1. Afuranguagüda huméi ka lan lasandirubei Heowá hawagu gürigia ǘnabugutiña?

HÍNSIÑETIÑA gürigia ǘnabugutiña lun Heowá. Gürigiarügübaña ha arufudubaña aban ǘnabuguni inarüniti gayara gamadagua hamá luma ani hínsiñetiña lun. Ánhañati ha “barüguabaña houngua” magundanti Bungiu hau (1 Fe. 5:5). Sun wagía busentiwa wagundaaragüdüni Bungiu luma lun wasandiruni línsiñehabu, ligíati gébunati lun wafurendeirun arufuda ǘnabuguni.

2. Kaba wakutiha lidan arütíkulu le?

² Lidan arütíkulu le, wakutihabei lóunabagüle ǘrüwa álügüdahani le. 1) Ka mini lubéi ǘnabuguni? 2) Ka uagu lunti lubéi gagaburi wamani igaburi le? 3) Ka sügǘ gayaraabei ladügün lun lóuchawagun ǘnabuguni le wawagubei? Warihibei dan le lan, ǘnabugu wamá gúndagüda wamuti Heowá ani buiti giñe lidin woun (Ari. 27:11; Isa. 48:17).

3. Ka mini lubéi ǘnabuguni?

³ Gürigia le ǘnabugubei manaagunti lungua mapantan ligía. Arufuda tumuti Bíbülia gunfuranda lani gürigia le ǘnabugubei íñutima lan Heowá luéi ani gufuranda lumuti giñe buidu hamá amu luéi lidan somu katei (Fili. 2:3, 4).

4, 5. Ka uagu gayara lubéi wariñagun mama lan luagu ligaburi harihín gürigia lun ǘnabugu hamá?

⁴ Añahein gürigia aba hafamurun ǘnabugu hamá. Háfuga haburitiña ani óusera hamutiña gürigia ha amu lau inebesei luma lau ínsiñehabuni ladüga ítara liña lan harasan o ligaburi  hagüriarún. Gama lumoun, gayaraati anihein lan pantaü tidan hanigi. Mama uguñe ni haruga harufudubei káteitimañanu lan (Luk. 6:45).

⁵ Luagu amu oubaü, gürigia ha chóurubei hasandiragun houngua o ha furangutiña mama mosu wasaminarun hawagu panta hamá (Huan 1:46, 47). Íbini gürigia ha chubalugubaña lunti hóunigiragun houngua luéi hafiñerun saragu luagu igaburi le hawagubei. Meberesenga ka lan igaburi wawagubei, sun wagía mosu wáfaagun lun ǘnabugu wamá tídangiñe sun wanigi.

6. Según le bürüwañubei lidan 1 Korintuna 15:10, ka wafurendeirubei lúmagiñe apostolu Pábulu?

⁶ Ariha waméi le asuseredubei lun apostolu Pábulu. Yusu lumuti Heowá lun ladararun iseri damuriguaü lidan burí saragu fulasu. Gayaraati ua lan ni aban lani Hesukrístu apostolu adügüti saragu kei Pábulu lidan lani ministeriu. Lau sun lira, masandiragunti Pábulu lungua iñu lan hawéi líbirigu, ariñagati lau ǘnabuguni: “Au [...] ni kátatimabei hadan apostolugu; madünatina ni lun nanügǘn keisi apostolu, lugundun éibaaha numutiña meha tílana liligilisin Bungiu” (1 Ko. 15:9). Lárigiñe aba lariñagun luagu aban lan lumada Heowá ligía ladüga larufudun Heowá areini lun, mama ladüga espechali lan o ladüga ibihaali lan ladügün saragu katei (aliiha huméi 1 Korintuna 15:10). Chóuruti, arufuda lan lau ligaburi, ǘnabuguni houn korintuna dan le labürühabei houn, subudiñu lun luagu ayanuha hamá hádangiñe wuriba luagu (2 Ko. 10:10).

7. Ida liña larufudun aban íbiri subudiwati lidan wadaani ǘnabuguni?

⁷ Saragu Gefentiña íderagua laaña haliihani sügǘ luáguti libagari íbiri Karl Klein, aban meha hádangiñe lílana Musu Úaraguati. Lidan le labahüdagubei subudigüda lumuti lau ǘnabuguni fiu lídangiñe lituróbulin luma lidebilin le úmabei lageindagua luagu saragu  irumu. Ariha wamá fiu lídangiñe. Lidan burí irumu 1920 aban láfuridun apurichiha luagu furumiñeti wéiyaasu tidan burí muna, hanarimeti larihin hénrengu lan darí lun máfuridunhali lan luagu bián irumu. Dan lárigiñe dan le Betelirugu haali, aba lagañidun luagu aban dan luma aban íbiri ladüga lererehan lun. Aba giñe ladagarun lueirin íruni luma idiheri luagu, le ídangiñebei lareidagua murusun dan lárigiñe. Gama lumoun, ibihati saragu lubuidun buligasion. Ma inarüni ǘnabugu lan íbiri subudiwati le lau lasubudiruni ka lan lidebilinbei? Saragu lubúeingu Heowá aritagua hamagili íbiri Klein lau saragu ínsiñehabuni luma sügǘ luáguti libagari. *

8. Ida liña líderaguniwa 1 Féduru 5:6 lun warihini hínsiñe lan ǘnabuguni lun Heowá?

⁸ Resun le súdinitimabei lun ǘnabugu wamá ladüga ligía lan hínsiñebei lun Heowá, ítara kei lafuranguagüdüni apostolu Féduru (aliiha huméi 1 Féduru 5:6). Ariñagatu líburu “Ven, sé mi seguidor” luagu dimurei le: “Péisiniti pantaü ani gagünrinchaguaditi. Hanarimeti lubafu darí lun larihini Bungiu gürigia le gagaburibalin igaburi le ani gayaraaguati lungua kei aban gürigia le meseriwínti lun ni kata. Ánheinti gürigia le ǘnabugubei wéiriti lebegi lun Heowá íbini le ñǘraütimabei o le arihúbei kei ni kata”. Ani ariñagatu líburu to líchuguba lan Bungiu “wafayeiruaha ánhawa giñe arufudei igaburi le”. * Chóuruti úara wamá ua lan ni kata buídutimati kei wagundaraguagüdüni Heowá (Ari. 23:15).

9. Ka uagu hínsiñe lubéi houn gürigia herederun harugabu gürigia ǘnabugutiña?

⁹ Amu luéi wagundaaragüdüni Heowá, ánhawa ǘnabugu, buídubei ladüga woun. Achawaha lumutiña ǘnabuguni gürigia wawagun. Lun gunfuranda wamani ka lan uéigiñe lasusereda le, samina wamá ka lan uma hawuyeri gürigia wabusenra werederun (Mat. 7:12). Ma inarüni mésebe wamá harugabu gürigia ha busenbaña hadügüni le habusenrun súnwandan ani mabuseruntiña lun lererehan ni aban houn? Ánheinti dan le hámañadiwa lan íbirigu ha arufudubaña ínsiñeni, gudemehabu, areiduni luma ǘnabuguni, buiti wasandiragun woungua (1 Fe. 3:8). Ligíati, anhein ítara liña lubéi wasandiragun woungua, richati wasaminarun hasandiraguba lan amu houngua buidu ánhawa ǘnabugu.

10. Ida liña líderaguniwa ǘnabuguni lun wagagibudagun luma lénrengunga lidan ibagari?

¹⁰ Íderagua lumutiwa ǘnabuguni lun wagagibudagun luma lénrengunga lidan ibagari. Ani  kamaniti anihein lan katei le genegeti woun maricha lan o mabuidun lan. Ariñaga lumuti meha urúei Salomón katei le: “Arihaadina burí idamuni luagu gabayu, ánhaña burí harahüñü urúei eibu kamá hamuga idamuni hagía” (Apur. 10:7). Mama súnwandan lichugún uéiriguni houn gürigia ha gíbeti hayara, ani anihein dan rúwatimaati uéiriguni houn ha míbeti hayara. Gunfuranda lumuti Salomón le lan buídubei, wánharun lun gádantiwa mama lun wadiheridun luagu katei le mabuidunbei (Apur. 6:9). Ánhawa ǘnabugu ménrengunbei woun wánharun lun gádantiwa, mama lun wasaminarun buídutimabei lan hamuga katei.

11. Ka uagu mégeiwa lubéi lun ǘnabugu wamá dan le lererehóun woun?

¹¹ Sagü weyu, gachansin wamá lun warufudun ǘnabuguni. Ariha wamá fiu. Dan le lererehóun woun. Lunti waritaguni anhein lererehaña lubéi somu gürigia woun, másiñati weiri lan wachara sügǘ luéi le wasaminarubei. Lidan burí kesi le, furumiñe, másiñati wamaharun lun ídemuei le ichugúbei woun. Háfuga wadimureha wuriba luagu gürigia le álugubei líderaguniwa o wayanuhan luagu ida liña lan layanuhan woun. Gama lumoun, ánhawa ǘnabugu wáfaaguba lun wasansiruni wagaburi.

12. Según Ariñawagúni 27:5, 6, ka uagu lunti lubéi geteingiradi wamá dan le lererehan somu íbiri woun? Ru humá aban hénpulu.

¹² Gürigia le ǘnabuguti ruti seremei luagu adundehani le ichugúbei lun. Samina wamá luagu sügǘ le. Samina wamá tídanñadiwa lan Luban Adamuridaguni ayanuha hama fiu íbirigu. Aba ladireirun aban hádangiñe wau ani aba lariñagun woun wábuguarügü anihein lan life éigini luagu wari. Chóuruti, líchuguba lan busiganu woun. Gama lumoun seremei wabéi luagu lariñaguni woun. Gúndaatimabadiwa hamuga lun hamuga binarü lan lariñawagúa woun. Ligíati, mosu geteingiradi wamá lau ǘnabuguni lau ganigi lan aban íbiri lererehan woun dan le wemegeiruni. Mariha waméi kei aban ágani, kamá hamuga mínsiñetiwa lun, ariha waméi kei aban umadaü le hínsiñehabuti woun (aliiha huméi Ariñawagúni 27:5, 6; Gal. 4:16).

13. Ida luba warufudun ǘnabuguni dan le heresibirun amu íbirigu buligasion lidan heseriwidun?

¹³ Dan le leresibirun aban íbiri buligasion lidan leseriwidun. Ariñagati aban íbiri wéiyaali lidan afiñeni gíriti Jason: “Dan le narihin lichugún aban buligasion lun aban íbiri, anihein dan aba nálügüdagun nungua ka lan uagu mama lubéi nun híchigei”. Sandiguañahadün san hungua ítara? Maribanti wáfaagun lun waganwoundagüdüni weseriwidun lun Heowá  (1 Tim. 3:1). Gama lumoun, lunti wóunigiragun woungua luéi le wasaminarubei, lugundun gayaraati láhüchün pantaü tidan wanigi. Kei hénpulu, gayaraati lasaminarun aban kristiánu ligíarügüñein lan gayara letenirun lun aban buligasion. O másiñati tasaminarun aban íbiri buídutima lan tani weiriei lun ladügüni dasi le ladügübei amu íbiri. Ánhawa ǘnabugu le tímatimaati, masaminarungunbei báadiwa ítara.

14. Ka wafurendeirubei luagu ligaburi lóunabun Moisesi dan le heresibirun amu buligasion?

¹⁴ Ariha waméi ida liña lan lóunabun Moisesi dan le heresibirun amu gürigia buligasion luma kaba lan wafurendeira lídangiñe. Gebegiti meha dasi le lúmabei lun keisi alidihati néchani. Ida liña lóunabun Moisesi dan le lígirunbei Heowá lun híderaguni amu gürigia lidan wadagimanu le? Magañidunti (1 Lur. 11:24-29). Arufudati giñe ǘnabuguni dan le lígirunbei lun híderaguni amu aguseragüda (Afu. 18:13-24). Hau saragu aguseragüdütiña, fureseti meha laransehóun turobuli ani mama meha mosu hagurabahan ísüraelina saragu. Súdinitimatiña meha lumutuniña Bungiu lun Moisesi sügǘ lau lani buligasion. Ma aban hénpulu le woun? Haritagua waméi anhein busén wabéi lun hu wamá lun Heowá, súdinitimati ǘnabugu wamá sügǘ luéi iyarani le wawagubei. Kei le bürüwañubei lidan Sálumu 138:6, “lau sun íñuñein lan Aburemei, arihati hawagun gürigia ha gudemebaña,”

15. Ka asansiruni úmabei hagagibudagua saragu íbirigu?

¹⁵ Dan le lasansirun gádantiwa. Málügili lúmagiñe hasansirún saragu íbirigu lídangiñe dasi le meha hadügübei luagu saragu irumu. Kei hénpulu, lidan irumu 2014, aban hagunbirahóun óunigirutiña distritu tuma hani weiriou lun heseriwidun lidan amu dasi lidan dan dayarüti. Lídanmeme irumu ligía, aban meseriwidunhaña lan lidan lóunigirun sirkuitu, íbirigu ha agunfulirubaña 70 irumu. Luagu amu oubaü dan le hagunfulirun íbirigu 80 irumu o lóugiñe meseriwidunhaña lidan dasi lánina harihin  lau hawadigimari ha híbiri wéiyaaña lidan afiñeni. Ani lidan burí irumu le sügühalibei agunbirahouwatiña íbirigu ha eseriwidubaña tidan Beteli lun heseriwidun kei prekursoru. Añahein amu íbirigu mosu hígiruni heseriwidun lidan dan dayarüti lun hetenirun houn haduheñu o ladüga luriban hátuadi luma ladüga amu burí katei.

16. Ida liña harufudun fiu wíbirigu ǘnabuguni?

¹⁶ Le linarün aban katei, hénrenguti asansiruni le houn saragu íbirigu. Saragu hádangiñe aba hasandirun saragu íruni, ladüga meseriwidunhaña lan lidan dasi le ñein lubéi meha heseriwida luagu saragu irumu ani hínsiñeti meha houn. Añahein hádangiñe lau lásügürün dan aba héchudun. Ka uagu? Ladüga ínsiñeni le hasandirubei luagu Heowá. Furanguti meha houn derege hamaali lan habagari lun Bungiu, mama lun aban dasi ni lun aban iri (Kol. 3:23). Gúndaatiña lau heseriwidun lun Heowá lidan furumiñeguarügü dasi le ichugúbei houn. Ígira hamuti “sun katei lun Bungiu”, lugundun lóunigiruñanu lan le tímatimaati (1 Fe. 5:6, 7).

17. Ka uéigiñe seremei wabarun Lererun Bungiu lau tadundehaniwa lun ǘnabugu wamá?

¹⁷ Chóuruti seremei wamanu Lererun Bungiu lau tadundehaniwa lun ǘnabugu wamá. Lahuuduba dandu woun kei houn amu ǘnabugu wamá. Seremei lun lubuidun igaburi le, gayaraabei wagagibudagun buidu luma lénrengunga le lídanbei ibagari ani ligibuagu sun katei wayarafadatimaba lun Wáguchi le siélubei. Ma wagundan wasubudiruni Heowá lan “Íñugutimabei” ani le Wéirigutimabei, íbini ítara, hínsiñetiña ani gebegitiña lubúeingu ha ǘnabugubaña lun (Isa. 57:15).