1, 2. a) Ka meha Eunisebou, ani ka lénrengunga úmabei tagagibudagua? b) Ariha humóun iyawaü to luágunboun tidáü garüdia.

 ÍBINI mayanuhan tan Bíbülia luagu labadiseirun Timotéu, ma funa lueirin ugundani le tasandirubei Eunise to lúguchu weyu ligía (Ari. 23:25). Samina wamá luagu sügǘ le: chóuruti gunda tan Eunise lau tarihini tisaani dúnarugu labadiseira lan. Lidan anuhán lan aríaguei lau aban áhayachuni aba tayarafadun Loida, to lagütü tun aba tóuburunu. Aba láwiyurun táguira Eunise lidan labadiseiruña lan Timotéu luma lidan láfuridun dúnarugugiñe lau aban ugundani. Íbini hénrengu lan, ibiharu lun tarufudahan lun Timotéu lun hínsiñe lan Heowá luma Hesukrístu lun. Ka san lénrengunga úmabei tagagibudagua lun tibihin lun labadiseirun tisaani?

² Ámuñegueinarügütu hani lagübürigu Timotéu relihión. Güriegu meha lúguchi, ánhounti lúguchu tuma lagütü huríu meha (Adü. 16:1). Genegeti wéiriaali lan Timotéu dan le tadügagubei Eunise to lúguchu tuma Loida to lagütü kristiánugume. Ánheinti lúguchi masansirun lumutu meha lani relihión. Wéiriaali meha Timotéu, ligía gayara lubéi lanúadirun kaba lan ladüga. Kaba méhati ladüga? Lanúadiruboun meha san relihión to ñein lubéi lúguchi? Lasigirubei meha san hechun huríu le lafurendeirubei lúmagiñe liñüraü? O ladügaguba meha san lungua lánime Hesusu disipulu?

3. Según Ariñawagúni 1:8, 9, ida liña larihini Heowá sun le hadügübei úguchurugu lun híderaguniña hasaanigu lun gamadagua hamá luma?

 ³ Ítara kei Eunise, hínsiñetiña giñe tílana haban úguchuru kristiánugu houn. Lugundun busentiña híderaguniña hasaanigu lun gamadagua hamá luma Heowá. Gebegiti lun Wabungiute áfaaguni le hadügübei (aliiha huméi Ariñawagúni 1:8, 9). Íderaguaali Heowá saragu úguchurugu lun harufudahan houn hasaanigu lun hínsiñe lan houn luma lun heseriwidun lun.

4. Ka lénrengunga úmabei hagagibudagua úguchurugu uguñe weyu?

⁴ Chóuruti anihein lan dan álügüdagua tan aban úguchuru tungua anhein hanúadirubei lubéi tisaanigu heseriwidun lun Heowá kei ladügüni Timotéu. Lau sun lira subudi hamuti agübürigu buidu gagibugua hamá hasaanigu luma óuchawaguni lidan ubóu le lábugiñebei lubafu Satanási (1 Fe. 5:8). Lanwoun lira gagibuguatiña giñe úguchurugu luma lénrengunga lau hagüriaruniña hasaanigu hábugua o lau hagüriaruniña úara luma aban úguchili le meseriwidunti lun Heowá. Kei hénpulu ariñagatu aban íbiri to gíritu Christine: b “Aban meha úguchili buiti nani weiriei ani hínsiñetiwa meha lun saragu, lau sun lira mígirun lumutina lun nagüriaruniña wasaanigu kei gefentiña luagu Heowá. Saragu wéiyaasu nálügüdagun nungua ayahuaheina anhein lachülürüba lubéi aban dan lun heseriwidun nisaanigu lun Heowá”.

5. Kaba wariha lidan aturiahani le?

⁵ Anhein aban lubéi úguchuru kristiána huguya, gayaraati híderaguniña hisaanigu lun línsiñedun Heowá houn luma lun heseriwidun lun, ítara kei meha tadügüni Eunise. Lidan aturiahani le, warihiba ida luba lan hafalaruni tani Eunise hénpulu luma lun harufudahan houn hisaanigu dandu lau le hariñagubei kei lau le hadügübei. Warihibei giñe ida luba líderagunün Heowá.

6. Ítara kei lariñaguni 2 Timotéu 3:14, 15, ida liña ladügagun Timotéu lungua kristiánume?

⁶ Áfaaguatu Eunise lúmagiñe lagüriahóun Timotéu lun tarufudahani le tídanbei Lererun Bungiu lun, según le gunfuranda habéi huríu. Inarüni gébeha lan le tasubudirubei lugundun ibidiñe lan meha ni kata tun luagu Hesukrístu. Lau sun lira, le lafurendeirubei Timotéu tídangiñe lererun Bungiu ruti aban lubuidun ebu lun le gayaraabei líderaguni adügagua lungua kristiánume. Lanuadirúba meha san lun kristiánu lan? Wéiriaali meha lun gayara lan lanúadirun kaba lan ladüga lau libagari. Chóuruti, adüga lan táfaagun lúguchu Timotéu lun tínchahani lun lawinwanduni inarüni luáguti Hesusu le uágubei afiñeli lan (aliiha huméi 2 Timotéu 3:14, 15). Ma funa tugundan Eunise lau tarufudahan lun tisaani asubudirei Heowá! Le linarün katei gadüna tumuti kristiána to tiri, le mini lubéi iri le “agañeiruni”.

7. Ka tadügübei Eunise lun gayara lan tíderaguni tisaani lun lasigirun awansera lárigiñe labadiseirun?

⁷ Lau labadiseirun Timotéu adügati aban katei súdiniti lidan libagari. Lau sun lira mámañein lagumucha tidiheri Eunise. Kaba san ladüga tisaani lúmagiñe dan ligía lun lubaruaguóun? Lígiraguagüdüba san lungua houn hagübüri umadagu? Lídiba san aturiaha Atenasi ani anha ligíame lun harufudahan wügüriña ha ñéinbaña ha máhuduragunbaña lun Bungiu? Lewesirubei meha san nibureinti le lidaani, luma lere áluaha irisini? Siñati meha tanúadiruni Eunise kaba lan ladüga Timotéu lau libagari, gama lumoun, gayaraati meha tíderaguni. Ida? Gayaraati meha tasigirun arufudaha lun lun lasandirun ínsiñeni luagu Heowá luma lun larufudun eteingiruni luagu le ladügübei Hesusu. Gayaraati hénrengu lan hachülürün agübürigu tidoun hanigi hasaanigu, lun heseriwidun isaanigu ha lun Heowá lau úaraguni, mámarügü  houn agübürigu ha ábanbei hádangiñe lidan inarüni. Hénrenguti giñe houn agübürigu ha eseriwidubaña lun Heowá úara. Ligíati, ka lunbei hafurendeiruni agübürigu lídangiñe tani Eunise hénpulu?

8. Ida luba gayara lan tíderaguni aban úguchuru tani weiriei le Gefenti lun letenirun lun hamadagua lisaanigu luma Heowá?

⁸ Aturiaha humóun Bíbülia hama hisaanigu. Anhein anihein lubéi hani weiriei lidan inarüni, busenti Heowá lun híderaguni hani weiriei lun hetenirun huguya biángubei lun hamadagu hisaanigu luma Heowá. Aban igaburi lun hadügüni lun híderaguni lidan áhudurawaguni keisi iduheñu le adügübei sagü dimaasu. Ayanuha humá buiti luagu áhuduraguni le, ani samina huguyame kaba lan gayara hadügüni lun aban lan ókaasion darangilati luma lun hínsiñe lan houn tílana huban. Háfuga gayaraabei híderaguni hani weiriei lidan aransehani le lánina taturiahoun Bíbülia o lidan somu dasi espechaliti. Lanwoun lira, anhein wéiriaali lubéi aban hádangiñe hisaanigu gayaraati laturiahanu líburu Winwan humá lau ugundani, másiñati gayara lan híderaguni hani weiriei lidan dasi le.

9. Ka lénrengunga úmabei tagagibudagua aban úguchuru to mama kristiánu tani weiriei?

⁹ Añahein úguchuru mosu hárügüdüni dasi lun harufudahan houn hasaanigu ladüga mani hamá weiriei o ladüga ua lan hani weiriei lidan inarüni. Anhein ligía lubéi asuseredubei hun madiherida humá. Anihein Heowá hurugabun lun líderagunün. Sagá humá buiti tídangiñe tulu to tíchuguboun lóundarun lun haturiaha hama hisaanigu. Ayanuha humá hama amu agübürigu lun hasubudiruni ida luba lan hayusurunu agumeiraguagüdüni to lidan háhuduragun keisi iduheñu c (Ari. 11:14). Lanwoun lira, amuriaha humá luma Heowá lun líderagunün ayanuha hama hisaanigu lun hasubudiruni ka lan hasaminarubei luma ka lan hasandirubei (Ari. 20:5). Lau burí hadügün álügüdahani houn kei burí “ka san turobuli úmabei bagagibudagua leskuelarugu?” gayaraati ladügün lira lun hayanuhan huma.

10. Ka amu katei gayaraabei líderaguniña hisaanigu asubudirei Heowá?

¹⁰ Áluaha humá chansi lun harufudahan luagu Heowá houn hisaanigu. Ayanuha humá luagu Heowá luma luagu sun katei le adüga laalibei huagu (2 Lur. 6:6, 7; Isa. 63:7). Súdiniti katei le anhein siñá lubéi haturiaha hama hisaanigu múnada. Ariñagatu Christine, to uáguboun wayanuhan lidan párafu 4: “Kei le lougua lubéi chansi lun nayanuhan hama nisaanigu luagu Bungiu, dan burí le nadarirun meferidirun numuti ábaha nayanuhan hama. Furitiwa meha asariñaha o aba burí wádinagun tidan aban guríara aba woudin anagü lun wayanuhan luagu lubuidun katei le ladügübei Heowá luma lun wayanuhan luagu. Dan meha le wéiriaraühaña nisaanigu, aba nínchahaniña lun haturiahanu Bíbülia houngua”. Lanwoun lira, ayanuhatina meha buidu tuagu lóundarun Heowá luma hawagu íbirigu. Mayanuhantina meha wuriba hawagu wéiyaaña lidan afiñeni. Gayaraabei ladügün le hariñagubei hawagu wéiyaaña lun busén hamá hisaanigu hafiñerun hawagun luma lun háluahaniña danme le hemegeiruniña.

11. Según Santiagu 3:18, ka uagu súdini lubéi lun wadügün lun ñein lan darangilaü múnada?

¹¹ Ídeha humá lun ñein lan darangilaü múnada. Hechu humá arufuda ínsiñeni lun hani weiriei luma houn hisaanigu. Ayanuha humá lau ínsiñeni luma lau inebesei luagu hani weiriei, ani arufudaha humá houn hisaanigu lun hadügüni ligiaméme. Lídehaba katei le lun ñein lan aban darangilaü múnada ani lídehaba giñe lun ménrengun lan lun hafurendeirun hisaanigu luagu Heowá (aliiha huméi Santiagu 3:18). Ariha  huméi le asuseredubei lun Jozsef, aban prekursoru espechaliti le eseriwidubei Rumania. Dan meha ñǘraügili dǘgüdati meha lúguchi tuagu lúguchu luma hawagu lun meseriwidun hamá lun Heowá. Ariñagati Jozsef: “Adüga tumuti núguchu sun tiyaraati lun ñein lan darangilaü múnada. Dántima le líchugun núguchi lidere dan, ligíatima tarufudun núguchu ínsiñehabuni. Dan le tarihin hénrengu lan meha woun warufudun inebesei luma gaganbadi lun wáguchi, aba takutihani le lariñagubei Éfesuna 6:1-3 wama. Lárigiñe aba tayanuha luagu lubuidun ligaburi núguchi ani aba tíderaguniwa lun gunfuranda wamani ka lan uagu lunti lubéi inebe lan woun. Ítara liña tídehan lun ñein lan darangilaü múnada”.

12. Lau gabaroun humani le lariñagubei 2 Timotéu 1:5, ka buiti lasagarubei Timotéu lídangiñe tani Eunise hénpulu?

¹² (Aliiha huméi 2 Timotéu 1:5). Rutu Eunise aban buiti hénpulu lun Timotéu. Chóuruti arufudaha tani lun lau lan le ladügübei gürigia larufuda afiñeni le inarüniti (Sant. 2:26). Inarüni ariha lani Timotéu le lan tadügübei lúguchu adüga tani ladüga lueirin ínsiñeni le tasandirubei luagu Heowá. Ariha lumuti giñe barǘ lan ugundani tun lúguchu teseriwidun lun Heowá. Ka buiti libihinbei Timotéu ladüga tani Eunise to lúguchu hénpulu? Kei lariñaguni apostolu Pábulu, anihein meha aban afiñeni luagu Timotéu ítara kei le tuágubei lúguchu. Ani mama ítaraguarügüti. Ariha lumuti meha Timotéu tani hénpulu ani busenti meha láyeihani. Ítarameme, ‘luágurügü hóuserun’ saragu úguchurugu chülühaña tidoun hanigi tílana haban (1 Fe. 3:1, 2). Huguya sun gayaraati giñe hadügüni ligiaméme. Ida?

13. Ka uagu lunti lubéi tíchuguni aban úguchuru tumadagua luma Heowá lidan furumiñeti lúgaaru?

¹³ Ru huméi humadagua luma Heowá lidan furumiñeti lúgaaru (2 Lur. 6:5, 6). Kei saragu úguchurugu, chóuruti adüga humá saragu sákürifisiu. Kei hénpulu, anihein dan marumugun humá ani aranseñu hiña lun híchuguni hidaani luma hiseinsun lun hetenirun lun le hemegeirubei hisaanigu. Mígira humá lun ladügün amu katei lun metenirun humá lun humadagua luma Heowá. Sagá humá dan lun hafurieidun hábugua, haturiahanu Bíbülia, luma lun hidin adamuridagua. Ítara luba hederebudagüdüni humadagua luma Heowá ani ru huguyame aban buiti hénpulu houn hiduheñu luma houn amu gürigia.

14, 15. Ka hafurendeirubei lídangiñe tani Leanne, María luma João hénpulu?

¹⁴ Ariha waméi hakesin fiu nibureintiña ha afurendeirubaña asandira ínsiñeni luagu Heowá luma lun hafiñerun luagu lau harihini tani háguchu hénpulu. Ariñagatu Leanne, aban hádangiñe tisaanigu Christine würiña: “siñati meha waturiahanu Bíbülia wábiñe dan le anihein lan núguchi ñein. Lau sun lira súnwandan meha tidin wáguchu adamuridagua. Íbini lougua lan meha wasubudin tuagu Bíbülia íderagua lumutiwa tani hénpulu lun lederebugudun wafiñen. Saragu meha dan lubaragiñe wagumeserun ábasiha adamuridagua, aba wíchugun fe hámañein lan gefentiña luagu Heowá inarüni”.

¹⁵ Lidan tikesin María anihein meha dan líchugun túguchi lidere dan houn ladüga houdin adamuridagua. Ariñagatu: “Núguchu aban hádangiñe íbirigu hiñaruñu ha ganigitimabaña hádangiñe ha nasubudirubaña. Dan meha le ñǘraügidina anihein meha dan máhatina nadügün ítaga katei ladüga nanufude kaba lan hariñaga amu. Gama lumoun lau narihini ganigi tan núguchu ani súnwandan tíchuguni Heowá lidan furumiñeti lúgaaru lidan tibagari, íderagua lumutina katei le lun manufudedun nan hawéi amu”. Siñati meha layanuhan João ni liduheñu hábiñe luagu ariñahani le tídangiñeti Bíbülia ladüga máhati meha lúguchi. Ariñagati João: “Afiñe lan, le lan aweiridagüdübarun lanigi, adüga tani lúguchu sun tiyaraati lun tagundaaragüdüni lúguchi,  mámarügaali ligía ínsiñeni le tasandirubei luagu Heowá”.

16. Ka buiti gayaraabei hasagarun amu lídangiñe tani aban úguchuru hénpulu?

¹⁶ Haritagua huméi gayara lan hasagarun amu buiti lídangiñe hani hénpulu. Ida? Samina humá ida liña lan líderaguni apostolu Pábulu tani Eunise hénpulu. Abürühati afiñeni lan le inarüniti le larufudubei Timotéu túmañein lan lúguchu furumiñe (2 Tim. 1:5). Ídabuga larihei Pábulu luagu furumiñeti wéiyaasu afiñeni le tarufudubei Eunise? Másiñati Lístüra lan lasubudiroun Pábulu Loida tuma Eunise furumiñe lidan furumiñeti luweiyasun kei misionéru másiñati giñe íderagua lániña lun hadügagun houngua kristiánugume (Adü. 14:4-18). Dan le labürühanbei lun Timotéu 15 irumu lárigiñe, haritagua lágili meha Pábulu tafiñen Eunise ani aba lanügünün kei aban hénpulu. Furanguti lubuidun lan igaburi le tarufudubei würi to ru lan gurasu lun apostolu Pábulu ani chóuruti ru lan giñe gurasu houn saragu amu kristiánugu ha lánina furumiñeti sígulu. Anhein hagüriahañanu lubéi hisaanigu hábugua o meseriwidun lan hani weiriei lun Heowá, gayaraati hachoururuni lederebudagüdünbei lan hénpulu lánina afiñeni le híchugubei hafiñen ha geyegubaña hau ani línchahabaña lun habaruaguóun hamá.

17. Ka gayaraabei hadügüni anhein genege lubéi hun meberesen lan hisaani lau sun áfaaguni le hadügübei?

¹⁷ Ánheinti genege lubéi hun meberesen lan hisaani lau áfaaguni le hadügübei? Haritagua huméi barǘ lan dan larufudahóun lun aban irahü. Dan le hábunun aban ilaü másiñati álügüdagua humá hungua anhein laginduba lubéi nadü ligía. Íbini machourun humá sigitün  áturaguei lun gayara lan láhüchün (Mar. 4:26-29). Ítarameme kei aban úguchuru gayaraati anihein lan dan álügüdagua humá hungua anhein hachülürüña lubéi tidoun lanigi hisaani. Inarüni siñá lan hachoururuni anhein ítara luba lubéi. Gama lumoun, sigitün adügei sun hiyaraati lun harufudahan lun hisaani, ítara luba gayara lan híchuguni sun le mégeiwabei lun laganwoundagüdüni lumadagua luma Bungiu (Ari. 22:6).

18. Ida luba líderaguniña Heowá hisaanigu lun haganwoundagüdüni hamadagua luma?

¹⁸ Lúmagiñe tidaani Bíbülia íderaguaali Heowá saragu nibureintiña lun gamadagua hamá luma (Sal. 22:9, 10). Gayaraati giñe líderaguniña hisaanigu lun haganwoundagüdüni hamadagua luma ánhaña busén (1 Ko. 3:6, 7). Íbini hadireirun hisaanigu luéi inarüni lasigiruba Heowá asandira ínsiñeni hawagu (Sal. 11:4). Danme le harufuduni isaanigu ha afiñe hamá, aranseñu luba Heowá lun líderaguniña (Adü. 13:48; 2 Kro. 16:9). Gayaraati giñe líderagunün ariñaga dimurei le buiti dan le mégeiwa lan lidan dan le hemegeiruni hisaanigu haganbuni (Ari. 15:23). Gayaraabei giñe línchahaniña íbirigu ha lílana damuriguaü dandu wügüriña kei würiña lun hetenirun houn hisaanigu luma lun harufudun ínsiñeni houn. Íbini danme le wéinamugaaña gayaraati ladügün Heowá lun haritaguni le meha harufudahabei houn lidan dan le sügühalibei (Huan 14:26). Anhaün asigira arufudaha houn hisaanigu lau le hariñagubei luma lau le hadügübei labinirubadün Heowá saragu.

19. Ka uagu chouru hubalin gunda lan Heowá hau?

¹⁹ Ínsiñeni le lasandirubei Heowá huagu masansirubei ladügarügü le hanúadirubei hisaanigu. Hínsiñetün lun Heowá ladüga hínsiñe lan Heowá hun. Anhein hagüriaruñanu lubéi hisaanigu hábugua o ladüga ua lan hani weiriei lidan inarüni, haritagua huméi füramase lan Heowá lóunigirubadün lan ani ábanbei lan úguchili houn hisaanigu (Sal. 68:5). Mama húhaburuguñein anhein heseriwiduba lubéi hisaanigu lun Heowá o meseriwidunbaña lan. Gama lumoun ánhaadün afiñera luagu lídehan Heowá ani adüga humeime sun hiyaraati, lagundaaruba hau.