1. Ida liña meha hatouhóun lubúeingu Heowá lidan furumiñeti sígulu?

 SAGÜ líchugun Heowá aban dasi houn lubúeingu, agurabati lun hagunfuliruni lidan lubudubu (1 Ko. 14:33). Kei hénpulu, busenti lun lapurichihóun uganu buiti lidan sun fulasu ubouagu (Mat. 24:14). Ligía írida laali lubéi Heowá Hesusu lun ligía lan ariha lau dasi le. Ani adügaali Hesusu lun lagunfulirúniwa lau dasi le lidan lubudubu. Lidan furumiñeti sígulu, apostolugu meha hama aban sétanu wéiyaaña lidan afiñeni ha uburugubaña Herusalén íchugubaña adundehani houn lílana damuriguaü (Adü. 15:2; 16:4). Ani lidan sun damuriguaü ligía, iridúatiña meha wéiyaaña lidan afiñeni lun hagía lan ariha hau lílana luma lun hasubudiragüdüni adundehani ligía houn (Adü. 14:23). Kei meha gaganbadi habéi íbirigu hagía, aba meha lederebugudun hafiñen lílana damuriguaü ani aba haganwoundun “sagü weyu” (Adü. 16:5).

2. Ida liña ladundehaniña Heowá lumutuniña lúmagiñe irumu 1919 ani ru ligía ariñahani houn?

² Anihagua Heowá atouhaña lumutuniña uguñe weyu. Lidan meha irumu 1919, gumeseti Hesusu ayusura aban sétanu wügüriña hádangiñe kristiánugu anuadirúaaña lun hadundehani apurichihani luma lun híchugun ariñahani lúmagiñeti Bungiu houn lani disipulugu (Luk. 12:42). a Menefánti labiniruñein lan Heowá wadagimanu le hadügübei (Isa. 60:22; 65:​13, 14).

3, 4. a) Yusu humá aban hénpulu lun hafuranguagüdüni ka lan buiti wasagarubei lau ñein lan aransehani buiti wadan. b) Kaba wariha lidan aturiahani le?

³ Lun hamuga úa lan aransehani buiti waganagua, siñabei  hamuga wagunfulirun lau le lariñagubei Hesusu woun (Mat. 28:​19, 20). Kei hénpulu, lun hamuga mariñawagún lan houn lílana damuriguaü halíaba lan hapurichiha, lapurichihaña hamuga kada íbiri ñein lumuti labusenra. Ani ñeinbei hamuga fulasu le ídanbei gabügürügua lan lapurichihóun ani ñeinbei hamuga amu le ídanbei mapurichihóuniwa lan. Gayaraati san hasaminarun luagu amu burí buiti le wasagarubei lau anihein lan aransehani buiti wadan?

⁴ Aban ligaburi latouhaniña Hesusu lumutuniña Bungiu uguñe weyu kei meha latouhaniña lani disipulugu dan meha le ya lubéi ubouagu. Lidan aturiahani le, wakutihabei lani Hesusu hénpulu ani warihibei ida liña lan táyeihani lóundarun Heowá uguñe weyu. Wayanuhaba giñe luagu le gayaraabei wadügüni lun warufuduni afiñe wamá tuagu lóundarun Heowá.

ANUHAGUA LÓUNDARUN HEOWÁ ÁYEIHEI HESUSU

5. Ida liña táyeihani lóundarun Heowá Hesusu? (Huan 8:28).

⁵ Sun meha le ladügübei luma le lariñagubei Hesusu, lúmagiñe meha Heowá, Lúguchi le siélubei, lafurendeirei. Ítarameme, tídangiñe giñe Lererun Bungiu tasagarei lóundarun Heowá sun le tarufudahabei luma adundehani le tíchugubei (aliiha huméi Huan 8:28; 2 Tim. 3:​16, 17). Gabügürüguati giñe taritaguagüdüniwa lunti lan waliihanu Bíbülia, falá wameime le tariñagubei. Ida liña wasagarun buiti lídangiñe adundehani le?

6. Ka buiti wasagarubei dan le waturiahanu Bíbülia?

⁶ Gíbeti buiti wasagarun dan le waturiahanu Bíbülia lau tídehan wani agumeiraguagüdüni. Kei hénpulu, íderagua tumutiwa arihei ka lan lánibei adundehani le weresibirubei tídangiñe lóundarun Heowá luma le tarufudahabei Lererun. Danti le warihini ítara liña lan, ábatima laganwoundun wafiñen tuagu lóundarun (Rom. 12:2).

7. Ka meha uganu lapurichihabei Hesusu ani ida liña táyeihani lóundarun Heowá?

⁷ Apurichiha lumuti meha Hesusu “uganu le luáguti Larúeihan Bungiu” (Luk. 4:​43, 44). Ani ariñaga lumuti giñe houn lani disipulugu lunti lan hadügüni ligiaméme (Luk. 9:​1, 2; 10:​8, 9). Uguñe weyu, sun ha tílanabaña lóundarun Heowá, apurichiha hamuti uganu luáguti Larúeihan Bungiu meberesenga halía lan hawinwanda o ka lan buligasion aubei hagunfulira.

8. Ka lubuidun chansi wámabei?

⁸ Aban óunwenbu chansi wapurichihani uganu luáguti Larúeihan Bungiu houn amu gürigia. Le linarün katei, michugúnti lubuidun chansi le houn súngubei. Kéiburi meha dan le ya lubéi Hesusu ubouagu, mígirunti meha lun hapurichihan máfianu luagu (Luk. 4:41). Uguñe weyu, lun gayara lan láfuridun aban gürigia apurichiha hama gefentiña luagu Heowá, furumiñe mosu lanügüni libagari kei lagurabuni Heowá hámagiñe lubúeingu. Ida liña warufuduni weiri lan lebegi chansi lánina wapurichihan woun? Lau meferidirun wamá chansi lun wapurichihan. Ítara kei Hesusu, busentiwa wábununi inarüni tidan hanigi gürigia (Mat. 13:​3, 23; 1 Ko. 3:6).

9. Ka adüga táalibei lóundarun Heowá lun tasubudiragüdüni liri Bungiu?

⁹ Subudigüda lumuti meha Hesusu liri Bungiu. Luagu aban weyu, ariñagati Hesusu lun Lúguchi le siélubei lidan furíei: “Subudigüda naali biri” (Huan 17:​26, TNM). Áyeiha tumuti lóundarun Heowá Hesusu lau tadügüni sun tiyaraati lun tíderaguniña gürigia asubudirei ka lan liri Bungiu. Lun lira, wéiritimaati tayusurunu Bíbülia Traducción del Nuevo Mundo, to lídanboun lóugiñe 270 iñeñein, dayarügü lan  yebe o lidan fánreinti. Tidan Bíbülia to, fuati liri Bungiu lidan sun fulasu le ñein lubéi meha láfuacha dan le tabürüdǘnbei furumiñe. Tidan garüdia Adundehani lun taturiahóun Lererun Bungiu páhina 1 darí 13, dariwati ariñahani luáguti lafidirún liri Bungiu lárigoun tidan Lererun. Ani lidan lanwoun ariñahani (Apéndice C) le tídanbei Biblia de estudio, dariwati saragu ariñahani le arufudubalin ka lan uagu lunti lubéi láfuachun liri Bungiu tidan Abürüdǘni Güriegu Kristiánu 237 wéiyaasu.

10. Ka wafurendeirubei lídangiñe le asuseredubei tun aban würi ageiraü Mianmarü?

¹⁰ Kei meha ladügüni Hesusu, busentiwa giñe wíderaguniña sun gürigia ha wayara lun hasubudiruni liri Bungiu. Lidan ageiraü le gíribei Mianmarü, arufudaha tumuti aban Gefentu liri Bungiu tun aban würi to 67 irumu tau. Wéiriti tugundan würi tuguya darí lun labulachagun táguira ani ariñagatu: “Anihán furumiñeti wéiyaasu naganbuni liri Bungiu. […] Arufudaha baali katei súdinitimati le gayaraabei nafurendeiruni nun lidan sun nibagari”. Arufudahati sügǘ le woun gayara lan ladügün hasubudiruni gürigia liri Bungiu lun lasansirun habagari.

SIGÍ WAMÁ ARUFUDEI AFIÑE WAMÁ TUAGU LÓUNDARUN HEOWÁ

11. Ida luba harufuduni wéiyaaña lidan afiñeni afiñe hamá tuagu lóundarun Heowá? (Ariha humóun giñe iyawaü).

¹¹ Ida liña harufuduni wéiyaaña lidan afiñeni afiñe hamá tuagu lóundarun Heowá? Lau haliihani adundehani le heresibirubei túmagiñe luma lau hafalaruni buidu buidu. Kéiburi adundehani le heresibirubei luáguti ida luba lan hadügüni hadasin o furíei lidan adamuridaguni luma luáguti ida luba lan hóunigiruniña íbirigu. Dan le hafalaruni wéiyaaña lidan afiñeni adundehani burí le, sandí hamuti íbirigu línsiñehabu Heowá ani góunigi lániña.

12. a) Ka uagu lunti lubéi gaganbadi wamá houn ha adundehabaliwa? (Ebüréu 13:​7, 17). b) Ka uagu lunti lubéi wetenirun lun igaburi buiti le hawagubei ha adundehabaliwa?

¹² Aban katei buítimati lun wadügüni, wafalaruni adundehani le híchugubei wéiyaaña lidan afiñeni woun. Ítara, wadügüba lun ménrengun lan houn hagunfulirun lau hadasin. Ariñagatu Bíbülia lunti lan gaganbadi wamá houn ha adundehabaliwa, redei wagíame lábugiñe hererehan (aliiha huméi Ebüréu 13:​7, 17). Anihein dan hénrengu lan katei le ladüga chará hamá wéiyaaña lidan afiñeni. Lau sun lira, lunti waritaguni ánhawa lan etenira lúnrügü hachara lubaragiñe wetenirun lun katei buiti le hadügübei, wadügüñein lanme le habusenrubei wáganiñu lun wadügüni. Ka uagu wariñagei lira? Ladüga ánhawa asaminara wuriba hawagu wéiyaaña lidan afiñeni, gayaraati lau lanme lásügürün dan, mafiñerunhaadiwa lanme tuagu lóundarun Heowá, ligía hálugubei áganiñu burí ha habihin. Kati gayaraabei wadügüni lun wóunigiragun woungua hawéi wáganiñu danme le wíchugun fe háluguña lan heyeeduniwa?

MÍGIRA WAMÁ LUN HADÜGÜN AMU LUN MAFIÑERUN WAMÁ TUAGU LÓUNDARUN HEOWÁ

13. Ka hariñagubei áganiñu tuagu lóundarun Heowá?

¹³ Adügatiña wáganiñu lun larihín katei le tadügübei lóundarun Heowá kamá hamuga wuribati. Kei hénpulu, arufudahatu Bíbülia busén lan Heowá lun haruma hamá lubúeingu lidan ligaburi háhuduragun lun, lidan ligaburi hanügüni habagari luma hágubu. Ariñagatu giñe furumiñeguarügü lan gürigia le wíyeti lanügüni libagari ani masakürihanti lunti lan labugún lídangiñe damuriguaü (1 Ko. 5:​11-13; 6:​9, 10). Keiti falá wamani gumadi le, aba hariñagun  áganiñu deré tan wanigi, mineben lan le hasaminarubei amu woun ani afiñe wamá buídutima wamá hawéi ha híbiri.

14. Ka úmagiñe liabin iyeeni le abahüdawagúbei tuagu lóundarun Heowá?

¹⁴ Haritagua huméi kátima lan ábürühabei tuagun lóundarun Heowá. Satanási “ligía lúguchibei iyeeni”, ligía adügübei lun labahüdawagún iyeeni tuagu lóundarun Heowá (Huan 8:44; Agu. 3:​1-5). Ligía maweiridun tubéi wanigi luagu añahein lan gürigia aburuchaguagüdütiña iyeeni tuagu lóundarun Heowá. Adügañaha laali Mafia katei le lidan furumiñeti sígulu.

15. Ka meha hadügübei tábutigu relihión lun Hesusu luma houn lani disipulugu?

¹⁵ Lau sun meha mafigoun lan Hesusu le Liráü Bungiu ani adüga ligía milaguru buíduburiti, yúsuti meha Satanási ítaga gürigia lun habahüdahan sun luwuyeri iyeeni luagu Hesusu. Kéiburi tábutigu relihión ha meha ariñagubaña houn gürigia lau lan lubafu Mafia lasagaha Hesusu sífirigu wuribatiña (Mar. 3:22). Lárigiñe, dan le meha laguserawagüdüña lubéi Hesusu, ariñagatiña tábutigu relihión anabagua laali lan meha Hesusu Bungiu, ani adügatiña lun hamuriahani gürigia lafarún Hesusu hilagubei (Mat. 27:20). Dan lárigiñe, dan le hagumeserunbei lani Kristu disipulugu apurichiha, aba hachagaraguagüdüniña áganiñu gürigia ani gañei haméi haritagun lun héibaahaniña kristiánugu (Adü. 14:​2, 19). Tidan La Atalaya to lánina 1 lidan duusu-hati, irumu 1998 dan le tayanuhan luagu Adügaü 14:​2, afuranguagüdatu memeni lan meha houn áganiñu huríu hamahadun lun uganu buiti, “adügatiña giñe lun laburuchagun iyeeni” hawagu kristiánugu lun hábürühan lílana amu burí néchani hawagun.

16. Ka lunbei waritaguni dan le waganbun iyeeni tuagu lóundarun Heowá?

¹⁶ Meredeti lariñagun Satanási iyeeni ani  anihagua ‘eyeehei sun ubóu’ (Aruf. 12:9). Ligíati, ánhawa aganba somu iyeeni tuagu lóundarun Heowá o hawagu íbirigu ha adundehabarun, haritagua waméi adügañaha hamaali lan áganiñu katei le lun Hesusu luma houn lani disipulugu lidan furumiñeti sígulu. Ítara kei tariñaguni Bíbülia lidan profesía, héibaahañanu gürigia gefentiña luagu Heowá ani ayanuhatiña giñe iyeeni hawagu (Mat. 5:​11, 12). Mibihinbaña áganiñu heyeeduniwa anhein furangu lubéi woun halíagiñe lan liabin hayeeni ani direi wagíame hawéi lau lóufudagun. Ka lunbei wadügüni lun wóunigiragun woungua hawéi?

17. Ka lunbei wadügüni anhein achülüra arufudahani mama inarüniti woun? (2 Timotéu 1:13; ariha huméi giñe rekuáduru “ Ka lunbei wadügüni anhein achülüra ariñahani mama inarüniti woun?”).

¹⁷ Maganbaha wamá iyeeni tuagu lóundarun Heowá. Ariñaga lumuti meha apostolu Pábulu ka lan lunbei wadügüni dan le waganbun ariñahani iyeeniti kei le. Lidan 1 Timotéu 1:​3, 4, ruti gumadi houn lubúeingu Heowá lun meteni hamá “lun burí úraga”. Ani lun Timotéu, ru lumuti adundehani le: “Meferidirabéi bidaani asigeneha luagu burí libidiegun úraga” (1 Tim. 4:7). Samina wamá luagun le: anhein abuda aban irahü somu katei múarugugiñe, másiñati ládarubei lan liyumulugun; ánheinti aban gürigia le wéiriaali, maweiyasunbei adügei lira lugundun subudi lumuti halíagiñe lan liabin ani gunfuranda lumuti gayaraabei lan ladügün dañu lun. Ligía maha wabéi lun ariñahani mama inarüniti ani arufudahanirügüñein le inarüniti waganbaha (aliiha huméi 2 Timotéu 1:13).

18. Ida luba warufuduni afiñe wamá tuagu lóundarun Heowá?

¹⁸ Lau sun arihaadiwa lan ǘrüwa katei le ídanbei táyeihei lóundarun Heowá Hesusu, mámarügüñein ligía. Éibume haturiahanu Bíbülia, chóuruti hadariruba lan saragu amu. Mararamagualá híderaguniña híbirigu ederebudagüdei hafiñen tuagu lóundarun Heowá. Ani sigí humá eseriwida lun Heowá lau úaraguni, mígirunga lun ñein lan somu katei le adügüti lun hadisedun tuéi óundaruni to layusuruboun lun lagunfulirun lau lugundan (Sal. 37:28). Ma inarüni aban lan óunwenbu chansi weseriwidun lun Heowá tidan aban óundaruni to ñein lubéi saragu ínsiñehabuni luma úaraguni? Gebegilá lubeiti lubuidun chansi le woun!