1, 2. Ka burí sügǘ úmabei hagagibudagua saragu lubúeingu Heowá ani ka lánibei hawagu?

SAMINA wamá luagu ǘrüwa sügǘ le. Aba lariñagun surusia lun aban íbiri nibureingili anihein lan aban sandi luagu le adügübei lun eferidireina lani lere. Aban leferidiruni aban íbiri benefati le barühali 50 irumu luadigimari ani madariti amu lau sun yebe áluaha lan saragu. Sandiguatu aban íbiri derebuguharu tungua eibu lan lásügürün dan siñaali tadügün saragu lidan teseriwidun lun Heowá.

² Anhein wásügürüña lubéi lídangiñe aban lídangiñe turobuli le, másiñati genege lan woun meseriwín wamá lun ni kata. Gayaraati ladügün sügǘ libe burí le lun weferidiruni wagundan, lun wasandiragun woungua wuriba luma lun lagadeirun wamadagua hama amu.

3. Ida liña larihini Satanási hama ha áyeihabalin ibagari?

³ Arufuda lumuti ubóu le ida liña lan larihini Satanási habagari gürigia. Súnwandan lóuseruniwa kamá hamuga mebegitiwa lun ni kata. Lau magudemehabuni lariñaga tun Ewa gayaraabei lan tadügüni sun le tabusenrubei ani subudigaléi buidu buidu óunweniba lan lanüga maganbadi tan lun Bungiu. Súnwandan ligía lan abugurubalin léibugun bísini ubouagu, polítika hama alidihatiña relihión. Ligíati maweiridun tubéi wanigi lau harufudun saragu laburiña bísinisi, polítiku hama alidihatiña relihión menebenehabuni luagu ibagari ani meberesentiña lau le hasandirubei gürigia.

4. Kaba uagu wayanuha lidan arütíkulu le?

 ⁴ Ánheinti Heowá busenti lun buidu lan wasandiragun woungua ani íderagua lumutiwa dan le wásügürün lídangiñe sügǘ le gayaraabei ladügün lun wasandiragun woungua mouni wamá (Sal. 136:23; Rom. 12:3). Lidan arütíkulu le, wafurendeiruba ida liña lan líderaguniwa Heowá lidan burí sügǘ le: dan le wageindaguña lan luma sandi, dan le wásügürün lídangiñe maseinsuni luma dan le ladügün aweiyaduni lun wasaminarun ua lan ni kata lun wíchuguni lun Heowá lidan weseriwidun lun. Furumiñe, akutiha waméi ka lan uagu mosu lubéi wafiñerun weiri lan webegi súngubei wagía lun Bungiu.

5. Ka katei arufudubalin weiri lan hebegi gürigia lun Heowá?

⁵ Íbini lídangiñe lan múa ladügawa Heowá, gebegitimatiwa sügǘ lau bu murusun múa (Agu. 2:7). Ariha wamá fiu resun le uágubei wasubudira weiri lan webegi lun Bungiu. Kei hénpulu, adüga lumutiwa lau iarani lun gagaburi wamani ligaburi (Agu. 1:27). Ítara, íñutimati wabara sügǘ luéi amu katei le ladügübei ya ubouagu ani ru lumuti múa hama animaalugu lábugiñoun waríaahan (Sal. 8:4-8).

6. Ka amu katei arufudubalin woun weiri lan hebegi gürigia gafigountiña lun Heowá?

⁶ Íbini lárigiñe lafigounha Adán tuma Ewa, sigimémeti Heowá arufuda gebegi hamá gürigia lun. Le lueirin webegi lun darí lun lóunahani Hesusu, le Liráü, íchigei libagari kei sákürifisiu lun lesefuruniwa lídangiñe figóu (1 Huan 4:9, 10). Seremei lun esefuruni, láguyuguagüdübaña Bungiu gürigia ha óunwegubaña ladüga lifigoun Adán, dandu ha richabaña kei ha marichabaña (Adü. 24:15). Arufudatu tumuti Lererun woun mama lan ladüga ligaburi hátuadi, wadeiragun woungua luma warumudiri adügübei gebegi wamá lun (Adü. 10:34, 35).

7. Ka amu resun arufudubalin woun wagía lubúeingu Bungiu weiri lan webegi lun?

⁷ Anihein bandi resun wama wagía lubúeingu Bungiu lun wafiñerun weiri lan webegi lun Heowá. Achawaha láadiwa luouguoun ani arihaléi ida liña lan wóunabun lun uganu buiti (Huan 6:44). Dan le wagumeserunbei ayarafada lun Heowá, aba giñe layarafadun woun (Sant. 4:8). Lanwoun lira, díreiti dan luma erei lun ladundehaniwa. Subudi lumuti ida waña lan guentó luma le gayaraabei wadügüni ámuñegü. Arufuda lumuti giñe línsiñehabu woun lau lererehan woun (Ari. 3:11, 12). Ma arufuda lumuti sun katei le weiri lan webegi lun Bungiu?

8. Ida liña gayara lan líderaguniwa dimurei le lídanbei Sálumu 18:27-29 lun warihini turobuli lidan amu igaburi?

⁸ Chouru lumuti meha urúei Dawidi hínsiñe lan lun Heowá ani íderagualei. Anihán le íderagubalin Dawidi awanda lau aban lubuidun igaburi dan le harihinbalin amu kei gürigia móuniti (2 Sam. 16:5-7). Dan le wasandiragun woungua siñá lan woun ani gagibugua wagía luma lénrengunga, gayaraati líderaguniwa Heowá arihei katei lidan amu igaburi luma lun wawandun furumiñeguarügü lénrengunga (aliiha huméi Sálumu 18:27-29). Anhein anihein lubéi lídehan Heowá wama, úabei ni aban lun hararamuni weseriwidun lun lau ugundani (Rom. 8:31). Guentó, ariha wamá ǘrüwa sügǘ le ídanbei mosu lan waritaguni weiri lan webegi lun Heowá hínsiñe wagía lun.

9. Ka gayaraabei wasandiruni ladüga sandi?

⁹ Gayaraati ladügün sandi lun weferidiruni were luma lun wasaminarun meseriwín wamá lun ni kata. Háfuga nibusigari wamá lun híchugun gürigia fe luagu le wásiñarubei adüga o megei wamá ídemuei. Ani íbini hamuga míchugun hamá amu fe sándiñadiwa lan, háfuga nibusigari wamá ladüga siñá haali lan wadügüni le  meha wadügübei luagu aban dan. Lidan burí dan lánina idiheri le, ruti Heowá dǘgüdaguaü woun. Ida?

10. Kei lariñawagún lidan Ariñawagúni 12:25, ka katei gayaraabei líderaguniwa dan le wageindaguña lan luma sandi?

¹⁰ Dan le sandi wamá, gayaraati ladügün “dimurei buiti” lun wárügüdagun woungua (aliiha huméi Ariñawagúni 12:25). Adügaali Heowá lun wadarirun tidan Bíbülia, lubuidun burí dimurei le aritaguagüdübaliwa gebegi wamá lun Heowá íbini sándiñadiwa lan (Sal. 31:19; 41:3). Ánhawa aliihei ani aliihaya waméi dimurei lúmagiñeti Bungiu le, líderagubadiwa lun mígiraguagüdün wamá woungua lun luriban saminaü ladüga somu sandi.

11. Ida liña larihini aban íbiri lídehan Heowá?

¹¹ Ariha waméi likesin aban nibureinti gíriti Jorge le uágubei ladagara aban sandi le ídanbei eferidireina lani lere lau lóufudagun, adüga ligía lun lasandiragun lungua mouni lan. Ariñagati: “Maranserungidina meha lun nagagibudagun luma luriban saminaü le ñǘbuinbei nun ladüga sandi, ni luma busiganu le nasandirubei ladüga meha herederun gürigia aríaguana. Lidan aribadeinatima lan nátuadi, saminatina meha ida luba lan nibagari. Siñá meha nun, ábati nayumuragun lun Heowá lun líderagunina”. Ida liña lóunigiruni Bungiu? Ariñagati: “Hénrenguti meha nun lun níchugun arigei lun bérusu burí le naliihabei, ligía lariñawagúnbei nun lun naliihan bérusu le chátiti lídangiñe Sálumu, le burí ayanuhabei luagu weiri lan hebegi lubúeingu Heowá lun. Aliiha ani aliihaya numuti bérusu burí ligía sagü weyu. Íderagua lumutina, adüga ligía lun darangilu lan nasandiragun nungua. Lau lásügürün dan, aba hagumeserun amu arihei gabügürüguaali lan náhayachun. Darí lun hariñagun nun ru lan igaburi buiti le nuágubei dǘgüdaguaü houn. Aba níchugun fe óunaba laali lan Heowá nafurieidun.  Íderagua láadina meha asansirei le nasandirubei nuougua. Aba nagumeserun etenira lun le tariñagubei Bíbülia luagu ida liña lan larihinina Heowá, íbini sándiñadina lan”.

12. Ka lunbei wadügüni lun wibihini lídehan Heowá dan le wageindaguña lan luma sandi?

¹² Anhein wageindaguña lubéi luma somu sandi, chouru waméi subudi lani Heowá le wásügürübei. Ayumuragua wamá lun lun líderaguniwa arihei gádantiwa lau lubuidun igaburi. Aliiha wamóun Bíbülia darí wamaamugei lubuidun burí dimurei le labürügüdübei Bungiu tidan wabá. Teni wamá lun burí bérusu le ayanuhabei weiri lan hebegi lubúeingu Heowá lun. Lau wadügüni, warihibei buidu lan hama sun ha eseriwidubaña lun lau úaraguni (Sal. 84:11).

13. Ka gayaraabei lasandiruni aban hachügüdina iduheñu lau leferidiruni luadigimari?

¹³ Sun hachügüdina iduheñu busentiña híchuguni le hemegeirubei haduheñu houn. Samina wamá aban lan leferidiruni aban íbiri luadigimari ibidiñega lun ka lan uéigiñe. Áfaaguati saragu lun láluahan amu, íbini ítara, madariti. Lidan burí aban sügǘ ítarati, másiñati lasandiragun lungua meseriwín lan lun ni kata. Ida luba líderaguni letenirun lun le füramase lubéi Heowá?

14. Ka uagu lagunfulirei Heowá lererun?

¹⁴ Meredeti ni aban lani Heowá füramasei magunfulirunga (Hos. 21:45; 23:14). Adüga lumuti luagu saragu resun. Furumiñe, ladüga lídanñein lan huraraü liri. Ru laali lererun lóunigirubaña lan lubúeingu ha úaraguabaña, ligíati ariha lumuti lagunfulirun lau lani füramasei kei aban buligasion (Sal. 31:1-3). Lanwoun lira, subudi lumuti wuribañein lan hamuga wasandiragun woungua lun hamuga masaminarun lan hawagu ha tílanabaña lóundarun. Füramase haali líchugubei lan le wemegeirubei woun  ani lóunigirubei lan wamadagua luma, úati ni kata lun lararamuni (Mat. 6:30-33; 24:45).

15. a) Ka lénrengunga úmabei hagagibudagua kristiánugu lidan furumiñeti sígulu? b) Ka lachoururagüdübei Sálumu 37:18, 19 woun?

¹⁵ Dan le waritaguni ka lan uagu lagunfulirei Heowá lani füramasei, chóurutimabei wasandiragun woungua dan le wásügürün lídangiñe maseinsuni. Samina wamá hawagu kristiánugu ha lánina furumiñeti sígulu. Dan le héibahounbei lílana damuriguaü le Herusalénbei, súngubei hagía “aba hanurahan lidoun burí lirahüñü fulasu [...]; apostolugurügüñanu manurahan” (Adü. 8:1). Másiñati gagibugua hamá meha luma maseinsuni. Háfuga féridi hamutu haban, hawadigimari luma hani bísinisi. Lau sun lira, mágurun lumutiña Heowá ani meferidirun hamuti giñe hagundan (Adü. 8:4; Ebü. 13:5, 6; Sant. 1:2, 3). Ágüdaha lumutiña meha Bungiu kristiánugu úaraguatiña ha ani lágüdahabadiwa giñe (aliiha huméi Sálumu 37:18, 19).

16. Ka burí sügǘ gayaraabei ladügün lun wasaminarun anhein gebegi lubéi weseriwidun lun Heowá?

¹⁶ Lidan aweiyadeina wamá gayaraati liábingua lidoun wasaminan siñaali lan wadügün saragu lidan weseriwidun lun Heowá. Másiñati ítara liña lan meha lasandiragun urúei Dawidi lungua dan le laweiyadunbei (Sal. 71:9). Ida liña líderaguniwa Heowá?

17. Ka larufudahabei le asuseredubei tun aban íbiri gíritu Jheri woun?

¹⁷ Ariha waméi le asuseredubei tun aban íbiri gíritu Jheri. Aban tagunbirahóun lidoun aban adamuridaguni lánina larufudahóun taransehóun Luban Adamuridaguni le ídanbei mabusenrun tan tidin. Aba tariñagun: “Wéiyaadina, hilá lani weiriei ani siñaguatina nungua lun nadügün somu katei le gayaraabei lahuudun lun Heowá. Meseriwínhadina lun ni kata”. Guñoun  lubaragiñe, aba tafurieidun lun Heowá tídangiñe sun tanigi. Weyu lárigiñe, dan le tachülürünbei tidoun Luban Adamuridaguni, anihagua meha machouruni tuagu anhein lunti lubéi ñein tan. Lidan programa, aba lafuranguagüdün aban íchuguti yanu, le lan súdinitimabei wama lau aranseñu wamá lun wígirun lun ladundehaniwa Heowá. Ariñagayatu Jheri: “Aba nasaminarun, ‘anati le gayara numuti’. Aba nagumeserun ayahuaha, ladüga aba níchugun fe óunaba laali lan Heowá nafurieidun. Lachoururagüdüñein meha nun anihein lan somu katei gebegiti numa le lunti níchuguni lun ani aranseñu liña lan lun larufudahan nun”. Dan le tasaminarun Jheri luagu le sügühalibei, ariñagatu: “Adadagareina liña meha nebelurun lidoun adamuridaguni, sin erei luma lau íruni. Náfurida ñéingiñe lau gurasu, sandí nuguya gebegi nan ani afiñeñu gayaraguabadina lan nungua”.

18. Ida liña tarufuduni Bíbülia gebegimémegili lan weseriwidun lun Heowá íbini wéiyougaadiwa lan?

¹⁸ Íbini wéiyaadiwa lan, gayaraati wachoururuni anihein wadagimanu luma Heowá le lunti líchuguni woun (Sal. 92:12-15). Arufudahati Hesusu woun weiri lan lebegi lun Heowá le wadügübei lidan weseriwidun lun íbini genege lan woun murusunrügüñein lan o siñá lan wadügün saragu (Luk. 21:2-4). Ligíati, teni wamá lun le gayaraabei wadügüni. Kei hénpulu, gayaraati wayanuhan luagu Heowá, wafurieidun hawagu íbirigu luma lun wínchahaniña íbirigu lun úaragua hamá. Ariha lumutiwa Heowá kei ídehatiña luma, mama luagu le wibihibei, ladüga aranseñu waña lan lun gaganbadi wamá lun (1 Ko. 3:5-9).

19. Ka ichouruni líchugubei Rómana 8:38, 39 woun?

¹⁹ Ma lueirin eteingiruni le wasandirubei lau wáhuduragun lun Heowá, aban Bungiu le unbei gebegi hamá ha áhuduragubaña lun. Adüga lumutiwa lun wadügüni lugundan ani wáhuduragun lun adügübei lun gunda lan wabagari le tímatimaati (Aruf. 4:11). Gayaraati ariha lániwa ubóu kei gürigia meseriwíntiña, ánheinti Heowá úati nibusigari lan wau (Ebü. 11:16, 38). Dan le wasandiragun woungua siñá lan woun ladüga sandi, maseinsuni o aweiyaduni, haritagua waméi úati lan lunti lafanreinraguniwa luéi línsiñehabu Wáguchi le siélubei (aliiha huméi Rómana 8:38, 39).