1. Ka gádanbalin apostolu Huan lidan lagumuchagüle furumiñeti sígulu?

LIDAN lagumuchagüle furumiñeti sígulu, aba ladunragun Huan luma aban sügǘ hénrenguti. Derebuguhali meha, ladaürǘña meha lidan aban ubouhu gíriti Pátümosu ani másiñati ligía lan lagumuhóun apostolu erederuti wínwanñu (Aruf. 1:9). Subudi lumuti meha añaha lan láganigu inarüni eyeedaña lílana burí damuriguaü ani hafanreinraguagüdüñanu. Gayaraati genege lan lagumuchagua lan meha damuriguaü kristiánu (Hud. 4; Aruf. 2:15, 20; 3:1, 17).

2. Según Arufudúni 7:9-14, ka lubuidun arufudúni larihibei Huan? (Ariha huméi dibuhu le luágubei tidáü garüdia).

² Labadinagua sun lénrengunga le, arihati Huan aban lubuidun arufudúni. Lidan arufudúni ligía arihati Huan fiu ánheligu eresibirei gumadi lun hágüdahani burí garabali gagünrinchaguaditi le lánina óunwenbu asufuriruni darime hibihini fiu lumutuniña Bungiu lagumuhóun seyu (Aruf. 7:1-3). Sétanu le hádangiñetiña 144,000 kristiánugu ha lúnbaña harúeihan luma Hesusu sielu (Luk. 12:32; Aruf. 7:4). Lárigiñe aban larihin Huan amu sétanu wéiriti darí lun lariñagun: “Aba narihin saragu gürigia lídangiñetiña sun fulasu, sun rasa, sun iñeñein luma néchani; rara haña ligibugiñe lálana arúeihani luma ligibugiñe Mudún. Gíbetiña gürigia hagía darí lun siñá lan habahüdǘn” (aliiha huméi Arufudúni 7:9-14). Chóuruti aba lan lasandirun ugundani lau larihin añaheinbaña lan saragu milu gürigia áhuduragua lun Heowá ámuñegü.

3. a) Ka uagu mosu lubéi lederebudagüdüni wafiñen arufudúni le larihibei Huan? b) Kaba wafurendeira lídangiñe arütíkulu le?

³ Chóuruti derebugüda lani arufudúni le lafiñen Huan. Lunti giñe lederebudagüdüni wafiñen saragu, lugundun lagunfuliruña arufudúni le lidan wadaani. Gefentiwa luagu hebeluruña lan saragu míñunu gürigia hamoun lumutuniña Heowá ha hemenigibaña  hásügürün wínwanñu lídangiñe óunwenbu asufuriruni luma lun hawinwandun lun súnwandan ya ubouagu. Lidan arütíkulu le, warihibei ida liña lan lasubudiragüdüni Heowá houn lumutuniña kei burí 80 irumu guentó kátaña lan saragu gürigia. Ani wakutihaba giñe bián katei luagu sétanu le: 1) liseisin luma 2) añahein lan sun hawuyeri gürigia lidan. Lederebudagüdübei saminaü le hafiñen sun ha agurabubaña hádangiñe hamá lubuidun sétanu le.

4. Ka úabei gunfuranda tan relihión to ariñaguboun tuougua kristiánu tan, ani ka hafiñerubei Aturiahatiña Bíbülia?

⁴ Marufudahantu relihión to mama inarünitu luagu ariñaga tan Bíbülia hawinwanduba lan gürigia ha gaganbadibaña ya ubouagu lun súnwandan (2 Ko. 4:3, 4). Uguñe weyu tiibe-agei relihión to ariñaguboun tuougua kristiánu tan arufudahatu sun lan nege gürigia ha buiti hagaburi hóudinba lan sielun danme le hounwen. Ánhañati aban sétanu kristiánugu ha aturiahabarun Bíbülia, ani ha afanreinhabarun garüdia to gíriboun uguñe weyu Garüdia Awisahatu afiñetiña meha amu katei lidan lagumuchagüle sígulu 19. Gunfuranda hamuti ladügübei lan Bungiu Ubóu ábame paraísu ani hawinwanduba lan saragu míñunu gürigia ha gaganbadibaña ya ubouagu, mama sielu. Íbini subudi hamani lira, lǘtiña lubá gunfuranda hamani furangu kátaña lan gürigia gaganbaditiña hagía (Mat. 6:10).

5. Ka hafiñerubei Aturiahatiña Bíbülia hawagun 144,000?

⁵ Inarüni gufuranda hamani giñe Aturiahatiña Bíbülia arufudaha tan Lererun Bungiu ñéinbaña lan fiu gürigia agañeinhouwarügütiña “hádangiñe ha ubouagubaña” (Aruf. 14:3). Añahein 144,000 kristiánugu anuadirúaaña lidan sétanu le ha eseriwidubaña lau ubebeni luma úaraguni lun Bungiu ya ubouagu. Gama lumoun kátaña san hádangiñebaña saragu gürigia?

6. Ka meha hasaminarubei Aturiahatiña Bíbülia hawagu saragu gürigia?

⁶ Ariha lumuti Huan sétanu le rara “ligibugiñe lálana arúeihani luma ligibugiñe Mudún” (Aruf. 7:9). Según dimurei burí le aba gunfuranda hamani Aturiahatiña Bíbülia siéluba lan hawinwanda saragu gürigia, ítara kei 144,000 Kristiánugu anuadirúaaña. Ánheinti siéluba lubéi hawinwanda bián sétanu ha, ida liña ámuñegueinarügü hamá hawariuagua? Según meha Aturiahatiña Bíbülia, ha hádangiñebaña saragu gürigia, kristiánugu ha meha lóuguabei haganbadi lun Bungiu dan meha le ya habéi ubouagu. Íbini harumaraü lan meha habagari murusunraü, másiñati añahein lan hádangiñe tílana meha relihión to ariñaguboun tuougua kristiánu tan. Le meha habusenrunbei Aturiahatiña Bíbülia hariñagun ua lan ubebeni hawagu gürigia ha lun gayara lan harúeihan luma Hesusu. Kei mederebugun lan ínsiñeni le hasandirubei luagu Bungiu, ligibugiñebaña meha lálana arúeihani, mañuurubaña meha luagu.

7. a) Según Aturiahatiña Bíbülia, kátaña lúnbaña hawinwandun ubouagu lidan Milu Irumu? b) Ka hasaminarubei Aturiahatiña Bíbülia hawagu wügüriña úaraguatiña ha lánina binadu dan?

⁷ Ligíati, kátaña lúnbaña hawinwandun ubouagu? Según Aturiahatiña Bíbülia, lárigiñeme houdin 144,000 hama saragu gürigia sielun, gachansinbaña saragu míñunu gürigia lun hawinwandun ubouagu luma lun heresibiruni abinirúni le lunbei lanügüni Larúeihan Kristu le lánina Milu Irumu. Masaminaruntiña meha aturiahatiña Bíbülia heseriwiduba lan gürigia ha lun Heowá lubaragiñe lagumeserun arúeihani le, le hasaminarubei larufudahóuba lan lugumadin Bungiu houn lidan Milu Irumu. Lárigiñeme ha adügübalin le lubeibei Bungiu ábame hawinwandun ya ubouagu lun sun dan, hati salufuribaña ábame hagünrinchawagun. Saminatiña meha giñe Aturiahatiña Bíbülia ha  lan lúnbaña herederun agumadiha ubouagu lidan Milu Irumu ligía hawinwanduba lan hádangiñe sielu lárigiñe lagumuchun Milu Irumu. Haganagua añaheinbaña “gürigia ha lánina binadu dan” ha lúnbaña háguyugun, lidan amu dimurei, gürigia ha úaraguabaña ha awinwandubaña lubaragiñe Kristu (Sal. 45:16).

8. Kátaña meha ǘrüwa sétanu ha uágubaña hasaminara Aturiahatiña Bíbülia?

⁸ Ítara liña hafiñerun Aturiahatiña Bíbülia añahein lan ǘrüwa sétanu: 1) san-bián-wein-gádürü-milu ha lúnbaña harúeihan luma Kristu sielu; 2) saragu gürigia kristiánugu ha múaragunbaña saragu, ha ligibugiñebaña lálana arúeihani luma ligibugiñe Mudún sielu, 3) saragu míñunu gürigia ha lúnbaña hafurendeirun luagu lugumadin Heowá ubouagu lidan Larúeihan Kristu le lánina Milu Irumu. * Gama lumoun, Heowá asubudirubalin kaba lan meha dan lafuranguagüdei inarüni luagu katei le houn lubúeingu (Ari. 4:18).

9. a) Ka mini lubéi herederun saragu gürigia “rara [...] ligibugiñe lálana arúeihani luma ligibugiñe Mudún” anhein yáñanu lubéi ubouagu? b) Ka uagu furangu lubéi lafuranguagüdüniwa lidan Arufudúni 7:9?

⁹ Lidan irumu 1935, aba gunfuranda hamani gefentiña luagu Heowá buidu kátaña lan hádangiñebaña saragu gürigia ha larihubaña Huan lidan arufudúni. Aba híchugun fe mama lan mosu houdin gürigia ha sielun lun gayara lan rara hamá “ligibugiñe lálana arúeihani luma ligibugiñe Mudún”, yúsuarügüti dimurei le kei hénpulu. Íbini ya lan ubouagu hawinwanda ha hádangiñebaña saragu gürigia, “rara haña ligibugiñe lálana arúeihani”, ladüga inebeti lubara Heowá houn kei Lurúeite sun ubóu ani ánhatiña lun (Isa. 66:1). Ani “rara haña [...] ligibugiñe Mudún”, ánhaña afiñera luagu lani Hesusu sákürifisiu. Daritiwa aban kesi lenege le lidan Matéu 25:31, 32. Ariñagati ñein: “Ábame hóundaragun gürigia ha lílana sun fulasu” íbini ha salufuribaña, ligibugiñe Hesusu luma ligibugiñe lala le wéirigubei. Furanguti, sun lan néchanigu ha ubouaguñanu, mama sielu. Furanguti lafuranguagüdüniwa katei le lidan irumu 1935. Afuranguagüdawati ka lan uagu mariñagun tubéi Bíbülia hóudiba lan saragu gürigia sielun. Hóunrügüñein aban sétanu gürigia füramasewa lan ibagari magumuchaditi sielu: houn 144,000 ha lúnbaña “hagumadihan ubouagu” luma Hesusu (Aruf. 5:10).

10. Ka uagu mosu lubéi hasubudiruni ha hádangiñebaña saragu gürigia lilurudun Heowá lubaragiñe Milu Irumu?

¹⁰ Lúmagiñe irumu 1935, gunfuranda wamani wagía gefentiña luagu Heowá saragu lan gürigia ha larihubaña Huan lidan arufudúni, kristiánugu lan ha úaraguabaña ha agurabubaña hawinwandun lun súnwandan ubouagu. Lun gayara lan hásügürün wínwanñu lídangiñe óunwenbu asufuriruni luma lun gayara lan “hibihin ubafu lun hawanduni sun burí katei le lunbei lasuseredun”, mosu hasubudiruni lugumadin Heowá luma lun harufuduni derebugu lan hafiñen lubaragiñe lagumeserun Larúeihan Kristu le lánina Milu Irumu (Luk. 21:34-36).

11. Ka uagu hasaminara hádangiñe Aturiahatiña Bíbülia añaheinbaña lan wügüriña úaraguatiña másiñati hóudiba lan sielu lárigiñe Milu Irumu?

¹¹ Kei buga warihini lidan párafu 7, añahein meha hádangiñe Aturiahatiña Bíbülia afiñetiña meha añaheinbaña lan wügüriña úaraguatiña ñüdün sielun lárigiñe lagumuchun Milu Irumu. Ka uagu hasaminara ítara? Akutihóuati katei le tidan garüdia to wasubudiruboun uguñe weyu kei Garüdia Awisahatu, to lánina 15 lidan bián-hati, irumu 1913. Anihán lébunabei hasaminarubei ítara: anhein hóudiba lubéi kristiánugu ha maganbadiraübaña sielun, ka uagu yáarügüba lubéi ubouagu hawinwanda wügüriña úaraguatiña  ha lánina binadu dan? Furanguti chará lan ligaburi saminaü le, luagu bián katei: 1) hawinwanduba lan saragu gürigia sielu, 2) ha lan hádangiñebaña saragu gürigia kristiánugu ha úabei úaragu hamá saragu.

12, 13. Ka hasubudirubei kristiánugu anuadirúaaña ítara kei saragu gürigia luáguti hafayeiruaha?

¹² Gama lumoun, kei le aubei warihei, lúmagiñe irumu 1935, wagía gefentiña uagu Heowá gunfuranda wamuti buidu ha lan lúnbaña hásügürün wínwanñu lídangiñe Arümahedón, saragu gürigia ha larihubaña Huan lidan arufudúni. Hagíaba ásügüra “luéigiñe óunwenbu asufuriruni” ya ubouagu ani hagúarahaba lau umalali héreti “lúmagiñe Wabungiute, le ñunbei luagu lálana arúeihani, luma lúmagiñe Mudún, liabin wasalbarun” (Aruf. 7:10, 14). Ani ariñagatu giñe Bíbülia gürigia lan ha lúnbaña háguyugun sielun resibi hamá “aban katei buítimati” sügǘ haméi wügüriña úaraguatiña ha lánina binadu dan (Ebü. 11:40). Ínchaha lumutiña iseri ariñahani le íbirigu lun hagunbirahaniña gürigia lau ubebeni lun heseriwidun lun Heowá lau emenigini lun hawinwandun lun súnwandan ya ubouagu.

¹³ Gúndaagüda lumutiña emenigini le ha hádangiñebaña saragu gürigia. Gufuranda hamuti luagu Heowá lan anúadirubalin halíaba lan heseriwida lubúeingu ha úaraguabaña anhein sielu lubéi o ubouagu lan. Dandu kristiánugu anuadirúaaña kei saragu gürigia subudi hamuti afayeiruahaü lan le lubéi heresibiruni ladüga lan lareini Heowá houn ani arufuda lumuti lau lóunahani Hesukrístu kei wesefuragüle (Rom. 3:24).

14. Ka uagu hálügüdagua saragu íbirigu houngua lárigiñe irumu 1935 ida luba lan lagunfulirun profesía hawaguti saragu gürigia?

¹⁴ Lárigiñe lafuranguagüdüniwa katei le lidan irumu 1935 hawagu saragu gürigia, saragu hádangiñe íbirigu aban hálügüdagun houngua ida luba lan hagibedagun kristiánugu ha hemenigibaña hawinwandun lun súnwandan ya ubouagu. Kei hénpulu, haritagua láagili Ronald Parkin, dan meha le duusu lubéi irumu lau, dan le lafuranguagüdüniwa kátaña lan saragu gürigia, ariñagati: “Añahein meha 56,000 apurichihatiña lidan sun ubóu ani gíbetiña, másiñati saragu lan hádangiñe kristiánugu meha anuadirúaaña. Ítara genegeti meha lougua hamá ha hádangiñebaña saragu gürigia”.

15. Afuranguagüda huméi ida liña lan aganwoundeina hamá saragu gürigia?

¹⁵ Lidan burí irumu le asigirubei aba burí hóunahoun misionerugu lidoun saragu ageiraü, ligía merederun lubéi haganwoundun gefentiña luagu Heowá. Lidan irumu 1968, aba lagumeserun aban programa lánina taturiahoun  Bíbülia tau líburu La verdad que lleva a vida eterna. Ménrengunti ligaburi tafuranguagüdüni líburu to inarüni le tídanbei Bíbülia ani achawaha lumutiña saragu gürigia ha haruma tanigi sügǘ luéi amu dan. Lidan gádürü irumu badiseitiña hóugiñe 500,000 iseri disipulugu. Badiseitiña aban míñunu dan le tagumeserunbei ligilisi katolika eferidirei tubafu América Latina luma lidan amu burí ageiraü luma dan le lerederunbei wéibaahoun lidan oubaü le ñéingiñe lubéi laboucha weyu libiti Yuropa luma fiu fulasu Áfürika (Isa. 60:22). Lidan burí irumu le, adügaaru lóundarun Heowá saragu agumeiraguagüdüni lun tíderaguniña gürigia asubudirei ariñahani le tídanbei Bíbülia. Chóuruti hóundarawaguña lan saragu gürigia, hóugiñeñanu widü míñunu guentó.

16. Halíagiñe háfurida saragu gürigia?

¹⁶ Lidan arufudúni le larihibei Huan arihati lídangiñetiña lan “sun fulasu, sun rasa, sun iñeñein luma néchani” saragu gürigia. Ariñagati giñe profeta Sakaríasi aban katei líbeina lira. Abürühati: “Lídanme dan ligía, hárügüdübei diisi terencha ha lílana líbiri burí fulasu aban huríu tuéigiñe ladaüragun, hariñagame lun: ‘Busentiwa woudin huma, ladüga aganbatiwa luagu anihein lan Bungiu huma!’” (Sak. 8:23).

17. Ka adügǘbei lun híderawagun gürigia ha lídangiñetiña sun néchani luma iñeñein?

 ¹⁷ Subudi wamuti wagía gefentiña luagu Heowá, lun lan gayara lan hóundarawagun gürigia lídangiñetiña sun iñeñein, mosu lapurichihóun uganu buiti lidan saragu iñeñein. Ligía barühadiwa lubéi lóugiñe 130 irumu ásügüragüda agumeiraguagüdüni tídangiñetu Bíbülia lidoun amu iñeñein. Ani guentó wadügüña aban dasi le wéiritimabei, wásügüragüdüña ariñahani tídangiñeti Bíbülia lidan saragu iñeñein. Furanguti ladügüña lan Heowá aban milaguru: lóundaraguagüdüña saragu gürigia ha lídangiñetiña saragu néchani. Kei anihein lubéi ariñahani tídangiñeti Bíbülia lidan saragu iñeñein, heseriwiduña ámuñegueinarügü gürigia lun Heowá lidan aban. Subudiwatiña Gefentiña lau hapurichihan lau ubebeni luma lau hínsiñegua hamá hámagua keisi íbirigu. Ma inarüni adüga lan sun katei le lun lederebugudun wafiñen? (Mat. 24:14; Huan 13:35).

18. a) Según Isaíasi 46:10, 11, ka uagu maweiridun tubéi wanigi luagu lagunfuliruni Heowá profesía hawagu saragu gürigia? b) Ka uagu masandiragun habéi ha agurabubaña hawinwandun ya ubouagu ni kata hamá?

¹⁸ Gíbeti lébuna lun wagundaarun lau profesía le. Maweirintu wanigi lau lagunfuliruni Heowá lidan aban igaburi hanarimeti (aliiha huméi Isaíasi 46:10, 11). Seremei hamuti saragu gürigia Bungiu lau lubuidun emenigini le. Masandiraguntiña houngua kamá le ni kátañanu ladügarügü manúadirun lániña Heowá lau lani sífiri lun heseriwidun luma Hesusu sielu. Adimurehatu Bíbülia hawagu wügüriña hama würiña úaraguatiña ha meha ladundehabaña sífiri sandu gama lumoun mafarantiña hama 144,000, kei burí Huan le Abadiseihabei luma Dawidi (Mat. 11:11; Adü. 2:34). Háguyuguba gürigia ha lidan Paraísu ya ubouagu ítara kei saragu. Sun hagía, úara hama saragu gürigia, gachansinbaña lun harufuduni úaragua hamá lun Heowá luma lun liricha lun larúeiha.

19. Anhein gunfuranda wabalin arufudúni le larihibei Huan hawagu saragu gürigia, kaba wadüga?

¹⁹ Masuseredunñahagili lun lóundaragun Heowá míñunu gürigia ha lídangiñetiña saragu néchani lun háhuduragun lun. Dandu anhein aguraba wabéi wawinwandun sielu o ya lan ubouagu, lunti wíderaguniña saragu gürigia ha wayaraatiña lun hádangiñe hamá “amu mudún” (Huan 10:16). Yarafa madise, ladügün Heowá lun ñein lan óunwenbu asufuriruni le lunbei lagumuchun hau gumadimatiña luma tau relihión to adügüboun lun hasufurirun gürigia. Sun ha hádangiñebaña saragu gürigia gachansinbaña lun hagundaarun: lun heseriwidun lun Heowá ya ubouagu lun sun dan (Aruf. 7:14).