1, 2. Ka turobuli másiñati gayara lan wagagibudagun luma, wagía le lubúeingu Heowá?

 FURUMIÑEGUARÜGÜ oura gayaraati liabin somu lamiselu woun sódini le gayaraabei lasansiruni wabagari lun súnwandan. Ariha wamá fiu sügǘ. Aban weyu aban lariñagun aban surusia lun aban íbiri úaraguati gíriti Luis a anihein lan aban luwuyeri kánserü ámuti luagu ani fiúrügaali lan hati lau abagarida. Teseriwiduña meha Monika lau saragu ubebeni úara luma tani weiriei, le meha wéiyaali lidan afiñeni. Aban weyu, aban tíchugun fe lawinwanduña lan tani weiriei aban ibagari le mabuidunti luagu saragu irumu. Olivia, aban íbiri mamarieidungiru, mosu meha tanurahan túbiñegiñe ladüga layarafaduña lan aban óunwenbu herigini. Dan le tagiribudunbei aba tíchugun fe günringua lan tuban. Sódini aba lasansirun habagari gürigia burí ha. Susereeli san aban katei libe le hun?

² Ítara kei sun gürigia, wagía lubúeingu Heowá sügütiwa giñe lídangiñe saragu turobuli ani chülüti dan lun wasandirun. Lanwoun lira, óuserawaguatiwa ladüga wafiñen, éibaaha hamutiwa ha iyereehabúbaña houn lumutuniña Bungiu. Inarüni, ígira lan Heowá lun lasuseredun katei wuribati woun, gama lumoun füramaseti líderagubadiwa lan (Isa. 41:10). Lau Heowá wóubagiñe, gayaraati wakipuruni wagundan, wanúadirun buidu lúmati lun úaragua wamá íbini lidan sügǘ hénrenguti. Lidan aturiahani le, warihiba gádürü katei le ladügübei Heowá lun líderaguniwa agagibudagua luma turobuli le lánina ibagari. Wayanuhaba giñe luagu le lunbei wadügüni lun wasagarun buiti lídangiñe ídemuei le líchugubei woun.

LÓUNIGIRUBADIWA HEOWÁ

3. Ka katei hénrengubei woun lun wadügüni dan le wásügürün lídangiñe somu lamiselu?

³ Anhein wásügürüña lubéi lídangiñe somu sügǘ hénrenguti,  másiñati gürewei lan woun wasaminarun luma wanúadirun buidu. Ka uagu? Másiñati anihein lan saragu igarigu wawagu ani buin liña lan wachügü lau saragu idiheri ani ibidiñe ligía woun kaba lan wadüga. Ítara liña hasandiragun bián íbirigu würiña ha iridúbaña lidan furumiñeti párafu houngua. Abahüdahatu Olivia: “Dan le lagünrichagubarun herigini nuban aba labidiñedun nun kaba lan nadüga ni kaba lan nariñaga”. Anihán le tariñagubei Monika luagu wuribani le ladügübei tani weiriei: “Hanarimeti wuribani le ladügübei. Aba nasandirun kamá hamuga le mirawaguaru nanigi. Siñaguagubeitina nungua ni lun nadügüni nuberesegun le lánina sagü weyu. Masaminarungubeitina gayara lan lasuseredun aban katei líbeina le nun”. Ida liña füramase lani Heowá woun líderagubadiwa lan danme le siñaguaadiwa lan woungua lun wiñuragun lídangiñe somu sügǘ?

4. Ka füramase lubéi Heowá woun lidan Filipuna 4:​6, 7?

⁴ Le ladügübei Heowá. Ariñagatu Bíbülia: “Ábameti líchuguni Bungiu lidarangilan” woun (aliiha huméi Filipuna 4:​6, 7). Darangilaü ligía, ligía íchugubei ñurugua tun wanigi seremei lubuidun wamadagua luma Heowá. Ma lueirin darangilaü le, “le íñutimabei luéi sun subudi le siñá lubéi ni aban gürigia gunfuranda” o asaminara. Sandiguañahaadün san hungua lau aban lanarime darangilaü lárigiñe hadügün aban furíei tídangiñe sun hanigi lun Heowá? ‘Lidarangilan Bungiu’ hasandirubei.

5. Ida luba lóunigirunu ‘lidarangilan Bungiu’ wanigi luma wasaminan?

⁵ ‘Lidarangilan Bungiu’ le uágubei layanuhóua lidan Filipuna 4:7 ariñagati giñe, “lun lóunigirunu hanigi luma sun hisaminan”. Dimurei güriegu le ásügürawagüdübei kei “lóunigirunün”, ligía meha dimurei le hayusurubei milidaru lun hayanuhan hawagu súdaragu ha óunigirubalin aban uburugu lun mábürühan hamá áganiñu luagun. Gayaraabei meha harumugun gürigia ha awinwandubaña lidan uburugu lau darangilaü ladüga subudi hamani añaha lan súdaragu óunigirei. Ítarameme, dan le lóunigirunu ‘lidarangilan Bungiu’ wanigi luma wasaminan sandiguatiwa woungua chóuruñu ani lau darangilaü (Sal. 4:8). Íbini maranseragun lan turobuli lau lóufudagun gayaraati wasandirun murusunraü darangilaü ítara kei lasuseredun tun Ana (1 Sam. 1:​16-18). Ítarati, gayaraabei ménrengun lan woun lun wasaminarun buidu luma lun wanúadirun buidu.

6. Ka gayaraabei wadügüni lun wasandiruni ‘lidarangilan Bungiu’? (Ariha humóun giñe iyawaü luma dibuhu).

⁶ Le lunbei wadügüni. Ítara kei gayara lan hamuriaha lílana aban uburugu luma aban súdara lun lóunigiruniña, gayaraati giñe wamuriahan luma Heowá lun lóunigiruniwa. Furíei wamá lun Heowá darime wibihini “lidarangilan” (Luk. 11:9; 1 Tesa. 5:17). Ligía ladügübei Luis tuma Ana to lani weiriou, dan le lichugúnbei ñunsu houn fiúrügaali lan hati lau abagarida.  Ariñagati: “Masaminarugubeitina hénrengubei lan nun nanúadirun kaba lan agaranihani neresibira luma burí amu katei ítarati le lunbei nadügüni lidan oura ligía. Gama lumoun huuti furíei lun gayara lan wakipuruni wadarangilan lidan sun sügǘ le”. Biángubei hagía furíeitiña lun Heowá tídangiñe sun hanigi saragu wéiyaasu, lun líchugun darangilaü houn lun lóunigirunu hanigi luma lun líchugun lichú aau houn lun hanúadirun buidu. Ani sandí hamuti óunaba lani Heowá hafurieidun. Anhein hásügürüña lubéi lídangiñe sügǘ hénrenguti meredera lan hafurieidun. Harihibei líchugun Heowá darangilaü hun ani lóunigiruboun hanigi luma hisaminan (Rom. 12:12).

LÍCHUGUBA HEOWÁ ÑURUGUA WOUN

7. Ida liña wasandiragun woungua dan le wásügürüña lan lídangiñe aban sügǘ le hanarimeti lénrengun?

⁷ Anhein wásügürüña lubéi lídangiñe aban sügǘ hénrenguti, másiñati hénrengu lan woun warihini katei keisi lubudubu ni lun wasaminarun buidu kéiñaha wadügüni dan le maturobulin wamá. Háfuga wasandiragun woungua kamá aban waporu lidan aban lanarime lérouga. Ligía asuseredubei tun lani Luis weiriou dan le lóunwenbei. Abahüdahatu: “Anihein dan aban nasandirun kamá ni kata nuguya ábati nasandirun gudemehabu núniwagua. Ani anihein burí dan aba nasandiragun nungua lau igañi ladüga úaali lan Luis numa”. Anihein burí weyu sandigua tan tungua tábuguarügüñoun lan ibidiñe ligía tun kaba lan tadüga ladüga mosu lan tadügüni katei burí le meha ladügübei Luis. Ítara liña sun katei le tun kamá hamuga lídanñoun aban lanarime liñawan dan baranaha. Ida liña líderaguniwa Heowá dan le wásügürün lídangiñe sügǘ ítarati le hénrenguti woun lun wiñuragun lídangiñe?

8. Ka füramase lubéi Heowá woun lidan Isaíasi 33:6?

⁸ Le ladügübei Heowá. Füramasehaali líchuguba lan ichouruni woun (aliiha huméi Isaíasi 33:6). Dan le lídanñoun lan aban lanarime lérouga aban waporu, gayaraati tagumeserun ánhinha lau irofuni. Lun gayara lan tawandun aban waporu lanarime lérouga, anuhein tuguya garünatu, tuleguñu liña arüna ligía lidan biángubei oubaü. Adügatiti lira lun maweirin lan tánhinha, chouru ligía hasandiragun pasaheru houngua. Saragu waporu nadagimeinti tarüna anhein téibaaguña lubéi. Ítarameme, anhein busén wabéi lun líchugun Heowá ichouruni woun dan le wásügürün lídangiñe turobuli wéinamuti, lunti wasigirun wabaruaguóun, mini lan le wasigirun eseriwida lun lau úaraguni.

9. Ida liña tadügün sun agumeiraguagüdüni to tíchuguboun lóundarun Heowá lun darangilu wamá? (Ariha humóun giñe iyawaü).

⁹ Le lunbei wadügüni. Anhein buin liña lubéi wachügü lau turobuli, adüga waméi sun  wayaraati sagü weyu lun wakipuruni wamadagua luma Bungiu. Inarüni, háfuga siñabei lan wadügüni katei kéiñaha wadügüni, ligía lubeiti haritagua waméi gunfuranda lániwa Heowá (ariha huméi giñe Lúkasi 21:​1-4). Mabulieida huméi hasagarun dan lun haturiahan luma lun hararamagun asaminara luagu le haturiahabei. Yusu lumutu Heowá lóundarun lun líchugun ariñahani woun luma burí bidéu buíduburiti le gayaraabei líderaguniwa akipuragua woungua keisi lubudubu. Lun wadariruni le wemegeirubei, gayaraati wayusuruni JW Library^®, Índice de las publicaciones Watch Tower tuma Adundehani lun haturiahan gefentiña luagu Heowá. Ariñagatu Monika, to buga uáguboun wayanuha, yusu tanu tulu burí to dan le liabin luriban saminaü tichügüwagun. Anihein burí dan, áluaha tumuti dimurei igañi, agarabaaguni o úaraguni, aba burí taliihani ariñahani darí tasandiragun tungua buidu. Ariñagatu: “Aba burí nagumeserun áluahei ariñahani le lau burí saragu katei nichügüwagun, lárigiñeti aba nasandirun aban lanarime gálumaü kamá hamuga lóuburuñadina Heowá. Sun anaha lan aliihei, aba níchugun fe gunfuranda lani Heowá buidu buidu le nasandirubei ani líderaguñadina meha”. Gayaraati líchugun Heowá darangilaü hun lun hadügüni katei keisi lubudubu (Sal. 119:​143, 144).   

LÁGÜDAHABADIWA HEOWÁ

10. Ida liña wasandiragun woungua dan le wagagibudagun luma somu lamiselu?

¹⁰ Dan le wásügürün lídangiñe somu lamiselu, aniheinbei weyu másiña lan wasandiragun woungua lau saragu débili luma maguraasuni. Háfuga wasandiragun woungua ítara kei aban éibaaguti le óufubei léibaagun ani lárigiñe aba ladamahan. Gayaraati aniheinbei lan dan hénrengu lan woun wadügüni dasi le meha wadügübei lau lumenrengun o here lan woun lun wadügüni dasi léñaha hínsiñebei woun wadügün luagu aban dan. Ítara kei Elíasi másiñati busén wamá lun werederun róundügü luma arumuga (1 Uru. 19:​5-7). Ka füramase lubéi Heowá woun anhein débili lubéi wasandiragun woungua?

11. Ka amu katei ladügübei Heowá lun líderaguniwa? (Sálumu 94:18).

¹¹ Le ladügübei Heowá. Füramaseti lágüdahabadiwa lan (aliiha huméi Sálumu 94:18). Ítara kei megei lan aban éibaaguti ídemuei lun liñuragun ladüga labuleseirun, másiñati giñe megei wamá ídemuei lun wasigirun eseriwida lun Heowá. Dan le wásügürün lídangiñe sügǘ líbeina le, aba füramase lan woun: “Au le Bubungiute, ragǘ naali búhabu; ani ariñagaadina bun: ‘Manufudebá, íderagua numutibu’” (Isa. 41:13). Dan le lagagibudagunbei urúei Dawidi luma ámuñegueinarügü óuchawaguni  luma hama láganiñu, ariha lumuti anihein lan Heowá lurugabu, ligía lariñagubei: “Ágüdaha bumutina lau búhabu le bóunwenren” (Sal. 18:35). Ida liña lágüdahaniwa Heowá?

12. Anhein sandigua wabéi woungua wuriba, ka gürigia gayaraabei layusuruniña Heowá lun híderaguniwa?

¹² Liibe-agei dan, ágüdaha lumutiwa Heowá lau línchaha amu gürigia lun líderaguniwa. Luagu aban dan, héiguañu liña meha larüna Dawidi, ábati lidin Yónatan le lumada abisidahei lun líchugun dǘgüdaguaü luma gurasu lun (1 Sam. 23:​16, 17). Lídanti likesin Elíasi, aba lanúadiruni Heowá Eliséu lun líderaguni Elíasi (1 Uru. 19:​16, 21; 2 Uru. 2:2). Lídanti wakesin, gayaraabei layusuruniña Heowá waduheñu, wamadagu o wéiyaaña lidan afiñeni lun gayara lan híderaguniwa. Gama lumoun, dan wuriba lan wasandiragun woungua, másiñati le lan wabuserunbei werederun wábugua. Ani gunfurandawati lira. Ligíati, ka lunbei wadügüni lun wasagarun buiti lídangiñe ídemuei le líchugubei Heowá woun?

13. Ka lunbei wadügüni lun wasagarun buiti lídangiñe ídemuei le líchugubei Heowá woun? (Ariha humóun giñe iyawaü).

¹³ Le lunbei wadügüni. Áfaagua wamá lun merederun wamá wábugua. Dan le wadisedun hawéi amu, wáluguña lun wawounguarügü lan wasaminara luma luagu waturobulin. Gayaraati ladügün katei le lun wanúadirun wuriba (Ari. 18:1). Inarüni, sun lan wagía anihein lan dan megei wamá lun werederun wábugua, dántima le wásügürün lídangiñe somu lamiselu. Ligíati, ánhawa áluaha werederun wábugua saragu dan, lunti wóunigiragun woungua, másiñati wamahaduña lan lun ídemuei le líchugubei Heowá woun lun lágüdahaniwa. Íbini wásügürüña lan lídangiñe lénrengunga, anha wamá lun ídemuei le híchugubei waduheñu, wamadagu hama wéiyaaña lidan afiñeni woun. Ariha wamaña kei ídemuei ha líchugubaña Heowá woun lun lágüdahaniwa (Ari. 17:17; Isa. 32:​1, 2).

LÍCHUGUBA HEOWÁ GURASU WOUN

14. Ka gayaraabei lanufudedagüdüniwa?

¹⁴ Másiñati wasandiragun woungua lau saragu anufudei. Anihein abahüdaguni tidan Bíbülia hawaguti lubúeingu Bungiu ha úaraguabaña ha ariñagubaña hadadagaruña lan meha lau anufudei hadüga háganiñu o ladüga somu turobuli le wéiriti (Sal. 18:4; 55:​1, 5). Anti wagía? Híchuguña san wapaaná leskuelarugu o lidan wadagimanu, waduheñu o gumadimatiña lidere dan woun? Wageindaguña san luma somu sandi le máraninati? Lidan burí sügǘ líbeina le, másiñati wasandiragun woungua kamá aban irahü le ñǘraügili. Ka ladügübei Heowá lun líderaguniwa?

15. Según Sálumu 94:​19, ka füramase lubéi Heowá woun?

 ¹⁵ Le ladügübei Heowá. Ruti gurasu woun luma darangilaü (aliiha huméi Sálumu 94:19). Samina wamá tuagu aban irahü to hanufudeboun ani siñati tarumugun ladüga aban lanarime liñawan dan, anihán labirihaniga luma wayuhuru. Ábati liabin túguchi aba lóuburunu, aba layanuhan tuma lun líchugun darangilaü tun darí tarumugun. Sigiti liñawan dan, gama lumoun, chóuruti tasandiragun tungua larünarugu túguchi. Ítarameme, dan le wadadagaruña lan lau anufudei, háfuga mégeitiwa lun lóuburuniwa Wáguchi Bungiu le siélubei darí wasandiragun woungua buidu. Ka lunbei wadügüni lun líchugun Heowá gurasu woun?

16. Anhein busén wabéi lun líchugun Heowá gurasu woun, ka lunbei wadügüni? (Ariha humóun giñe iyawaü)

¹⁶ Le lunbei wadügüni. Súdiniti lun wéchudun ásügüra dan luma Heowá lau wafurieidun lun ani aliiha wamounme Lererun (Sal. 77:​1, 12-14). Ligíati, danme le wásügürün lídangiñe somu sügǘ le hénrenguti, buídubei wáluahani ladundehan Wáguchi Bungiu le siélubei. Ayanuha wamá luma Heowá luagu katei le adiheridagüdübaliwa luma luagu le anufudedagüdübadiwa, ani ígira wamá lun lóunabuni wafurieidun luma lun líchugun gurasu woun tau Lererun (Sal. 119:28). Anihein burí fánreinti tidan Bíbülia létima ruti dǘgüdaguaü lidan lásügürün gürigia lídangiñe dan hénrenguti kei burí líburu to gíriboun Hobu, Sálumu, Ariñawagúni lúmati dimurei le lariñagubei Hesusu lidan Matéu kapítulu 6. Anhein furíeihadün lubéi lun Heowá ani aliiha humóun Lererun, harihibei ida liña lan líchugun gurasu hun.

17. Ka lunbei gabaroun wamani?

¹⁷ Gabaroun waméi súnwandan: íbini wásügürün lídangiñe dan létima hénrengutimabei lidan wabagari, ñeinbei Heowá warugabu súnwandan lun líderaguniwa. Maweiyasunbei ígirawa wábugua (Sal. 23:4; 94:14). Haritagua waméi füramasehaali lan lóunigiruniwa, líchugun darangilaü woun, lágüdahaniwa luma lun líchugun gurasu woun. Ariñagati Isaíasi lun Heowá: “Rútibu darangilaü houn ha deregüdaguabaña lidan hafiñen buagu ladüga hemenigitiña buagu” (Isa. 26:3). Ligíati, afiñe humá luagu Heowá ani anha humá lun sun ídemuei le líchugubei hun. Ánhaadün adügei, derebugubadün lun hawanduni furumiñeguarügü lénrengunga le ñǘbuinbei hun lidan hibagari.