Mini lan áfiñuruni líchuguni gürigia lererun luagu lagunfulirubei lan le füramase lubéi, gayaraati ariñagarügü lani o bürürügün lani fiñuti ligía.

Añahein asaminarutiña mabuidun lan láfiñurun gürigia ladüga ariñaga lan Hesusu: “Moun lumuti lan háfiñurun ni ka uagu. [...] Ariñagarügü humá ‘anha’ o ‘uá’, máfiñurunga ni ka uagu; ladüga furumiñeguarügü amu katei hariñagun luéi lira lúmagiñeti Mafia” (Mat. 5:33-37). Furanguti subudi lan meha lun Hesusu ariñawagúa lan lidan Lilurudun Moisesi aniheinbei lan meha dan mosu lan háfiñurun ísüraelina, ani fiñún hamá meha lubúeingu Bungiu ha úaraguabaña (Agu. 14:22, 23; Afu. 22:10, 11). Subudi lumuti meha giñe Hesusu íbini lan Heowá adüga lan fiñún (Ebü. 6:13-17). Ligíati, mama meha lariñaguña Hesusu siñá lan lafiñurúniwa. Le labusenrunbei Hesusu lariñagun moun lumuti lan wóufudahan áfiñura ni lun wáfiñurun luagu katei le lóuguati lisudinin. Ligíati, mosu wagunfulirun lau wererun lugundun ligía lagurabubei Heowá wámagiñe.

Kati lunbei hadügüni ánhaña ariñaga hun lunti lan háfiñurun? Furumiñe chouru huméi gayara lan hagunfuliruni. Anhein machourun hubalin hagunfulirubei lan le füramase hubéi, buídutimati lun máfiñurun humá. Ru tumuti lererun Bungiu adundehani le: “Buítimati lun ua lan füramase ban sügǘ lau füramase ban ani magunfuliruntibu” (Apur. 5:5). Lárigiñe, akutiha huméi ariñahani tídangiñeti Bíbülia le úarabei luma fiñuti ligía, lárigiñeme gayaraabei hadügüni le lariñagubei hisaminan le úarabei luma le tariñagubei Bíbülia. Ka burí san adundehani tídangiñeti Bíbülia ligía?

Anihein áfiñuruni úarati luma lugundan Bungiu. Kei hénpulu, dan le hamarieidun aban feru gefentiña luagu Heowá, adügatiña füramasei le ítarabei kei fiñuti. Dandu wügüri kei würi füramasetiña ligibugiñe Bungiu kei hagibugiñe amu gefentiña hínsiñeguabaña lan hámagua, hóunigiraguba lan hámagua lau ínsiñeni, ani inebeguabaña lan hámagua sunme añahán lan úara ya ubouagu. (Añahein amu maríeitiña másiñati mariñagun hamuti lan ligiaméme dimurei, lau sun lira adügatiña aban füramasei ligibugiñe Bungiu). Ábati lariñagun minisi maríeihadün lan, agurabúati herederun húmagua lidan sun hibagari (Agu. 2:24; 1 Ko. 7:39). Füramase le hadügübei maríeitiña buiti ani úarati luma lugundan Bungiu.

Anihein áfiñuruni múaranti luma lugundan Bungiu. Kei hénpulu, máfiñuruntiña kristiánugu hageindaguba lan luéigiñe aban ageiraü o hamahadunba lan lun hafiñen luagu Bungiu. Anhein hamuga hadüga harufuduña hamuga maganbadi lun lugumadin Bungiu. Keiti le mámaaña lubéi ubouaguna kristiánugu, mádaraguntiña houngua lidoun liturobulin ubóu ani mágeidaguntiña luéigiñe (Huan 15:19; Isa. 2:4; Sant. 1:27).

Anihein áfiñuruni le lunbei kada lan kristiánu lun lanúadiruni según le lariñagubei lisaminan lun. Lubaragiñe lanúadirun aban kristiánu ladügün aban  fiñún, anihein dan mosu lasaminarun buidu luagu adundehani le líchugubei Hesusu, le ariñagubei ítara: “Le lani urúei ru huméi lun urúei; le lani Bungiu ru huméi lun Bungiu” (Luk. 20:25).

Samina wamá busén lan aban kristiánu lun lílana lan aban ageiraü o busén lan libihin somu gárada, ani aba líchugun fe mosu lan láfiñurun úaraguni lun ageiraü ligía. Ánheinti múaran lubéi fiñuti ligía luma Lilurudun Bungiu, madügün lubéi kristiánu fiñuti ligía ladüga mígirun lani lisaminan le úarabei luma le tariñagubei Bíbülia. Másiñati ligirún urúei lun lasansirun fiu burí dimurei lídangiñe fiñuti ligía le úarabei luma lisaminan gürigia ligía.

Lasansirun fiñún le lani ageiraü luáguti úaraguni, úaraguati luma adundehani le tídangiñebei Bíbülia le wadarirubei lidan Rómana 13:1, le ariñagubei: “Sun gürigia lunti gaganbadi hamá houn gumadimatiña”. Másiñati lasaminarun aban kristiánu mariban lan láfiñurun, lugundun ariñaga lan Bungiu gayara lan ladügüni.

Súdiniti giñe lun gaganbadi wamá lun wasaminan le úarabei luma le tariñagubei Bíbülia dan le lamuriahóun wama lidan wadügün áfiñuruni lidan layusurún somu katei kei burí híchugun gürigia háhabu haniguagu o tuagu Bíbülia o hiñuruni. Lidan dan le sügühalibei fiñutiña meha rómana hama escitas tuagu hefeinte aguwareina luagu lubafu aban nege bungiu le lánina wuribu kei ichouruni gayara lan lafiñerúniwa luagu hererun. Ánhañati güriegu iñura hamuti háhabu sielu dan le hadügün aban fiñún. Ítara liña harufuduni anihein lan aban ubafu le lani habungiute le nege aríagubei lun le hariñagubei luma le hadügübei, le unbei yu lan nege híchugun fe luagu le hariñagubei luma le hadügübei.

Inarüni, máfiñurubaña lan lubúeingu Heowá luagu somu katei le ayusurubei lidan burí ageiraü lun líchugun uéiriguni lun hageira, kei burí fanidira, idaüdinaü, tídibu wewe, somu fuluri luma katei líbeina lira o katei le gánibei tuma relihión mama inarünitu le unbei háhuduragua. Kaba hamuga asusereda anhein amuriahóua huma lidan aguseragülei lun híchuguni húhabu tuagu Bíbülia lun háfiñurun hariñagubei lan sun inarüni? Lidan kesi le, gayaraati hadügüni ladüga ayanuhatu Lererun Bungiu hawagu lubúeingu ha úaraguabaña ha áfiñurubaña lau hayusurun somu seini (Agu. 24:2, 3, 9; 47:29-31). Anhein ligía lubéi wanúadirubei wadügün súdiniti lun waritaguni wáfiñuruña lan ligibugiñe Bungiu luagu wariñagubei lan inarüni. Ligíati lunti lubéi wachoururuni wóunabuba lan lau inarüni lun furumiñeguarügü álügüdahani le lunbei ladügǘn woun.

Kei le gebegi lubéi wamadagua luma Heowá woun, ligíati mosu lubéi wafurieidun lun luma lun wasaminarun buidu buidu lubaragiñe wadügün aban fiñún. Busentiwa wachoururuni madüraagun wabéi lan lilurudun Bungiu le tídanbei Bíbülia ani magadeirun wameime wasaminan le úarabei luma le tariñagubei Bíbülia. Ánhawa adüga aban fiñún chouru waméi wagunfulirubei lan (1 Fe. 2:12).