1. Ka lunbei wadügüni lun waganwoundagüdüni weseriwidun lun Bungiu?

 WAGÍA kristiánugu inarünitiña hínsiñeti Heowá woun saragu ani busentiwa wadügüni sun wayaraati lúntima buidu lan weseriwidun lun. Lun wibihini waganwoundagüdüni weseriwidun lun Heowá mosu wálugun wadügün amu katei hawagu gürigia, wabuiduragüdüni wagaburi keisi kristiánugu luma lun wáluaha wíderaguniña amu. b

2. Ka lunbei hamuga wadügüni lun waganwoundagüdüni wamadagua luma Bungiu ani ida luba wáfaagun lun wibihini?

² Ka uagu lunti lubéi wáfaagun lun waganwoundagüdüni weseriwidun lun Heowá ani ida luba wibihini? Le súdinitimabei busentiwa wagundaaragüdüni Heowá Wáguchi le hínsiñehabubei. Gúndaati lau wayusuruni buidu le gayara wabéi adüga luma iyaraani wawagubei lun weseriwidun lun. Lau lira, busentiwa ítarameme wamá abuiduragüdei wagaburi keisi kristiánugu (1 Tesa. 4:9, 10). Meberesenga átirihali lan irumu wau lidan inarüni lunti ítarameme wamá aganwoundagüdei wamadagua luma Bungiu. Warihaali ida luba gayara lan wadügüni.

3. Ka adundehani líchugubei Pábulu lun Timotéu lidan 1 Timotéu 4:12-16?

³ Nibureingili meha Timotéu dan le labürühabarun apostolu Pábulu furumiñetu ligaradan lun, gárada to anügübalin liri Timotéu, subudi laali meha Timotéu lidasin kei wéiyaali lidan afiñeni. Íbini ítara ínchaha lumuti Pábulu Timotéu lun láfaagun lun labuiduragüdüni lumadagua luma Heowá (aliiha huméi 1 Timotéu 4:12-16). Ánhawa araramagua asaminara luagu dimurei le lariñagubei  Pábulu lun Timotéu, wíchuguba fe linchahañein lan lun lawanserun lidan bián katei. Luéigiñe aban oubaü, gayaraati labuiduragüdüni ligaburi keisi kristiánu kei burí ínsiñeni, afiñeni luma laruman igaburi. Luéigiñe le ábaya oubaü gayaraati giñe labuiduragüdüni laliihan, larufudahan luma líchugun adundehani. Lidan aturiahani le wakutihabei lani Timotéu hénpulu ani warihibei ánhawa lan aganwoundagüdei wamadagua luma Bungiu ani adüga wameime sun wayaraati lun wibihini le wabusenrubei wibihin líderagubadiwa lun wasigirun awansera lidan weseriwidun lun. Wakutihaba giñe ida luba lan wadügün lanwoun lidan weseriwidun lun Bungiu.

4. Según Filipuna 2:19-22, ka uagu layusurei Heowá Timotéu saragu?

⁴ Ka uagu hu lubéi meha Timotéu lun Heowá? Ladüga buiti meha ligaburi keisi kristiánu (aliiha huméi Filipuna 2:19-22). Lau warihini ligaburi layanuhan Pábulu lun Timotéu ariha wamuti luagu ǘnabugu lan, úara lan, benefa lan ani afiñewa ligía luagu. Óusera lumutiña meha Timotéu íbirigu lau ínsiñeni ani bereseti meha giñe hau. Hínsiñeti meha Timotéu lun Pábulu saragu ligía masaminarun lubéi bián wéiyaasu lun líchugun dasi hénrenguti lun (1 Ko. 4:17). Ánhawa áfaagua lun wibihini lubuidun igaburi le hínsiñebei lun Heowá, hínsiñebadiwa lun ani layusurun baadiwa lidan damuriguaü (Sal. 25:9; 138:6).

5. a) Ida luba wasubudiruni ka lan lídangiñe wagaburi mégeibei lun wabuiduragüdüni? b) Ka tadügübei íbiri nibureingiru to tídanboun iyawaü lun tíchaagun tungua lidan halugaarun amu?

⁵ Furangu lan woun le wabusenrubei wadügün lidan weseriwidun lun Heowá. Furíei wamá lun Heowá lun líderaguniwa asubudirei ka lan igaburi wawagubei le lunbei wabuiduragüdüni. Anúadira wamá aban lídangiñe ani ábame wáfaagun lun wabuiduragüdüni. Mégeitina san lúntima níchaagun nungua lidoun halugaarun amu o náfaagun lúntima busentima nan níderaguniña? Lúntima san darangilutima nan o naranserun lúntima feruduna nániña amu? Anhein machourun wabalin álügüda waméi aban wamada le afiñetiwa luagu lun lariñaguni woun ida liña lan larihini wagaburi (Ari. 27:6).

6. Ida luba wibihin lun wabuiduragüdüni aban lídangiñe wagaburi?

⁶ Áfaagua wamá lun wibihini le wabusenrubei wibihin lidan weseriwidun lun Heowá. Ida? Gumese wamá áluaha ariñahani luáguti igaburi le wabusenrubei wabuiduragüdün. Kei hénpulu, samina wamá lunti lan ferudunatima wamaniña amu. Buídubei lun waliihani luagu hénpulu  le hani gürigia ha lánina tidaani Bíbülia ha ferudunabaliña amu tídangiñe sun hanigi lúmati hani ha madügünbalin, luma lun wararamagun asaminara luagu. Samina wamá luagu Hesusu. Aranseñu liña meha lun feruduna lániña gürigia (Luk. 7:47, 48). Meteniti meha lun hachara, le unbei meha letenira lun le gayara habéi adüga. Ánhañati fariséugu óusera hamutiña meha “amu gürigia kei ni kata” (Luk. 18:9). Lárigiñe wararamagun asaminara luagu hénpulu le, álügüdagua wamá woungua. “Ida liña san narihiniña amu gürigia? Ka lídangiñe hagaburi unbei netenira?” Anhein hénrengu lubéi woun lun feruduna wamaniña amu adüga wamá aban lísüta lau sun igaburi buiti le warihibei hawagu, ani álügüdagua wamá woungua: “Ida liña san larihiniña Hesusu? Feruduna lubaña hamuga san?”. Ánhawa áluahei lóunabagüle álügüdahani le, gayaraabei líderaguniwa asansirei ligaburi wasaminan. Furumiñe háfuga hénrengubei lan woun feruduna wamani somu gürigia ladüga wuribani le ladügübei woun. Gama lumoun, ánhawa áfaagua lun feruduna wamani, wibihiba wabuiduragüdüni igaburi le wawagubei.

7. Ida liña layusuruniña Heowá íbirigu ha subudihabúbaña lun hawadigimari uguñe weyu? (Ariñawagúni 22:29)

⁷ Ábaya katei le gayaraabei wadügüni, wafurendeirun adüga katei le huuti. Kei hénpulu, samina wamá hawagu sun íbirigu ha ídehabaña lidan tábunawagun sukursáli, Luban Adamurini luma Luban Adamuridaguni. Saragu hádangiñe furendei hamuti hawadigimari ladüga hawadigimaridun úara hama íbirigu ha subudihabúbaña lun wadagimanu ligía. Kei warihini tidan burí iyawaü dandu wügüriña kei würiña hafurendeiruña adügei le lunbei hadügüni lun gayara lan hetenirun tun Luban Adamurini luma tun Luban Adamuridaguni. Lidan igaburi le luma burí amu, Heowá “Bungiu le Warúeitebei lun sun dan”, luma Hesusu “Harúeite urúeigu” yusu hamutiña burí gürigia ha lun sun luwuyeri wadagimanu wéinamuburiti (1 Tim. 1:17; 6:15; aliiha huméi Ariñawagúni 22:29). Ligíati busén wabéi wawadigimaridun saragu luma lun wayusuruni iyaraani le wawagubei lun wíchugun uéiriguni lun Heowá mama wóuniwagua (Huan 8:54).

8. Kaba íderaguawa lun wasubudiruni kaba lan idan iarani wawadigimarida?

⁸ Furangu lan woun le wabusenrubei wadügün lidan weseriwidun lun Heowá. Ka katei wabusenrubei wadügün? Ayanuha wamá hama wéiyaaña lidan afiñeni ha lílana damuriguaü o luma óunigiruti sirkuitu lun hariñaguni woun kaba lan idan wabuidura. Kei hénpulu, ánhawa hínchaha lun wabuiduragüdüni ligaburi wíchugun yanu o ligaburi warufudahan, gayaraabei wálügüdüniña ka lan igaburi gayaraabei wabuiduragüdüni. Lárigiñemeti ábame wadügüni le hariñagubei woun. Ida?

9. Ka gayaraabei wadügüni lun wibihin wafurendeirun somu iarani?

⁹ Áfaagua wamá lun wibihini le wabusenrubei wadügün lidan weseriwidun lun Bungiu. Samina wamá busén wamá lun máisturugu wamá buítiña. Gayaraabei waturiahanu buidu buidu garüdia Buidutimalá haliihan luma harufudahan. Lubaragiñe wíchugun aban fánreinti lidan adamuridaguni le labadinaguabei dimaasu, gayaraati wamuriahan luma aban íbiri létima subudihali saragu lun laganbuniwa luma lun lariñaguni woun ka lan idan mégeitima wamá wawadigimaridun. Ánhawa aranserei wayanun lau dan ábanbadiwa máisturu buiti ani harihibei amu benefa wamá ani gayara lan lafiñerúniwa wawagu (Ari. 21:5; 2 Ko. 8:22).

10. Ru humá aban hénpulu lun wabuiduragüdüni ligaburi wadügüni aban katei le hénrenguti woun.

¹⁰ Ka gayaraabei wadügüni anhein busén wabéi wadügün aban katei le hénrengubei woun? Mábürühan lan warüna! Ariha waméi likesin aban íbiri gíriti Garry, le meha hénrengubei lun laliihan. Haritagua lágili belú lan meha saragu  busiganu lun dan meha le laliiha lidan adamuridaguni. Gama lumoun, mábürühanti larüna, sigiti áfaagua lun labuiduragüdüni ligaburi. Seremei hídehan amu íbirigu tuma agumeiraguagüdüni, guentó rúhali yanu lidan adamuridaguni, lidan adamurini sirkuitu luma lidan adamuridaguni le wéiriti.

11. Ítara kei Timotéu, kaba íderaguawa lun weresibirun lau wadasin?

¹¹ Chülüti san Timotéu lun gíchigadi lan yanu luma lun aban lan máisturu buiti? Mariñagun tumuti Bíbülia, lau sun lira, subudi wamuti falá lani adundehani le líchugubei Pábulu lun. Chóuruti aban lan labuiduragüdüni ladügüni lidasin murusun murusun, ítara luba meha buídutima lan lagunfuliruni le agurabúbei lúmagiñe (2 Tim. 3:10). Ítara kei Timotéu, ánhawa abuiduragüdei ligaburi wadügüni katei, aransenbadiwa lun weresibirun lanwoun wadasin.

12. Ida liña hibihin ídemuei hámagiñe amu?

¹² Ma wagundan dan le híderaguniwa amu! Kei hénpulu óunwenbu wagundan dan le hachülürün íbirigu ha ídehabaña lidan Sétanu ha ídehabaña tidan Háspitali lun hawadigimaridun surusia hama íbirigu sánditiña o Sétanu ha abisidahabaliña sanditiña. Dan le wásügürün lídangiñe lénrengunga lidan wabagari, sanditiwa óunwenbu ugundani dan le ladireirun aban wéiyaali lidan afiñeni dan lun laganbuniwa luma lun líchugun gurasu woun. Dan le busén wamá wíderawagun hau aturiahatiña Bíbülia, ma burí wagundan gayara lan wamuriahan ídemuei hama prekursorugu ha subudihaña, lun houdin wama íchiga aturiahani tídangiñeti Bíbülia luma lun hariñaguni woun kaba lan idan wabuiduragüdei ligaburi wíchugun aturiahani. Ariñagati Hesusu: ‘Gúndaatimati le íchugubei sügǘ lau le eresibirubei’ (Adü. 20:35, LBID). Sun íbirigu ha sandí hamuti ugundani le dan le híderaguniwa. Wagía giñe sun gundabadiwa giñe ánhawa adügei ligiaméme. Anhein busén wabéi weseriwidun lun Heowá lidan dasi le luma lidan amu, ida luba wibihini?

13. Ka lunbei gabaroun wamani dan le busén wamá wibihini le wabusenrubei wadügün lidan weseriwidun lun Bungiu?

¹³ Áfaagua wamá lun wadügün katei le gayara wabéi adüga. Kei hénpulu másiñati samina wamá: “Busentina hamuga naganwoundagüdüni neseriwidun lidan damuriguaü”. Másiñati hénrengu lan hun hasubudiruni halíagiñeba lan hagumesera o anhein hibihibei lubéi o mibihin hubéi lan. Buídutimati lun furangu lan le  wabusenrubei wadügün lidan weseriwidun lun Bungiu. Gayaraati wabürüdüni le habusenrunbei wibihin luma kaba lan wadüga lun wibihini.

14. Ka uagu lunti lubéi aranseñu wamá lun wadügün furumiñeguarügü katei lidan weseriwidun lun Heowá?

¹⁴ Mosu aranseñu wamá wadügün furumiñeguarügü katei lidan weseriwidun lun Heowá. Ka uagu? Mabafutiwa luagun sun le asuseredubei geyegua wau. Kei hénpulu ídehati meha apostolu Pábulu lidan lagumeseha damuriguaü le Tesalonikabei, háfuga samina lan yebe lerederun fiu dan ñein lun líderaguniña iseri kristiánugu ha ñéinbaña. Gama lumoun, ábati hafosuruni láganigu lun lanurahan lídangiñe uburugu ligía (Adü. 17:1-5, 10). Lun hamuga meha redei lan lidan uburugu ligía líchuguñanu hamuga lílana damuriguaü lidan denchaü. Mábürühanti larüna Pábulu. Lubaragiñe lira aba lúaradun luma le gádanbalin, ani dan lárigiñe aba lóunahani Pábulu Timotéu lun lederebudagüdüni hafiñen íbirigu hagía (1 Tesa. 3:1-3). Ma hagundan íbirigu ha Tesalónikabaña lau harihini aranseñu liña lan Timotéu lun lidin le ñeinhin lumuti lounahóua.

15. Afuranguagüda huméi lau aban hénpulu le gayaraabei lasuseredun hun luma lun le habusenrubei hadügün lidan lasansirun gádantün.

¹⁵ Gayaraati wafurendeirun lídangiñe lani Pábulu hénpulu luma lídangiñe le asuseredubei Tesalónika. Másiñati wáfaaguña lan wibihini le wabusenrubei wibihin lidan weseriwidun lun Heowá, sódini aba lasansirun gádantiwa ani siñá wadügüni le wabusenrubei wadügün (Apur. 9:11). Kábati wadüga? Samina wamá wadügün amu katei le gayaraabei wadügüni. Ligía ladügübei Ted tuma Hiedi. Aba hígiruni heseriwidun Betelirugu ladüga luriban hátuadi. Kei hínsiñe lubéi Heowá houn saragu lau lóufudagun aba háluahan heseriwidun lun lidan amu igaburi. Furumiñe aba hiridún kei prekursorugu ha adügübaña 70 oura lau hati, lárigiñe aba hiridún kei prekursorugu espechalitiña, ñéingiñe aba larufudahóun lun Ted, lun leseriwidun kei aban óunigiruti sirkuitu le abisidahabalin damuriguaü dan le siñá lan lidin le óunigirubei sirkuitu abisidaha. Málüti aba lasansirun harumudiri ha lúnbaña hóunigirun sirkuitu, ábati líchugun Ted tuma Hiedi fe luagu siñá hali lan heresibiruni dasi le. Lau sun dagá lan murusunraü íruni hawagu, subudi hamuti gayara lan heseriwidun lun Heowá lidan amu igaburi. Ariñagati Ted: “Furendeihadiwa mámarügüñein lan lidan aban igaburi leseriwidúa lun Heowá”.

16. Ka larufudahabei Galasiana 6:4 woun?

¹⁶ Mabafutiwa luagu le asuseredubei lidan wabagari. Ligíati, súdiniti lun waritaguni mama lan dasi le wibihibei ligibugiñe Heowá adügübei lun gebegi wamá lun. Meseriwínti giñe lun ni kata wetenirun lun dasi le hibihibei amu, ni lun le mibihin wabéi. Ariñagatu Hiedi: “Ánhawa agoubaguagüdei wabagari luma habagari amu, weferidirubei wagundan” (aliiha huméi Galasiana 6:4). Ligíati, le buídubei lun wadügüni wasigirun  áluaha amu igaburi lun weseriwidun lun Heowá luma lun wíderaguniña amu. c

17. Ka gayaraabei wadügün lun weresibirun lanwoun wadasin?

¹⁷ Gayaraati waganwoundagüdüni weseriwidun lun Heowá anhein mibe lubéi burí wamaati ani madúeihan wagía dan burí le memegeirun wamani, gayaraabei aranseñu wamá lun weresibirun lanwoun wadasin. Áfaagua wamá wadügün dasi le ñǘbüriti lidan weseriwidun lun Heowá le gayaraabei líderaguniwa lun wibihin dasi wéinamuti ámuñegü. Kei hénpulu, anhein busén hubéi heseriwidun kei prekursorugu ha adügübaña 70 oura luagu hati, gayaraati san heseriwidun furumiñe kei prekursorugu ídehati luagu fiu dan? Anhein busén hubéi lun aban humá ídehatiña lidan damuriguaü, gayaraati haganwoundagüdüni dan le hásügürünbei lidan apurichihani o lidan habisidahaniña íbirigu derebuguhaña hama sanditiña? Sun le hafurendeirubei guentó gayaraabei líderagunün lun hibihin amu dasi ámuñegü. Meberesenga le habusenrubei hadügün áfaagua humá hadügüni sun hiyaraati lidan heseriwidun lun Heowá (Rom. 12:11).

18. Ka larufudahabei tani Beverley hénpulu woun? (Ariha humoun giñe iyawaü).

¹⁸ Mariñaga wamá siñá lan waganwoundagüdüni weseriwidun lun Heowá ladügarügü derebuguhadiwa lan. Ariha waméi tani aban íbiri hénpulu to 75 irumu tau gíritu Beverley. Ladüga aban sandi siñati téibugun buidu. Gama lumoun, wéiriti meha tabusenrun tapurichihan lidan tederegehóun agunbirahagülei lubá Aritaguagülei. Ka tadügübei? Furanguti lidan tisaminan le tabusenrunbei tadügün, dan le tagunfuliruni aba tasandirun aban lanarime ugundani. Adügati áfaaguni le tadügübei lun taganwoundagüdüni tani ministeriu. Furanguti gebegi lan lun Heowá sun áfaaguni le hadügübei íbirigu derebuguhaña meberesenga le gádanbaliña (Sal. 71:17, 18).

19. Kaba lídangiñe sun le wabusenrubei wibihin lidan weseriwidun lun Bungiu lunbei wawadigimaridun luagu?

¹⁹ Áfaagua wamá lun wibihini le wabusenrubei wibihin lidan weseriwidun lun Heowá. Áfaagua wamá lun gagaburi wamani igaburi le uágubei lagundaara Heowá. Furendei wamá amu katei lánina eseriwiduni lúntima layusuruniwa Bungiu tuma lóundarun. Áluga wamá lun wadügün amu burí katei hawagu wíbirigu. d Ánhawa adügei sun le, labinirubadiwa Heowá, ítara kei lidan likesin Timotéu furangubei harihini amu wawanserun (1 Tim. 4:15)