ARÜTIKULU LÁNINA ATURIAHANI 36
Aban ñunsu buiti anitén lan Arümahedón
“Ábati hóundaraguniña [...] lidan fulasu le gíribei Arümahedón” (ARUF. 16:16).
UREMU sjj 150 Áluaha huméi Bungiu lun hesefurúniwa!
LE LUNBEI WATURIAHANI *
1, 2. a) Ka uagu aban lubéi uganu buiti houn gürigia liabin Arümahedón? b) Kaba álügüdahani wóunaba lidan arütíkulu le?
SARAGU gürigia dan le haganbun luagu Arümahedón ariñagatiña aban lan ñunsu wuribati, wuribu lan lidan sun ubóu o lagünrinchawagun sun le geyegubei wau. Ánheinti le tariñagubei Bíbülia luagu Arümahedón aban uganu buiti le adügübei lun wagundaarun (Aruf. 1:3). Magumuchunbei wuribu Arümahedón hau gürigia, séfurugu lubaña. Ida?
2 Arufudahatu Bíbülia lagumuchuba lan Arümahedón hau urúeigu ubouaguna, lagünrinchagubaña wuribatiña ani lakipurubaña gürigia ha richaguabaña lau ibagari, ani ladügüba lun magünrinchawagun lan ubóu (Aruf. 11:18). Lun gunfuranda wamani katei le buidu, akutiha wamá gádürü álügüdahani: Ka san Arümahedónbei? Kaba asusereda lubaragiñe liabin? Ka lunbei wadügüni lun wásügürün lau ibagari? Ida luba wakipuragun woungua úaraguñu lidan ayarafadeina lan?
KATEI SAN ARÜMAHEDÓNBEI?
3. a) Ka mini lubéi dimurei “Arümahedón”? b) Lau gabaroun wamani le lariñagubei Arufudúni 16:14, 16, ida liña wasubudiruni mama lan aban fulasu Arümahedón?
3 (Aliiha huméi Arufudúni 16:14, 16). Dariwati dimurei “Arümahedón” aban wéiyaasu tidan Bíbülia, lídangiñeti hererun ebüréu ani le mini lubéi Wübü “Megidu” (Aruf. 16:16). Megidu ligía meha aban lídangiñe binadu uburugu lani Ísüraeli (Hos. 17:11). Mama aban fulasu, mini lan hóundaragun “sun urúeigu ha ubouagubaña” lun hawügürihóun lun Heowá (Aruf. 16:14). Gama lumoun lidan arütíkulu le, wayusurubei dimurei “Arümahedón” lun wayanuhan luagu wuribu le lunbei liabin lárigiñe hóundaragun sun urúeigu ha ubouagubaña. Ida liñati wasubudiruni mama lan aban fulasu Arümahedón? Furumiñe, mama aban wübü Megidu. Libiaman, fulasu le geyegubei lau uburugu Megidu ñǘbüriti, ligíati makawebaña hamuga “sun urúeigu ha ubouagubaña” ñein hau sun hasudaranigu tuma burí áruma to hayusuruboun. Lǘrüwan, lugundun, kei le aubei warihei lidan arütíkulu le, lagumeseruba wuribu Arümahedón danme le hagumeserun “urúeigu” ha ubouagubaña ábürüha hawagun lubúeingu Bungiu, ha awinwandubaña lidan ámuñegueinarügü fulasu ubouagu.
4. Ka uagu lariñaga Heowá ítara luba lan lagumuhóun luwuribun kei Megidu?
4 Ka uagu lariñaga Heowá ítara luba lan lagumuhóun luwuribun kei Megidu? Ladüga Megidu luma fulasu wayati le gíribei Hesüreeli ñein meha lageindawagua saragu wuribu. Anihein meha dan lídehan Heowá lau lubafu. Kei hénpulu: “yarafa lun lidunari Megidu” líderaguei Heowá aguseragüdüti Barakü agañeiraña hasudaranigu kananna le meha lalidihabei Sísara. Seremei lumuti meha Barakü tuma profeta Débora Heowá lau lagañeiragüdüni wuribu le houn lau aban milaguru. Lidan aban uremu aba heremuhan, ariñageina: “Awuribuhatiña waruguma lúmagiñe siélugiñe, [...] luma Sísara. Buida lumutiña liraüraü duna” (Ali. 5:19-21).
5. Ida liña ámubei lan Arümahedón luéi wuribu le lageindagubei Barakü?
5 Gumú lumuti Barakü tuma Débora heremun lau dimurei burí le: “Ítarala hagünrinchawaguniwa, sun báganiñu Wabureme, ani ámiriha hamá ha hínsiñehabubaña bun kei lámirihan weyu lau sun lere!” (Ali. 5:31). Hóunweguba láganigu Heowá lidan Arümahedón, ánhaña ha hínsiñehabubaña lun hesefuruba. Anihein aban katei súdiniti le adügübei lun amu lan Arümahedón luéi wuribu le lageindagubei Barakü. Lídanme Arümahedón, mageindagunbaña lubúeingu Bungiu. Ni áruma úaboun hama. Hárügüdüba erei ánhaña eredera gálumañu ani afiñe hagíame luagu Heowá luma hawagu lisudaranigu ha siélubaña (Isa. 30:15; Aruf. 19:11-15).
6. Kaba layusura Heowá lun láfaraguniña láganigu lidan Arümahedón?
6 Ida luba lagañeiruniña Heowá láganigu lidan Arümahedón? Gayaraati ladügüni lidan ámuñegueinarügü igaburi. Másiñati layusuruni hárabaganali, lúbara huya dereguati luma wayuhuru (Hob. 38:22, 23; Esek. 38:19-22). Gayaraati giñe ladügün lun hageindagun láganigu hámagua (2 Kro. 20:17, 22, 23). Gayaraati giñe layusuruniña ánheligu lun láfaraguniña láganigu (Isa. 37:36). Meberesenga kaba lan layusura, lagañeiruba sunsuinagubei. Hagünrinchawaguba sun láganigu, gama lumoun hesefuruba sun ha richaguabaña (Ari. 3:25, 26).
KABA ASUSEREDA MURUSUN DAN LUBARAGIÑE ARÜMAHEDÓN?
7, 8. a) Según 1 Tesalónikana 5:1-6, kaba awisahani híchiga alidihatiña ubouaguna? b) Ka uagu ábanbei lubéi iyeeni denchati?
7 Hariñaguba gürigia “lídanñein darangilaü luma achoururuni sun katei” lubaragiñe lachülürün luéyuri Heowá (aliiha huméi 1 Tesalónikana 5:1-6). Tidan 1 Tesalónikana 5:2, dimurei “weyu ligía” o luéyuri Heowá, layanuhaña luagu “óunwenbu asufuriruni” (Aruf. 7:14). Kei le aubei warihei, ídaame lagumesera óunwenbu asufuriruni? Ariñagatu Bíbülia lariñawagúba lan dimurei le ani ligíaba adüga lun liabin óunwenbu asufuriruni.
8 Hariñaguba alidihatiña ubouaguna anihein lan “darangilaü luma achoururuni”. Kábati uagu hariñagei? Ñéinbaña san alidihatiña relihión hadan? Másiñati. Gama lumoun ábayame iyeeni hámagiñeti máfianu dimurei le. Denchabei iyeeni le, lugundun ladügüba lun hafiñerun gürigia lídanñein lan achoururuni sun katei lubaragiñe laduurun óunwenbu asufuriruni le
úagilibei ubouagu. Ítara luba “liabin günringuaü hawagun sódini kei liabin agariduni tun würi dageinatu”. Kaba asusereda houn lubúeingu Heowá ha úaraguabaña? Kei le ibidiñe lubéi houn kaba lan dan liabin óunwenbu asufuriruni, gayaraati taweiridun hanigi luagu lasuseredun sun katei le, gama lumoun aranseñu haba.9. Ida luba lagünrinchaguni Heowá ubóu le lábugiñebei lubafu Satanási?
9 Furumiñe magumuchunbei Heowá sunsuinagubei lau ubóu le lábugiñebei lubafu Satanási, kei meha ladüga lidan lidaani Noé. Lidan ókaasion le, ladügüba bián fánreinti lau. Furumiñe, lagünrinchaguboun Babilónia to Wéiriboun, sun relihión to ubouaguboun to mama inarünitu. Lárigiñemeti, lídanme Arümahedón, ábanme lagumuchaguagüdüni Heowá ubóu le lábugiñebei lubafu Satanási, fánreinti le hani polítika, milidaru, luma burí bísinisi. Ariha wamá fiu ariñahani luagu katei le.
10. Según Arufudúni 17:1, 6, luma 18:24, ka uagu lagünrinchaguboun lubéi Heowá Babilónia to Wéiriboun?
10 “Tabeichún óunwenbu horu” (aliiha huméi Arufudúni 17:1, 6; 18:24). Dasei taali Babilónia to Wéiriboun liri Bungiu. Arufudahaaru iyeeni luagu Bungiu ani óuseratu kamá aban horu, ladüga íderagua taaña urúeigu ubouaguna. Yusu tumuti tubafu luma tilurudun hawagun tánigu. Ani wiyutaali hata saragu gürigia, haganagua añahein lubúeingu Bungiu (Aruf. 19:2). Ida luba lagumuchun Heowá tau Babilónia to Wéiriboun?
11. Katei san “mónsturu funati” ani ida luba layusuruni Bungiu lun lagünrinchagunu Babilónia to Wéiriboun?
11 Layusurubei Heowá “diisi ganchun” le luágubei “aban mónsturu funati” lun lagumuchun tau óunwenbu horu. Mini lan mónsturu ligía Óundaruni hani Néchani ani le diisi ganchu mini lan urúeigu ha íchugubaña ídemuei tun uguñe weyu. Danme labusenruni Bungiu ábame hábürühan urúeigu ha tuagu Babilónia, sun relihión to mama inarünitu. “Ábame hígirunu fuíwañu, surusu” ábame hagidaruni tirisin tuéi ani ayanuha hagíame luagu sun turiban (Aruf. 17:3, 16). Ladügüba tagünrinchawagun “lidan ábanmeme weyu” lun herederun tánigu wagañu, ladüga burí tariñagun: “Ñun niña ya kei aban urúei; mama nuguya aban hiñaru hilaali túmari, masufurirúnbadina giñe” (Aruf. 18:7, 8).
12. Kaba mígirun lan Heowá lun hadügüni néchanigu, ani ka uagu?
12 Mígirunbei Heowá lun hagumuchun néchanigu hau lubúeingu ladüga barǘ hamuti liri lau ugundani ani gaganbaditiña lun lugumadin lau hanurahan tídangiñe Babilónia to Wéiriboun (Adü. 15:16, 17; Aruf. 18:4). Ani áfaaguaaña lun híderagun amu anuraha tídangiñe. Ligíati mafanranbaña “lidan tabeichúniwa”. Íbini ítara lóuchawaguba hafiñen.
Meberesenga halíañanu lan lubúeingu Heowá hafiñeruba luagu danme le lábürühan Gogu hawagun. (Ariha huméi párafu 13). *
13. a) Ka san Gógubei? b) Según Esekiéli 38:2, 8, 9, kaba adüga lun lachülürün Gogu lidoun Arümahedón le ítarabei kamá hamuga aban fulasu?
13 Lábürühan Gogu hawagun lumutuniña Bungiu (aliiha huméi Esekiéli 38:2, 8, 9). Danme le gürinwaguaaru sun relihión mama inarünitu, ábame herederun lumutuniña Heowá rara kei aban tídibu wewe lárigiñe lásügürün aban lanarime liñawan dan. Chóuruti safagu luba lan Satanási. Ligíati, larufudubei ligañi lau laburuchaguagüdün dimurei hámagiñeti máfianu lun hábürühan néchanigu hawagu lubúeingu Heowá (Aruf. 16:13, 14). Wáwati houn Néchanigu ha ‘Gogu le Magogu’. Danme le hábürühan néchanigu ha hawagu lumutuniña Heowá, kamá hamuga chülühaña lidoun fulasu le gíribei Arümahedón (Aruf. 16:16).
14. Kaba katei lasubudira Gogu?
14 Luáguba “here wügüriña lemenigida” Gogu, mini lan le luáguba here milidaru lemenigida (2 Kro. 32:8). Ánheinti wagía luáguba Wabungiute Heowá wemenigida. Libidiouniganbei au le houn néchanigu. Lugundun aban meha gabafutu Babilónia to Wéiriboun, lau sun lira, míderagun hamutu tubungiutegu lun tesefurun luéi “Mónsturu” luma luéi “diisi liganchun” (Aruf. 17:16). Ligíati lafiñeruba lubéi Gogu ménrengunbei lan lun lagañeiruni wuribu. Ítara kei ladouragun dúeri lau ageiraü ítara luba lábürühan hawagun lumutuniña Heowá (Ese. 38:16). Lau lóufudagun ábame líchugun fe héiguaali lan tidoun aban sádara. Kei lasuseredun lun faraón lidan barana Funati, ábame líchugun fe luma lan Heowá lawuribuha (Afu. 14:1-4; Ese. 38:3, 4, 18, 21-23).
15. Kaba ladüga Hesusu lidan wuribu le gíribei Arümahedón?
Aruf. 19:11, 14, 15). Kaba asusereda lúntima meni lágani Heowá, Satanási, le lunbei lanügüniña néchanigu lidoun Arümahedón lau laburuchaguagüdün iyeeni? Hesusuba águrei lidoun fusu le mébehabei, le ñeinba lubéi ladaürei luagu milu irumu (Aruf. 20:1-3).
15 Lageindaguba Kristu úara hama lisudaranigu ha siélubaña haweigiñe lubúeingu Bungiu ani haburechawaguba lánigu Gogu (KABA WADÜGA LUN WASÜGÜRÜN LAU IBAGARI?
16. a) Ka lunbei wadügüni lun warufuduni subudi lan Bungiu woun? b) Kaba asusereda lidan Arümahedón houn ha subudibalin Heowá?
16 Barühadiwa lan yebe saragu o murusun dan hadan lumutuniña Heowá, lun gayara lan wásügürün lau ibagari lídangiñe Arümahedón lunti warufuduni subudi wamani Bungiu adüga wagíame “gasu lau uganu luáguti asalbaruni lúmagiñe Wabureme Hesusu” (2 Tesa. 1:7-9). Arufuda wamuti subudi wamani Bungiu dan le hínsiñe lan woun, dan le gaganbadi wamá lun luma dan le lúnrügü lan wáhuduragua (1 Huan 2:3-5; 5:3). Dan le larufuduni gürigia subudi lan Bungiu lun, “subudi lumuti Bungiu gürigia ligía keisi lánigu” ani lesefurubei lídangiñe Arümahedón (1 Ko. 8:3). Ka uagu? Dan le subudi lan gürigia ligía lun Bungiu “keisi lánigu” mini lan gunda lan Bungiu lau.
17. Ka mini lubéi gaganbadi lun “uganu luáguti asalbaruni lúmagiñe Wabureme Hesusu”?
17 Lidan “uganu luáguti asalbaruni lúmagiñe Wabureme Hesusu”, anihein sun inarüni le larufudahabei le wadarirubei tidan Bíbülia. Gaganbaditiwa lun dan le wawinwanduni. Mini lan le wíchuguni weseriwidun lun Heowá lidan furumiñe lúgaaru lidan wabagari, inebe ligía lilurudun woun luma lun wapurichihan luagu Larúeihan (Mat. 6:33; 24:14). Ani mosu giñe wíderaguniña kristiánugu anuadirúaaña lidan añahán lan etenira lun buligasion súdiniti le hadügübei (Mat. 25:31-40).
18. Ida luba hagiribudagüdüni líbirigu Kristu anuadirúaaña fulesei le hadügübei “amu mudún”?
18 Yarafa madise málühaña lubúeingu Bungiu anuadirúaaña agiribudagüdei fulesei le adüga Huan 10:16). Ida? Lubaragiñe lagumeserun wuribu lánina Arümahedón, ibihañame sun 144,000 ibagari sielu kei sífirigu móunwedaditiña. Hádangiñebaña lisudaranigu Bungiu ha siélubaña ha lúnbaña haburechaguniña lánigu Gogu ani hóunigirubaña “saragu gürigia” ǘnabugutiña ha ítarabaña kei mudún (Aruf. 2:26, 27; 7:9, 10). Wéiribei ugundani le lunbei hasandiruni “saragu gürigia” ladüga híderaguniña lubúeingu Heowá ha anuadirúaaña dan meha ya habéi ubouagu.
hamaalibei “amu mudún” houn lau híderaguniña (IDA LUBA ÚARAGUA WAMÁ EIBU AYARAFADEINA LAN LAGUMUCHAGÜLE UBOU LE?
19, 20. Íbini laganagua óuchawaguni, kaba íderaguawa lun úara wamá lidan ayarafadeina lan Arümahedón?
19 Lidan lagumuhóun dan hénrenguti le, saragu lubúeingu Heowá gagibuguatiwa luma óuchawaguni. Gama lumoun, gayaraati wawandun ani gunda wagíame (Sant. 1:2-4). Aban katei le lunbei líderaguniwa, lun mígirun wamani wafurieidun (Luk. 21:36). Ábaya katei, mosu waturiahanu Bíbülia sagü weyu luma lun wasaminarun luagu le waliihabei, kei burí lubuidun profesía le adimurehabei luagu wadaani (Sal. 77:12). Ánhawa adügei sun le ani adüga wameime sun wayaraati lun wapurichihan, derebugubei wafiñen ani mabulubudunbei wemenigin.
20 Samina wamá luagu ugundani le lunbei wawinwanduni danme le tagünrinchawagun Babilónia to Wéiriboun luma danme le lagumuchun Arümahedón. Ábaya katei súdiniti, lun wasaminarun luagu lanarime ugundani le lunbei wasandiruni danme le larumadahóun sunsuinagubei liri Bungiu luma liricha lun larúeihan (Ese. 38:23). Ligíati, chóuruti aban lan uganu buiti Arümahedón houn ha subudihabúbaña lun Bungiu, ha gaganbadibaña lun Liráü ani awanda hagía darí lagumuhóun (Mat. 24:13).
UREMU sn 32 Deregüdagu wamá lidan wafiñen!
^ par. 5 Barühadiwa wagía lubúeingu Heowá saragu irumu agurabahei liabin Arümahedón. Lidan arütíkulu le, wakutihabei ka lan Arümahedónbei, kaba lan asusereda lubaragiñe liabin lúmati kaba lan wadüga lun úaragua wamá lídanme ayarafadeina lan.
^ par. 71 LE ARIÑAWAGÚNBEI TUAGU IYAWAÜ. Danme le lasuseredun aban katei hanarimeti ani sódiniti geyegu wau, 1) wapurichihaba anhein gayara, 2) wasigiruba aturiahaboun Bíbülia luma 3) wasigiruba afiñera luagu lóunigirubadiwa lan Bungiu.
^ par. 85 LE ARIÑAWAGÚNBEI TUAGU IYAWAÜ. Fiu polisía hebeluruña hábiñoun aban iduheñu kristiánu, ha afiñebaña subudi lan lun Hesusu luma houn ánheligu le asuseredubei.