1. Ida liña tíderaguniña lóundarun Heowá wíbirigu würiña, ani ka turobuli úmabei hagagibudagua saragu hádangiñe? (Ariha humoun iyawaü to luáguboun tidáü Garüdia).

WÉIRITI wagundan añahein lan saragu íbirigu würiña lidan damuriguaü ha benefatiña. Rútiña óunabagülei lidan damuriguaü, furitiña apurichiha ani arufudatiña berese hama hawagu hábirigu. Lanwoun lira, ídehatiña giñe lidan taransehóun Luba Adamuridaguni. Lau sun lira, gagibuguatiña giñe luma turobuli. Añahein hádangiñe hóunigiruñanu hagübürigu. Hádangiñe, hawanduñein luriban houserún hadan haduheñu. Ha híbiri hagüriahañanu hasaanigu hábugua ani mosu háfaagun lun híchuguni le hemegeirubei houn.

2. Ka uagu lunti lubéi wáfaagun lun wíderaguniña wíbirigu würiña?

² Ka uagu lunti lubéi wáfaagun lun wíderaguniña wíbirigu würiña? Ladüga móuserun lumutiña ubóu würiña lau inebesei le yuubei houn. Gama lumoun, ariñagatu Bíbülia lun wíderagun wámagua. Kei hénpulu, ariñagati apostolu Pábulu lun damuriguaü le meha Rómabei lun heresibirunu Febe lau ugundani luma giñe lun híderagunu lidan le temegeirubei (Rom. 16:1, 2). Sun meha dan le fariséu lubéi Pábulu, lídanñein meha aban échuni le óuserubaliña würiña kei ni kata. Gama lumoun, dan le ladügagubei lungua kristiánume, aba láyeihani ligaburi Hesusu ani óusera lumutiña würiña lau areini luma inebesei (1 Ko. 11:1).

3. Ida liña lóuseruniña Hesusu würiña ani ka lasandirubei hawagu würiña ha adügübalin lugundan Bungiu?

³ Óusera lumutiña meha Hesusu sun würiña lau inebesei (Huan 4:27). Mítaranti meha kei alidihatiña relihión ha lídanbaña lidaani. Ariñagatu aban enciclopedia to ayanuhaboun tuagu Bíbülia: “Úati ni aban dimurei le lariñagubei Hesusu lun lǘnabudagüdüniña würiña”. Sandirügüti aban lanarime ínsiñeni hawagun würiña ha adügübalin lugundan Lúguchi. Arihúati ítara liña lan dan le líriduniña  würiña úara hama wügüriña ha lanügübaña keisi líbirigu (Mat. 12:50).

4. Kaba wakutiha lidan arütíkulu le?

⁴ Aranseñu liña meha Hesusu súnwandan lun líderaguniña íbirigu würiña. Gebegitiña meha giñe lun ani ayanuhati luéigiñe hafulesein. Akutiha waméi ida luba lan wáyeihani Hesusu lidan ligaburi lóuseruniña íbirigu würiña.

5. Ka uagu hénrengu lubéi lun hásügürün fiu íbirigu würiña dan hama amu?

⁵ Meberesenga anhein wügüriña wabéi o würiña lan, sun wagía mégeitiwa lun wásügürün dan hama amu gürigia. Gama lumoun, hénrenguti katei le houn fiu íbirigu würiña. Ka uagu hénrengu lubéi? Ariha waméi. Ariñagatu aban íbiri gíritu Judith *: “Kei le mamarieidungidina lan, anihein dan sandiguatina nungua mabara nan lidan damuriguaü, ábati nasandiragun nungua nábuguarügüñadina lan”. Ariñagatu Pérüla aban prekursora to águyuboun lidoun amu fulasu lun taganwoundagüdüni teseriwidun: “Gayaraati basandiragun bungua bábuguarügüñadibu lan dan le sun liña bachülürün lidoun aban damuriguaü”. Luagu le aban oubaü, ha awinwandubaña hama iduheñu ha mama gefentiña, gayaraati hasandiragun houngua hábuguarügüñanu lan dandu hadan haduheñu kei hadan íbirigu. Añahein giñe ha sandiguatiña houngua hábuguarügüñanu lan ladüga siñá lan háfuridun hábiñegiñe ladüga hasandi o ladüga hóunigiruña lan somu haduhe le sándibei. Ariñagatu aban íbiri gíritu Janet: “Kei nuguya lántima óunigirubarun núguchu, siñati meha nánharun dan le nagunbirahóun”.

6. Según Lúkasi 10:38-42 Ida liña líderagunu Hesusu Marta tuma María?

⁶ Sügüti meha Hesusu dan hama íbirigu würiña ani aban meha umadaü inarüniti houn. Samina wamá luagun umadagu le lánibei Hesusu tuma María tau Marta, ani genegeti meha mamarieidungiña lan würiña ha (aliiha huméi Lúkasi 10:38-42). Furanguti adüga lan ligaburi layanuhan hama luma ligaburi lóuseruniña lun buidu lan hasandiragun houngua. Sandiguatu meha María tungua lau ichouruni lun tañuurun lurugabu lugudi Hesusu lun tafurendeirun lúmagiñe. * Manufudetu meha Marta lun tariñaguni lun Hesusu furangu gañi tan ladüga míderagutanu María. Yusu lumuti Hesusu dan le lásügürübei hama lun larufudahan fiu katei súdiniti houn. Arufuda lumuti giñe berese lan hau luma lau Lásaru le hábiri dan burí le labisidahabaliña (Huan 12:1-3). Maweiriduntu wanigi dan le lan lasandirubei Lásaru, manufudetu María tuma Marta lun hamuriahan ídemuei luma Hesusu (Huan 11:3, 5).

7. Ida luba wíchugun dǘgüdaguaü houn wíbirigu würiña?

⁷ Lídantima adamuridaguni harihaña fiu kristiánugu würiña hábirigu. Ligíati, busentiwa wasagarun buiti lídangiñe chansi le lun wíchugun aban buiti achülürüni houn, wayanuha hama luma lun warufuduni houn berese wamá hau. Ariñagatu Judith to buga uáguboun wayanuha: “Hínsiñeti nun lun hariñagun nun buidu lan nadüga dan le níchugun óunabagülei lidan damuriguaü, dan le giñe hadügün aransehani numa lun apurichihani o harufudun lidan amu igaburi berese hama nau”. Adüga wamá lun hasandirun íbirigu würiña berese wamá hau. Ariñagatu aban íbiri gíriti Karina: “Anhein neferidira aban adamuridaguni, subuditi nun hábürühaba lan íbirigu nun luéigiñe gágamuru lun harihin ida niña lan. Arufudati lira nun berese hama lílana damuriguaü nau”.

8. Ka amu burí igaburi gayaraabei wáyeihani lúmagiñe Hesusu?

⁸ Adüga wamá kei Hesusu ani sagá wamá dan  lun wayanuhan hamá wíbirigu würiña. Másiñati gayara lan wagunbirahaniña wábiñoun lun heigin wamá o lun wayanuha. Yusu waméi dan le lun wayanuha hama luagu katei le ruti dǘgüdaguaü (Rom. 1:11, 12). Súdiniti lun háyeihani wéiyaaña lidan afiñeni ligaburi Hesusu. Subudi lumuti meha Hesusu hénrengu lan meha houn fiu íbirigu lun herederun mamarieidunga. Afuranguagüda lumuti mama lan ladüga maríei lan gürigia ni gasaanigu lan lun gúndaabei lan, le lan íchugubei ugundani líchuguni leseriwidun lun Heowá lidan furumiñeti lúgaaru lidan libagari (Mat. 19:12; Luk. 11:27, 28).

9. Ida luba híderaguniña wéiyaaña lidan afiñeni íbirigu würiña?

⁹ Lunti hóuseruniña wéiyaaña lidan afiñeni íbirigu würiña kamá háguchu o kamá hátunu (1 Tim. 5:1, 2). Lunti háfaagun wéiyaaña lidan afiñeni lun hasagarun dan lubaragiñe o lárigiñe adamuridaguni lun hayanuha hama íbirigu würiña. Ariñagatu Pérüla: “Aba líchugun aban wéiyaaña lidan afiñeni fe hanarime lan beresegu nan, aba lálügüdina ida liña lan nóurate. Teinki numuti luagu berese lan nau”. Dan le hadireirun wéiyaaña lidan afiñeni dan lun hayanuhan hama íbirigu würiña, harufuduña berese hama hau. * Ariñagatu giñe Janet ka lan buiti tasagarubei lídangiñe katei le: “Subuditiña nun buidu buidu ani subuditina giñe houn. Ligíati, dan le  násügürün lídangiñe somu turobuli hénrenguti, ménrenguti nun lun namuriahan ídemuei hama”.

10. Ka gayaraabei ladügǘn lun buidu lan hasandiragun wábirigu würiña houngua?

¹⁰ Sun wagía sandiguatiwa woungua buidu dan le hetenirun gürigia lun le gayaraatima wabéi adüga ariñaga hagía woun hínsiñe lan le wadügübei houn. Anhein mariñawagun woun gayaraati wasandiragun woungua wuriba. Ariñagatu aban prekursora gíritu Awigaili, anihein lan dan sandigua tan tungua kamá hamuga bulíeiguaaña lan tuéi: “Ariharügü hamutina kei lisaani ítaga mutu ani kei litu ítaga gürigia. Anihein dan nasaminarun marihíntina lan”. Ariha waméi le tariñagubei aban íbiri mamarieidungiru gíritu Pamela, to eseriwiduboun kei misionera luagu saragu irumu, gama lumoun, lau lásügürün dan aba tagiribudun hábiñoun óunigiraña tagübürigu. Guentó lóugiñe 70 irumu tau, ani anuhagua eseriwida kei prekursora ani ariñagatu: “Létima íderagubalina dan le hariñagun amu nun gebegi nan houn”.

11. Ida liña larufudun Hesusu gebegi hama würiña ha íderagubalin lidan lani ministeriu lun?

¹¹ Gebegiti meha lun Hesusu ídemuei le híchugubei fiu würiña ha úaraguabaña lau hayusuruni “le hámati” lun hetenirun lun (Luk. 8:1-3). Ani mámarügüñein lubuidun chansi le líchugubei houn, subudigüda lumuti giñe katei huliliti le lúmagiñeti Bungiu houn. Kéiburi, ariñagati houn lóunweba lan aba lanme láguyugun (Luk. 24:5-8). Ítara kei meha ladügüni houn apostolugu aranse lumutiña meha würiña ha luba lénrengunga le lunbei meha hagagibudagun luma danme le harihini lasufurirun luma lounwen (Mar. 9:30-32; 10:32-34). Ani aban katei le achawahabalin waritagun: dan le larügüdǘn Hesusu aba hanurahan apostolugu, ani fiu hádangiñe würiña hagüra mígirun hamuti lidan aniha lan lidan lagumuhóun lóurate (Mat. 26:56; Mar. 15:40, 41).

12. Ka dasi líchugunbei Hesusu houn fiu würiña?

¹² Ruti meha Hesusu dasi súdiniti houn fiu würiña. Kei hénpulu, ha furumiñetiña gürigia ha gefenbaña luagu águyuguaali lan, würiña úaraguatiña. Aba lariñagun houn lun lan hawisarún apostolugu luagu águyuguaali lan (Mat. 28:5, 9, 10). Lidan Pentekosutesi, irumu 33, dan le heresibirunbalin disipulugu sífiri sandu chóuruti añahein lan meha würiña ñein. Anhein ítara liña lubéi, resibi hamuti kristiánugu würiña anuadirúaaña ha milaguru lun hadimureha “luagu luéirigun Bungiu” lidan ámuñegueinarügü iñeñein (Adü 1:14; 2:2-4, 11).

13. a) Ida liña heseriwidun íbirigu würiña uguñe weyu lun Heowá? b) Ida luba gayara warufuduni teinki wamaniña luagu sun le hadügübei?

¹³ Yuuti houn wíbirigu würiña lun wíchugun seremei houn luagu sun le hadügübei lidan heseriwidun lun Heowá. Lidan amu burí katei, ídehatiña lidan tábunawagun luma taransehóun muna to burí tani lóundarun Heowá ani ídehatiña lidan burí sétanu le lani amu iñeñein, ani ídehatiña giñe Betelirugun. Ídehatiña giñe lidan le ñein lubéi mégeiwa hamá dan le anihein lan somu katei asusereduti, luma tásügürawagüdün agumeiraguagüdüni, ani seriwitiña kei prekursorugu ítara kei misioneru. Ítara kei wügüriña ñǘdüntiña giñe tidan Leskuela houn Prekursorugu, Leskuela houn Apurichihatiña Larúeihan Bungiu luma tidan Leskuela Galaadü. Luagu le aban oubaü, añahein íbirigu würiña maríeitiña ha íderagubaliña hani weiriei etenira lun dasi le wéinamuti lidan damuriguaü luma tidan lóundarun Heowá. Lun hamuga mídehan tan hani weiriou siñá habéi hamuga íbirigu ha, ha ítarabaña “keisi idewesei” woun, adügei hadasin sunsuinagubei (Efe. 4:8, TNM). Anihein san somu katei le gayaraabei wadügüni lun wíderaguniña íbirigu würiña lidan sun le hadügübei lidan heseriwidun lun Heowá?

14. Según le lariñagubei Sálumu 68:11, ka hadügübei wéiyaaña lidan afiñeni ha buítiña?

¹⁴ Wéiyaaña lidan afiñeni ha buítiña, subudi hamuti ‘saragu haña lan íbirigu würiña’ ha aransetiña lun hídehan ani saragu hádangiñe añahein hadan ha apurichihabalin uganu buiti  (aliiha huméi Sálumu 68:11). Ligíati, adüga hamuti wéiyaaña lidan afiñeni sun hayaraati lun híderaguniña lidan dasi le. Hínsiñeti tun Awigaili, to buga uáguboun wayanuha, lun hálügüdünün wéiyaaña lidan afiñeni ida liña lan línsiñe tun tagumeserun apurichiha houn gürigia. Ariñagatu: “Íderagua lumutina lira lun narihin rúhali lan Heowá aban ubaraü nun tidan lóundarun”. Subudi hamuti giñe wéiyaaña lidan afiñeni gayara lan híderaguniña íbirigu würiña, ha úaraguabaña ani derebuguti hafiñen, íbirigu würiña nibureintiña lau haturóbulin (Titu 2:3-5). Chóuruti yu lan houn íbirigu würiña lun weteingiruniña luma lun warufudun ínsiñeni houn.

15. Ka ida sügǘ gayara lan megei hamá íbirigu würiña lun híderawagun?

¹⁵ Anihein dan másiñati megei hamá fiu íbirigu würiña lun layanuhóuniwa luéigiñe hafulesein ani lun híderawagun (Isa. 1:17). Kei hénpulu, añahein íbirigu hilaali hani weiriei o ígiraguaaña, másiñati megei hamá lun layanuhóuniwa luéigiñe hafulesein o lun ladügǘn katei hábiñe le meha ladügübei hani weiriei. Aban íbiri to derebuguharu, másiñati megei tan tíderawagun lun tayanuhan luma surusia. Ani aban prekursora to ídehaboun lidan amu igaburi tidan lóundarun Heowá, háfuga megei tan lun layanuhóun tuéigiñe dan le layanuhóun tugua luagu mapurichihan tan saragu kei amu prekursorugu. Ka amu katei gayaraabei wadügün luagu hafulesein íbirigu ha? Giribu wamá ayanuha luagu ligaburi lóuseruniña Hesusu?

16. Según Márükosu 14:3-9, ida liña layanuhan Hesusu luéigiñe tufulesein María?

¹⁶ Masaminarunti Hesusu bián wéiyaasu lun layanuha luéigiñe hafulesein íbirigu würiña dan le lanügǘniwa le hariñagubei o le hadügübei wuriba. Kei hénpulu, ayanuhati luéigiñe tufulesein María dan le tagañidubei Marta tuma (Luk. 10:38-42). Adüga lumuti giñe dan le hayanuhabei amu wuriba tuagu dan le tadügübei aban katei le genegebei houn mabuidun lan (aliiha huméi Márükosu 14:3-9). Subudi lumuti meha Hesusu ka lan uagu tadügei. Ligíati, aba lariñagun tun buidu lan tadüga lau dimurei le: “Aban katei buiti le tadügübei nun. [...] Adüga taali würi to le tiyaraabei”. Darí lariñagun lidan aban profesía: “Lidan lan furumiñeguarügü fulasu lidan sun ubóu le ñein lumuti lapurichihóua uganu le lánina asalbaruni labahüdawagúba giñe le tadügübei würi to”. Ani ligía asuseredubei guentó lau aniha lan lidan arütíkulu le. Aba funa tasandirun María aban darangilaü dan le taganbuni dimurei burí le! Ma lubuidun lagoubadaguagüdüni Hesusu laburuchaguba lan apurichihani lidan sun ubóu luma laganbahóuba lan luagu lubuidun igaburi le tarufudubei würi to.

17. Ru humá aban hénpulu ka lan dan megei tan aban íbiri layanuhóuniwa luéigiñe tufulesein?

¹⁷ Ayanuhatiwa san luéigiñe hafulesein wíbirigu würiña dan le mégeiwa lan? Samina wamá aba lan híchugun fiu íbirigu fe leti lan burí tachülürün aban íbiri to mama gefenti tani weiriei lidoun adamuridaguni ani ñǘdüngiñetu túbiñoun? Ani díseguati burí tanügüniña tisaanigu adamuridagua. Ábanti hagumeserun íbirigu ayanuha wuriba tuagu ani álügüdagua hagía houngua ka lan uagu mederaagüdün tubéi lun tani weiriei. Le linarün katei, tadügüñein sun tiyaraati. Mama túmañein lagumuhóun dimurei luagu tóurate ni luagu hagüriahóun tirahüñü. Kaba hamuga san wadüga? Anhein wariñaga tun buidu lan tadüga ani ayanuha wagía buidu tuagu houn amu, gayaraati werederuni layanuhóuniwa tuagu.

18. Ka amu katei idan gayara lan wíderaguniña wíbirigu würiña?

¹⁸ Ábanya igaburi lun warufudun houn wíbirigu würiña berese wamá hau lau wíchugun ídemuei le ménrengunti houn (1 Huan 3:18). Ariñagatu Janet to meha óunigirubarun túguchu to sándiboun: “Anihein burí dan hachülaagun fiu umadagu  íchiga aban úhabu nun o íchiga éigini nun lun gayara lan nadügün amu katei. Adügati lira lun nasandiragun nungua lílana nan damuriguaü ani hínsiñe nan houn”. Ánhounti Judith, íderagua lumutu aban íbiri lau líchugun adundehani tun luáguti ida luba lan tóunigirunun tugune karü. Ariñagatu: “Gúndaatina nasubudiruni nidiheri hamá íbirigu nau”.

19. Ka amu igaburi ídabei gayara lan híderaguniña wéiyaaña lidan afiñeni wíbirigu würiña?

¹⁹ Lunti giñe harihini wéiyaaña lidan afiñeni ka lan hemegeirubei wábirigu würiña. Subudi hamuti ariha lani Heowá ida liña lan hounigirún (Sant. 1:27). Ligíati, ítara kei Hesusu saminatiña, ani michu hagía lúrudu dántima le lunti lan hamuga harufudun areiduni luma gunfurandaü (Mat. 15:22-28). Dan le háfaagun wéiyaaña lidan afiñeni lun híderaguniña íbirigu würiña, adügatiña lun hasandirun hínsiñewa hamá. Ligía meha asuseredubei tun Karina, dan le táguyubei tidoun amu muna. Dan líchugubei íbiri le arihibei lau sétanu le lani apurichihani fe luagu táguya lan aba lánhingichun lun híderagunu íbirigu. Ariñagatu: “Adügati lira lun madiheridun nan. Ruti le hariñagubei gurasu nun ani lau ídemuei le híchugubei arufuda hamuti nun lílana nan damuriguaü ani mama lan nábuguarügüñadina dan le gaturobulin nan”.

20, 21. Ida luba warufuduni gebegi hamá wábirigu würiña woun?

²⁰ Láurügü warihin lidan damuriguaü le ñein wabéi, wadariruba saragu íbirigu würiña ha benefatiña ani ha yuuti lun habihini wídehan. Lau wakutihani le ladügübei Hesusu, furendeihadiwa mosu lan wáfaagun lun wásügürün dan hama luma lun wasubudiruniña, warufudun seremei wamaniña luagu sun áfaaguni le hadügübei lidan heseriwidun lun Bungiu, ani dan le mégeiwa lan, lunti giñe wayanuhan luéigiñe hafulesein.

²¹ Lidan tágumuchagüle ligaradan apostolu Pábulu houn Rómana, íridati kéiburi nefu íbirigu würiña (Rom. 16:1, 3, 6, 12, 13, 15). Chóuruti resibi hama gurasu dan e haganbuni mábuigaü le lóunahabei houn luma lubuidun burí dimurei le layanuhanbei hawagun. Ánhawa íderaguaña wíbirigu, warufuduña giñe houn gebegi hamá woun ani barǘ wamutiña lan keisi waduheñu.