Subuditi san hun?
Ka meha tuwuyeri ugunei to ñein lubéi laweiyasuha wügüri etiopíana dan le layarafadúnbei Felipe lun?
DIMUREI güriegu le ásügürawagüdübei kei “karü” tidan Traducción del Nuevo Mundo gayaraati layanuhaña lan luagu ámuñegueinarügü tuwuyeri ugunei múaruguna (Adü. 8:28, 29, 38). Genegeti, ugunei lan to ñein lubéi laweiyasuhan wügüri etiopíana mama aban ugunei lánina wuribu ni lánina ásügüraguni, aban meha ugunei wéiritumaatu. Ariha wamá fiu resun ka lan uagu wariñagei lira.
Aban meha wügüri súdiniti wügüri etiopíana ani aweiyasuhaali meha dise. “Aban wügüri wéiriguti; ligía giñe gamaniharibei lau sun tiseinsun Kandase to lurúeite Etiopía” (Adü. 8:27). Dan meha ligira, wéiriti meha Etiopía, lúmagiñe le subudiwabei uguñe weyu kei Sudán darí yagürounméme lun suru libiti Ehiptu le wasubudirubei uguñe weyu. Íbini maweiyasuha lan wügüri Etiopíana tidan tuguyaméme ugunei sun dan, chóuruti barǘ lan saragu ílagu lun wéiyaasu migifeti ligía. Lidan furumiñeti sígulu yúsuatu ámuñegueinarügü tuwuyeri ugunei lun tanaahan pasaheru. Aban tídangiñe, aban tuwuyeri karü gádürü tubalabala ani daruguatu. Ariñagatu aban líburu to tánina taturiahoun Bíbülia: “Tidan meha ugunei tuguya gayaraati meha lanügǘn saragu ílagu, ani gayaraati meha laweiyasuha gürigia buidu tidan ani másiñati gayara lan taweiyasuhan ugunei burí to dise” (Acts—An Exegetical Commentary).
Laliihaña meha wügüri Etiopíana ligía dan le layarafadúnbei Felipe lun. Ariñagati abahüdaguni “aba layarafadun tuagun karü, aba laganbuni laliihaña lan wügüri ligía tidan liliburun Isaíasi” (Adü. 8:30). Madügǘntu meha karü to anaahaboun pasaheru lun téibaagun saragu, hámaruti meha téibaagun ugunei tuguya. Adügatiti lira lun gayara lan lidin wügüri etiopíana aliiheina luma lun labudunu Felipe dan le lídinbei éibaagueina tárigi.
Aba lariñagun wügüri etiopíana “lun Felipe lun ládinun lumoun lun lañuurun lóubagiñe” (Adü. 8:31). Tidan aban karü to lánina ásügüraguni rara liña houdin gürigia tidan. Ánhounti karü to anaahatu pasaheru anihein saragu ubaraü tidan lun lañuurun etiopíana luma Felipe.
Lau warihini le bürüwañubei lidan kapítulu 8 lidan Adügaü luma burí sügǘ le achoururagüdübalin woun, madibuha wamaali tidan wani agumeiraguagüdüni wügüri etiopíana tidan karü to lánina wuribu ni tidan karü to lánina ásügüraguni, tídanba aban karü to wéiritimaboun wadiburei.