1, 2. Ka uagu súdini lubéi houn gefentiña luagu Heowá hasansiragun keisi lubudubu?

AYANUHATU aban periodiku luagu ligaburi hasansiragun fiú lábutigu relihión dan le hóudinbei lidan aban lídangiñe hadamuridagun. Ariñagatu yusu hamá gürigia hagía furumiñeguarügü daüguaü, ladüga hárouga lan. Ayanuhatu giñe periodiku tugía hawagu gefentiña luagu Heowá ha ñǘdünbaña lidoun aban adamurini, ani aba tariñagun amu lan ligaburi hasansiragun. Ariñagatu periodiku tugía dandu lan wügüriña irahüñü kei wügüriña yusu hamá kórubata tuma sagü. Ariñagatu giñe yusu hamá würiña hama würiña irahüñü gudu to gadünamatu. Súnwandan layanuhóun buidu luagu ligaburi hasansiragun gefentiña luagu Heowá. Ariñagati apostolu Pábulu lunti lan hasansiragun kristiánugu “keisi lubudubu”, lugundun ligía agurabahóubei hámagiñe lubúeingu Bungiu (1 Timotéu 2:9, 10). Íbini layanuhaña  lan Pábulu hawagu würiña lidan bérusu le, huuti giñe adundehani le houn wügüriña.

² Súdiniti houn lubúeingu Bungiu hasansiragun keisi lubudubu ladüga súdiniti giñe katei le lun Bungiu le unbei heseriwida (Agumesehani 3:21). Heowá Lurúeitebei sun ubóu. Ani ígira tumuti Bíbülia furangu galurudun lan Bungiu libügürü ida luba lan hasansiragun lubúeingu. Ligíati, mámarügübei woun tínsiñeda daüguaü to wanúadiruboun. Le súdinitimabei lun hínsiñe tan lun Heowá le Wabungiute.

3. Ka wafurendeirubei lídangiñe le lariñagubei lilurudun Moisesi luagu asansiraguni?

³ Lidan lilurudun Moisesi anihein meha lúrudu le óunigirubaliña ísüraelina luéi magíaguni le lídanbei néchani burí le geyegubei hau. Arufuda lumuti meha Lúrudu ligía iyereegu lan lun Heowá asansiraguni le adügübei lun ibidiñewa lan ka lan wügüribei luma ka lan wǘriboun (aliiha huméi 2 Lúrudu 22:5). Arufudahati lilurudun Moisesi woun mínsiñe tan daüguaü to adügüboun lun larihín wügüri kei würi, ni daüguaü to adügüboun lun tarihín würi kei wügüri, ni daüguaü to adügüboun lun ibidiñewa lan ka lan wügüribei luma ka lan wǘriboun.

4. Ka gayarabei líderaguniña kristiánugu lun desidírü hamá buidu luagu ligaburi hasansiragun?

⁴ Gayarati tíderaguniwa Lererun Bungiu lun desidírü wamá buidu luagu ida luba lan wasansiragun. Súdiniti adundehani burí le meberesenga anhein hárouga lubéi o diliga lan, ka lan wéchunbei o halía lan weredera. Memegeiruntiwa aban lísüta migifetu lau adundehani luagu kaba lan daüguaü wayusura. Busenrügütiwa wasigiruni lúrudu le tídanbei Bíbülia, le íchugubei chansi woun lun wayusurun katei le hínsiñebei woun. Ariha wamá fiú adundehani le gayarabei líderaguniwa asubudirei ‘ka lan lugundanbei Heowá’ danme le desidírü wamá ida luba lan wasansiragun (Rómana 12:1, 2).

5, 6. Ka efekütu lunbei gani lani ligaburi wasansiragun hawagu amu?

⁵ Adügati Heowá lun labürüdüni apostolu Pábulu adundehani le waliihabei lidan 2 Korintuna 6:4 (aliiha huméi). Arufuda lumuti ligaburi waríawagun ida waña lan, ani adügati lun hasaminarun gürigia amu katei wawagu (1 Samueli 16:7). Keisi lubúeingu Bungiu, moun lumuti wadaürün furumiñeguarügü daüguaü ladügarügü buidu lan wasandiragun woungua tau o ladügarügü hínsiñe tan woun. Mosu líderaguniwa lúrudu burí le tídanbei Bíbülia lun mayusurun wamá daüguaü to madünamatu, kéiburi to murutu o to ídangiñeboun larihíwa sun wamegegun. Moun lumuti wadügün lun  wuriba lan hasandiragun amu houngua ni lun harihin lidoun amu oubaü ladüga luriban ligaburi wasansiragun.

⁶ Anhein haruma tubéi wadaüragun, ani gadünama tugía, háfuga harufuduba lan gürigia inebesei tuagu wóundarun ani inebebadiwa giñe houn keisi lubúeingu Heowá. Háfuga busenbaña lan hafurendeirun luagu Bungiu le unbei wáhuduragua. Ani másiñati haganbubei lan uganu le luáguti esefuruni.

7, 8. Ka burí ókaasion buídubei lun wasansiragun keisi lubudubu?

⁷ Luagu inebesei le wasandirubei luagu Wabungiute le sándubei, hawagu wíbirigu luma hawagu gürigia ha únbaña wapurichiha, lunti wasansiragun lidan aban igaburi le íchugubei uéiriguni lun Heowá luma lun uganu le wapurichihabei (Rómana 13:8-10). Súdiniti lun wasansiragun keisi lubudubu, dántima le wadamuridagun o dan le wáfuridun apurichiha. Lunti larihíniwa lubúein lan Bungiu wagía lau ligaburi wasansiragun (1 Timotéu 2:10). Furanguti anuhein lan daüguaü to wayusuruboun lidan somu fulasu to siñati wayusurunu lidan amu. Ligíati, meberesenga halía lan wawinwanda, wagía gefentiña  luagu Heowá mosu wayusurun daüguaü to madügütu lun wuriba lan hasandiragun amu houngua.

⁸ (Aliiha huméi 1 Korintuna 10:31). Dan le woudin lidan adamurini, lunti wayusurun daüguaü to gadünamatu. Moun lumuti wáyeihani ligaburi hadaüragun lílana ubóu le. Moun lumuti giñe wayusurun daüguaü madünamatu o to wuribati taríawagun ni lubaragiñe ni lárigiñe adamurini, ni dan le wachülürün tidoun haban chülüdügütiña ni dan le wáfuridun ñéingiñe. Ítara, gúndaabadiwa lau wariñagun luagu gefentiña lan luagu Heowá wagía ani aranseñubadiwa giñe lun wapurichihan furumiñeguarügü oura.

9, 10. Ka efekütu lunbei gani lani Filipuna 2:4 luagu ligaburi wasansiragun?

⁹ (Aliiha huméi Filipuna 2:4). Ka uagu lunti lubéi wasaminarun luagun ida luba lan harihini amu íbirigu ligaburi wasansiragun? Ladüga áfaaguatiña lubúeingu Bungiu lun hafalaruni adundehani le: “Ígira huméi sun le higaburibei le láninabei ubóu le: Ualá ni aban hídangiñe agamariduti mamarieidunga, madügün huguyame katei wíyeti, mafalara huméi luriban haritagun” (Kolosana 3:2, 5). Añahein fiú íbirigu adügatiña meha figóu lánina agamariduni lubaragiñe gefén hamá luagu Heowá, ani háfuga añahagua áfaagua kóntüra luriban saminaü. Mosu wóunigiragun woungua ladüga gayarati ladügün ligaburi wasansiragun lun hénrengu lan houn íbirigu hagía gaganbadi hamá lun le tariñagubei Bíbülia. Gayarati giñe ladügün lun hénrengu lan houn hasigirun áfaagua kóntüra luriban ayumahani (1 Korintuna 6:9-11). Mabusenruntiwa lun lasuseredun katei le, adián?

¹⁰ Dan le hámañadiwa lan wíbirigu, dísetiwa hawéi gürigia ha marihinbalin agamariduni mamarieidunga kei aban figóu. Ídehati ligaburi wasansiragun lun wakipurun arumani waganagua, dandu tidan Luban Adamuridaguni kei lidan amu fulasu. Inarüni wagíaba lan anúadiroun wadaüragun. Gama lumoun lunti wayusurun daüguaü to lunboun tíderaguniña amu lun hasaminarun, lun hayanuhan ani lun hadügüni sun katei lidan aban igaburi harumati ligibugiñe Bungiu (1 Féduru 1:15, 16). “Le hínsiñehabubei [...] mámarügüñein luougua laritagua” (1 Korintuna 13:4, 5).

11, 12. Ida liña líderaguniwa Apurichihati 3:1, 17 lun wasaminarun buidu?

¹¹ Dan le wanúadahan ida luba lan wasansiragun, wagía lubúeingu Bungiu, subudi wamuti “gadaaniti [lan] sun katei” (Apurichihati 3:1, 17). Gayarati ladügün ligaburi dan o amu burí katei efekütu lidan ligaburi wasansiragun. Gama lumoun, masansiti lilurudun Heowá (Malakíasi 3:6).

¹² Lidan burí ageiraü le ñein lubéi hárouga lan hénrengutimati tanuadahóun  daüguaü to gadünamatu. Gúndaatiña wíbirigu dan le mayusurun wamá daüguaü murutu o to ñéingiñe lubéi larihíwa wamegegun (Hobu 31:1). Íbini dan le wágawahaña lan, lunti gadünama tan daüguaü to wayusuruboun lun wágawaha (Ariñawagúni 11:2, 20). Saragu gürigia lidan ubóu le yúsutiña daüguaü to madünamatu lun hágawaha. Gama lumoun wagía mosu wíchugun uéiriguni lun Heowá tau daüguaü to wayusuruboun lun wágawahan, ladüga sánduti Bungiu.

13. Ka uagu lunti lubéi waritaguni adundehani le lídanbei 1 Korintuna 10:32, 33 dan le wanúadahan daüguaü?

¹³ Anihein ámuya lúrudu le lunbei wasigiruni dan le wanúadahan daüguaü. Lunti wadügün lun masandiragun hamá amu gürigia houngua wuriba (aliiha huméi 1 Korintuna 10:32, 33). Moun lumuti wayusurun daüguaü to adügüboun lun hasandiragun wíbirigu o amu gürigia houngua wuriba. Abürühati apostolu Pábulu: “Kada aban wádangiñe, lunti lagundaaraguagüdüni gürigia líledi lau le buídubei lun gürigia ligía [...]. Ni Kristu, míchugunti ugundani lúniwagua” (Rómana 15:2, 3). Súdinitimati meha lun Hesusu ladügüni lugundan Bungiu luma lun líderaguniña amu, sügǘ luéi líchugun ugundani lúniwagua. Lunti wadügüni ligiaméme. Ligíati, mayusurunbadiwa daüguaü to hínsiñetu woun ani to gayarati tadügün lun maganbun hamani gürigia uganu buiti.

14. Ida luba harufudahan agübürigu houn hasaanigu lun híchugun uéiriguni lun Bungiu lau ligaburi hasansiragun?

¹⁴ Mosu harufudahan agübürigu kristiánugu houn hasaanigu lun hafalaruni le tariñagubei Lererun Bungiu. Kei hénpulu, lunti harufudahan houn lun hasansiragun lidan aban igaburi le adügüti lun gunda lan Heowá (Ariñawagúni 22:6; 27:11). Ida luba harufudahan agübürigu houn hasaanigu lun inebe lan lilurudun Bungiu houn? Lau híchugun aban hénpulu buiti houn luma lau harufudahan houn lau ínsiñeni ida luba lan ani halíaba lan hadarira daüguaü gadünamatu. Mosu harufudahan agübürigu houn hasaanigu súdinitimati lan hanúadahan daüguaü to íchuguboun uéiriguni lun Heowá, Bungiu le unbei heseriwida.

15. Ka lunbei líderaguniwa lun desidírü wamá lau lichú aau?

¹⁵ Rutu Bíbülia lubuidun adundehani woun le gayarabei líderaguniwa lun desidírü wamá lau lichú aau lun wíchugun uéiriguni lun Bungiu. Íbini ítara, lunti wanúadahanu daüguaü to hínsiñetimaboun woun. Ámuñegueinarügüti katei le hínsiñebei houn ha híbiri gürigia. Gama lumoun, lunti haruma tan wadaüragun ani gadünama tugía. Ani lunti giñe buidu lan taríawagun lidan fulasu le ñein lubéi weredera.

16. Ka uagu buidu lubéi lun wáfaagun lun wasansiragun keisi lubudubu?

¹⁶ Mama súnwandan lun ménrengunbei lan wadarirun daüguaü gadünamatu. Anuhein saragu budigü, dáüguaürügüñoun to lídanboun moda taluguraha. Ligía mosu lubéi wasagarun dan ani áfaagua wagíame lun wadarirun gudu, chegidi tuma dínugu, o lun wadarirun sutu  tuma galasun to mámurutu. Gama lumoun, buiti lun wáfaagun. Ka uagu? Furumiñe, ladüga harihinbadiwa íbirigu ani gúndaabaña lau harihini wáfaaguña lan lun wasansiragun keisi lubudubu. Ani libiaman, ladüga wíchuguba uéiriguni lun Wáguchi le siélubei. Wéiritimabei ugundani le lunbei wasandiruni lau wíchugun uéiriguni lun Heowá sügǘ lau furumiñeguarügü sákürifisiu le lunbei wadügüni lun wasansiragun buidu.

17. Ka lunbei lasaminaruni aban íbiri anhein lasaminaruña lubéi lígirun lun laweinamudun lídiuma?

¹⁷ Maribanti san lun hádiuma hamá wügüriña? Lábugiñe lilurudun Moisesi mosu meha hádiuma hamá wügüriña. Gama lumoun, wagía kristiánugu mámaadiwa lábugiñe lilurudun Moisesi ani mama mosu gaganbadi wamá lun (Fádirigu 19:27; 21:5; Galasiana 3:24, 25). Lidan saragu fulasu ubouagu ánhawati ani inebewati gürigia le hádiumabei ani aranse lumuti buidu, ani gayarati mani lan katei ligía luriban efekütu hawagu gürigia ha aganbubalin uganu. Lidan néchani burí ligía, íbirigu ha anügübalin ubaraü lidan damuriguaü hádiumatiña. Íbini ítara, lidan burí fulasu ligía háfuga añahein íbirigu sagua hamuti (1 Korintuna 8:9, 13; 10:32). Anihein amu burí fulasu le ñein lubéi mechun hamá wügüriña lau ídiumaü, ani wuribati larihíniwa lun hayusuruni kristiánugu. Anhein másaragun lan aban íbiri lídiuma, gayarati mama lan líchuguña uéiriguni lun Bungiu, ani ‘hadimurehaba gürigia wuriba luagu’ (1 Timotéu 3:2, 7; Rómana 15:1-3).

18, 19. Ida liña líderaguniwa Mikeasi 6:8?

¹⁸ Gúndaatiwa lau míchugun lan Heowá aban lísüta migifetu woun luagu ida luba lan wasansiragun luma luagu ida luba lan waranseragun woungua. Lubaragiñe lira, ruti chansi woun lun wasaminarun lau lichú aau según le tariñagubei Bíbülia. Ligíati, íbini lau ligaburi wasansiragun luma ligaburi waranseragun woungua, arufuda wamuti busén wamá weseriwidun lun Bungiu lau aban lubuidun igaburi luma lau ǘnabuguni, kei lariñaguni Mikeasi 6:8.

¹⁹ Lunti ǘnabugu wamá ani gunfuranda wagíame luagu sandu lan Heowá, ani luagu seriwi lan lilurudun woun saragu. Anhein busén wabéi wóuserun lau ǘnabuguni, wafalarubei lilurudun Bungiu lidan wabagari. Ani ladügüba lubuidun wagaburi lun inebe lan le hasandirubei luma le hasaminarubei amu gürigia woun.

20. Ka efekütu lunbei gani lani ligaburi wasansiragun luma ligaburi waranseragun woungua hawagu amu?

²⁰ Mosu tarufuduni wadaüragun luagu lubúein lan Heowá wagía. Súdiniti lilurudun Bungiu, ani falá wamuti lau sun wagundan. Mosu wariñagun houn hiibe-agei íbirigu luagu buidu lan hadüga lau ligaburi hasansiragun luma lubuidun hagaburi. Achawaha hamutiña amu gürigia lun haganbuni uganu lánina esefuruni le tídanbei Bíbülia ani rútiña uéiriguni lun Heowá. Ánhawa desidírü lau lichú aau luagu ligaburi wasansiragun, wasigiruba íchiga uéiriguni lun Bungiu, le adouragubei laugua lau uéiriguni (Sálumu 104:1, 2).