1. Dan le hasaminarun luagu Heowá, ida liña harihini?

 ÁFAAGUAADÜN san lun hasaminarun ida liña lan Heowá? Dan le hafurieidun lun, ka ñǘbuinbei hichügüwagun? Íbini marihín lan, ayanuhatu Bíbülia luagu lidan saragu igaburi. Kei hénpulu, ariñagatu Bíbülia luagu Bungiu “harugoungadagüdati”, ani ítara liña lan giñe kei “aban watu gagumuchaguagüdaditi” (Sal. 84:11; Ebü. 12:29). Lidan aban arufudúni, ariñagati profeta Esekiéli ítara liña lan Heowá kei dübü le safiru, ítara liña giñe kei buronse laganagua watu gemeti, arihúati giñe aban larugounga geyegu lau, tenege heremuru (Ese. 1:​26-28). Lau wasaminarun luagu másiñati taweiridun wanigi o wanufudedun.

2. Ka uagu hénrengu lubéi houn fiu gürigia hayarafadun lun Bungiu?

² Kei marihín wabalin Heowá, másiñati hénrengu lan woun wafiñerun hínsiñe wamá lun. Wasaminarúnbei ítara háfuga ladüga katei le asuseredubei woun lidan wabagari —kei ua lubéi aban úguchili le arufudubei ínsiñeni woun— ábati wasaminarun maweiyasunbei lan Heowá asandira ínsiñeni wawagu. Le buídubei, gunfuranda lumuti Heowá ida liña lan wasandiragun woungua luma ida liña lan ladügün le meha wawinwandubei lun ítara wamá. Lun líderaguniwa lun gunfuranda wamani hínsiñe wamá lun, ruti adundehani buiti tidan Lererun luagu lubuidun ligaburi.

3. Ka uagu wayanuhaba lubéi luagu Heowá luma luagu línsiñehabu?

³ Ínsiñeni, ligíatima dimurei le arufudubalin káteiñein lan Heowá (1 Huan 4:8). Arufuda lumuti igaburi le adüga lani sun katei lau ínsiñeni. Wéiriti ani héreti línsiñehabu darí lun sandí lani hawagu ha mínsiñehabubaña lun (Mat. 5:​44, 45). Lidan aturiahani le, wayanuhaba luagu Heowá luma luagu línsiñehabu. Éibutimaame wasubudiruni éibume línsiñedun woun.

 WÉIRITI WÍNSIÑE LUN HEOWÁ

4. Ida liña hasandiragun hungua lau hasaminarun hínsiñehabu lan Heowá? (Ariha humóun iyawaü).

⁴ Ariñagatu Bíbülia luagu Bungiu “ligía guánarügü hínsiñetün lun” (Huan 16:27). Tidan Bíbülia agoubaguagüdati Heowá lungua tuma aban úguchuru to hínsiñehabutu (Isa. 66:​12, 13). Samina wamá tuagu aban úguchuru to óunigirubalin tisaani lau saragu ínsiñeni. Lau ínsiñeni, aba tañuuragüdüni luagu tigachürügü ani aba tayanuhan luma lau ínsiñehabuni. Dan le layahun irahü o dan le anihein lan gáriti luagu, aba tíchuguni le lemegeirubei lun. Ítarameme, warugabubei Heowá danme le hiru wamá. Ligía lariñagubei abürühati Sálumu: “Labadinagua idiheri le agibedagubei nisaminanrugu, rútibu dǘgüdaguaü nun luma ugundani” (Sal. 94:19).

5. Anti hun, ka mini lubéi línsiñehabu Heowá le magumuchadibei?

⁵ Úaraguati Heowá (Sal. 103:8). Hínsiñetiwa lun íbini chará wamá. Sun oura hau ísüraelina agañidagüdei Heowá; gama lumoun, dan le hasakürihan, arufuda lumuti houn luagu hínsiñe hamá lun. Luagu aban dan, aba lariñagun houn lumutuniña: “Ladüga bínsiñe nun, wéiriti bebegi ani hínsiñetibu nun” (Isa. 43:​4, 5). Masansiragungili ligaburi Heowá. Gayaraati wachoururuni sandí láagili lan ligiaméme ínsiñeni wawagu. Íbini wadügün aban figóu wéiriti mágurun lubadiwa. Ánhawa asaküriha ani yarafa wagíame lun, lasandiramémebei ligiaméme ínsiñeni ligía wawagu. Füramaseti feruduna lubadiwa lan (Isa. 55:7). Ariñagatu Bíbülia dan le lan feruduna lániwa Heowá, ítara liña kamá hamuga ‘lachibuñein wafigoun’ (Adü. 3:19).

6. Ka wafurendeirubei lídangiñe Sakaríasi 2:8 luagu Heowá?

⁶ (Aliiha huméi Sakaríasi 2:8). Agoubaguagüda lumutiwa Heowá luma lila lagu. Aban katei hanarimeti lisudinin agu. Ligíati, ítara liña kamá lariñaguña Heowá: “Dan le ladügün somu gürigia wuribani hun, ítara liña kamá laguuruña luagu aban katei le súdinibei nuagu”. Kei le hínsiñe wabéi lun Heowá, mínsiñeti lun lun ladügǘn wuribani woun, ani ligía busén lubéi lun lóunigiruniwa. Dan le wasufurirun, súfuriti giñe. Ligíati, gayaraati wariñagun lun Heowá: “Góunigibana kei lila bagu” (Sal. 17:8).

7. Ka uagu lunti lubéi wachoururuni hínsiñe wamá lun Heowá?

⁷ Busenti Heowá lun hachoururuni hínsiñe humá lun. Inarüni, gunfuranda lumuti adüga lan le winwan humaalibei o turobuli le úmabei  hagagibudagua lun hasandirun machouruni luagu hínsiñe humá lun. Ligíati súdiniti lun hachoururuni luagu hínsiñe humá lun. Ka gayaraabei líderagunün? Lau wakutihani ida liña lan larufudun Heowá ínsiñeni lun Hesusu, houn kristiánugu anuadirúaaña luma woun súngubei wagía. Ligíaba wakutiha guentó.

ARIÑAGA LUMUTI HEOWÁ HÍNSIÑE HUMÁ LUN

8. Ka uagu chouru lubalin Hesusu buidu buidu hínsiñe lan lun Lúguchi?

⁸ Sügühali Heowá saragu milu míñunu irumu úara luma Lisaani le hínsiñebei lun. Ligía lídanñanu lubéi aban ani wéiriti hínsiñegu hámagua. Anihán umadaguaü le lǘhalitimahalibei. Lidan Matéu 17:​5, ariñagati Heowá furangu luagu hínsiñe lan Hesusu lun. Mama ariñagarügüti “le aubei óunwenbu lan nugundan”, ariñagati giñe: “Anihán niráü le hínsiñebei nun”. Busenti lun wasubudiruni hínsiñe lan lun saragu, panta lan lau Hesusu luma luagu le lunbei ladügüni yarafa madise (Efe. 1:7). Chouru lumuti meha Hesusu buidu buidu le lasandirubei Heowá luagu. Wéiriti meha lachoururuni hínsiñe lan lun Lúguchi, ligía lariñagunbalin saragu wéiyaasu (Huan 3:35; 10:17; 17:24).

9. Ka dimurei arufudubalin hínsiñe hamá kristiánugu anuadirúaaña lun Heowá? (Rómana 5:5).

⁹ Ariñagati giñe Heowá hínsiñe hamá kristiánugu anuadirúaaña lun (Aliiha huméi Rómana 5:5). Según iñeñein le ídangiñebei tabürüdǘwa Bíbülia, layanuhaña bérusu luagu weiri lan ínsiñeni le lasandirubei Heowá hawagu kristiánugu anuadirúaaña darí lun lagoubaguagüdüniwa luma aban duna le éibaaguati. Subudi hamuti kristiánugu anuadirúaaña hínsiñe hamá lun Bungiu (Hud. 1). Ariñaga lumuti apostolu Huan le lasandirubei dan le labürüdünbalin dimurei burí le: “Ariha humá lueirin wínsiñe lun Bungiu Úguchili, darí lun gayara lan laguarúniwa woun ‘lirahüñü Bungiu’” (1 Huan 3:1). Kristianurügüñanu san anuadirúaaña hínsiñe lun Heowá? Uá, wafurendeiruba hínsiñetiña sun lubúeingu lun.

10. Ka achoururagüdübalin woun hínsiñe wamá lun Heowá?

¹⁰ Ka ichouruni wéiritimabei wama le achoururagüdübalin woun hínsiñe wamá lun Heowá? Lebegi esefuruni. Ligía arufudubalin woun hínsiñe wamá lun Heowá saragu (Huan 3:16; Rom. 5:8). Derege lumuti Heowá Lisaani lun lounwen wawagu súngubei lun gayara lan ferudunawa lan wafigoun luma lun lumadagu wamá (1 Huan 4:10). Eibu wararamagun asaminara luagu lebegi esefuruni le lafayeirubei Heowá luma Hesusu wawagu, ábatima gunfuranda wamani weiri lan línsiñe kada aban wádangiñe lun (Gal. 2:20). Mafayeirun lumuti Heowá lebegi esefuruni lúnrügü lagunfulirun lau aban lúrudu, lafayeirunbalin ladüga wínsiñe lun. Arufuda lumuti línsiñehabu lau lederegeruni Lisaani —le hínsiñetimabei lun —lun lasufurirun hilá ligía wawagu.

11. Ka hafurendeirubei lídangiñe Heremíasi 31:3?

¹¹ Kei le aubei warihei, mama sandirügüti Heowá ínsiñeni wawagu, arufuda lumuti giñe (aliiha huméi Heremíasi 31:3). Achawaha lumutiwa luouguoun ladüga hínsiñe wamá lun (aliiha huméi giñe 2 Lúrudu 7:​7, 8). Úati ni kata lun hafanreinraguagüdüniwa luéi ínsiñeni le lasandirubei wawagu (Rom. 8:​38, 39). Ida liña san hasandiragun hungua lau hasaminarun luagu le? Waliihaali Sálumu 23. Sunme awanha lan aliihei, ariha huméi ida liña lan meha lasagarun Dawidi buiti lídangiñe ínsiñeni le larufudubei Heowá lun lúmati ida liña lan giñe hasagarun buiti lídangiñe.

IDA LIÑA SAN HASANDIRAGUN HUNGUA LAU HASUBUDIRUNI HÍNSIÑE HUMÁ LUN HEOWÁ?

12. Ida luba hamuga hayanuhan luagu Sálumu 23 lidan murusun dimurei?

¹² (Aliiha huméi Sálumu 23:​1-6). Lidan Sálumu 23, ariñagati Dawidi lau ichouruni hínsiñe  lan lun Heowá, góunigilei lau ínsiñeni. Ariñagati ñein luagu Heowá lan Lúniribei, ani ayanuhati giñe luagu ida liña lan lumadagua luma. Chóuruti lasandiragun Dawidi lungua ladüga subudi lani Heowá lan adundehabalin. Ani rabati luagun sunsuinagubei. Subudi lumuti meha larufudubei lan Heowá línsiñehabu lun sagü weyu lidan libagari. Ariha waméi ka lan uagu lariñaga lau saragu ichouruni afiñe lan luagu Bungiu.

13. Ida liña meha lasubudiruni Dawidi lóunigirubei lan Heowá?

¹³ “Ligía ua lubéi nemegeirun”. Sandiguati meha Dawidi lungua luagu lóunigiruñein lan Heowá buidu buidu, lugundun súnwandan líchuguni Heowá sun le lemegeirubei lun. Subudi lumuti gayara lan gamadagua lan luma Bungiu ani gunda lan Bungiu lau. Ligíati chouru lubalin Dawidi, meberesenga lan le asusereduti, Heowaba lan ariha lun ua lan ni kata lemegeirun. Afiñeti weiri lan ínsiñeni le larufudubei Heowá lun sügǘ lau sun lidiheri, ani adügati katei le lun lasandiragun lungua gúndaañu (Sal. 16:11).

14. Ida liña larufudun Heowá ínsiñeni woun?

¹⁴ Góunigi lumutiwa Heowá lau saragu ínsiñeni dántima le lasuseredun katei wuribati woun. Ariha waméi tikesin Claire, a to meha barüharuboun 20 irumu eseriwida Betelirugu. Ariñagatu luagu ibidiñe lan tun kaba lan tadüga dan le liábinbei saragu lamiselu houn tiduheñu: aba ladagarun derame luagu túguchi, aba tabugún aban tamulelua, aba labouchagun hani tiduheñu bísinisi ani féridi hamutu haban. Ida liña larufuduni Heowá lóunigiruñanu lan? Ariñagatu Claire: “Ru lumuti Heowá le hemegeirubei niduheñu houn sagü weyu. Súnwandan líchuguni lóugiñe le nasaminarubei. Areida numuti tidan nanigi ínsiñeni le larufudubei Heowá nun ani  sun oura nasaminaruña luagu. Íderagua lumutina lun nubaruaguóun nan dan le wuriba lan léibugun katei”.

15. Ida liña meha libihin Dawidi erei? (Ariha huméi giñe dibuhu).

¹⁵ “Ruti iseri erei nun”.  Lásügürüña meha Dawidi lídangiñe saragu lénrengunga, ligía anihein lubéi burí dan aba lasandirun idiheri (Sal. 18:​4-6). Íderagua lumuti larihini Dawidi línsiñehabu Heowá luma lóunigiruni lun lárügüdün erei. Ariñagati Dawidi luagu Heowá le lumada: “Emeraaguagüda lumutina lidan sagadi le hilumati, barǘ lumutina larun burí duna le darangilati”. Ítara liña lárügüdün erei lun lasigirun eseriwida lun Heowá lau ugundani (Sal. 18:​28-32).

16. Ida liña hasandiragun hungua lau rúhali lan Heowá iseri erei hun?

¹⁶ Dan le wagagibudagun luma lénrengunga, gayaraati giñe wariñagun: “Mébeha lan línsiñehabu Wabureme, ani malouguadungili lareini” (Aya. 3:22; Kol. 1:11). Ariha waméi le asuseredubei tun Rachel. Dan le lígirunbarun tani weiriei ani ígiralei lumadagua luma Heowá lidan lidaani COVID-19, ariñagatu bulesei lanu sügǘ ligía tanigi. Ka ladügübei Heowá lun líderagunun? Ariñagatu: “Adügati Heowá lun nasandiragun nungua hínsiñewa nan. Ruti saragu umadagu nun ha ásügürübaña dan numa, barütiña éigini nun, óunahatiña mensahitu buíduburiti nun luéigiñe gágamuru luma burí bérusu le íchuguti dǘgüdaguaü, hayatiña nuagun ani haritaguagüda haméi nun lóunigiruñadina lan Heowá. Rútina seremei lun Heowá sun oura hawagu íbirigu ha ítarabaña nun kei iduheñu lau harufudun ínsiñeni nun”.

17. Ka uagu gayara lubéi lariñagun Dawidi: “Manufudebadina ni ka uei”?

¹⁷ “Manufudebadina ni ka uéi, ladüga buguya, Nabureme, númañadibu”. Hanarimetiña meha láganiñu Dawidi ani lídanñein meha denchaü libagari saragu wéiyaasu. Ligía lubeiti, adügati línsiñehabu Heowá lun lasandiragun Dawidi lungua chóuruñu luma luagu lóunigiruñein lan Heowá. Sandiguati lungua kamá le anihán Heowá súnwandan lóubawagu. Ligía gayara lubéi lariñagun lidan luremu: “Aba lóunabunina gidaléi sun anufudei nuéi” (Sal. 34:4). Lau sun anihein lan meha dan sandí lan Dawidi anufudei, mígiraguagüdünti lungua lun ladüga chouru lumuti meha hínsiñe lan lun Heowá.

18. Dan le wagagibudagun luma sügǘ le adügübei lun wanufudedun, ida liña líderaguniwa Heowá lun wasubudiruni hínsiñe wamá lun?

¹⁸ Dan le wagagibudagun luma sügǘ le íchuguti anufudei woun, ida liña wasubudiruni hínsiñe  wamá lun Heowá? Ariñagatu aban prekursora gíritu Susy ida liña lan tasandiragun tungua tuguya luma tani weiriei dan le láfaragunbei hasaani lungua: “Dan le lasuseredun aban katei hanarimeti bun ítara, adügati lun basandiragun bungua siñá lan bun ani ibidiñe ligía bun kaba lan badüga. Lau sun lira, adügati línsiñehabu Heowá lun wasandiragun woungua chóuruñu ani góunigi lumutiwa”. Ariñagatu Rachel, to buga uáguboun wayanuhan lidan párafu 16: “Dan le hiru nubéi aban weyu guñoun, ani hanufude nuguya, aba nasandirun siñá lan nun, aba nafurieidun lun Heowá ayahuaheina lau saragu igarigu. Lau lóufudagun aba nasandirun kamá hamuga le larünarügüñadina Heowá lun líchugun darangilaü nun, ítara kei tadüga aban úguchuru lun tisaani. Lárigiñe aba gayaraahali lan narumugun. Maweiyasuntina abulieidei ida liña lan nasandiragun nungua lárigiñe furíei ligía”. Sügüti aban íbiri wéiyaali lidan afiñeni gíriti Tasos gádürü irumu adaürǘwa ladüga lamahadun lun lasudarahan. Ariñagati góunigi lani Heowá lau ínsiñeni: “Ru lumuti lóugiñe le nemegeirubei nun ani adügati katei le lun lederebugudun nafiñen luagu. Lau lira, ru lumuti lani sífiri sandu nun, lun gayara lan nasandiragun nungua gúndaañu íbini lídanñadina lan aban fulasu le ruti íruni. Adügati lira lun eibu lan nafiñerun luagu, eibu nasandiruni línsiñehabu. Ligíati, dan meha le furisunrugu nubéi, aba nadügagun nungua prekursorume”.

YARAFA WAMÁ LUN WABUNGIUTE LE HÍNSIÑEHABUBEI

19. a) Ida luba ligaburi wafurieidun anhein wasubudira hínsiñe wamá lun Heowá? b) Ka bérusu luáguti línsiñehabu Heowá chülütimabei tidoun hanigi? (Ariha huméi rekuáduru “ Bérusu le gayaraabei líderaguniwa lun wasandiruni línsiñehabu Heowá”).

¹⁹ Sügǘ le uágubei wayanuhan lidan aturiahani le, arufudati aban lan Bungiu hínsiñehabuti Heowá (2 Ko. 13:11). Nidiheriti luagu kada aban wádangiñe. Chouru wamuti luagu ‘óuburagua lumutiwa lan lau línsiñehabu’ (Sal. 32:10). Éibutima wararamagun asaminara luagu ida liña lan larufudun Heowá ínsiñeni woun, éibutimaame inarüni lan woun ani wasandiraguba woungua yarafañu lun. Ligíati gayara lubéi wafurieidun lun, dará wamounme wanigi lun, lun wabahüdahani lun megei wamani línsiñehabu saragu. Gayaraati wabahüdahani sun le nidiheridagüdübadiwa lun luma lun wachoururuni gunfuranda lániwa ani ayumaha lan líderaguniwa (Sal. 145:​18, 19).

20. Ka uagu layarafagüdawa línsiñehabu Heowá lun?

²⁰ Ítara kei wayarafadun lun watu durunguti lidan lidiliga, ítara liña giñe lachawahaniwa línsiñehabu Heowá lun súnwandan. Busentiwa lun werederun súnwandan lurugabu. Gabafuti línsiñehabu Heowá, ani buiti. Gúndaatiwa lau hínsiñe wamá lun Heowá saragu! Sun wagía busentiwa wariñagun luagu Heowá: “Hínsiñeti Nabureme nun” (Sal. 116:1).