Kaba agumuchagua danme le liabin Larúeihan Bungiu?
“Ani ubóu, agumucheina liña lau burí sun luriban hayumahan gürigia; ánheinti le adügüti lugundan Bungiu, labagariduba lun sun dan” (1 HUAN 2:17).
UREMU: 55, 24
1, 2. a) Ida liña genegegua lan ubóu wuribati le luma wügüri le siadi waalibei lun lounwen? (Ariha huméi dibuhu le lídanbei lagumeseha arütíkulu). b) Danme le lagünrichawagun ubóu le, ida luba hasandiragun ha siélubaña hama ha ubouagubaña houngua?
SAMINA humá luagun sügǘ le. Éibugeina liña aban adaürǘti peliguruti turageirugu furisun úara hama súdaragu ha agúaraheinabaña: “Wügüri hilaali éibugeina!”. Ka uagu hariñaga hilaali lan anhein wínwangili lubéi adaürǘti ligía ani genegeti buidu lan látuadi? Ladüga siadi waali lan wügüri ligía lun lounwen ani chülümémeeli lóurate lafarún. Lidan kesi ligía, kéigubeirügü hamuga hilaali lan * (ariha huméi abürüdǘni).
2 Ítara liña ubóu wuribati le kei adaürǘti le áfaruamemelibei. Ariñagatu Bíbülia lagumuchaguba lan ubóu le (1 Huan 2:17). Desidírühali Heowá lagumuchun lau ubóu le yarafa madise, ani ítara luba. Gama lumoun, mítaranbei lagumuchagüle ubóu le kei lafarún adaürǘti ligía. Háfuga samina hamá meha fiú gürigia maricha lan laguserawagüdün adaürǘti ligía ani háfuga hadügün somu katei lun hálugun lun mafarúniwa lan. Ánheinti Heowá, aban aguseragüdüti úaraguati Heowá, ani úati charati lidan desidírü lan lagumuchun lau ubóu le (2 Lúrudu 32:4). Madarasarunbei liabin lagumuchagüle ubóu le. Danme le lachülürün lidaani, sun ha siélubaña hama ha ubouagubaña hariñaguba richá lan laguseragüdün Heowá. Wéiribei awalidaguni le lunbei hasandiruni!
3. Kaba gádürü turóbuli agumuchagua danme le liabin Larúeihan Bungiu?
3 Kaba burí katei agumuchagua danme le lagünrinchawagun ubóu le? Sun katei wuribati le lídanbei wabagari sagü weyu lagumuchaguba yarafa madise. Ñunsu le lídangiñeti “uganu buiti le luáguti larúeihan Bungiu” (Matéu 24:14). Lidan arütíkulu le wayanuhaba luagu gádürü turóbuli le lunbei lagumuchagun danme le liabin Larúeihan Bungiu. Anihán gádürü turóbuli ligía: gürigia wuribatiña, óundaruni burí to móuserunboun lau arumani, wuribani luma luriban ligaburi hawinwandun gürigia. Danme le wakutihan kada aban lídangiñe turóbuli burí le, warihibei ka lan lánibei efekütu wawagu, kaba lan ladüga Heowá lun laransehani ani kaba lan lanüga leweñeguame.
GÜRIGIA WURIBATIÑA
4. Ka lánibei le hadügübei gürigia wuribatiña efekütu wawagu?
4 Ka hánibei efekütu wawagu? Ariñagati meha apostolu Pábulu “liábinburiba lan weyu hénrenguti lídounme lagumuhóun dan”. Ani ariñagati giñe wuribatimarügübaña lan gürigia eibu dan (2 Timotéu 3:1-5, 13). Ma warihiñein lagunfulirun profesía le? Saragu wádangiñe súfurihadiwa hadüga gürigia wuribatiña o hadüga gürigia ha óuserubaliña amu wuriba ani mígirun hamutiña lun hawinwandun darangilu, o mínsiñehabutiña lan houn lílana amu rasa. Añahein fiú málugungubeitiña haramuduni katei wuribati le hadügübei. Añahein amu aba hafamurun luagu busén hamá híderaguniña gürigia, gama lumoun, katei wuribati habusenrubei hadügün houn. Ani íbini masuseredungili lan somu katei wuribati woun, sun katei wuribati le asuseredubei gániti efekütu wawagu. Ma hanufudeguatiwa dan le warihin houserún fiú irahüñü wuriba, o gürigia wéiyaaña hama gürigia ha siñati hadügün ni kata hawougua? Añahein gürigia wuribatiña ha óuserubaña kei animaalugu áraabuna o íbini kei máfianu (Santiagu 3:15). Gama lumoun, rutu Bíbülia emenigini woun.
5. a) Ka chansi aniheinguabei houn gürigia wuribatiña? b) Kaba asusereda houn gürigia wuribatiña ha mabusenruntiña hasansirun?
5 Kaba ladüga Heowá? Uguñe weyu, líchuguña Heowá chansi houn gürigia wuribatiña lun hasansirun (Isaíasi 55:7). Íbini málühali lan ubóu wuribati le agünrinchawagua, maguserawagüdüngiña gürigia wuribatiña. Gama lumoun, kaba san asusereda houn ha mabusenruntiña hasansirun ani ha luéigiñebaña lóubadina ubóu le danme lagumeserun óunwenbu asufuriruni? Füramase haali Heowá lagumuchun hau (aliiha huméi Sálumu 37:10). Furendeihaña saragu gürigia aramudahei katei wuribati le hadügübei ani libe-agei dan buiti lidin houn (Hobu 21:7, 9). Gama lumoun, haritaguagüda tumutiwa Bíbülia: “Aríagu liña Bungiu lun lamufurun kada gürigia, ani subudi lumuti sun lánhingichun. Úati lanarime luburiga lun gayara lan laramudagun lau aban adügüti wuribani” (Hobu 34:21, 22). Ligíati, úati gayarati laramudagun luéi Heowá. Ariha lumuti sun le hadügübei gürigia wuribatiña. Lárigiñe Arümahedón, úaañame gürigia ha. Marihindigia wamañame (Sálumu 37:12-15).
6. Kaba eredera wínwanñu danme le hagünrinchawagun wuribatiña, ani ka uagu buidu lubéi ñunsu le?
6 Kaba eredera wínwanñu danme le Sálumu 37:11, 29). Kátaña san “ha ǘnabubei hanaagun houngua” ani kátaña ha buídubaña? Ha ǘnabugubaña hagía gürigia ha afurendeirubaña luagu Heowá ani gaganbaditiña lun. Wáwati giñe houn gürigia buítiña ladüga busén hamá hadügüni le uágubei lariñaga Bungiu buidu lan. Lidan ubóu le, gíbetimatiña gürigia wuribatiña hawéi buítiña. Ánheinti lidan iseri ubóu le füramase lubéi Bungiu gürigiarügübaña buítiña ñein. Hadügübei gürigia hagía Ubóu paraísume.
hagünrinchawagun wuribatiña? Füramaseti Heowá: “Ha ǘnabubei hanaagun houngua, hagíaba laburiña múa, habagariduba lidan darangilaü le dayarüti”. Lárigiñe ábaya lariñagun: “Galangantehabei gürigia buítiña múa, haganóuba giñe lidan súnwandan” (ÓUNDARUNI BURÍ TO MÓUSERUNBOUN LAU ARUMANI
7. Ka efekütu lánibei le tadügübei óundaruni burí to móuserunboun lau arumani wawagu?
7 Ka tánibei efekütu wawagu? Saragu lídangiñe katei wuribati le asuseredubei uguñe weyu mama hadurun fiúrügü gürigia, tidurun óundaruni burí to móuserunboun lau arumani. Anuhein burí óundaruni lánina relihión to eyeeduboun saragu míñunu gürigia. Mariñagun hamuti inarüni luagu ka lan Búngiubei ni luagu le lunbei lasuseredun ámuñegü lun Ubóu luma houn gürigia. Arufudahatiña giñe siñati lan lafiñerúniwa tuagu Bíbülia. Luagu amu oubaü, añahein burí urúeigu ha móuseruntiña lau arumani ani ínchaha hamutiña gürigia lun houdin awuribuha luma lun hadügün damichi houn gürigia ha lídangiñetiña amu rasa. Ani wuribati hóuseruniña gudemetiña ha siñabei hadügün ni kata hawougua. Ani eibu dan ábatima harisidun ani aba gabafutima hamá lau híchugun ídemuei houn fiúrügü gürigia o lau heresibirun seinsu hámagiñe amu lun gayara lan hadüraaguni lúrudu. Luagu amu oubaü, anuhein saragu kónpeni wéinamutu ani lidan hálugun taburiña haganwoundagüdüni harisin aba burí hawiyeduni Ubóu luma duna ani günringua haméi burí tídibu wewe luma amu katei. Amudiragua hamutiña giñe gürigia lun harisidun fiú hádangiñe. Furanguti gadurun tan óundaruni burí to móuserunboun lau arumani lidan libe-agei asufuriruni le ubouagubei.
8. Ka tariñagubei Bíbülia lasusereduba lau tau óundaruni burí to harihiboun gürigia kamá héretu?
8 Kaba ladüga Heowá? Lagumeseruba óunwenbu asufuriruni danme le hábürühan gumadimatiña luagun sun relihión mama inarüniti, le burí uágubei tayanuha Bíbülia kei aban horu to gíriboun Babilónia to Wéiriboun (Arufudúni 17:1, 2, 16; 18:1-4). Tagünrinchawaguba óundaruni burí lánina relihión to sunsuinagubei. Gama lumoun, kaba san asusereda tau tíbiri óundaruni to móuserunboun lau arumani? Ariñagatu Bíbülia ítara tiña lan óundaruni burí to kei wübü luma burí ubouhu ladüga here lan tarihín (aliiha huméi Arufudúni 6:14). Gama lumoun ariñagatu giñe lagünrinchawaguba lan gumadi tuma furumiñeguarügü óundaruni to mámaboun luéigiñe lóubadina Larúeihan Bungiu. Lasusereduba katei le danme le gumumémeeli óunwenbu asufuriruni (Heremíasi 25:31-33). Merederunboun ni aban óundaruni to móuseruntu lau arumani.
9. Ka uagu gayara lubéi wachoururuni ñeinbei lan aransehani buiti lidan iseri ubóu?
9 Kaba teweñegua óundaruni burí to móuserunboun lau arumani? Ñeinboun san somu óundaruni ubouagu lárigiñe Arümahedón? Ariñagatu Bíbülia: “Aguraba wamuti iseri sielu luma iseri ubóu le füramase láalibei Bungiu woun; úaraguabei sun katei ñein, ani buídubei sun katei ñein, richagua” (2 Féduru 3:13). Arúeihani burí le ídanbei ua lan arumani ligía binadubei sielu. Ánheinti binadu ubóu, gürigia ha lábugiñebaña lubafu ubóu. Kaba san heweñegua danme le hagünrinchawagun? Aban “iseri sielu luma iseri ubóu”. Aban iseri arúeihani ligía iseribei sielu. Larúeihan Bungiu iseri arúeihani ligía, le ñeinba lubéi lagumadiha Hesukrístu hama 144,000 urúeigu ha lúnbaña hagumadihan luma. Iseri ubóu hagía gürigia ha lúnbaña hawinwandun lábugiñe Larúeihan Bungiu. Dandu Hesusu kei ha lúnbaña harúeihan luma háyeihabei ligaburi Heowá, le hínsiñehabubei lun aransehani (1 Korintuna 14:33). Ligía ñéinbei lubéi aransehani le buiti lidan “iseri ubóu”. Buídubaña wügüriña ha lúnbaña hetenirun lun sun katei ani hafalarubei ladundehan Hesusu hama 144,000 (Sálumu 45:16). Samina wamá ida luba lan ibagari danme le tagünrinchawagun óundaruni burí to móuserunboun lau arumani. Ábanrügaarume óundaruni to ídanboun ñeinbei lan úarani luma arumani lun súnwandan.
WURIBANI
10. a) Ka burí katei wuribati buinbei lidan fulasu le ñein lubéi hawinwanda? b) Ka lánibei wuribani efekütu huagu luma hawagu hiduheñu?
10 Ka lánibei efekütu wawagu? Uguñe weyu, buin liña ubóu lau figóu lánina agamariduni, liwiye hóuserun gürigia luma lanarime anarimeni. Adügati isebáhari le ubouagubei lun línsiñedun katei burí le houn gürigia ani adügati bula lau lilurudun Heowá luagu le buídubei luma le wuribabei (Isaíasi 5:20). Agübürigutima lúnbaña háfaagun lun hóunigiruniña hasaanigu luéi burí katei wuribati. Le linarün katei, sun kristiánugu inarünitiña mosu wáfaagun lun wóunigiruni wamadagua luma Heowá lidan ubóu le menebenehabubei lun lilurudun Bungiu.
11. Ka wafurendeirubei lídangiñe le ladügübei Heowá lun Sodoma luma Gomora?
11 Kaba ladüga Heowá? Ariha waméi le ladügübei Heowá lau wuribani le meha lídanbei uburugu Sodoma luma Gomora (aliiha huméi 2 Féduru 2:6-8). Aban meha wügüri richaguati Lotu, ani dandu ligía kei liduheñu súfuritiña meha saragu ladüga katei wuribati le meha hadügübei gürigia ha geyegubaña hau. Günringua lumuti meha Heowá sun fulasu ligía lun lagumuchun lau wuribani. Gama lumoun adüga lumuti giñe “lun hénpulume houn gürigia wuribatiña ha lúnbaña hayabin hárigiñe”. Ítara kei meha lagumuchun Heowá lau liwiye agamariduni le lídanbei dan ligía, ítara luba ladüga danme le lagumuchun lau ubóu wuribati le.
12. Ka katei habusenrubei hadügün danme le úaali wuribani?
12 Kaba ñübuin leweñeguame wuribani? Gíbebei katei buiti wadügün lidan Paraísu. Wadügübei Ubóu paraísume ani wábunaguba muna woungua luma houn waduheñu. Weresibirubaña giñe saragu míñunu gürigia ha lúnbaña háguyugun ani warufudahaba houn luagu Heowá luma luagu sun le adüga láalibei hawagu gürigia (Isaíasi 65:21, 22; Adügaü 24:15). Beresegubadiwa adüga wadagimanu le lunbei gunda wamá lau ani le lunbei líchugun uéiriguni lun Heowá.
LURIBAN LIGABURI HAWINWANDUN GÜRIGIA
13. Ka burí katei wuribati lanügübei ebedaaguni le asuseredubei lidan fuluri-agei Edén?
13 Ka san lánibei efekütu wawagu? Uguñe weyu, wuribati wabagari ladüga saragu wuribani luma tadüga óundaruni burí to móuserunboun lau arumani. Sun wagía sandiguatiwa woungua wuriba ladüga wuribu, gudemei, iyereehabúni houn lílana amu rasa, sandi luma óunweni. Gumeseti sun turóbuli le ladüga hebedaagun Satanási, Adán tuma Ewa lun Heowá. Ani sun wagía súfuritiwa ladüga ebedaaguni.
14. Kaba ladüga Heowá lau luriban ibagari?
Sálumu 46:8, 9). Lagumuchuba lau sandi (Isaíasi 33:24). Lagidarubei óunweni lun súnwandan (Isaíasi 25:8). Lagumuchuba giñe lau gudemei (Sálumu 72:12-16). Lagidarubei Heowá sun katei le adügübei lun wasufurirun. Lagumuchuba íbini lau Satanási hama lumafianu (Éfesuna 2:2).
14 Kaba ladüga Heowá? Samina wamá luagun fiú katei le füramase lubéi Heowá ladügün lun lagumuchun lau luriban ibagari. Lagumuchuba wuribu (aliiha huméiSamina humá luagun aban ubóu sin wuribu, sandi ni óunweni.(Ariha huméi párafu 15)
15. Kaba burí katei ua lárigiñe Arümahedón?
15 Samina humá san luagun ida luba lan ibagari lidan aban ubóu le ñein lubéi úabei lan wuribu, sandi luma óunweni. Úabaña súdaragu, árüma ni fulasu burí le ñein lubéi houdin gürigia lun haritaguniña haduheñu ha óunwegubaña lidan wuribu. Memegeirunbadiwa háspitali, surusia, anosuhatiña, ni muna lun hareidahóun hilaaña ni gabusandu. Ani kei le úaaña lubéime gürigia wuribatiña, memegeirunwabaña súdaragu ni amuri le ariñaagubei tuagu muna. Háfuga memegeirunwabei lan ni geléin. Sun le adügübei lun wadiheridun lagumuchaguba lun súnwandan.
16, 17. a) Ida luba san hasandiragun gürigia ha lúnbaña hasigirun awinwanda lárigiñe Arümahedón houngua? Ru humá aban hénpulu. b) Ka lunbei wadügüni lun wesefurun danme le lagünrinchawagun ubóu wuribati le?
16 Ida luba san wasandiragun woungua danme le buíduhali ligaburi wawinwandun? Hénrenguti woun wasaminarun ida luba lan. Wínwanhadiwa saragu dan lidan wuribani darí lun míchugunhaadiwa lan fe luagu idiheri le lanügübei woun. Kéiburi gürigia ha awinwandubaña yarafa lun fulasu le ñein lubéi tararama íngiini háfuga aba lan héchudun luagu ireini. Ani gürigia ha awinwandubaña yarafa lun fulasu le ñein lubéi lachagahóua ifei háfuga aba lan héchudun luagu íngini. Gama lumoun, lun hamuga lagumuchagun ireini luma íngini, hasandiruña hamuga aban lanarime awalidaguni. Ítara luba awalidaguni le lunbei wasandiruni danme le lagumuchun Heowá lau sun wuribani le ídanbei wawinwanda.
17 Kaba ñübuin leweñegua idiheri le gádanbaliwa guentó? Ariñagati Sálumu 37:11 wawinwanduba lan “lidan darangilaü le dayarüti” ámuñegü. Ma ruti gurasu woun wasubudiruni anihán lan le labusenrubei Heowá woun? Lidan dan hénrenguti le, adüga waméi sun wayaraati lun wakipuragun woungua yarafa lun Heowá luma tun lóundarun. Wéiriti lebegi emenigini le wibihibei lubá ámuñegü, ligía lunti lubéi wasaminarun luagun súnwandan. Áfaagua wamá lun warihini kei aban katei inarüniti ani ayanuha wamá luagu houn amu (1 Timotéu 4:15, 16; 1 Féduru 3:15). Anhein wadüga wesefuruba danme le lagünrinchawagun ubóu wuribati le ani ábame wagundaarun lun súnwandan.
^ par. 1 Afuranguagüda lumuti párafu le aban binadu échuni le meha tídanbei fiú furisun Meriga saragu irumu guentó.