1. Ka hasandirubei fiu íbirigu dan le háfuridun apurichiha? (Ariha humóun giñe iyawaü).

 WAGÍA le lubúeingu Heowá, apurichihatiwa ladüga hínsiñe lan Wáguchi le siélubei woun ani busentiwa lun hasubudiruni ha híbiri gürigia. Lau sun añahein lan saragu íbirigu ha hínsiñeti apurichihani houn, añahein amu, masandiraguntiña houngua buidu lidan apurichihani. Ka uagu? Ladüga añahein hádangiñe haburitiña ani mafiñentiña hawougua. Añahein amu, mínsiñeti houn houdin hábiñe gürigia magunbirahóunga. Añahein giñe hanufudetiña luéi maha hamá gürigia heresibiruniña. Ani añahein amu, arufudahóuaali houn hábiñe lun masigenehan hamá. Lau sun weiri lan línsiñe Heowá houn, hénrenguti houn lun hanügüni uganu buiti houn gürigia ha ibidiñetiña houn. Lau sun lira, kei gunfuranda hamani lisudinin dasi le, gabügürüguati háfuridun apurichiha. Chóuruti gunda lan Heowá hau!

2. Ka uagu moun lumuti lubéi lábürühan harüna anhein hénrengu lubéi hun hasandiragun hungua buidu lidan apurichihani?

² Agia huguya? Hénrenguti san hun hasandiragun hungua buidu lidan apurichihani? Anhein ítara liña lubéi, mábürühala harüna. Másiñati ladüga lan ǘnabugu humá hasandiragunbei hungua ítara ani mabusenrúntün hawachahani arihini huouguoun ni hasigenehan. Lanwoun lira, úati gürigia unti línsiñeda ladügün lun hasandiragun amu houngua wuriba, dántima le láluguña lan líderaguniña. Gunfuranda lumuti Húguchi le siélubei buidu buidu ka lan turobuli úmabei hagagibudagua ani busenti líderagunün (Isa. 41:13). Lidan aturiahani le, warihiba seingü adundehani le lunbei líderaguniwa agagibudagua luma saminaü burí le, gúndaatima wamaamuga lidan apurichihani.

RAGǗ HUMÁ EREI TÍDANGIÑE LERERUN BUNGIU

3. Halíagiñe meha libihei Heremíasi erei le lemegeirubei lun lapurichihan?

³ Lúmagiñe lidan binadu dan, líchuguña luganute Bungiu iderebugu houn lubúeingu lun hagunfulirun lau somu dasi hénrenguti  le líchugubei houn. Samina wamá luagun profeta Heremíasi. Dan meha le lóunahanbalin Heowá apurichiha, aba lanufudedun saragu ani aba lariñagun: “Au ñǘraügidina ani mariñagaditina!” (Her. 1:6). Ka meha íderagubalin lun ganigi lan lun lapurichihan? Resibi lumuti meha erei le lemegeirubei tídangiñe Lererun Bungiu. Ariñagati: “Aba nasandiruni bererun nídangua kei aban watu gemeti le ebeluruti lidoun sun nabu. Áfaaguatina yebe lun nawanduni, gama lumoun siñá numuti” (Her. 20:​8, 9). Lau sun meha hénrengu lan lapurichihóun houn gürigia ha lídanbaña fulasu le ñein lubéi lapurichiha Heremíasi, lídangiñe guánarügü uganu le meha lunbei lapurichihani libihei erei le lemegeirubei lun lagunfulirun lau lidasin.

4. Ka wibihubei dan le waliihanu Lererun Bungiu ani ráramagua wagía asaminara luagun le waliihabei tidan? (Kolosana 1:​9, 10).

⁴ Ruti giñe uganu le tídanbei Lererun Bungiu dǘgüdaguaü woun, wagía kristiánugu. Dan meha le labürühanbei apostolu Pábulu houn kristiánugu ha meha Kolosabaña, ariñagati houn gayara lan línchahaniña subudi lun “hagaburidun keisi lunti lan hagaburidun lánigu Wabureme” luma lun hadügüni “le aubei lagundaara súnwandan” (aliiha huméi Kolosana 1:​9, 10). Ani wapurichihani uganu buiti, ligía aban lídangiñe katei le aubei lagundaara Bungiu. Kei aubei warihei, dan le waliihanu Lererun Bungiu ani ráramagua wagía asaminara luagun le waliihabei tidan, ábatima lederebugudun wafiñen luagu Heowá ani ábatima giñe gunfuranda wamani ka lan uagu weiri lubéi lisudinin wapurichihani uganu luáguti Larúeihan Bungiu.

5. Kaba íderaguawa lun wasagarun saragu buiti tídangiñe Bíbülia?

⁵ Lun wasagarun saragu buiti tídangiñe Lererun Bungiu, moun lumuti éibaagueina lan waliihanu, waturiahanu luma wararamagun asaminara luagun le waliihabei tidan. Anhaün adunragua luma aban bérusu le úati gunfuranda humani, mígira huméi katei ítara, lubaragiñe lira, áluaha humá ariñahani luagu bérusu ligía tidan burí wani agumeiraguagüdüni luma tidan Adundehani lun haturiahan gefentiña luagu Heowá. Anhaün adireira dan nófuti lun haturiahan, laganwounduba hafiñen tuagu Lererun Bungiu (1 Tesa. 5:21). Ani éibume laganwoundun hafiñen tuagu Bíbülia, hínsiñetimabei hun hayanuhan hama amu gürigia luagu le hafurendeirubei.

ARANSE HUMÁ BUIDU LUBÁ HAPURICHIHAN

6. Ka uagu lunti lubéi waranserun buidu lubá apurichihani?

⁶ Anhaün aransera buidu lubá apurichihani,  chóuruti darangilubei lan hasandiragun hungua danme le hayanuhan hama gürigia. Aranse lumutiña meha Hesusu lani disipulugu lubaragiñe lóunahaniña apurichiha, ani kei falá habalin adundehani le líchugubei houn, sanditiña meha aban óunwenbu ugundani ladüga buidu lan lidin houn (Luk. 10:​1-11, 17).

7. Ka gayaraabei wadügüni lun waranserun lubá apurichihani? (Ariha humóun giñe iyawaü).

⁷ Kati lunbei wadügüni lun waranserun buidu lubá apurichihani? Samina wamá buidu luagu ida luba lan wafuranguagüdüni inarüni lidan wererun guánarügü. Samina wagíame luagu biama o ǘrüwa katei le burí hariñagubei gürigia lidan apurichihani, aranse wameime kaba lan hamuga wariñaga lun wóunabuniña. Ítarati, danme le wayanuhaña lan hama gürigia, gayaraabei darangilu lan wasandiragun woungua, wáhayachun hawagun luma warufudun gamadóuni.

8. Ka uagu lariñawagúa ítara haña lan kristiánugu kei ágeidinaü lauti múa?

⁸ Yúsuti meha apostolu Pábulu aban hénpulu lun layanuhan luagu dasi lánina apurichihani le wagunfulirubei. Ariñagati: “Lídanñein wágubu irisini ligía le ítarabei kei aban sóudieru lauti múa” (2 Ko. 4:7). Ka méhati irisini uágubei layanuha Pábulu? Layanuhaña meha luagu lapurichihóun uganu luáguti Larúeihan Bungiu, aban dasi le esefuhabei ibagari (2 Ko. 4:1). Kei aubei warihei, ítara waña, wagía le lubúeingu Heowá ha anügübalin uganu buiti, kei ágeidinaü lauti múa. Lidan meha lidaani Pábulu, kamaniti meha hanaahani alugurahatiña hebegidina lidan burí ágeidinaü lauti múa, kéiburi éigini, diwéin luma seinsu. Uguñe weyu, rúhali giñe Heowá aban katei le wéiriti lebegi lábugiñoun waríaahan: lapurichihóun uganu buiti. Lau lídehan Heowá, wabihibei erei le wemegeirubei lun wagunfulirun lau úaraguni lau dasi le: wapurichihani uganu buiti houn amu!

AMURIAHA HUMÁ GANIGI LUMA HEOWÁ

9. Anhein sandí wabéi anufudei hawéi gürigia, ka lunbei wadügüni lun lagidarun anufudei ligía wawéi? (Ariha humóun giñe iyawaü).

⁹ Anihein dan wasandirun anufudei hawéi gürigia. Ka lunbei wadügüni dan le lasuseredun lira? Samina wamá luagun furíei le meha hadügübei apostolugu dan le lichugúnbei gumadi houn lun masigi hamá apurichiha. Lubaragiñe meha hígiraguagüdün houngua lun anufudei, aba hamuriahan luma Heowá lun líderaguniña  lun “hapurichihani lererun [ . . . ] manufudeuga”. Ani óunaba lumutiña lau lóufudagun (Adü. 4:​18, 29, 31). Danme le wasandirun anufudei hawéi gürigia, amuriaha wamá luma Heowá lun líderaguniwa asandira ínsiñeni hawagu gürigia wáledigu, manufude wamaamuga wapurichihani uganu buiti houn.

10. Ka ídemuei ru laalibei Heowá woun lun wagunfulirun lau wadasin keisi gefentiña luagu Heowá? (Isaíasi 43:​10-12).

¹⁰ Anúadira láadiwa Heowá keisi lánigu Gefentiña (aliiha huméi Isaíasi 43:​10-12). Ani füramasehaali líderagubadiwa lan lun ganigi wamá. Lun lira, yúsuti Heowá gádürü katei. Furumiñe, anihein Hesusu wama dan le wapurichihani uganu buiti (Mat. 28:​18-20). Libiaman, rúhali Heowá gumadi houn ánheligu lun híderaguniwa (Aruf. 14:6). Lǘrüwan, ru laali Heowá lani sífiri sandu woun le íderagubaliwa lun waritaguni le furendei wamaalibei (Huan 14:​25, 26). Ani gádürü, ruti Heowá íbirigu woun lun wapanaagume. Lau lídehan Heowá luma hídehan wíbirigu ha hínsiñehabubaña, ibiha wamuti sun le wemegeirubei lun buidu lan lidin woun lidan wáfaagun lun wagidaruni anufudei wawariua.

ARANSEÑU HUMÁ LUN HADÜGÜN ASANSIRUNI SEGÚN LE HEMEGEIRUBEI GÜRIGIA ANI AGURABA HUMÉI LE BUÍDUBEI HÁMAGIÑE

11. Ka gayaraabei hadügüni lúntima gibe hamá gürigia ha únbaña hapurichihei uganu buiti? (Ariha humóun giñe iyawaü).

¹¹ Féridi humuti san huguraasun ladüga lougua hamá gürigia hadarirun hábiñe? Álügüdagua humá hungua: “Halíañanu funa san gürigia ha lídanbaña fulasu le ñein lubéi wapurichiha guentó? Añahein san awadigimarida o agañeingua?” (Adü. 16:13). Anhein ítara liña lubéi, gayaraabei gíbetima hamá gürigia hadarirun anhaün apurichiha ǘmada. Ariñagati aban íbiri gíriti Joshua: “Darihadina chansi lun napurichihan dan le nidin mágidurugu o lidan amu fulasu le ñein lubéi hagañeiha gürigia o ñein lubéi habuinchagua”. Gíbetimatiña giñe gürigia ladarirun, ligía tuma Bridget to lani weiriou, dan le hapurichihan hábiñe gürigia dimaasu lárigiñe amidi (Efe. 5:​15, 16).

12. Ka gayaraabei wadügüni lun wasubudiruni ka lan uagu hafiñera gürigia luma ka lan burí katei uágubei habusenra haganbun?

¹² Anhein lougua lubéi hebereserun gürigia lau uganu le wapurichihabei houn, houcha wamá wasubudiruni ka lan uagu hafiñera  luma ka lan áhüchüragüdübaliña. Yusu lumuti Joshua tuma Bridget álügüdahani burí le áfuachubei luagu tidáü tratadu. Kéiburi tratadu to gíriboun Ida liña san harihinu Bíbülia?, ábati hariñagun houn gürigia: “Añahein gürigia afiñetiña lúmagiñe lan Bungiu tiabin Bíbülia, añahein amu mafiñen hamuti lira, agia huguya, ka hisaminanbei?”. Ítara liña habihin hayanuhan hama saragu gürigia.

13. Ka uagu gayara lubéi wariñagun buidu lan lidin woun dan le wapurichihan íbini maganbún wamá? (Ariñawagúni 27:11).

¹³ Meberesenga anhein haganba gürigia uganu le wapurichihabei o maha hamá haganbuni, súnwandan gayara lan wariñagun buidu lan lidin woun. Ka uagu? Ladüga wadügüñein le lamuriahabei Heowá luma Lisaani wámagiñe: wapurichihani uganu buiti (Adü. 10:42). Ligíati, madiheri wamá saragu anhein siñá lubéi wayanuhan luma ni aban o maha hamá gürigia haganbuni uganu le. Íbini ítara, wéiriti ugundani le wasandirubei ladüga subudi wamani wagundaaragüdüñein lan Wáguchi Bungiu le siélubei (aliiha huméi Ariñawagúni 27:11).

14. Ka wasandirubei dan le ladarirun aban íbiri somu gürigia le busenbei lafurendeiruni inarüni, ani ka uagu?

¹⁴ Gúndaatiwa hama íbirigu ha adarirubaña somu gürigia le busenbei lafurendeirun. Ariñagatu Garüdia Awisahatu ítara liña lan dasi lánina wapurichihan kei dan le laluahóun aban irahü. Lau sun gibe hamá ídehatiña lun laluahóun irahü ligía lidan sun fulasu, dan le ladarirún, mámarügüñein gürigia le adarirubalin agundaara, aba giñe hagundaarun súngubei. Ítarameme, lidan dasi lánina haluahóun disipulugu, ídehatiwa súngubei lau wapurichihan lidan sun fulasu ani gúndaatiwa dan le lagumeserun aban gürigia abasiiha lidoun adamuridaguni.

ADÜGA HUMÉI DASI LE LUAGU ÍNSIÑENI LE HASANDIRUBEI

15. Kaba ídeha lun laganwoundun ubebeni le wasandirubei luagu apurichihani? (Matéu 22:​37-39; ariha humóun giñe).

¹⁵ Ánhawa asandira ínsiñeni luagu Heowá luma hawagu gürigia wáledi, laganwounduba ubebeni le wasandirubei luagu apurichihani (aliiha huméi Matéu 22:​37-39). Gayaraati san hasaminarun luagun óunwenbu ugundani le lasandirubei Heowá dan le larihiniwa agunfulira lau dasi le luma luagun ugundani le lunbei hasandiruni gürigia ha agumeserutiña aturiahoun Bíbülia? Samina humá giñe luagu lanügübaña lan hánharun lun uganu le lun lesefurun habagari (Huan 6:40; 1 Tim. 4:16).

16. Ida luba wadarirun ugundani dan le wapurichihan íbini siñá lan wáfuridun múnadagiñe? Ru humá aban hénpulu.

 ¹⁶ Ánheinti siñá lubéi háfuridun húbiñegiñe? Teni humá lun le hiyaraabei adüga lun harufuduni ínsiñeni le hasandirubei luagu Heowá luma hawagu gürigia. Lidan meha dan le laburuchagunbei sandi COVID-19, rédeiti meha Samuel tuma Dania máfuridunga hábiñegiñe. Lidan sun dan hénrenguti ligía, apurichihatiña meha luéigiñe gágamuru, tau gárada ani ru hagía aturiahani tídangiñeti Bíbülia luéigiñe Zoom. Apurichihati giñe Samuel houn ha úmatiña ladunragua dan le lidin háspitalirugu lun lagaranihóun lun kánserü le luágubei. Ariñagati: “Adügati turobuli lun labuchadun wawagu, adüga ligía lun mere lan wasandiragun woungua luma lun hénrengu lan woun wederebudagüdüni wamadagua luma Heowá. Ligía megei wabalin ugundani le líchugubei weseriwidun lun Heowá”. Lidan dan ligía, héiguatu giñe Dania ani aba lásiñarun tásaarun gabanarugugiñe luagu ǘrüwa hati. Lárigiñe, rédeitu ñun luagu aban haláü gabalabalanti luagu sisi hati. Ariñagatu: “Hóuchatina nadügüni sun niyaraati según le gádanbalina. Apurichihatina tun anosuhatu to achülürüboun etenira nun luma houn alugurahatiña ha achülürübaña múnada. Apurichihatina meha giñe luéigiñe gágamuru tun aban hiñaru to meha arihiboun tau aban bísinisi lánina agaranihani”. Inarüni siñá lan meha ladügün Samuel tuma Dania saragu katei ladüga le gádanbaliña, íbini ítara, kei meha adüga hamani sun le hayaraati, wéiriti meha hagundan.

17. Ka lunbei wadügüni lun lahuudun adundehani le lídanbei aturiahani le woun?

¹⁷ Lahuuduba sun adundehani le ariha wamaalibei lidan aturiahani le woun, anhein wafalara súngubei. Lugundun ítara liña kada aban lídangiñe kei lagana éigini. Dan le wíchuguni sun lagana aban éigini lidoun, semeeti lerederun éigini ligía woun. Ítarameme, anhein wafalara sun adundehani le wafurendeirubei lidan aturiahani le, wárügüdaguba woungua luéi anufudei luma luéi katei líbeina lira, ábameti hínsiñetima lan apurichihani woun.