ítara kei ha híbiri kristiánugu, mégeitiña kristiánugu anuadirúaaña lun larufudahan Heowá houn lidan damuriguaü. Ani memegeiruntiña lun lariñawagún houn luagu anuadirúaaña lan. Subudigüda laali Heowá houn furangu, lau lani sífiri sandu, erei le héretimabei.

9. Según Éfesuna 1:18, ka asansiruni úmabei lagagibudagua aban gürigia dan le anúadira laali Bungiu?

⁹ Gayaraati gürewei lan houn saragu lubúeingu Bungiu ha uguñebaña weyu lun gunfuranda hamani le asuseredubei lun aban gürigia dan le lanúadiruni Heowá. Moun lumuti taweiridun wanigi lau hasandiragun houngua ítara, lugundun manuadirúnwagiña. Ladüga adüga lumutiña Bungiu gürigia lun hawinwandun ya ubouagu lun súnwandan mama lun hawinwandun sielu (Agu. 1:28; Sal. 37:29). Anúadiraali hádangiñe gürigia lun hawinwandun sielu. Ligíati dan le lanuadirúniña adügati lun lasansirun hemenigi luma ligaburi hasaminan ani ayumahatiña hawinwandun sielu (aliiha huméi Éfesuna 1:18).

10. Ka mini lubéi ‘lágurahouniwaya’ gürigia?

¹⁰ Dan le hanuadirún gürigia lau sífiri sandu, ábaya “hágurahouniwa” *. Afuranguagüda lumuti giñe Hesusu siñá lan gunfuranda lani gürigia le manúadirunbei ka lan lasandirubei gürigia ‘leeya águrahouawayabei’ o “ha águrahoubaña lídangiñe [s]ífiri [s]andu” (Huan 3:3-8).

11. Ka asansiruni aniheinbei lidan ligaburi lasaminarun aban kristiánu le anuadirúaali?

¹¹ Ka asansiruni aniheinbei lidan ligaburi lasaminarun aban kristiánu le anuadirúaali? Lubaragiñe lanuadirún lun lidin sielun, hemenigiti meha lawinwandun lun súnwandan ubouagu. Ayumahati meha larihini weyu danme le lagidaruni Heowá sun wuribani luma lun ladügüni  Ubóu ábanme paraísu. Másiñati samina lan meha líchugun aban lubuidun achülürüni houn liduheñu o lumadagu ha hilaguaañabaña. Ani dan le lanúadirunbalin Bungiu lun lidin sielun, aba lasansirun lisaminan. Ka uagu? Mama luagu mabusenrun hali lan lun lawinwandun ya ubouagu. Ni luagu saragu idiheri o turobuli le aniheinbei o lasaminarun hírubei lan ibagari lun sun dan ya ubouagu. Le suserebei, yusu lumuti Heowá lani sífiri sandu lun lasansiruni ligaburi lisaminan gürigia ligía lun lemenigidun luagu amu katei.

12. Según 1 Féduru 1:3, 4, ka lasandirubei kristiánu anuadirúaali dan le lasaminarun luagu le lunbei libihini?

¹² Másiñati sandí lan kristiánu anuadirúaali madüna lani óunwenbu chansi le, íbini ítara, chouru lumuti anúadira laali lan Heowá. Lau lasaminarun luagu le lunbei libihini, sánditi aban óunwenbu ugundani luma eteingiruni (aliiha huméi 1 Féduru 1:3, 4).

13. Ka hasaminarubei kristiánugu anuadirúaaña luagu habagari ya ubouagu?

¹³ Mini lan san le busén hamá kristiánugu anuadirúaaña hóunwegun? Ruti apostolu Pábulu óunabagülei lun álügüdahani le. Lárigiñebei lariñagun ítara liña lan hágubu kristiánugu anuadirúaaña kamá hamuga aban kianpu, ariñagati: “Sun awanha lan abagarida lau úgubu le wawagubei, daritiwa mégeiti luagu; sandigua wagía woungua lau idiheri. Mama hamuga wabusenruña wóunwegun [...] le wabusenrubei, lun lasansiragun wágubu le gagumuchadibei [...] lidoun wágubu le magumuchadibei, móunwenga wagía” (2 Ko. 5:4). Ligíati mama hamuga luagu mabusenrunhaña lan anuadirúaaña lun hawinwandun ya ubouagu ni lun hóunwegun lau lóufudagun. Lubaragiñe lira, gúndaatiña lau ibagari ani busentiña hayusuruni lun heseriwidun lun Heowá hama haduheñu luma hama hamadagu. Íbini ítara, meberesenga ka lan idan heseriwida, súnwandan haritagua hamuti lubuidun emenigini le hemenigibei (1 Ko. 15:53; 2 Fe. 1:4; 1 Huan 3:2, 3; Aruf. 20:6).

14. Ka burí katei marufudubalin anúadira laali lan Bungiu aban kristiánu lau sífiri sandu?

¹⁴ Háfuga álügüdaguatün lan hungua anhein anúadira laadün lubéi Bungiu lau sífiri sandu. Anhein ítara liña lubéi, súdini hadügüni álügüdahani burí le: le san lúgubu busén humá hadügüni lugundan Bungiu tídangiñe sun hanigi?, apurichiha humuti san uganu buiti lau saragu ubebeni?, hínsiñeti san hun haturiahanu Bíbülia luma lun hafurendeirun luagu “lilulin-agei laritagun Bungiu”? (1 Ko. 2:10). Ariha humaali san labiniruñein lan Heowá háfaagun lidan hapurichihan?, ayumahatün san tídangiñe sun hanigi lun híderaguniña amu abuiduragüdei hamadagua luma Bungiu?, ariha humaali san lidan hibagari ida liña lan líderagunün Heowá? Anhein óunaba hubéi anha lun álügüdahani burí le, mini lan san le anúadira laadün lan Bungiu lun hidin sielun? Uá, lugundun gayaraati hasandiragun sun lubúeingu Bungiu houngua ítara, íbini mama hamá kristiánugu anuadirúaaña. Gayaraati giñe layusuruni Heowá lani sífiri sandu lun líchugun erei houn furumiñeguarügü lubúeingu, meberesenga ka lan hemenigibei. Ligíati, anhein machourun hubalin anhein anuadirúaadün lubéi lau sífiri sandu, mini lan le luagu mama lan hugía aban hádangiñe. Málügüdaguntiña kristiánugu anuadirúaaña houngua anhein inarüni lubéi anúadira laaña lan Bungiu lau sífiri sandu; chouru hamuti luagu anuadirúaaña lan!

15. Ida liña wasubudiruni mama lan sun ha eresibirubaña sífiri sandu lun hóudiba lan sielun?

¹⁵ Ayanuhatu Bíbülia hawagu saragu lubúeingu Heowá ha úaraguabaña ha eresibirubalin lani Bungiu sífiri sandu ani mídintiña sielun. Kei hénpulu, resibi lumuti meha Dawidi ladundehan lani Bungiu sífiri sandu (1 Sam. 16:13).  Anihán le íderagubalin lun gunfuranda lan saragu katei huliliti luagu Bungiu ani adundehaléi Bungiu lun labürühan saragu fánreinti tídangiñeti Bíbülia (Mar. 12:36). Íbini ítara, ariñagati apostolu Féduru: “Mama Dawidi amudeirubei sielun” (Adü. 2:34). Luéigiñe le aban oubaü, ‘buin liña’ meha Huan le abadiseihabei lau sífiri sandu (Luk. 1:13-16). Hesusu guánarügü ariñagubei luagu: “Hadan sun gürigia, úagili ni aban wéiriguti luéi Huan le abadiseihabei”. Lau sun lira, afuranguagüda lumuti úabei lan hadan ha lúnbaña harúeihan lidan Larúeihan Bungiu sielu (Mat. 11:10, 11). Yusu lumuti Heowá lani sífiri sandu lun hadügün wügüriña ha saragu katei wéinamuti, gama lumoun, mayusurun lumuti lun lanúadiruniña lun houdin sielun. Mini lan san le murusunrügüñein lan úaragua hamá hawéi ha anuadirúbaña lun harúeihan sielu? Uá. Le mini lubéi le láguyuguagüdübaña lan Heowá lun hawinwandun lidan Paraísu ya ubouagu (Huan 5:28, 29; Adü. 24:15).

16. Halíaba hawinwanda saragu míñunu lubúeingu Bungiu ha lídanbaña dan le?

¹⁶ Uguñe weyu, saragu míñunu lubúeingu Bungiu ha awinwandubaña ubouagu mama lun hawinwandun sielu hemenigibei. Ítara kei Abüraámü, Sara, Dawidi, Huan le abadiseihabei hama saragu amu wügüriña hama würiña ha lánina binadu dan, ayumahatiña hawinwandun ubouagu lábugiñe Larúeihan Bungiu (Ebü. 11:10).

17. Kaba burí álügüdahani wóunaba lidan le aban arütíkulu?

¹⁷ Guentó, añahagua fiu kristiánugu anuadirúaaña ya ubouagu. Ligía liábinguabei álügüdahani woun (Aruf. 12:17). Kei hénpulu, ida luba hasandiragun kristiánugu anuadirúaaña houngua lau anuadirúaaña lan? Ida luba wóuserun aban íbiri lídangiñeti wani damuriguaü le agumeseruti eiga tídangiñe fein gurá ligía tídangiñe diwéin lidan Aritaguagülei? Lunti san wadiheridun ladüga aganwoundeina hamá sagü irumu ha ariñagubaña anuadirúaaña lan? Lóunabuba álügüdahani burí le lidan le aban arütíkulu.