1. Ka lagurabubei Heowá wámagiñe?

 LAU sun gunda hamá aban feru maríeitiña dan le nasirua lan hasaani, mabusenrúntiña lun lerederun ítara lun sun libagari, íbini weiri lan línsiñe irahü figigili ligía houn. Le linarün katei, hadiheriduña hamuga anhein hariha maweiridun lan. Ítarameme, lau sun gunda lan Heowá dan le wagumeserun afurendeira luagu, mabusenrunti lun ñéinrügü lan wébeda (1 Ko. 3:1). Le labusenrubei, lun kristiánugu wamá ha “wéinamuhaña lidan ligaburi hasaminarun” (1 Ko. 14:20).

2. Kaba burí álügüdahani wóunaba lidan aturiahani le?

² Lidan aturiahani le, wóunabubei álügüdahani burí le: ida liña lóuserun aban kristiánu le wéiriaali lidan ligaburi lasaminarun?, ka lunbei wadügüni lun kristiánugu wamá ha derebuguti hafiñen?, ida liña líderaguniwa waturiahanu Bíbülia hulili lun lederebugudun wamadagua luma Heowá? ani ka uagu lunti lubéi wasigirun áfaagua lun derebugu lan wafiñen?

IDA LIÑA LÓUSERUN ABAN KRISTIÁNU LE WÉIRIAALI LIDAN LIGABURI LASAMINARUN?

3. Ida liña lóuserun aban kristiánu le wéiriaali lidan ligaburi lasaminarun?

³ Tidan Bíbülia, dimurei güriegu le ásügürawagüdübei kei “wéinamuhaña”, mini lan giñe “derebuguhaña” o “dayarühaña” (1 Ko. 2:6). Ligíati, kristiánuguhadiwa ha wéinamuhaña lidan hafiñen dan le mítaranhaali lan wasaminarun kei irahüñü. Lunti san lararamun wawanserun dan le ibiha wamaali lira? Uá. Lunti wasigirun awansera (1 Tim. 4:15). Meberesenga anhein wéiriyaali lubéi o nibureingili lan aban kristiánu, ida liña lasubudirúniwa anhein derebuguhali lubéi lafiñen?

4. Ida liña hóuserun kristiánugu ha derebuguhaña lidan hafiñen?

⁴ Kristiánugu ha derebugubaña lidan hafiñen, mámarügüñein lun lugumadin Heowá le anügübei buiti houn gaganbadi hamá,  gaganbaditiña giñe lun sun lúrudu ligía. Íbini chará hamá, áfaaguatiña lun hasaminarun luma hóuserun kei lagurabuni Heowá hámagiñe lubúeingu. Dáüguaaña lau iseri igaburi ani adüga hamuti sun hayaraati lun eibu lan dan ábanmeme lan ligaburi hasaminarun kei lasaminarun Bungiu (Efe. 4:​22-24). Kei furendeihaña lan afalarei ladundehan luma lilurudun Heowá dan le hanúadiruni kaba lan hadüga, memegeiruntiña aban timigifen lísüta lau gumadi lauti le gayaraabei hadügüni lumoun le siñabei hadügüni. Ani dan le samina hamaali kaba lan hadüga, áfaaguatiña lun hagunfuliruni (1 Ko. 9:​26, 27).

5. Ida liña hóuserun kristiánugu ha úabei derebugu lan hafiñen? (Éfesuna 4:​14, 15).

⁵ Ánhañati kristiánugu ha úabei derebugu lan hafiñen, ménrengunti hábürühan “lidoun hayeeni gürigia sumaditiña”. Afiñetiña houn ha aburuchaguagüdübaña ñunsu mama inarüniti luma abahüdaguni iyeeniti le áfuachubei lidan ñunsu luma lun le hariñagubei gürigia ha garabaguaañabaña houngua luagun Bungiu (aliiha huméi Éfesuna 4:​14, 15). a Másiñati gimuga hamá, ganigi hamá lágieru o ménrengun lan hagañidun o hábürühan lidoun óuchawaguni (1 Ko. 3:3).

6. Ka hénpulu íderagubaliwa gunfurandei ida liña lan lawanserun aban gürigia darí lun ábanhali lan kristiánu le derebuguhali lidan lafiñen? (Ariha humóun giñe burí iyawaü).

⁶ Kei aubei warihei, góubaguagüda tumuti Bíbülia lawanserun aban gürigia darí lun ábanhali lan kristiánu derebuguhali luma laweiridun aban irahü. Gíbeti katei ibidiñeti lun aban irahü, ligía megei lubalin ladundehan aban gürigia le wéiriaali. Kéiburi dan le mosu lan tánhiñuraguni aban úguchuru üma tau sun tisaani, tárügüdübei úguchuru túhabu tisaani. Eibu aweirideina tan irahü, másiñati tígiruba lan túguchu lun tánhiñuraguni üma tábuguarügü, íbini ítara, taritaguagüdübei tun mosu lan tarihin luagun biángubei oubaü lubaragiñe tánhiñuragun. Dan le taweiridun irahü, subudi taali ka lan lunbei tadügüni lun tóunigiragun tungua luéi denchaü. Ítarameme, mégeiti giñe aban kristiánu le úagili derebugu lan lafiñen lun híderaguni kristiánugu ha derebuguhaña lidan hafiñen lun lanúadirun buidu luma lun lóunigiragun lungua luéi katei burí le gayaraabei lagadeiruni lumadagua luma Heowá. Ánhaña kristiánugu ha derebuguti hafiñen, gayaraaguatiña houngua lun hararamagun  asaminara luagun adundehani le tídanbei Bíbülia lun hasubudiruni ka lan lasaminarubei Heowá luagu ítaga katei luma lun hanúadirun buidu.

7. Gayaraati san lemegeirun aban kristiánu le derebuguti lafiñen lun líderawagun? Afuranguagüda huméi.

⁷ Mini lan san le luagu machülübei lan dan lun lemegeirun aban kristiánu le derebuguti lafiñen lun híderaguni amu? Uá, mama ligía mini lubéi. Ñeinbei giñe dan lemegeirun lun líderawagun. Lau sun lira, gürigia le úagili derebugu lan lafiñen, busenti lun lariñawagún lun súnwandan ka lan lunbei ladügüni. Ánheinti kristiánu le derebugubei lafiñen, amuriahati adundehani hama íbirigu ha subudihaña saragu, arufuda hagía lichú aau ani gabaroun lumuti “lunti [lan] lanügüni lanügün guánarügü” (Gal. 6:5).

8. Ida liña ámuñegueinarügü hamá bián kristiánugu ha derebuguhali hafiñen hawariuagua?

⁸ Ítara kei ámuñegueinarügü hamá gürigia ha wéinamugaañabaña hawariuagua, ítara liña giñe ámuñegueinarügü lan igaburi létima aubei hasubudirúa kristiánugu ha derebugubaña lidan hafiñen. Añahein, subudiwatimatiña luagu harufudun lichú aau, o luagu ganigi le harufudubei, o luagu híchigadi, o luagu gunfuranda hamaniña amu. Gayaraati giñe ámuñegueinarügü lan le hanúadirubei bián kristiánugu ha derebuguti hafiñen lidan aban sügǘ le genegeguati, lau sun biángubei lan hagía gabaroun hamuti adundehani le tídanbei Bíbülia dan le hanúadiruni kaba lan hadüga. Ligíati, úabei ni aban ayanuhati wuriba luagu le aban ladügarügü amu lan le lanúadirubei luéi, lubaragiñe lira, háfaaguba biángubei lun ua lan fánreinguaü hadan (Rom. 14:10; 1 Ko. 1:10).

KA LUNBEI WADÜGÜNI LUN KRISTIÁNUGU WAMÁ HA DEREBUGUTI HAFIÑEN?

9. Ka uagu wariñaga mítaran lan lederebugudun lafiñen aban kristiánu kei laweiridun aban irahü?

⁹ Mararamunti laweiridun aban irahü darí dan le wügürihali, ánheinti lawanserun aban kristiánu darí derebugu lan lafiñen, mítaranti. Samina wamá hawagun wíbirigu ha meha Korintubaña, ha meha ánharubaña lun uganu buiti, badiseitiña, resibitiña sífiri sandu ani furendeitiña saragu lúmagiñe apostolu Pábulu (Adü. 18:​8-11). Íbini ítara, lau sun meha sügühali lan saragu irumu lúmagiñe habadiseirun, úagili meha derebugu lan hafiñen (1 Ko. 3:2). Ka gayaraabei wadügüni lun masuseredun lan katei le woun?

10. Ka lunbei wadügüni lun kristiánugu wamá ha derebuguti hafiñen? (Húdasi 20).

¹⁰ Lun lederebugudun lafiñen aban kristiánu, furumiñe, mosu busén lan kristiánu ligía lederebugudun lafiñen. Ha hímeibalin irahüñümeme hamá lidan hamadagua luma Bungiu, mederebugudunbei hafiñen (Ari. 1:22). Mabusenrúntiwa ítara wamá kei gürigia wéinamugaaña ha erederubaña dipeni hawagu hagübürigu lun hagía lan anúadira hawagu. Busenrügütiwa wagía guánarügü lan ariha lau wawanserun lidan wamadagua luma Heowá (aliiha huméi Húdasi 20). Anhein sandí hubéi mégeigidün lan lun lederebugudun hafiñen, amuriaha humá luma Heowá lun líchuguni ‘lubuidun ayumahani ligía hun’ (Fili. 2:​13, Lererun Bungiu to lánina iseri Daradu).

11. Ida liña líderaguniwa waturiahanu Bíbülia hulili lun lederebugudun wamadagua luma Heowá? (Éfesuna 4:​11-13).

¹¹ Magurabunti Heowá lun wederebudagüdüni wafiñen sin wíderawagun. Lidan damuriguaü, añahein wéiyaaña lidan afiñeni ha arufudahabaña woun lun híderaguniwa lun “wachülürün lumoun lubunwari Kristu” (aliiha huméi Éfesuna 4:​11-13). Ru lumuti giñe Heowá lani sífiri sandu woun lun ábanmeme lan wasaminan kei “lisaminan Kristu” (1 Ko. 2:​14-16). Adügati giñe lun labürüdǘniwa gádürügubei Ewanhéliu le íderagubaliwa asubudirei le meha ladügübei Hesusu dan le ya lubéi ubouagu. Anhein wáyeiha ligaburi lasaminarun, layanuhan luma lóuserun Hesusu, kristiánugubadiwa ha derebuguti hafiñen.

 LISUDININ ARIÑAHANI DǗGÜDATI LE TÍDANBEI LERERUN BUNGIU

12. Ka uagu layanuhóua dan le layusurún dimurei “arufudahani le ménrengubei libügürü Kristu”?

¹² Lun lederebugudun wafiñen, moun lumuti wagufurumadun láurügü “arufudahani le ménrengubei libügürü Kristu”. Laganagua arufudahani le, anihein “ligirún binadu igaburi le málati”, “afiñeni luagu Bungiu, arufudahani luagu badisei” luma luagu “hásaarun hilaaña lídangiñe óunweni” (Ebü. 6:​1, 2). Mosu hafurendeiruni kristiánugu inarünitiña sun arufudahani burí le. Ligía meha líridunbalin apostolu Féduru igaburi burí le houn saragu gürigia ha meha únbaña layanuha lidan fedu le Pentekosutesi (Adü. 2:​32-35, 38). Lun lani wamá Kristu disipulugu, mosu wafiñerun luagu arufudahani burí le. Le linarün katei, ariñagati meha Pábulu mala lan hafiñen ha máhabaña lun arufudahani luáguti águyuguni (1 Ko. 15:​12-14). Lau sun lira, moun lumuti wagufurumadun lau wafurendeiruni arufudahani ménrengunti burí le.

13. Ka lunbei wadügüni lun wabuinchagüdüni wachügü lau ariñahani dǘgüdati le uágubei layanuhóua lidan Ebüréu 5:14? (Ariha humóun giñe burí iyawaü).

¹³ Bóugudin luéi arufudahani ménrengunti le tídanbei Lererun Bungiu, anihein giñe ariñahani le dǘgüdati, le ídanbei wadarirei lilurudun Heowá luma adundehani le íderagubaliwa asubudirei ida liña lan ligaburi larihini katei. Lun wabuinchagüdüni wachügü lau ariñahani dǘgüdati le, mosu waturiahanu Bíbülia, wararamagun asaminara luagu le waliihabei tidan, winwan wameime le wafurendeirubei tídangiñe. Anhein wadüga sun lira, wafurendeiruba adügei katei kei línsiñe lun Heowá (aliiha huméi Ebüréu 5:14). b

14. Ida liña meha líderaguniña Pábulu kristiánugu ha Korintubaña lun lederebugudun hafiñen?

¹⁴ Kristiánugu ha úabei derebugu lan hafiñen, hénrenguti houn lun hasubudiruni ka lan lunbei hadügüni dan le madarirun hamá aban lúrudu furanguti tidan Bíbülia le ariñaguti houn ka lan lunbei hadügüni. Dan le madarirun hamani lúrudu ligía, aba hasaminarun gayara lan hadügüni le habusenrun. Másiñati añahein lan amuriahatiña lun lichugúniwa somu gumadi íbini memegeirúniwa lan. Kei hénpulu, genegeti amuriaha hamá meha kristiánugu ha Korintubaña luma Pábulu lun líchugun somu gumadi luáguti leiginiwa éigini le dagagüdawaali houn guáriua.  Mafalarun lumutiña Pábulu, afuranguagüdarügü lumuti houn garicha lan kada gürigia lun lanúadiruni kaba lan ladüga según lariñaguni lisaminan lun. Aba méhati líridun saragu adundehani tídangiñeti Bíbülia houn le gayaraabei líderaguniña anúadira aban katei le lunbei lígiruni hasaminan darangilañu luma lun machugeraguagüdün hamá ni aban gürigia (1 Ko. 8:​4, 7-9). Larufudahañein meha Pábulu houn ida luba lan hayusurunu Lererun Bungiu lun hanúadiruni kaba lan hadüga lubaragiñe herederun dipeni hawagu amu o áluaha somu lúrudu. Láluahaña meha Pábulu lau lira lun líderaguniña lun kristiánugu hamá ha derebuguti hafiñen.

15. Ida liña meha líderaguniña Pábulu kristiánugu ebüréu lun hasigirun ederebudagüdei hafiñen?

¹⁵ Arufudahati giñe Pábulu amu katei súdiniti woun tidan gárada to labürüdüboun houn kristiánugu ebüréu. Añahein meha úagili derebugu lan hafiñen haganagua, ligía lariñagunbei houn: “Mégeigidün narufudahaniya burí katei létima ménrengubei tídangiñe Lererun Bungiu hun. Irahüñügidün lidan hafiñen, keisi irahüñü ha gásubei hatun míligi lubaragiñe hamuga heigin éigini le dǘgüdati” (Ebü. 5:12). Masigitiña meha afurendeirei iseri burí katei le larufudahabei Heowá houn lídangiñe damuriguaü (Ari. 4:18). Kei hénpulu, añahagua meha saragu kristiánugu huríu adügüdara luagu lunti lan gaganbadiwa lan lun Lilurudun Moisesi lau sun meha sügühali lan 30 irumu lúmagiñe ladügün lani Kristu sákürifisiu lun mámaali lan mosu lagunfulirúniwa lúrudu burí ligía (Rom. 10:4; Titu 1:10). Chóuruti dánhali lan meha lun hasansiruni kristiánugu hagía hasaminan. Kei méhati busén lan Pábulu líderaguniña ánhara lun inarüni dǘgüdati le larufudahabei houn, ligía meha labürüdünbarun gárada lúmagiñetu Bungiu to. Íderagua tumutiña meha gárada tuguya kristiánugu ha, lun harihini buídutima lan ligaburi láhudurawagun lun Heowá le meha larufudahabei Hesukrístu. Ru lumuti meha lira ganigi le hemegeirubei houn lun hasigirun apurichiha íbini hasufurirun éibaahouni hámagiñe huríu (Ebü. 10:​19-23).

KA UAGU LUNTI LUBÉI WASIGIRUN ÁFAAGUA LUN DEREBUGU LAN WAFIÑEN?

16. Dan le derebuguhali wafiñen, ka amu katei lunbei wadügüni?

¹⁶ Mosu wáfaagun, mámarügü lun derebugu lan wafiñen, mosu giñe wáfaagun lun ítarameme wamá. Ligíati moun lumuti lubéi wasaminarun mámaali lan mosu wasigirun áfaagua lun derebugu lan wamadagua luma Heowá ladügarügü derebuguhali lan wafiñen (1 Ko. 10:12). Wéiriti  lisudinin lun gabügürügua lan warihini ida waña lan lun wachoururuni anhein awanhagua lubéi awansera (2 Ko. 13:5).

17. Ida liña tíderaguniwa gárada to labürüdüboun Pábulu houn kolosana arihei lunti lan wasigirun ederebudagüdei wafiñen?

¹⁷ Tidan gárada to labürüdüboun Pábulu houn kolosana, ayanuhati giñe luagu lisudinin lederebugudun wafiñen luma lun wakipuragun woungua ítara. Lau sun meha derebuguhali lan hafiñen kristiánugu hagía, ariñagati Pábulu houn lunti lan hóunigiragun houngua luéi heyeedún lau ligaburi haritagun gürigia ha lánina ubóu le (Kol. 2:​6-10). Kei meha subudi lani Epafürasi lira buidu buidu, súnwandan meha lafurieidun hawagu kristiánugu hagía lun “deregüdagu [ha]má lidan hafiñen” (Kol. 4:12). Ka larufudahabei le woun? Dandu lan meha Pábulu kei Epafürasi subudi hamuti meha anhein lan busén wabéi lun derebugumeme lan wafiñen, megei wamani lídehan Heowá luma wáfaagun lun wederebudagüdüni wamadagua luma. Busentiña meha lun hasigirun kristiánugu kolosana ederebudagüdei hafiñen íbini meha hagagibudaguña lan luma lénrengunga.

18. Ka gayaraabei lasuseredun lun aban kristiánu le derebuguti lafiñen? (Ariha humóun giñe iyawaü).

¹⁸ Ariñagati meha Pábulu houn kristiánugu ebüréu gayara lan leferidiruni aban gürigia lufulesein Bungiu lun súnwandan íbini derebuguhali lan lafiñen. Anhoun ederera lanigi, gayaraati ladisedun saragu luéi Heowá darí lun siñá lan lasakürihan lun feruduna lani Heowá. Le buídubei, masuseredungili lan meha aban katei ítarati houn kristiánugu ebüréu (Ebü. 6:​4-9). Ka gayaraabei wariñaguni hawagu íbirigu ha dilihañabaña o ha abugúbaña lídangiñe damuriguaü ani lárigiñe aba hasakürihan? Ánhaña arufuda ǘnabuguni lau hasakürihan, arufudatiña mítaran hamá kei gürigia ha uágubaña layanuha Pábulu. Íbini ítara, megei hamuti lídehan Heowá dan le hagiribudun (Ese. 34:​15, 16). Ligíati, másiñati hamuriahaba lan wéiyaaña lidan afiñeni luma aban íbiri le derebuguti lafiñen lun líderaguniña abuiduragüdeiya hamadagua luma Heowá.

19. Ka lunbei wáfaagun luagu?

¹⁹ Anhein háfaaguña lubéi lun derebugu lan hafiñen, sigí humá hubaruaguóun. Sigí humá afurendeira luagu inarüni dǘgüdati le tídanbei Lererun Bungiu. Ani sigí humá áfaagua lúntima aban lan ligaburi hisaminan luma Heowá. Ánheinti derebuguhali lubéi hafiñen keisi kristiánu, adüga huméi sun hiyaraati lun ítarameme humá.