1, 2. Ka lariñagubei aban ánheli houn würiña ha lubadubaña lumúaha Hesusu, ani ka adundehani líchugubei Hesusu guánarügü houn?

ARUGADEINA liña weyu 16 lidan nisán irumu 33 lidaaniwagu Kristu. Lau saragu igarigu aban houdin fiu würiña afiñetiña arihei umúahaü le ñein lubéi lábunua Hesukrístu le Aburemei, kéiburi lóugiñe 36 oura lárigiñe labunún. Héibuga meha lun háhurudaguni lúgubu lau burí ibiñein luma agülei hémeti. Dan le hachülürünbei lubadu umúahaü, aba taweiridun hanigi lau hadeiruni málouga. Aba lariñagun aban ánheli houn saragüda waali lan Hesusu hádangiñe hilaaña, ani ariñagati: “Aningirán [...] hubá hubá Galiléoun; ñeinba harihei” (Mat. 28:1-7; Luk. 23:56; 24:10).

² Dan le hígirunbalin würiña umúahaü, Hesusu guánarügü aba layarafadun houn ani aba lariñagun: “Heiba awisaraña nánigu lun houdin Galiléoun, luagu ñeinba lan harihana” (Mat. 28:10). Chóuruti anihein lan adundehani súdiniti luma le lunbei líchuguni houn lani disipulugu, lugundun furumiñeti katei le ladügübei lárigiñe láguyugun, laransehan aban adamuridaguni.

3, 4. Ka uagu gayara lubéi wariñagun mámarügüñein lan houn apostolugu lichugúa gumadi le lídanbei Matéu 28:19, 20? (Ariha huméi dibuhu le luágubei tidáü garüdia).

³ (Aliiha huméi Matéu 28:16-20). Lidan damuriguaü le ladügübei, afuranguagüda lumuti houn lani disipulugu kaba lan dasi súdiniti hagunfulira lidan furumiñeti sígulu, ligiaméme giñe wadügübei uguñe weyu. Ariñagati houn: “Heiba lubeiti habügürü gürigia ha lílana sun fulasu, adüga humaña nánime disipulugu. [...]  Arufudaha huguyame houn lun gaganbadi hamá lun sun le uágubei nariñaga hun”.

⁴ Busenti Hesusu lun hapurichihaba lan sun ha afalarubalin. Mámarügüñein meha houn 11 apostolugu úaraguatiña líchigei Hesusu gumadi le. Ka uagu wariñagei le? Lugundun mámarügüñanu meha apostolugu ñein luagu wübü Galiléa dan le líchugunbalin Hesusu gumadi le houn lani disipulugu. Haritagua waméi ariñaga lan ánheli houn würiña harihibei lan buga Hesusu Galiléa. Ligíati, másiñati añahein lan meha giñe würiña úaraguatiña lidan damuriguaü ligía. Lanwoun lira, afuranguagüdati apostolu Pábulu arufudagua lan Hesusu “lungua houn sügǘ hau seingü-san afiñetiña ha óundaraguñubaña lidan aban” (1 Ko. 15:6). Halía?

5. Ka resun buiti wámabei lun wafiñerun layanuhaña lan 1 Korintuna 15:6 luagu adamuridaguni le adügǘbei Galiléa le uágubei layanuha Matéu kapítulu 28?

⁵ Anihein resun buiti wama lun wafiñerun layanuhaña lan meha Pábulu luagu adamuridaguni le adügǘbei Galiléa le uágubei layanuha Matéu kapítulu 28. Ka burí resun ligía? Furumiñe, galiléana meha hiibe-agei lani Hesusu disipulugu. Ligíati, wübü le Galiléabei ligía meha aban fulasu buiti lun hóundarawagun saragu gürigia, mama tidan aban muna Herusalén. Libiaman, óundaraguaali meha Hesusu hama lani 11 apostolugu tidan aban muna Herusalén lárigiñe láguyugun. Lun hamuga hóunrugubei lan lani apostolugu líchigei gumadi lun lapurichihóun luma lun hadügǘn disipulugu, lariñaguñein hamuga houn ñein Herusalén, mamuriahanga hama ni hama würiña ni hama amu disipulugu lun hóundaragun luma Galiléa (Luk. 24:33, 36).

6. Ida liña larufuduni Matéu 28:20 lagunfuliruba lan buga gumadi luáguti hadügǘn disipulugu uguñe weyu, ani ídatima liña lagunfuliruña lan?

⁶ Ariha wamá ábaya resun súdiniti le uágubei siñá lan wariñagun hóunrügüñein lan lani Hesusu apostolugu úaraguatiña líchigei gumadi lun hadügün disipulugu. Ida liña wasubudiruni? Lagumuhóun katei le lariñagubei Hesusu houn ha afalarubalin, anihán: “Subudi huméi luagu anahein lan huma sagü weyu darime lagumuchun ubóu” (Mat. 28:20). Úaragua luma le lariñagubei Hesusu, uguñe weyu hadügaguña saragu gürigia houngua lánigume Hesusu disipulugu, ítara kei larufuduni lubuidun dátosu le. Sagü irumu habadiseirun kéiburi 300,000 iseri lani Hesusu disipulugu kei gefentiña luagu Heowá.

7. Kaba wakutiha guentó, ani ka uagu?

⁷ Saragu aturiahatiña Bíbülia aba burí habadiseirun. Añahein amu hanufudetiña lun aban hamá lani Kristu disipulu. Gúndaatiña lau le hafurendeirubei, gama lumoun ásuhatiña lun habadiseirun. Chouru wamuti luagu ha lan íchugubaña aturiahani tídangiñeti Bíbülia busén hamá híderaguniña aturiahatiña afalarei le hafurendeirubei luma lun aban hamá disipulugu. Lidan arütíkulu le, warihibei ida luba lan wachülürün tidoun hanigi aturiahatiña luma wíderaguniña ederebudagüdei hamadagua luma Bungiu. Ka uagu mégeiwa lubéi lun lakutihóun katei le? Ladüga háfuga lachülürün dan le ídanbei mosu lan wanúadirun anhein wasigiruba lubéi íchiga aturiahani tídangiñeti Bíbülia lun aban gürigia o anhein masigirun báadiwa lubéi.

8. Ka uagu anihein lubéi dan hénrengu lan lun wíderaguniña aturiahatiña lun línsiñedun Heowá houn?

⁸ Busenti Heowá lun heseriwidun gürigia lun luagu línsiñe houn. Ligíati, le wabusenrubei lun wíderaguniña aturiahatiña gunfurandei berese lan Heowá hau, hínsiñe hagía lun saragu. Busentiwa lun harihini Heowá kei ‘háguchi méteñuhaña’, ani “ligía ágüdahabaliña würiña ha hilaguaaña hámari” (Sal. 68:5). Dan le gebegi lan houn aturiahatiña ínsiñeni le lasandirubei Heowá hawagu, gayaraati ladügün lira lun taweiridun hanigi luma lun laganwoundun ínsiñeni le hasandirubei luagu. Gama lumoun añahein aturiahatiña ha únbaña gürewei lan harihini Heowá kei aban  úguchili hínsiñehabuti, ladüga marufudun lan háguchi guánarügü ínsiñeni houn (2 Tim. 3:1, 3). Ligíati, ayanuha wamá luagu lubuidun burí ligaburi Bungiu lidan aturiahani. Íderagua wamaña aturiahatiña gunfurandei busén lan Wabungiute le hínsiñehabubei lun habihin ibagari magumuchaditi ani aranseñu liña lun líderaguniña ibihei. Ka amu katei gayaraabei wadügüni?

9, 10. Ka burí agumeiraguagüdüni lunboun wayusurunu lun wíchugun aturiahani tídangiñeti Bíbülia, ani ka uagu wayusuroun líburu tugía?

⁹ Yusu wamóun líburu Kátima san tarufudahabei Bíbülia? tuma “ Redei humá lidan línsiñehabu Bungiu”. * Adügǘwatu agumeiraguagüdüni to lun tíderaguniwa lun wachülürün tidoun hanigi aturiahatiña. Kei hénpulu, lidan kapítulu 1 tidan líburu Kátima san, ounabúati álügüdahani burí le: meberesenhabuti san Bungiu odi deretu lanigi?, ida liña san lasandiragun Bungiu lungua dan le wasufurirun marichaü? luma gayaraati san hayarafadun lun Heowá? Ánhounti líburu Línsiñehabu Bungiu, tíderagubei aturiahati gunfurandei adüga lan lafalarúniwa adundehani le tídanbei Bíbülia  lun buidu lan libagari luma lun derebugu lan lumadagua luma Heowá. Íbini rúhadiwa lan burí aturiahani tau líburu burí to lunti waranserun buidu lubá kada aturiahani asaminareina luagu le lemegeirubei kada aturiahati.

¹⁰ Guentó, samina wamá busén lan aturiahati lasubudirun luagu somu tema le uágubei mayanuhóun lan tidan aban tídangiñe agumeiraguagüdüni tótima wayusuruboun lun warufudahan. Lidan kesi le, gayaraati wariñagun lun lun laliihanu agumeiraguagüdüni to ídanboun layanuhóua luagu tema ligía, ligía lungua ani ábame wasigirun íchiga aturiahani lun tau burí agumeiraguagüdüni to írida wamaaruboun.

11. Kaba dan wagumesera afurieida hama aturiahatiña, ani ida luba wíderaguni aturiahati gunfurandei ka lan uagu súdini lubéi furíei?

¹¹ Gumese waméi aturiahani lau furíei. Liibe-agei dan, buídutimati lun gumesegiñe wamá lau wagumeseruni aturiahani luma lau wagumuchuni lau aban furíei dan le wíchugun aturiahani tídangiñeti Bíbülia, kéiburi dimaasu lárigiñe wagumeseruni aturiahani. Mosu wíderaguni aturiahati gunfurandei láurügübei lan lídehan sífiri sandu gunfuranda wamanu Lererun Bungiu. Añahein íchugutiña aturiahani gumesetiña arufudei lun aturiahati ka lan uagu wafurieida, lau haliihani le lariñagubei Santiagu 1:5, le ariñagubei: “Anhein megei lubéi aban hídangiñe lichú aau, amuriahalá luma Bungiu”. Lárigiñe, aba hálügüdaguni aturiahati: “Ida luba wamuriahan lichú aau luma Bungiu?”. Másiñati lóunabuba lan aturiahati, lau wafurieidun lun Bungiu.

12. Ida luba hamuga hayusuruni Sálumu 139:2-4 lun híderaguni aturiahati Bíbülia abuiduragüdei ligaburi lafurieidun?

¹² Arufudaha wamá lun aturiahati ida luba lan lafurieidun. Chóurugüda waméi lun busén lan Heowá laganbuni lafurieidun tídangiñe sun lanigi. Afuranguagüda waméi lun aturiahati gayara lan wadaarunu wanigi lun Bungiu lau wabahüdaguni lun ida liña lan wasandiragun woungua luma lau wayanuhan luma luagu burí katei le maweiyasuntiwa ariñagei lun ni aban gürigia. Lugundun le linarün katei, subudi lumuti Heowá le tídanbei tilulin-agei wanigi (aliiha huméi Sálumu 139:2-4). Mosu giñe wínchahani aturiahati lun lamuriahan luma Bungiu lun líderaguni asansirei ligaburi lisaminan luma lun lígiruni luriban échuni. Kei hénpulu, samina wamá barǘ haali lan aban aturiahati fiu dan aturiaha ani hínsiñegili burí fedu le tánina relihión mama inarünitu lun. Subudi lumuti luagu wuriba lan, íbini ítara, hínsiñegili lun. Ínchaha waméi lun labahüdaguni lun Heowá kátima lan lasandirubei luma lun layumuragun lun lun líderaguni asandira ínsiñeni luágurügü katei le hínsiñebei lun Heowá (Sal. 97:10).

13. a) Ka uagu lunti lubéi wagunbirahani aturiahati lidoun adamuridaguni lau lóufudagun? b) Ka gayaraabei wadügüni lun buidu lan lasandiragun aturiahati lungua tidan Luban Wadamuridagun?

¹³ Agunbiraha waméi aturiahati lidoun adamuridaguni lau lóufudagun. Ka uagu? Ladüga gayaraabei ladügün le laganbubei luma le larihibei lidan adamuridaguni lun lachülürün tidoun lanigi luma lun léredun lafiñen. Ligíati, arufuda waméi bidéu Ka adügǘbei lidan wadamuridagun? lun luma lun wagunbirahani tidoun Luban Wadamuridagun. Anhein gayara, gayaraati wásügürün luagu. Aban katei buiti le gayaraabei wadügüni, lau wagunbirahan ámuñegueinarügü íbirigu lun houdin wama íchiga aturiahani lun. Ítara, ménrengubei lun aturiahati lun léchudun hawagu lílana damuriguaü ani buídubei giñe lasandiragun lungua danme le lidin adamuridagua.

14. Kaba ínchahei aturiahati awansera lidan lafiñen?

¹⁴ Le wabusenrubei lun wíderaguni aturiahati awansera lidan lafiñen (Efe. 4:13). Dan le lánharun aban gürigia lun laturiahanu Bíbülia, másiñati le lan furumiñeti katei le labuserunbei lun líderaguni le laturiahabei lidan libagari. Gama lumoun, dan le gánwounhali ínsiñeni le lasandirubei luagu Heowá, másiñati lagumeserun  asaminara ida luba lan líderaguniña amu, kéiburi lílana damuriguaü (Mat. 22:37-39). Lanwoun lira, meredera waméi wayanuhan lun luagu burí chansi le wámabei lun wíchugun budagia lun lawanserun wadagimanu lánina apurichihani.

15. Ida luba wíderaguni aturiahati agagibudagua luma turobuli?

¹⁵ Arufudaha wamá lun aturiahati ka lan gayaraabei ladügüni lun lagagibudagun luma turobuli. Ru wamá aban hénpulu. Aba lariñagun aban aturiahati tídangiñeti Bíbülia woun, le furihali apurichiha ani mabadiseirungili, charaali lan aban lílana damuriguaü lun. Kaba hamuga wadüga? Lubaragiñe woudin luéigiñe lóubadina aban hádangiñe, akutiha wamá luma aturiahati ka lan tariñagubei Bíbülia. Gayaraati wafuranguagüdüni lun gayara lan ladügün bián katei: feruduna lani íbiri le achararubei lun o, anhein siñá lubéi labulieiduni le asuseredubei, lun layanuhan luma lau ínsiñehabuni, ñein láamuga darangilaü hádangua (ariha huméi giñe Matéu 18:15). Íderagua waméi aturiahati aranserei le lunbei lariñaguni. Arufuda huméi lun ida luba lan layusuruni programa JW Library^®, Adundehani lun haturiahan gefentiña luagu Heowá luma páhina jw.org^® lun lasubudiruni ida luba lan laransehani turobuli. Eibu buídutima lan lasubudiruni ida luba lan lagagibudagun luma burí sügǘ ítarati lubaragiñe labadiseirun, buídutimabei lanaagun lungua hama íbirigu lárigiñe.

16. Ka buiti ibihúbei dan le wagunbirahan amu íbirigu íchiga aturiahani tídangiñeti Bíbülia wama?

¹⁶ Agunbiraha waméi óunigiruni sirkuitu dan le labisidahani damuriguaü o amu íbirigu lidoun aturiahani. Ka uagu? Amu luéi le ariñaga wamaalibei lidan párafu 13, ladüga gayaraati buídutimabei lan líderaguni amu íbiri aturiahati sügǘ wau. Samina wamá áfaaguaali lan aturiahati saragu wéiyaasu lun lígirubei lan agumulahani, lau sun lira, siñá láagili. Lidan kesi le, agunbiraha wamá aban íbiri lun lidin wama le meha giñe áfaagubei saragu lun gayaraabei lan meha lígiruni agumulahani. Másiñati líchugun somu adundehani buiti tídangiñeti Bíbülia lun aturiahati. Anhein mabuidun lubéi wasandiragun woungua lun wíchugun aturiahani úara luma aban íbiri le subudihali saragu, amuriaha wamá luma íbiri ligía lun líchuguni aturiahani. Lidan burí sügǘ ítarati, sagá wamá buiti lídangiñe le subudi hamaalibei íbirigu. Haritagua waméi le lan wabusenrubei lun wíderaguni aturiahati awansera lidan lafiñen.

17, 18. Ka lunbei gabaroun wamani dan le wanúadirun anhein lunti lubéi wadüraaguni aturiahani tídangiñeti Bíbülia luma aban aturiahati?

¹⁷ Anhein mawanserun lubéi aban aturiahati, lunti wálügüdagun woungua anhein mosu lubéi wasigirun íchiga aturiahani lun. Aban katei le lunti gabaroun wamani, iarani le luágubei gürigia lun furendei. Añahein aturiahatiña hénrenguti houn lun hawanserun sügǘ hawéi amu. Ligíati, álügüdagua wamá woungua: “Lawanseruña san aturiahati según iarani le luágubei? Gumeseeli san awinwandei le lafurendeirubei?” (Mat. 28:20). Íbini hamuga hámaru lan lawanserun aturiahati, lunti warihini ladügüña lan asansiruni.

 ¹⁸ Kati gayaraabei wadügüni ánhawa ariha lougua lan línsiñe aturiahani tídangiñeti Bíbülia lun aturiahati o mínsiñe lan lun? Samina wamá luagu kesi le. Gumú laaru aturiahati laturiahanu líburu Kátima san ani másiñati gumeseeli lan aturiahoun líburu Línsiñehabu Bungiu, íbini ítara, mídingili lidan ni aban adamuridaguni, ni lidoun Aritaguagülei. Lanwoun lira, héchuti ariñaga maturiahanbei lan lúnrügü letenirun lun katei le masudininti. Lidan kesi le, mosu wayanuhan luma furangu. *

19. Ka gayaraabei wariñaguni lun aban aturiahati le genegebei lougua lan línsiñe aturiahani tídangiñeti Bíbülia lun, ani ka lunbei gabaroun wamani?

¹⁹ Gayaraati wagumeseruni yanu lau wadügüni álügüdahani burí le lun aturiahati: “Según bisaminan, ka san eredehabalibu lun mama ban aban gefenti luagu Heowá?” Ánhawa lóunaba aban aturiahati, le barǘ haali saragu dan aturiaha, hínsiñe lan le lafurendeirubei tídangiñe Bíbülia lun ani lau sun lira, mámabei lan aban gefenti luagu Heowá, lunti funa san wasigirun íchiga aturiahani lun? Luéigiñe le aban oubaü, másiñati lafuranguagüdüni aturiahati luagu furumiñeti wéiyaasu ka lan uagu mawanserun lubéi. Kei hénpulu, háfuga saminati siñaguabei lan lungua lun lapurichihan tidan burí muna. Lárigiñe wasubudiruni ida liña lan lasandiragun lungua, ménrenguntimabei woun lun wíderaguni.

20. Ida liña líderaguniwa Adügaü 13:48 asubudirei anhein wasigiruba lubéi íchiga aturiahani lun aban gürigia?

²⁰ Híruti añahein lan aturiahatiña Bíbülia ítara haña kei meha ísüraelina lidan lidaani Esekiéli. Ariñagati Heowá hawagu lun profeta le: “Ítara liña hanügünibu kei aban eremuhati uremu lánina adarihani, le buiti lumalali, gáfaradi ligía árüpa. Aganba hamuti bererun gama lumoun madügün hamuti” (Ese. 33:32). Másiñati hénrengu lan woun lun wariñagun lun aban gürigia masigihadiwa lan íchiga aturiahani lun. Gama lumoun, “murusunrügaali dan” erederuti (1 Ko. 7:29). Ligíati, lubaragiñe wasigirun íchiga aturiahani lun aban gürigia le mawanserunti, buítimati lun wáluahaniña “ha lúntiñabaña ibagari le magumuchaditi” (aliiha huméi Adügaü 13:48).

21. Kaba san bérusu lánina irumu 2020, ani ka uagu buídubei lubéi?

²¹ Lidan irumu 2020, líderagubadiwa bérusu lánina irumu asaminara ida luba lan wabuiduragüdüni ligaburi wadügün disipulugu. Lidan, dariwati dimurei súdiniti le lariñagubei Hesusu lidan adamuridaguni le ladügübei luagu wübü Galiléa: “Heiba lubeiti habügürü gürigia [...], adüga humaña nánime disipulugu; badisei humaña” (Mat. 28:19).