1, 2. Ida liña genegegua lan dimurei le lídanbei Apurichihati 11:6 luma lapurichihóuniwa uganu buiti luáguti Larúeihan Bungiu?

ANIHEIN burí ageiraü, ánhatiña gürigia lau sun hagundan lun uganu luáguti Larúeihan Bungiu. Anihantima le hemegeirubei. Anihein burí ageiraü meberesegúntiña gürigia lun hayanuhan luagu Bungiu ni tuagu Bíbülia. Meberesenga ida liña lan hóunabun gürigia lidan fulasu le ñein lubéi wapurichiha, busenti Heowá lun wasigirun apurichiha, darime lariñagun, buídurügaali.

² Danme lachülürün weyu le lanuadirúnbei Heowá, ábanme lagumuchun apurichihani “ligíaalimeti lagumuchun ubóu” (Mat. 24:14, 36). Sunme awanha lan agurabahei weyu ligía, ida luba wachoururuni mígirun wamá lun lábürühan warüna kei lariñaguni Apurichihati 11:6, TNM? (aliiha huméi). *

3. Kaba wariha lidan arütíkulu le?

³ Lidan arütíkulu le ásügürübei, arihatiwa gádürü igaburi le lunbei líderaguniwa lúntima chubalugu wamá lidan wanaaha gürigia lun Hesusu lun lánigume (Mat. 4:19). Lidan arütíkulu le, warihuba ǘrüwa igaburi le gayaraabei líderaguniwa lun busentima wamá wapurichihan meberesenga le úmabei wagagibudagua. Wafurendeiruba ka lan uagu súdini lubéi lun wetenirun lun wapurichihan, lun gaguraasun wamá luma lun here lan wafiñen.

4. Ka uagu lunti lubéi wetenirun lun dasi le líchugubei Heowá woun?

⁴ Ariñagati Hesusu kaba lan buga asusereda lidan lagumuhóun  dan luma ida luba lan buga hagaburi gürigia. Ariñagati giñe gayaraabei lan buga ladügün katei le lun hadireiruni lani disipulugu harihin luéi hagunfuliruni hadasin lánina apurichihani. Ligía lariñagubei houn: “Agagudúañu humá” (Mat. 24:42). Uguñe weyu, anihein katei le adügübei lun metenirun hamá gürigia lun eweridihani le, kei meha lidan lidaani Noé (Mat. 24:37-39; 2 Fe. 2:5). Ligíati, busentiwa lun wetenirun lun dasi le líchugubei Heowá woun.

5. Según Adügaü 1:6-8 halíaba lébeda apurichihani?

⁵ Uguñe weyu, mosu wetenirun lun wapurichihani uganu buiti luáguti Larúeihan Bungiu. Ariñagati Hesusu laburuchaguba lan uganu le ani lasigiruba lan lárigiñe lounwen (Huan 14:12). Lárigiñe meha lounwen Hesusu, aba meha hagiribudun lánigu disipulugu lidoun hani bísinisi lánina óuchahani. Lárigiñe láguyugun Hesusu, yusu lumuti lubafu lun meha hadigin lánigu disipulugu saragu úduraü. Yusu lumuti dan ligía lun lafuranguagüdüni houn súdinitimati lan hanaahoun gürigia lun lun lánigume (Huan 21:15-17). Lubaragiñe meha lagiribudun sielun ariñagati houn lánigu disipulugu lapurichihóuba lan inarüni lidan amu fulasu bóugudi luéi Ísüraeli (aliiha huméi Adügaü 1:6-8). Irumu lárigiñe, aba lafuranguagüdüni lun apostolu Huan lidan aban arufudúni le meha lunbei lasuseredun “lidan luéyuri Aburemei” *. Lidan amu burí katei arihati Huan katei le wéirigüdati anigi: lábugiñe hadundeha ánheligu lapurichihóuña “uganu le magumuchaditi [...] houn sun néchanigu, rasa, luwuyerigu dimurei luma sun fulasu” (Aruf. 1:10; 14:6). Furanguti busén lan Heowá lidan lagumuhóun weyu le lun wapurichihan darí lagumuhóun.

6. Ka lunbei wadügüni lun gayaraabei lan wetenirun lun wapurichihan?

⁶ Le lunbei líderaguniwa etenira lun  wapurichihan, wasaminarun luagu sun le ladügübei Heowá lun líderaguniwa. Kei hénpulu, ruti saragu ariñahani woun, kéiburi: agumeiraguagüdüni to imprimíruarügütu, to burí lídanboun wani páhina lidan Internet, to gürawaruarügütu, bidéu burí luma programa lani JW Broadcasting. Samina wamá luagu le: lidan wani páhina lidan Internet, anihein ariñahani ñein lidan lóugiñe milu iñeñein (Mat. 24:45-47). Lidan sun ubóu le fánreinguañubei lidan katei lánina polítiku, relihión luma katei lánina bísinisi, añahein lóugiñe widü míñunu lubúeingu Bungiu lidan sun ubóu ha ítarabaña kei aban iduheñu ha lídanbaña aban. Arihúati katei le lidan irumu lügüra wándaradi 19 lidan gádürü-hati, 2019, óundaraguatiña sun gefentiña luagu Heowá lidan sun ubóu lun harihini bidéu lánina taturiahoun Lererun Bungiu sagü weyu. Guñoun ligía chülütiña 20,919,041 gürigia lun laritawagún lounwen Hesusu. Ma aban lubuidun chansi warihini lagunfulirun milaguru le lidan wadaani ani lun giñe gafanran wamá lidan? Ínchaha lumutiwa wasaminarun luagu katei le lun wetenirun lun wadasin lánina lapurichihóun uganu lánina Larúeihan Bungiu.

7. Ida luba líderaguniwa wáyeihani Hesusu lun wetenirun lun wapurichihan?

⁷ Aban katei le gayaraabei líderaguniwa lun wetenirun lun wapurichihan, lau wáyeihani Hesusu. Mígirunti lun leberesehani ni aban lun lapurichihani inarüni (Huan 18:37). Mígirunti lun lábürühan lidoun óuchawaguni dan le lóuchagunbalin Mafia lau “larufuduni sun arúeihani le ubouagubei lun luma burí luéirigun”, ni dan le hálugunbei gürigia lun hadügüni urúeime (Mat. 4:8, 9; Huan 6:15). Mígiraguagüdünti lungua lun libihin umegeguni ni irisini ni dan le lagagibudagunbei luma lanarime burí óuchawaguni (Luk. 9:58; Huan 8:59). Danme le lóuchawaguniwa wafiñen, weteniruba lun wapurichihan, ánhawa áyeihei Hesusu lun mabuchadun lan wawagu mábürühan ligíame warüna, kei lariñaguni Pábulu (Ebü. 12:3).

8. Ka mini lubéi gaguraasuni ani ka uagu súdini lubéi uguñe weyu?

⁸ Mini lan gaguraasuni, iarani le luágubei aban gürigia lun lagurabahan lau darangilaü lun lasansiragun katei. Meberesenga anhein wagurabahaña lubéi lun lagumuchun aban turobuli le hanarimeti luriban o lasuseredun aban katei le lǘhadiwa agurabahei luagu saragu dan, mégeitiwa gaguraasuni. Busenti meha profeta Abakúku lun lagumuchun wuribani le meha Hudaabei (Abak. 1:2). Haritaguatiña yebe lani Hesusu disipulugu “luagu lagumesera lan larúeihan Bungiu dan ligía” luma luagu lesefurubaña lan luéi hagumadihan rómana (Luk. 19:11). Ayumahatiwa lun lachülürün Larúeihan Bungiu lun lagidaruni wuribani luma lun lanügün aban iseri ubóu le ñeinba lubéi ñein lan irichaü (2 Fe. 3:13). Furanguti, mosu lan gaguraasun wamá lun wagurabuni weyu le anúadira láalibei Heowá. Ariha wamá fiu igaburi le arufudubalin woun ida liña lan gaguraasun lan Heowá.

9. Ka uagu chouru wabalin gaguraasun lan Heowá?

⁹ Heowá ligíatima gaguraasutimabei ani ligía lunbei wáyeihani. Ruti saragu dan lun Noé lun gayaraabei lan ladügünu Noé árüka ani lun ‘lapurichihan houn gafigountiña’ (2 Fe. 2:5; 1 Fe. 3:20). Aganba lumuti Heowá Abüraámü saragu wéiyaasu dan le ladügünbei álügüdahani lun libügürü hagünrinchawaguniwa wuribatiña ha Sodomabaña luma Gomora (Agu. 18:20-33). Sügüti saragu sígulu lau Heowá gaguraasun houn ísüraelina ha meha múaragunbaña lun (Neem. 9:30, 31). Uguñe weyu larufuduña Heowá saragu gaguraasuni houn gürigia lun gayaraabei lan hasakürihan ha lachawahabaña  luouguoun lun lumadagu hamá (Huan 6:44; 1 Tim. 2:3, 4; 2 Fe. 3:9). Ruti ligaburi Heowá buiti resun woun lun gaguraasun wamá lidan awanhagua lan apurichiha luma arufudaha houn amu. Arufudahati giñe woun lau hénpulu le wadarirubei tidan Lererun lun gaguraasun wamá. Ariha waméi katei lan.

10. Ka wafurendeirubei lúmagiñe ábunaguti le uágubei layanuhóua lidan Santiagu 5:7, 8?

¹⁰ (Aliiha huméi Santiagu 5:7, 8). Arufudahati ábunaguti woun lunti lan gaguraasun wamá. Inarüni anihein lan nadü fureseti laweiridun, gama lumoun, liibe-agei barüti saragu dan lubá láfunadun, dántima le furuda lan. Lidan binadu Ísüraeli, lúmagiñe bábununi nadü darí laweinamudun barüti sisi hati: aba lagumeserun ábunaguti ábunagua lárigiñe furumiñeti huya le áhuyubei lamidangua diisi-hati, ábati lagumeserun alubaha lárigiñe lagumuhóun huya le áhuyubei lamidangua gádürü-hati (Mar. 4:28). Ánhawa arufuda lichú aau, wafalarubei lani ábunaguti hénpulu lun gaguraasun wamá. Gama lumoun, gayaraati hénrengu lan katei le.

11. Ida liña líderaguniwa gaguraasuni lidan wani ministeriu?

¹¹ Kei gafigoun wabéi busentiwa lun warihini lawanserun katei lau lóufudagun. Gama lumoun, anhein bunagua lubéi aban gürigia ani busenti lalubahani mosu lóunigiruni súnwandan: mosu lagarabahani múa, lábununi nadü, láhulahani híduru luéi luma lun láturaguni. Ligiaméme asuseredubei dan le wadügün disipulugu. Mosu wasagarun dan lun wíderaguni aturiahati Bíbülia agidarei iyereehabúni tídangiñe lanigi luma lun hínsiñehabu lan. Dan le maha hamá gürigia lun haganbuniwa, líderagubadiwa gaguraasuni lun mírudagun wamá. Lunti giñe gaguraasun wamá dan le buidu lan hóunabun gürigia lun inarüni, ladüga mama lunti wafosuruniña aturiahatiña Bíbülia lun hawanserun. Anihein meha dan, barütiña lani Hesusu disipulugu dan lun gunfuranda hamani le meha larufudahabei (Huan  14:9). Haritagua waméi gayaraati lan wábunagun luma wáturagun, gama lumoun Bungiu aweiridagüdübalin nadü (1 Ko. 3:6).

12. Ida luba warufudun gaguraasun wamá dan le wapurichihan houn waduheñu?

¹² Ábaya katei le ídanbei gürewei lan woun lun warufudun gaguraasuni, dan le wapurichihan houn waduheñu. Lidan Apurichihati 3:1, 7, daritiwa adundehani le gayaraabei líderaguniwa, ariñagati: “Chülüti [...] lidaani ámanichuni luma lidaani adimurehani”. Íbini arufuda wamani lau wagaburi lubúeingu lan Bungiu wagía, súnwandan áluahatiwa chansi lun wayanuhan luagu inarüni (1 Fe. 3:1, 2). Apurichihatiwa ani arufudahatiwa lau ubebeni, gama lumoun, arufudatiwa gaguraasuni houn sun gürigia, íbini houn waduheñu.

13, 14. Ka hénpulu lánina gaguraasuni gayaraabei wáyeihani?

¹³ Daritiwa hénpulu lánina gaguraasuni hadan lubúeingu Bungiu úaraguatiña ha lánina binadu dan hama ha lídanbaña wadaani. Ayumahati meha Abakúku lun larihini lagumuchun wuribani, ariñagati meha lau ichouruni: “Agagudúañu nuba ítara keisi óunigihati lidan lubara” (Abak. 2:1). Ariñagati meha apostolu Pábulu ayumaha lan tídangiñe sun lanigi lun lagumuchuni lani ministeriu. Íbini ítara, sigiti apurichihei “uganu buiti luáguti línsiñehabu Bungiu” lau gaguraasuni (Adü. 20:24).

¹⁴ Ariha wamá aban hénpulu hani aban feru maríeitiña ha eresibihaaña tídangiñe Leskuela Galaadü ani ñǘdüntiña eseriwida lidan aban ageiraü ñein lubéi lougua hamá íbirigu le ñein lubéi giñe lougua tan relihión kristiánu. Fiúrügüñanu meha gürigia hadeirun ha busenbaña haturiahanu Bíbülia. Ánhañati íbirigu ha eresibihaaña úara hama ha óunahoubaña lidoun amu ageiraü, óunahatiña gárada houn lau ariñahani buíduburiti hawagu saragu gürigia ha híderagubaña lun habadiseirun. Lau sun hámaru lan hánharun gürigia lun inarüni ñein, sigitiña feru maríeitiña ha apurichiha lau gaguraasuni. Lárigiñe widü irumu hau hapurichiha úouga ni aban abadiseirútiña, aba labadiseirun aban aturiahati hama, ma meha hagundan! Ida liña genegegua lan le meha asuseredubei lidan dan le sügühalibei luma wadaani? Mamagualidutiña ani mígiruntiña lun lábürühan harüna, ani biní lumuti Heowá haguraasun. Ligíati, áyeiha wamaña “ha meha afiñebaña luagu Bungiu, awanda haméi sun asufuriruni luagu, aba heresibiruni le füramase lubéi Bungiu houn” (Ebü. 6:10-12).

15. Ka uagu adüga lubéi apurichihani lun derebugu lan wafiñen?

¹⁵ Kei afiñe wabéi luagu uganu le wapurichihabei, busentiwa lun haganbuni sun gürigia. Afiñetiwa luagu le füramase tubéi Lererun Bungiu (Sal. 119:42; Isa. 40:8). Arihaadiwa lagunfulirun fiu profesía le tídanbei Bíbülia lidan wadaani. Arihaadiwa giñe buidu lan lidin houn gürigia dan le hafalaruni adundehani le tídanbei Bíbülia. Chóurugüda lumutiwa sun le, megei hamá gürigia lun haganbuni uganu buiti luáguti Larúeihan Bungiu.

16. a) Según le lariñagubei Sálumu 46:1-3, ka uagu lederebudagüdei apurichihani wafiñen luagu Heowá? b) Ida liña giñe líderaguniwa wafiñen luagu Hesusu?

¹⁶ Afiñetiwa giñe luagu Heowá le úmagiñebei liabin uganu le wapurichihabei luma luagu Hesusu le lanúadirubei Heowá lun Urúei lan lidan Larúeihan (Huan 14:1). Meberesenga le asusereduti, Heowá waramudaguagülebei ani ligía giñe wérebei (aliiha huméi Sálumu 46:1-3). Lanwoun lira, chouru wamuti ladundehañein lan Hesusu apurichihani lau ubafu le líchugubei Heowá lun (Mat. 28:18-20).

17. Ru humá aban hénpulu le arufudubei ka lan uagu mosu lubéi wasigirun apurichiha?

¹⁷ Seremei wafiñen, chouru wamuti labinirubei  lan Heowá áfaaguni le wadügübei ani anihein dan adüga lumuti lidan igaburi le magurabun wamuti (Apur. 11:6). Kei hénpulu, sagü weyu sügütiña hóugiñe milu gürigia ligibugiñe tarufudaagüle wani agumeiraguagüdüni. Huuti san luwuyeri apurichihani le? Anha, ayanuhatu Wani Ministeriu to lánina unsu-hati, irumu 2014 tuagu aban aturiahatu tidan luban furendei íñuti to meha abürühaboun aban arütíkulu hawagu gefentiña luagu Heowá. Madaritu meha aban luban adamuridaguni, gama lumoun, dúnguatu luma aban lídangiñe wani tarufudaagüle agumeiraguagüdüni lidan fulasu le ñein lubéi taturiahan. Ítara liña tadariruni ariñahani le meha temegeirubei lun tabürüdüni tani arütíkulu. Lau lásügürün dan, aba tabadiseirun ani guentó, ábanharu prekursora to adügüboun 70 oura luagu hati. Ínchaha lumutiwa sügǘ libe le lun wasigirun apurichiha, ladüga arufudati añahagua lan bandi gürigia ha mégeigiña lun haganbuni uganu buiti luáguti Larúeihan Bungiu.

18. Ka uagu chouru wabalin lagumuchuba lan lapurichihóun uganu luáguti Larúeihan Bungiu lidan dan le buídutimabei lun Heowá?

¹⁸ Gayaraati wachoururuni lagumuchuba lan lapurichihóun luáguti Larúeihan Bungiu lidan dan le buídutimabei lun Heowá. Samina wamá luagu le meha asuseredubei lidan lidaani Noé. Arufudati Heowá súnwandan lan ladügüni katei lidan dan le buídutimabei. Kei burí 120 irumu lubaragiñe Guran, ariñaga lumuti Heowá ídaba lan lagumesera. Saragu irumu lubaragiñe ariñagati lun Noé lun ladügün aban árüka. Lidan kéiburi 40 o 50 irumu, nadagimeinti Noé memeraagunga. Íbini michu hamá gürigia arigei lun, sigiti eweridiraña darí lariñagun Heowá óuraali lan lun lebelurun tidoun árüka hau sun animaalugu. Ligíati, lidan dan le buídutimabei, “aba ladouruni Bungiu tubenari ugunei” (Agu. 6:3; 7:1, 2, 16).

19. Ka gayaraabei wagurabuni ánhawa mígirun lun lábürühan warüna?

¹⁹ Yarafa madise lariñaguba Heowá darí lan ya lébeda apurichihani, ‘ladourubei lubenari’ ubóu le lábugiñebei lubafu Mafia ani ábame lanügüni iseri ubóu le lánina irichaü. Sunme awanha lan agurabahei dan ligía, falá waméi lani Noé, Abakúku hama amu lubúeingu Bungiu ha úaragubaña hénpulu, ha mígirunbaña lun lábürühan harüna. Teni wamá lun wapurichihan, gaguraasun wamá ani derebugu lan wafiñen luagu Heowá luma luagu le füramasei lubéi.