1. Ka gayaraabei wariñagun tuagu lóundarun Heowá ani ka wabusenrubei wadügün?

 UGUÑE weyu, anuhein aban óundaruni ubouagu to ítaraboun kei aban paraísu. Bereseguñu haña tílana adüga katei buiti. Buin haña lau darangilaü ani mabuseeruntiña háfuridun tídangiñe óundaruni to. Lanwoun lira, busentiña híderaguniña sun gürigia ha hayara lun hóundarun hamoun. Ka uagu wayanuha? Tuagu tubuidun lóundarun Heowá. a

2. Ka uagu gayara lubéi taweiridun wanigi lau adügaali lan Heowá aban óundaruni to ítaraboun kei aban paraísu?

² Kei wawinwanduña lan lidan aban ubóu buin lau iyereehabúni wuribani luma denchaü, ligía gayara lubéi taweiridun wanigi lau adügaali lan Heowá aban óundaruni to ñein lubéi darangilu lan wasandiragun woungua (1 Huan 5:19; Aruf. 12:12). Kei weiri lan wínsiñe lun Heowá ani subudi lumuti adüga lan ubóu le lábugiñebei lubafu Mafia damichi houn gürigia. Ligía lanügünbaliwa lidoun aban fulasu chóuruti le ñein lubéi gayara lan weseriwidun lun lau ugundani. Tidan Lererun, ayanuhati tuagu lóundarun kei aban fulasu le layusurubei “lun ladouragun hau” lánigu ani ariñagati ítara tiña lan ‘kei aban fuluri-agei le túaguati buidu’ (Isa. 4:6; 58:11). Lau lídehan Heowá, séfuñu liña hasandiragun tílana lóundarun houngua ani sanditiña ugundani íbini lidan lagumuhóun dan héreguti le (Isa. 54:14; 2 Tim. 3:1).

3. Ida liña lagunfulirun profesía le lídanbei Isaíasi kapítulu 65 luagu furumiñeti wéiyaasu?

³ Lidan Isaíasi kapítulu 65, ayanuhati Heowá luagu ida luba lan ibagari tidan lóundarun to ítaraboun kei aban paraísu. Gúnfuliti dimurei  le lariñagubei profeta Isaíasi luagu furumiñeti wéiyaasu lidan irumu 537 lubaragiñe lidaani Kristu. Lidan meha dan ligía hagiribuda huríu ha Babilóniabaña hageiroun ladüga meha asakürihaaña lan. Lau labinihan luma lídehan Heowá, ibihatiña lun haranseruni Herusalén, lunya aban lan uburugu buídumeraüti. Aranse hamutu giñe ténpulu lunya aban lan fulasu le ñein lubéi láhudurawagua lun Heowá (Isa. 51:11; Sak. 8:3).

4. Ida liña lagunfulirun profesía le lídanbei Isaíasi 65 uguñe weyu?

⁴ Lidan wadaani lagunfulira profesía lani Isaíasi luagu libiaman wéiyaasu. Gumeseti lidan irumu 1919, dan le hesefurunbei lubúeingu Heowá tídangiñe Babilónia to Wéiriboun. Lúmagiñe dan ligía, haganwounduña tílana lóundarun Heowá darí lun añaheinhaña lan lidan sun fulasu ubouagu. Kei apurichiha hamani Larúeihan Bungiu lau ubebeni, ibihaaña lun ñein lan saragu damuriguaü lidan sun Ubóu. Dandu wügüriña kei würiña ha meha fásibaña ani wiye ligía hanügüni habagari luagu aban dan, awanseeña lidan hamadagua luma Bungiu darí lun dáüguaaña lan “lau iseri igaburi, igaburi le ladügübei Bungiu kei ligaburi guánarügü” (Efe. 4:24). Le linarün katei, lídanhalime iseri ubóu lagunfulira sunsuinagubei saragu lídangiñe abiniruni le uágubei layanuha Isaíasi. Íbini ítara, weresibirúña lubuidun burí abiniruni guentó. Ariha waméi ka lan buiti gayaraabei wasagaruni lau tidan wamá lóundarun Heowá to ítaraboun kei aban paraísu ani ka lan uagu lunti lubéi werederun tidan.

IDA LIÑA HASANDIRAGUN LUBÚEINGU HEOWÁ HOUNGUA TIDAN LÓUNDARUN?

5. Según Isaíasi 65:​13, ka abiniruni líchugubei Heowá houn ha tídanbaña lóundarun?

⁵ Buiti wasandiragun woungua ani sanditiwa ua lan wemegeirun lidan wamadagua luma Heowá. Arufuda lumuti lani Isaíasi profesía wéiritima lan lubuidun le gádanbaliña ha tídanbaña lóundarun Heowá hawéi ha bóugudibaña tuéi (aliiha huméi Isaíasi 65:13). Ru lumuti Heowá sun le hemegeirubei lubúeingu houn lun buidu lan hamadagua luma. Lani sífiri sandu, Lererun luma saragu ariñahani le asagarúbei tídangiñe. Ítara liña lira kéigubeirügü hamuga geigin hamá, ganiñe hagía ani adügati sun lira lun gunda hamá (ariha huméi giñe Arufudúni 22:17). Ánhañati gürigia ha bóugudibaña tuéi lóundarun Heowá, háfaguña “ilamaü”, “mágürabu” luma “busiganu”, ibidiñetiga Bungiu houn (Amos. 8:11).

6. Ka idewesei lúmagiñeti Heowá iridúbei lidan Hoeli 2:​21-24, ka mini lubéi ani ida liña lanügün katei le buiti woun?

⁶ Lidan profesía le meha labürüdübei Hoeli, íridati fiu lídangiñe katei létima meha hayusurubei ísüraelina, kéiburi türigu, diwéin luma lagüle oliwu lun larufuduni líchugubei lan meha Heowá sun le hemegeirubei lumutuniña houn, íbini le hemegeirubei lun buidu lan hamadagua luma (Hoe. 2:​21-24). Ida liña líchuguni Heowá le hemegeirubei lumutuniña houn uguñe weyu? Yusu lumutu Bíbülia, agumeiraguagüdüni tídangiñetu Bíbülia, wani páhina lidan Internet, wadamuridagun luma burí adamurini. Ítara liña wibihini le wemegeiruni sagü weyu lun buidu lan wamadagua luma, ani adügati lira lun buidu lan wasandiragun woungua luma lun wibihin erei.

7. Ka uagu weiri lubéi ugundani le tídanbei hanigi kristiánugu? (Isaíasi 65:14).

⁷ Gúndaati wasandiragun woungua. Wéiriti eteingiruni le hasandirubei kristiánugu luagu sun le adüga láalibei Heowá, ligíati heremuhanbei lau saragu ugundani (aliiha huméi Isaíasi 65:14). Ka uagu weiri lubéi “ugundani le tídanbei hanigi”? Ladüga resibi hamá saragu dǘgüdaguaü lídangiñe füramasei luma inarüni le tídanbei Lererun Bungiu ani kei lani lan Hesusu sákürifisiu lébunabei hemenigin, ligía derebugu lubéi. Wéirititi hagundan dan le hayanuhan hámagua luagu sun burí katei le! (Sal. 34:8; 133:​1-3).

8. Ka bián igaburi wéiriti lubuidun adügübei lun tarihíniwa lóundarun Heowá kei aban paraísu?

⁸ Ínsiñeni luma úarani le hádanbei lumutuniña Heowá, ligíatima arufudubalin lídanñanu lan aban paraísu. Ínsiñeni le íchugubalin sun katei “lidan aban”, ani ligía íderagubaliwa  arihei ida luba lan ibagari lídanme iseri Ubóu. Ñein, wasandirubei ínsiñeni luma úarani le hádanbei lubúeingu Bungiu lidan aban igaburi le wéiritimati sügǘ lau le wawinwandubei uguñe weyu (Kol. 3:14). Ariñagatu aban íbiri ida liña lan tasandiragun tungua dan le tasubudirunbaliña gefentiña luagu Heowá: “Ibidiñeti meha nun ka lan ugundanibei, ni hadan niduheñu. Dánhali nasubudiruniña gefentiña luagu Heowá narihei luagu furumiñeti wéiyaasu ida liña lan harufudun gürigia ínsiñeni hámagua”. Sun le busenbei gunda lan, mosu lebelurun tidoun lóundarun Heowá to ítaraboun kei aban paraísu. Meberesenga ka lan lasaminarubei ubóu le hawagu lubúeingu Heowá, buiti wiri ligibugiñe Heowá luma hagibugiñe ha híbiri lubúeingu (Isa. 65:15).

9. Kaba asusereda lau burí katei le anügübei igarigu tun wanigi? (Isaíasi 65:​16, 17).

⁹ Darangiluti wasandiragun woungua. Ariñagati Isaíasi 65:14 ha lan anúadirubaña herederun bóugudi tuéi lóundarun Heowá, redei hamá “ayahuaha ladüga íruni luma idiheri”. Kábati asusereda lau katei burí le adügübei lun hasandirun lubúeingu Heowá igarigu? Füramaseti Heowá lariñaguba lan kada aban hádangiñe: “Bulieiná binadu burí nidiheri, gumugua ligibugiñegiñe nagu” (aliiha huméi Isaíasi 65:​16, 17). Lagidarubei Heowá sun waturobulin, ani lau lásügürün dan, maritagun wamaalime katei burí le anügübei igarigu tun wanigi.

10. Ka uagu wariñaga aban lan óunwenbu abiniruni wásügürün dan hama wábirigu? (Ariha humóun giñe iyawaü).

¹⁰ Íbini uguñe weyu, sanditiwa óunwenbu darangilaü dan le lídanñadiwa lan burí wadamuridagun lugundun dan le ñein wamá, míchugun wamuti wasaminan luagun burí katei le áhüchüragüdübarun wanigi lidan ubóu wuribati le. Ida liñati wídehan lun ñein lan darangilaü tidan lóundarun Heowá? Lau warufuduni igaburi burí le líchugubei sífiri sandu, kéiburi ínsiñeni, ugundani, darangilaü, lubuidun igaburi luma ǘnabuguni (Gal. 5:​22, 23). Aban óunwenbu abiniruni lúmagiñeti Heowá tílana wamá óundaruni to! Ánhawa eredera tidan, gayaraabei warihini lagunfuliruni Heowá füramasei le: “Nadügüba aban iseri sielu luma aban iseri ubóu”.

11. Ka lunbei wasandiruni lau tídanñadiwa lan lóundarun Heowá ani ka uagu? (Isaíasi 65:​18, 19).

¹¹ Sanditiwa eteingiruni ani buin waña lau ubebeni. Aba lafuranguagüdüni Isaíasi ka lan uagu lunti lubéi wabuinchun lau ugundani tidan lóundarun Heowá to ítaraboun kei aban paraísu. Ladüga Heowá guánarügü lan adügübei lun wawinwanduni lubuidun burí katei le (aliiha huméi Isaíasi 65:​18, 19). Ligía maweiridun tubéi wanigi lau layusuruniwa Heowá lun wínchahaniña gürigia lun háfuridun lídangiñe binadu ubóu le, le ítarabei kei aban fulasu mageirawati, lun hebelurun lidoun damuriguaü kristiánu le ítarabei kei aban emeraaguagülei. Wéiriti wagundan lau  lídanñadiwa lan inarüni! Ligíati weiri lubéi wabusenrun wayanuhan houn amu luagu lubuidun burí abiniruni le (Her. 31:12).

12. Ida liña hasandiragun hungua dan le haliihani füramasei le lídanbei Isaíasi 65:​20-24, ani ka uagu?

¹² Wéiriti eteingiruni le wasandirubei luagu lubuidun wamadagua luma Heowá ani wóurabahouña lubaroun lubuidun burí katei le lunbei wawinwanduni lídanme iseri Ubóu. Füramasetu Bíbülia: “Úabaña irahüñü figigiña óunwegutiña ñein, ni wéiyaaña mutu lun magunfulirun hamani hadaani”. Ani ariñagatu giñe: “Hábunaguba gürigia haban ábame haganóun tidan, hábunaguba beibei ábame héiginu tin”. Lanwoun lira, ariñagatu ‘mawadigimaridunbadiwa lan luagu ni kata’ ladüga labinirubadiwa lan Heowá. Füramaseti woun chóurubei lan wasandiragun woungua ani buin waba lan lau ugundani. Íbinime “lubaragiñe hagúarun” lubúeingu Bungiu lun, aganba láañame, líchugubei sun le tayumahabei hanigi houn (Isa. 65:​20-24; Sal. 145:16).

13. Ka lariñagubei Isaíasi 65:25 luagu asansiruni le hadügübei gürigia lun heseriwidun lun Heowá?

¹³ Lídanñadiwa darangilaü ani chóuruti wasandiragun woungua. Lau lídehan sífiri sandu, ibihaaña saragu gürigia ha meha gáñibaña lun hadügün óunwenbu burí asansiruni lidan habagari (aliiha huméi Isaíasi 65:25). Lun lira, adügaaña saragu áfaaguni (Rom. 12:2; Efe. 4:​22-24). Keiti gafigoun wawéi, wagía le lubúeingu Bungiu, anihein dan wachararun. Lau sun lira, adügaali Heowá aban milaguru lau libihin lun lidan hamá úarani luma darangilaü “sun hawuyeri gürigia”, arufuda hagía ínsiñeni hámagua (Titu 2:11). Búngiurügüñein le suntigabafu gayara libihin aban katei ítarati!

14. Ida liña lagunfulirun Isaíasi 65:25 lidan likesin aban íbiri?

¹⁴ Le san lúgubu gayara lan lasansiruni aban gürigia ligaburi? Samina humá luagun sügǘ le. Dan meha le wein lubéi irumu lau aban wügüri, sun meha oura ladaürǘña, ladüga adüga lan saragu katei wuribati, kéiburi íweruha karü luma burí amu katei. Wíyeti meha lanügüni libagari, fasi ligía, sun meha oura lau áluaha lágieru. Dan le laganbunbalin inarüni le tídanbei Bíbülia luagu furumiñeti wéiyaasu, gumese ligía abasiiha lidoun hadamuridagun gefentiña luagu Heowá, aba lachoururuni darihali lan aban katei le wéiriti lebegi: lóundarun Heowá to ítaraboun kei aban paraísu. Lárigiñe labadiseirun, saminati saragu wéiyaasu luagu ida liña lan lagunfulirun Isaíasi 65:25 lidan libagari. Ítarahali meha kei aban mudún, mama kei aban liñún gáñiti.

15. Ka uagu busén wabéi wíderaguniña amu lun tílana hamá lóundarun Heowá ani ida luba wibihini?

¹⁵ Gumeseti Isaíasi 65:13 lau dimurei le: “Ligía lariñagubei Bungiu”. Ánheinti bérusu 25, gumuti lau dimurei le: “Aburemei ariñagubalin”. Súnwandan lagunfuliruni Heowá Lererun (Isa. 55:​10, 11). Wawinwanduñein lagunfulirun profesía le uágubei layanuha Heowá: tídanñadiwa lóundarun to ítaraboun kei aban paraísu. Adügaali aban óundaruni to ítaraboun kei aban emeraaguagülei le ñein lubéi chóuruñu lan wasandiragun woungua, sandí wagía darangilaü lidan aban ubóu le buinbei lau anarimeni (Sal. 72:7). Ligía busén wabéi wíderaguniña sun gürigia ha wayara lun tílana hamá óundaruni to. Ida luba wibihini? Lau wetenirun lun dasi lánina hadügǘn disipulugu (Mat. 28:​19, 20).

IDA LUBA WACHAWAHANIÑA GÜRIGIA TIDOUN LÓUNDARUN HEOWÁ TO ÍTARABOUN KEI ABAN PARAÍSU?

16. Ka adügübei lun busén hamá gürigia lun tílana hamá lóundarun Heowá to ítaraboun kei aban paraísu?

¹⁶ Sun wagía, gayaraati wídehan luma Heowá lun buídutima lan katei tidan lóundarun to ítaraboun kei aban paraísu, lun giñe busén hamá amu gürigia lun tílana hamá. Ida? Lau wáyeihani Heowá. Mafosu lumutiña Bungiu gürigia lun hadügüni lugundan, achawaharügü lumutiña luouguoun lau ínsiñeni (Her. 31:3; Huan 6:44). Ha afurendeirubaña luagu Heowá ani harumatu hanigi, sanditiña busén hamá hayarafadun lun ladüga  lubuidun burí ligaburi. Ka burí katei gayaraabei wadügüni lun lachawahaniña lubuidun wagaburi gürigia tidoun lóundarun Heowá?

17. Ka gayaraabei wadügüni lun wachawahaniña gürigia tidoun lóundarun Heowá?

¹⁷ Dan le wóuseruniña wábirigu lau ínsiñeni luma areini, achawaha lumutiña katei le amu gürigia tidoun lóundarun Heowá. Ítara kei meha lasuseredun houn mafiñentiña ha meha achülürübaña lidoun adamuridaguni lidan binadu Korintu, busentiwa giñe lun hariñaguni gürigia ha wagunbirahabaña lidoun adamuridaguni dimurei le: “Anihein […] Bungiu huma le tímatimaati” (1 Ko. 14:​24, 25; Sak. 8:23). Ligía lunti lubéi wafalaruni adundehani le: “Abagarida humá lidan darangilaü húmagua” (1 Tesa. 5:13).

18. Kaba achawahaña gürigia tidoun lóundarun Heowá?

¹⁸ Lunti giñe wáfaagun lun warihiniña wábirigu kei larihiniña Heowá. Ligía wetenirunbei lun lubuidun hagaburi, mama lun hachara, katei le lunbei lagumuchun ámuñegü. Líderagubadiwa ínsiñeni lun waranseruni furumiñeguarügü turobuli wádangua ánhawa afalarei adundehani le: “Buidu humá, gudemehabu huguyame húmagua, ferudunagua humá húmagua” (Efe. 4:32). Lachawahabaña igaburi le sun ha busenbaña houserúniwa ítara lun tílana hamá lóundarun Heowá to ítaraboun kei aban paraísu. b

REDEI WAMÁ TIDAN LÓUNDARUN HEOWÁ TO ÍTARABOUN KEI ABAN PARAÍSU

19. a) Ka hariñagubei fiu hádangiñe íbirigu ha agiribudubaña tidoun lóundarun Heowá to ítaraboun kei aban paraísu? (Ariha huméi giñe rekuáduru le gíribei “ Ñǘdüntiña, lárigiñe aba hagiribudun”). b) Ka lunbei wadügüni? (Ariha humóun giñe iyawaü).

¹⁹ Ma lanarime ugundani le wasandirubei lau tílana wamá lóundarun Heowá to ítaraboun kei aban paraísu! Buídutimarügaaru óundaruni to eibu lásügürün dan ani gíbetimahaña lubúeingu  Heowá tidan sügǘ lau lidan amu dan. Ru wamá eteingiruni lun Bungiu súnwandan ladüga ladügünu óundaruni to woun. Sun ha busenbaña lun gunda hamá luma lun lidan hamá ichouruni luma darangilaü, mosu tílana hamá óundaruni to ani lunti máfuridun hamá ñéingiñe. Lanwoun lira, lunti wóunigiragun woungua ladüga ladügüñein Satanási sun liyaraati lun leyeeduniwa luma lun ladisedagüdüniwa tuéi tubuidun óundaruni to (1 Fe. 5:8; Aruf. 12:9). Mígiraguagüda wamá woungua lun. Áfaagua wamá lau sun were lun wóunigirunu tubuidun lóundarun Heowá to ítaraboun kei aban paraísu lun meferidirun lan arumani luma darangilaü le tídanbei.