Lugundun adügati Apurichihati 5:8 lun wasaminarun, ladüga ariñagati: “Maweiridatá banigi ánhabu ariha lamudirawagun aban gudemeti lidan somu fulasu, adügǘwa ligía anarimeni luma irichaü ñein, lugundun anihein aban úfisi íñutimati lóugiñe aban úfisi íñuti, añahein giñe úfisigu íñutimatiña hóugiñe biángubei hagía”.

Según warihini wagía gürigia bérusu le, laganóun layanuhaña lan hawagu ha gumadimatiña ha gabafubaña. Ánhawa arihei bérusu le buidu buidu ariñagati giñe aban inarüni woun luagu Heowá Bungiu le íchugubei gurasu luma darangilaü.

Ariñagati Apurichihati 5:8 luagu aban gumadimati le óuserubaliña gudemetiña lau marichaü. Lunti hamuga laritaguni wügüri le, másiñati lan anihein lan somu gumadimati le íñuti lubara o le gabafutimabei sügǘ lau arihei le ladügübei. Gayaraati giñe añahein hamá amu íñutimaati habara ani gabafutimatiña. Híruti lidan lan harúeihan wügüriña gayaraati lasuseredun sun lan gumadimatiña burí ha, mabusigari hamá ani mosu hasufuriruni gürigia le hadügübei.

Gama lumoun, íbini genege lan hiru lan sügǘ burí le, ruti gurasu woun wasubudiruni aríagu liña lan Heowá lun sun katei, íbini houn gumadimatiña ha íñubei habara. Gayaraati wayumuragun lun Bungiu lun líderaguniwa anügei wadiheri (Sal. 55:22; Fili. 4:6, 7). Subudi wamuti: “Aríagu liña Wabungiute lun sun le asuseredubei lidan sun ubóu, lun líchugun erei houn ha hemenigibaña luagu le tímatimaati” (2 Kro. 16:9).

Ligíati, inarüni dimurei le lídanbei Apurichihati 5:8 le ariñagubei: súnwandan anihein lan gabafutimati lidan harúeihan gürigia. Létima súdinibei, haritaguagüda lumutiwa lan bérusu le Heowá lan íñutimabei ani ligía gabafutimabei ligibuagun sun ubóu luma sielu. Ani guentó, larúeihaña lau layusuruni Hesukrístu le Liráü, le Urúei lidan Larúeiha Bungiu. Suntigabafu le arihibalin sun katei, richati sunsuinagubei, ani ítara liña giñe Lisaani.