1. Ka agunbirahani ladügübei Hesusu houn gádürü óuchahatiña ani ka hadügübei?

ÓUCHAHANI meha lánibei Féduru, Andürési luma Huan bísinisi. Chóuruti aban lan taweiridun hanigi dan le ladügünbalin Hesusu agunbirahani le houn: “Falá humana, ábame mesenihanhadün lan úduraü, anaaharügaadünme gürigia nun lun nánigume”. * Kati hadügübei? Ariñagatu Bíbülia: “Furese furese aba hígirunu hasenin, aba houdin luma” (Mat. 4:18-22). Lau hánharun lun agunbirahani le lasansiruba meha habagari sunsuinagubei, lugundun móuchahaña meha úduraü, anaharügaaña meha gürigia lun lánime Hesusu disipulu (Luk. 5:10). Uguñe weyu, adüga lumuti giñe Hesusu agunbirahani le houn gürigia harumatiña anigi ha únbaña línsiñeda inarüni (Mat. 28:19, 20). Ánharaadün san lun lagunbirahan Hesusu lun aban humá hádangiñe ha anaahabaña gürigia lun lánigume?

2. Ka uagu lunti lubéi warihini wanaahan gürigia lun Hesusu lun lánigume kei aban dasi súdiniti ani kaba íderaguawa agunfulira lau dasi le?

² Háfuga barühadün lan fiu dan aturiahoun Bíbülia ani hasaminaruña lun hapurichihani uganu buiti. Anihein san machouruni huagu lun hánharun lun lagunbirahan Hesusu? Anhein ítara liña lubéi, madiherida humá. Háfuga ladüga lan subudi humani súdini lan dasi le liábinbei machouruni hun. Inarüni ariñaga tan Bíbülia ígira lanu Féduru hama lupaanágu hasenin “furese furese”. Íbini ítara, mama masaminarunga lánhara Féduru luma Andürési le lamulen lun dasi le. Barühaña meha kéiburi sisi hati lúmagiñe hasubudiruni Hesusu ani  ánharaña meha ligía lan Mesiasibei (Huan 1:35-42). Ítarameme, chóuruti furendeihadün lan saragu luagu Heowá luma luagu Hesusu ani busentün hasigirun awansera. Gama lumoun, lubaragiñe hanúadirun hagunfulirun lau dasi le, lunti hasaminarun luagu burí sun katei le lunbei ladügǘniwa. Ka íderagubalin Féduru, Andürési hámaya amu agunfulira lau dasi le?

3. Kaba gádürü katei íderaguawa ánhara lun lagunbirahan Hesusu?

³ Aranseñu haña meha furumiñetiña lani Hesusu disipulugu lun hídehan, furendeihaña meha giñe adügei hadasin buidu, adüga aransehani buiti luma ganigi. Chóuruti anihán lan katei le íderagubaliña lun buídutima hamá lidan hani ministeriu. Líderagubadün arütíkulu le áyeihei le hadügübei.

4. Ka uagu lóuchaha Féduru?

⁴ Óuchaha meha lifisiutebei Féduru, lun lanúriahaniña liduheñu. Gama lumoun, genegeti marihin lani meha wadagimanu le kei furumiñeguarügü wadagimanu, lugundun wéiriti meha línsiñe óuchahani lun (Huan 21:3, 9-15). Lau sun lira, furendeiti anaha gürigia lun lánime Hesusu disipulugu. Lau lídehan Heowá aban buídutima lan lagunfulirun lau dasi le (Adü. 2:14, 41).

5. a) Según Lúkasi 5:8-11, ka uagu lanufudeda Féduru? b) Anhein sandigua lubéi aban aturiahati Bíbülia lungua kei Féduru ka katei gayaraabei líderaguni?

⁵ Ínsiñeni luagu Heowá, ligíatima ínchahabaliwa lun wapurichihan. Anhein sandi waméi machouruni, líderagubadiwa ínsiñeni le lun lidin machouruni wawéi. Dan le lagunbirahabalin Hesusu Féduru lun lanaahan gürigia lun lánime disipulugu, ariñagati lun: “Manufudedabá” (aliiha huméi Lúkasi 5:8-11). Mama meha ladüga hanufude lan Féduru luagu le lunbei lasuseredun lun anhein adügagua lungua aban hádangiñe lani Hesusu  disipulu. Sun liña meha layusuruni Hesusu lubafu lun hadigin saragu úduraü, ábati lasandirun Féduru madüna lan lun lawadigimaridun luma Hesusu. Agia huguya? Sanditün san anufudei dan le hasaminarun luagu sun le lunbei ladügüni aban lani Kristu disipulu? Anhein ítara liña lubéi, héregüda huméi hínsiñehabu luagu Heowá, luagu Hesusu luma hawagu gürigia. Anhein hadüga ítara, merengutimabei lun hánharun lun lagunbirahan Hesusu, lun hanaahan gürigia lun lun lánime disipulugu (Mat. 22:37, 39; Huan 14:15).

6. Ka amu resun ínchahabaliwa lun wapurichihan?

⁶ Ariha wamá ábaya resun le ínchahabaliwa lun wapurichihan. Furumiñe ladüga busén wamá lun gaganbadi wamá lun lugumadin Hesusu, le ñein lubéi lariñaga: “Heiba lubeiti habügürü gürigia [...], adüga humaña nánime disipulugu” (Mat. 28:19, 20). Le libiaman, ladüga ítarahaña lan gürigia kei “mudún ha móuniritiña”, ani ayumahatiña lun hafurendeiruni inarüni luáguti Larúeihan Bungiu (Mat. 9:36). Busenti Heowá lun hafurendeiruni sun hawuyeri gürigia inarüni luma lun hesefurun (1 Tim. 2:4).

7. Ida liña larufuduni Rómana 10:13-15 súdini lan lun wapurichihan?

⁷ Aban katei le lunbei línchahaniwa lun wapurichihan wasaminarun luagu buiti le lanügübei houn amu. Aban óuchahati, óuchahati úduraü lun lalugurahaniña o lun leigin, ánheinti wagía, “áluahatiwa” gürigia lun wíderaguniña esefurei habagari (aliiha huméi Rómana 10:13-15; 1 Tim. 4:16).

8, 9. Ka lunbei lasubudiruni aban óuchahati ani ka uagu?

⁸ Lidan lidaani Hesusu, mosu meha hasubudiruni ísüraelina kaba lan hawuyeri úduraü hóuchaha (Fad. 11:9-12). Mosu meha giñe hasubudiruni halíaba lan hadariraña. Súnwandan herederun úduraü lidan fulasu le ñein lubéi duna le hínsiñeti houn darí hagía heigin ñein. Súdiniti funa san giñe lun hasubudiruni óuchahatiña oura le ídanbei houdin óuchaha? Teni wamá lun le lariñagubei aban íbiri le awinwandubei lidan aban ubouhu Pasifiku lun aban misioneru. Agunbiraha lumuti íbiri ligía, íbiri misioneru lun houdin óuchaha, ábati lariñagun íbiri misioneru lun: “Wariaguba woungua haruga binaafin ladaürün nefu”. Ábanti lariñagun íbiri lun: “Ua mítaranti, úduraü anúadirubalin oura, mama wagía”.

⁹ Ítarameme, subudi hamuti meha óuchahatiña ha lánina furumiñeti sígulu kaba lan oura ani ka lan fulasu buídutimabei lun hadarirun úduraü. Kei hénpulu, apurichihatiña meha lani Hesusu disipulugu tidan burí ténpulu, tidan haligilisin huríu, tidan burí muna luma tidan burí magindun (Adü. 5:42; 17:17; 18:4). Wagía sun, mosu giñe wasubudiruni hagaburi gürigia ha awinwandubaña lidan burí fulasu le ñein lubéi wapurichiha. Lunti gabaroun wamani le gádanbaliña, luma lun wáluahaniña lidan burí fulasu luma oura le buídutimabei lun wadariruniña (1 Ko. 9:19-23).

10. Ka burí tulu tíchuguboun lóundarun Heowá woun?

¹⁰ Lunti gama hamá óuchatiña umegegu le buítimabei lun óuchahani luma lun hasubudiruni ida luba lan hayusuruni. Wagía giñe sun. Ruti Hesusu adundehani furanguti houn lani disipulugu libügürü ida luba lan háluahaniña gürigia. Ariñagati houn ka lan lunbei hanügüni hámagua, halíaba lan hapurichiha ani kaba lan hariñaga (Mat. 10:5-7; Luk. 10:1-11). Uguñe weyu rúharu lóundarun Heowá agumeiraguagüdüni woun tótima wayusuruboun lun warufudahan ani arufudatu giñe woun ídatima luba lan wayusurunu. * Íderagua lumutiwa  adundehani le lun chóurutima lan wasandiragun woungua lun buídutima lan wadügüni wadasin (2 Tim. 2:15).

11. Ka uagu mosu lubéi ganigi wamá lidan wadügün disipulugu?

¹¹ Lun aban lan óuchahati aban gürigia mosu ganigi lan, lugundun anihein dan lasansiragun ligibu barana. Lanwoun lira, anihein burí dan mosu lan lóuchahouniwa guñoun ani anihein dan gayara lan liabin liñawan dan. Mosu giñe ganigi wamá dan le wadügün disipulugu. Másiñati liábingua kamá hamuga “liñawan dan” dan le wagumeserun apurichiha ani arufudagua wagía woungua kei aban gefenti luagu Heowá, ladüga burí hamahadun waduheñu lun le wadügübei, hadügün wamadagu bula wau o hamahadun gürigia haganbuni uganu le wapurichihabei. Gama lumoun, madügünti lasuseredun katei le lun taweiridun wanigi, lugundun ariñagati Hesusu houn lani disipulugu lóunahabaña lan apurichiha haganagua gürigia gáñitiña (Mat. 10:16).

12. Kei lariñaguni Hosué 1:7-9, kaba íderaguawa lun ganigi wamá?

¹² Kaba íderaguaün lun ganigi humá? Furumiñe, chouru huméi ladundehañein lan Hesusu wadagimanu le siélugiñe (Huan 16:33; Aruf. 14:14-16). Lárigiñe, héregüda huméi hafiñen luagu lagunfulirubei lan Heowá le füramasei lubéi libügürü lóunigirubadün lan (Mat. 6:32-34). Eibu héretima lan hafiñen, ganigitimabadün. Dandu Féduru hama ha híbiri, arufudatiña weiri lan hafiñen dan le hígirunbalin hawadigimari keisi óuchahatiña lun hafalaruni Hesusu. Huguya sun arufuda humuti  ligiaméme dan le hariñagunbei houn humadagu luma houn hiduheñu haturiahañoun lan Bíbülia hama gefentiña luagu Heowá ani habasihaña lan adamuridagua. Ani chóuruti adügaadün lan asansiruni súdiniti lidan burí hibagari lun harufuduni haganbadi luagu lúrudu richati le líchugubei Heowá. Arufudati hadügüni katei le afiñe humá ani ganigi huguya. Ánhadün asigira áfaagua lun ganigi humá, gayaraabei hachoururuni ñeinbei lan Heowá huma le ñeinhin lumuti hidin (aliiha huméi Hosué 1:7-9).

13. Ida luba líderagunün hararamagun asaminara luma furíei lun hárügüdün ganigi?

¹³ Ka amu katei lunbei líderagunün lun ganigi humá? Amuriaha humá luma Heowá lidan furíei lun ladügün lun ganigi humá (Adü. 4:29, 31). Lóunabubei hafurieidun ani mígirun lubadün hábugua. Ñeinbei huma súnwandan lun líderagunün. Lanwoun lira, ráramagua humá asaminara luagu le ladügübei Heowá lun lesefuruniña lubúeingu lidan binadu dan. Samina humá giñe luagu ida liña lan líderagunün lun hawandun burí lénrengunga luma ida liña lan líchugun erei hun lun hadügün asansiruni lidan hibagari. Anhein adüga lubéi lun hásügürün lumutuniña luéigiñe Barana Funati, chouru huméi gayaraati lan líderagunün lun aban humá lani Kristu disipulu (Afu. 14:13). Ítara kei abürühati sálumu afiñe humá luagu dimurei le: “Anihein Nabureme numa, manufudetina. Kaba gayara lan gürigia adüga nau?” (Sal. 118:6).

14. Ka hafurendeirubei lídangiñe le asuseredubei tun Masae luma tun Tomoyo?

¹⁴ Ábaya katei le gayaraabei líderagunün lau hasaminarun luagu ida liña lan líderaguniña Heowá gürigia ha haburibaña lun ganigi hamá. Ariha waméi le asuseredubei tun aban íbiri gíritu Masae. Le lueirin haburi tan darí lun tasaminarun maweiyasunboun lan ayanuha houn amu luagu tafiñen. Adügati meha láurügü tasaminarun tapurichihan houn gürigia ha ibidiñetiña tun lun tarihini dasi le kei aban katei hénrenguti, le ítarabei tun kamá hamuga tamudeirun tóubawagungiñe muna lun tábulugun. Aba lubéi táfaagun lun taganwoundagüdüni ínsiñeni le tasandirubei luagu Bungiu luma hawagu gürigia. Ráramaguatu asaminara mama lan mosu ladarasahóuniwa lidan dan le ídanbei wawinwanda ani amuriahatu luma Bungiu lun líderagunu aganwoundagüdei tayumahan tabusenrun lun tapurichihan. Adügati katei le lun manufudedun tan darí lun teseriwidun kei prekursora. Gayaraati giñe líderaguniña Heowá iseri apurichihatiña lun hárügüdün ganigi, ítara kei lariñaguni Hosué 1:7, 9. Ariha waméi le asuseredubei tun aban íbiri gíritu Tomoyo. Lidan furumiñeti weyu le táfuridunbei apurichiha tidan burí muna, tidan furumiñetu muna aba táfuridun aban gürigia aba tagúaragun houn: “Mabuseruntina naganbun ni kata hawagu gefentiña luagu Heowá!”, ábati tachüürüni bena hawagun. Sin teferidiruni Tomoyo ubebeni, aba tariñagun tun tupaaná: “Ariha bumuti san le asuseredubei?, mariñagungubeitina ni kata ani subudi taali gürigia to aban wamá gefentiña luagu Heowá. Ma lubuidun!”. Guentó, teseriwiduña Tomoyo kei aban prekursora ha adügübaña 70 oura.

15. Ka mini lubéi ladügün gürigia aransehani buiti ani ka uagu súdini lubéi katei le houn kristiánugu?

¹⁵ Mini lan ladügün gürigia aransehani buiti, láfaagun lun lagunfulirun lau aransehani ligía. Aban óuchahati buiti mosu saragiñe lan, mosu lerederun darí lagumuchuni lóuchahan íbini laganagua liñawan dan. Wagía kristiánugu lunti wadügün aransehani buiti anhein busén wabéi wawandun darí wagumuchuni wadasin (Mat. 10:22).

16. Kaba íderaguawa lun wadügün aransehani buiti?

 ¹⁶ Mama lau igaburi le wagüriahóua wagía gürigia. Le linarün katei, héchutiwa lun madügün wamá saragu áfaaguni. Lun ladügün gürigia aransehani buiti, mégeiwati lun larufudun ragüguaü unguaü. Ligíati, mégeitiwa ídemuei lun wadügüni katei le uágubei wasaminara hénrengubei lan woun. Ru lumuti Heowá ídemuei le woun lau lídehan lani sífiri sandu (Gal. 5:22, 23).

17. Ka lariñagubei Pábulu lidan 1 Korintuna 9:25-27 luagu le lunbei ladügüni lun meha ladügün aransehani buiti?

¹⁷ Héchuti meha apostolu Pábulu adüga aransehani buiti, íbini ítara, ariñagati ‘bei lani lúgubu’ lun ladügüni le buídubei (aliiha huméi 1 Korintuna 9:25-27). Ariñagati houn kristiánugu lun hadügün aransehani buiti luma lun hadügüni “sun katei lidan lubudubu” (1 Ko. 14:40). Anihán le mégeiwabei lun ladügǘniwa aban lubuidun aransehani lánina ministeriu sin wabulieiduni háluahouniwa gürigia lun lánime Kristu disipulugu (Adü. 2:46).

18. Ka lunbei wadügüni lun lagundaarun Heowá lau le wadügübei?

¹⁸ Aban óuchahati arihati buidu lan lidin lun hawagun burí saragu úduraü ha ladigibaña. Ánheinti wagía, mama hawagun saragu gürigia ha wíderagubaña lun hachülürün tidoun lóundarun Heowá wariñaga luagu buidu lan lidin woun (Luk. 8:11-15). Ánhawa asigira apurichihei uganu buiti luma arufudaha houn amu, gúndaabei Heowá lau le wadügübei. Ka uagu? Ladüga warufuduña gaganbadi dandu lun kei lun liráü (Mar. 13:10; Adü. 5:28, 29).

19, 20. Ka amu katei ínchahabaliwa lun wapurichiha guentó?

¹⁹ Anihein burí ageiraü le ídanbei higirúa óuchahatiña lun hóuchaha lídanrügü fiu hati lidan irumu. Dan le ayarafadeina lan lagumuchun lidaani óuchahani, subudi hamuti óuchahatiña, mosu lan hóuchaha saragu. Lidan wakesin, aniha aban katei le adügübei lúntima wapurichihan guentó: óufudagueina liña liabin lagumuchagüle ubóu le. Murusunrügaali dan lun wídeha lidan dasi lánina apurichihani le, le esefuhabei ibagari. Masaminara humá mosu lan hagurabuni dan le buídutimabei lun hídehan lidan dasi súdiniti le (Apur. 11:4).

²⁰ Anihán dan lun aranseñu humá lun hídehan, haganwoundagüdüni hisubudin tuagu Bíbülia, harufudun ganigi luma lun hadügün aransehani buiti. Óundara humá hamoun hóugiñe saragu míñunu apurichihatiña lidan sun ubóu, ábameti hibihini “ugundani le líchugubei Bungiu” (Neem. 8:10). Aranseñu humá lun hadügüni sun hiyaraati lidan dasi le darime lariñagun Heowá, darí ya. Lidan le aban arütíkulu wayanuhaba luagu ǘrüwa katei le gayaraabei wadügüni lúntima busén wamá wasigirun apurichihei uganu buiti luáguti Larúeihan Bungiu.