Bérusu burí le lubaragiñebei ani le lárigiñebei íderagua lumutiwa lun gunfuranda wamani dan le lan lariñagun Pábulu lidan bérusu le “lererun Bungiu” layanuhaña lan luagu luganute Bungiu le luáguti lisuuni, según wadariruni tidan Bíbülia.

Tidan burí wani agumeiraguagüdüni, yusu wamuti saragu wéiyaasu le lariñagubei Ebüréu 4:12 lun warufudahan luagu gabafu tan Bíbülia lun tasansiruni habagari gürigia. Ani maribanti arufudahani ligía. Gama lumoun buiti giñe lun gunfuranda wamani ka lan meha uagu layanuhan Pábulu dan le labürüdünbalin bérusu le. Línchahañanu meha kristiánugu ebüréu lun hídehan lidan lisuuni Bungiu. Ayanuhóuati meha saragu luagu isuuni ligía tidan Lererun Bungiu. Lidan ókaasion ligía, ayanuhati Pábulu hawagu ísüraelina ha lasagarubaña Bungiu Ehiptugiñe. Hemenigitiña meha hebelurun lidoun aban “múa wéiriti ani rísiti le buiti lun ábunaguni” le meha füramase láalibei Bungiu houn. Gayaraati meha hemeraagun ñein (Áfuriduni 3:8; 2 Lúrudu 12:9, 10).

Ligía meha lisuunibei Bungiu. Gama lumoun, marufuduntiña meha ísüraelina afiñeni luagu Heowá ani aba maganbadi hamá lun, ligía mebelu habéi hiibe-agei hádangiñe lidoun lemeraagun Bungiu (1 Lúrudu 14:30; Hosué 14:6-10). Íbini ítara, ariñagati meha Pábulu aniheingua lan aban füramasei lun hebelurun “lidoun emeraaguni le aranse láalibei Bungiu” (Ebüréu 3:16-19; 4:1). Furanguti aban lan fánreinti lídangiñe le afuranguagüda láalibei Bungiu luáguti lisuuni füramasei le. Ítara kei kristiánugu ebüréu, gayarati giñe waliihan luagu isuuni ligía ani ídeha wagíame lidan. Lun larufuduni anihein lan füramasei ligía tidan Lererun Bungiu, ayanuhati meha Pábulu murusun luagu le lariñagubei Agumesehani 2:2 luma Sálumu 95:11.

Gúndaatiwa lau wasubudiruni aniheingua lan füramasei lun webelurun “lidoun emeraaguni le aranse láalibei Bungiu”. Afiñetiwa luagu gayara lan webelurun lidoun lemeraagun Bungiu, kei tariñaguni Bíbülia. Ligía wadügünbalin sun wayaraati lun webelurun. Ida? Máluguntiwa wasigiruni lilurudun Moisesi ni lun wadügün katei buiti lúnrügü lagundaarun Bungiu wau. Lubaragiñe lira, ídehatiwa lidan lisuuni Bungiu lau sun wagundan, ani wasigirumémeba adügei ladüga afiñe wamá luagu Bungiu. Gumeseeña saragu milu gürigia lidan sun ubóu aturiahoun Bíbülia luma afurendeirei le arufuda láalibei Bungiu luagu lisuuni. Íderagua laaña katei le saragu gürigia lun hasansiruni ligaburi habagaridun, lun hafiñerun luma lun habadiseirun. Arufuda lumuti katei le ‘winwan tan Lererun Bungiu ani gabafu tuguya’. Le arufuda láalibei Bungiu tidan Bíbülia luagu lisuuni adügaali asansiruni lidan wabagari ani lasigiruba adügei.