1. Ka dan hénrengutimabei lun leseriwidúniwa lun Heowá?

KA DAN hénrengutimabei lun leseriwidúniwa lun Heowá? Dan san le wagagibudagun luma lénrengunga o dan le wawinwandun lidan darangilaü? Dan gaturobulin wamá, éibaagueina wáluahani lídehan Heowá. Gama lumoun, ka wadügübei dan le buidu lan léibugun katei? Gayaraati funa san wabulieidagun luéi le súdinitimabei, weseriwidun lun Heowá? Wéridi lumutiña meha Heowá ísüraelina luéi peliguru le (2 Lur. 6:10-12).

2. Ka igaburi larufudubei urúei Asá lun wáyeihani?

² Arufudati meha urúei Asá aban igaburi buiti le lunbei wáyeihani, lugundun anúadira lumuti le buídubei ladüga afiñe lan luagu Heowá sunsuinagubei. Mama seriwirügüti lun Heowá lidan lidaani lénrengunga seriwiti giñe lun lidan lidaani darangilaü. Lúmagiñe nibureingili “gúnfuliti Asá luma Aburemei súnwandan” (1 Uru. 15:14). Arufuda lumuti dan le lagidarunbalin áhuduraguni mama inarüni Hudaagiñe. Ariñagatu Bíbülia: “Gidá lumuti burí hani búngiugu terencha latarü, [...] abouha lumuti burí dübü anuadirúati tuma burí liyawa Asera” (2 Kro. 14:3, 5). Gidá lumuti meha ubaraü le tani urúei úguchuru tuéi Maaká, to lagütü, ladüga meha tadügün aban guáriua lun háhuduragun gürigia lun (1 Uru. 15:11-13).

3. Kaba wakutiha lidan arütíkulu le?

³ Mámarügü áhuduraguni mama inarüniti lagidara Asá. Íderagua lumutiña giñe lílana Hudá lunya háhuduragun lun Heowá. Biní lumuti Heowá Asá hama giñe lílana Hudá lau aban dan le lánina darangilaü. * Lidan sun dan le laubei arúeiha, anihein  meha diisi irumu lau darangilaü lidan fulasu. (2 Kro. 14:1, 4, 6). Lidan arütíkulu le, furumiñe warihibei ka lan ladügübei Asá lidan dan ligía. Lárigiñe, wakutihabei giñe le hadügübei kristiánugu ha lánina furumiñeti sígulu, yusu hamuti hadaani buidu lidan lidaani darangilaü ítara kei meha ladügüni Asá. Lagumuhóun wóunabubei álügüdahani burí le: anhein wawinwanduña lubéi lidan aban fulasu le ñein lubéi gayara lan wáhuduragun lidan darangilaü, ida luba wayusuruni wadaani buidu lidan lidaani darangilaü?

4. Según le lariñagunbei 2 Krónikasi 14:2, 6, 7, ka buiti lasagarubei Asá lídangiñe aban dan lánina darangilaü?

⁴ (Aliiha huméi 2 Krónikasi 14:2, 6, 7). Aba lariñagun Asá houn lílana ageiraü Heowá lan íchugubei ‘darangilaü houn hama sun habesinanigu’. Gama lumoun, masaminarugubeiti ladügüni katei lau lámarun. Le ladügübei aba lagumeserun ábunagua uburugu, baríeiru, wáyelesi luma burí adüga bena. Ariñagati houn lílana Hudá: “Anihagua [...] ageiraü lábugiñe wabafu”. Kati labusenrunbei lariñagun? Gayara lan lamufurun lau darangilaü lidan fulasu le líchugubei Heowá lun luma lun lábunagun meberesenga hau áganigu. Ligía línchahanbaliña lílana ageiraü lun hasagarun buiti lídangiñe dan le lánina darangilaü.

5. Ka uagu lagawoundagüdaña Asá lisudaranigu?

⁵ Sagati Asá buiti lídangiñe lidaani darangilaü lun lagawoundagüdüniña lisudaranigu (2 Kro. 14:8). Le san mafiñen lan luagu Heowá? Chóuruti afiñe lan luagu Heowá, gama lumoun, kei urúei subudi lumuti meha mosu lan laranseruniña lílana ageiraü luba lénrengunga le lunbei meha liabin ámuñegü. Subudi lumuti meha darangilaü lan le Hudaabei madurabei lan lun súnwandan, ani ítara liña.

6. Ida liña hayusuruni kristiánugu lánina furumiñeti sígulu lidaani darangilaü?

⁶ Íbini súfuri hamani meha kristiánugu ha lánina furumiñeti sígulu éibaahouni luagu saragu dan, anihein meha burí dan ñein lan darangilaü. Ida liña hayusuruni dan ligía buidu? Wügüriña hama würiña hagía ténitiña meha lun hapurichihani uganu buidu. Ariñagati abahüdaguni le lídanbei Adügaü luagu damuriguaü kristiánu “aba hederebugudún lidan hafiñen luagu [Heowá]”, ani kei mararamun hamuti lan hapurichihan, “aba aganwoundeina hamá afiñerutiña”. Chóuruti biní lani Heowá ubebeni le harufudubei dan le meha hapurichihabei lidan lidaani darangilaü (Adü. 9:26-31).

7, 8. Afuranguagüda huméi ida liña lan meha meferidirun lan Pábulu hama amu kristiánugu ni murusun chansi lun hapurichiha.

⁷ Meferidiruntiña meha disipulugu ha lánina furumiñeti sígulu ni murusun chansi lun hapurichihani uganu buiti. Kéiburi apostolu Pábulu, aba lanuadirún lerederun Éfesu dan le larihinbei ‘daraali lan bena lubá’ lun lapurichihan luma lun ladügün disipulugu ñein (1 Ko. 16:8, 9).

⁸ Lidan irumu 49, dariti apostolu Pábulu hama amu kristiánugu ábaya chansi lun hapurichihan, dan le laranserunbei turobuli lánina heresibirun wügüriña seini tuagu hóustarun (Adü 15:23-29). Dan le lariñawagúnbei lun damuriguaü luagu le anuadirúabei aba hadügüni disipulugu sun hayaraati lun hapurichihani uganu buiti tuáguti Lererun Heowá (Adü 15:30-35). Ida liña lidin houn? Ariñagatu Bíbülia aba lan: “hederebugudun [lílana damuriguaü] lidan hafiñen, aba haganwoundun afiñetiña sagü weyu” (Adü. 16:4, 5).

9. Ka gayaraabei wadügüni uguñe weyu lidan saragu fulasu ani ka álügüdahani lunbei wadügüni wóuniwagua?

⁹ Uguñe weyu gayaraati wapurichihan lau darangilaü lidan saragu fulasu. Anhein wawinwanduña lubéi lidan aban ageiraü le ñein lubéi gayara lan láhuduraguniwa lun Bungiu lidan darangilaü, álügüdagua wamá woungua: “Nayusuruñein san dan buidu lun napurichihan?” Lidan lagumuhóun dan le, beresegutu lóundarun Heowá buidu buidu lidan aban dasi lánina apurichihani luma arufudahani le marihínwagili ubouagu (Mar. 13:10). Ma lubuidun, ani anihein saragu katei le lunbei wadügüni lidan dasi le.

10. Ka un línchahawa 2 Timotéu 4:2?

¹⁰ Anhein wawinwanduña lubéi lidan darangilaü, ida luba wayusuruni dan le buidu? (aliiha huméi 2 Timotéu 4:2). Akutiha waméi le gádanbaliwa. Samina wamá anhein gayara lubéi, wagía o aban hádangiñe waduheñu waganwoundagüdüni wapurichihan o weseriwidun kei prekursoru. Mámaali dan lun wóundaraguagüdün seinsu ni umegeguni lugundun leferidiruba sun le lidan óunwenbu asufuriruni (Ari. 11:4; Mat. 6:31-33; 1 Huan 2:15-17).

11. Ka hadügübei fiu íbirigu lun hapurichihan houn saragu gürigia?

¹¹ Saragu íbirigu furendeihaña amu iñeñein lun hapurichihan luma lun harufudahan houn amu gürigia. Eibu dan tadügün lóundarun Heowá ariñahani tídangiñeti Bíbülia lidan saragu iñeñein lun tíderaguniña. Kei hénpulu, lidan irumu 2010 anuhein meha agumeiraguagüdüni lidan 500 iñeñein. Guentó anuheinharu lidan lóugiñe 1,000.

12. Ida liña hasandiragun gürigia houngua dan le haganbuni uganu luáguti Larúeihan Bungiu lidan hererun? Afuranguagüda huméi.

¹² Ida liña san hasandiragun gürigia houngua  dan le haganbun layanuhóun luagu Heowá lidan hererun? Samina wamá luagu sügǘ le. Aba tidin aban íbiri lidan aban adamurini le adügübei Memphis (Tennessee, Meriga) lidan kinyarwanda le tererun, létima ayanuhóubei Ruanda, Republika Demokratiku Kongo luma Uganda. Lárigiñe adamurini, aba tariñagun: “Barühadina diisi sedü irumu ya Meriga, furumiñe wéiyaasu gunfuranda nani ariñahani lúmagiñeti Bungiu sunsuinagubei”. Furanguti lau lan taganbuni ariñahani lidan tererun guánarügü chülüti tidoun tanigi. Anhein gayara lubéi wadügüni, ka uagu mafurendeirun wabéi amu iñeñein lun gayara lan wíderaguniña gürigia ha lídanbaña fulasu le ñein lubéi wapurichiha? Ma másiñati busenbaña lan híchugun arigei woun, ánhawa apurichiha houn lidan hererun guánarügü? Chóuruti lanügüba lan áfaaguni le wadügübei saragu ugundani.

13. Ida liña hayusuruni wíbirigu ha Rúsiabaña lidaani darangilaü?

¹³ Mama sun wíbirigu apurichihatiña lidan darangilaü ladüga anihein burí ageiraü máhatiña gumadimatiña lun wapurichihan. Samina wamá hawagu wíbirigu ha Rúsiabaña. Lárigiñe saragu irumu éibaahoua, lidan irumu 1991 lidan ǘrüwa-hati aba lanharún lun apurichihani ñein. Lidan dan ligía añahein meha diisi milu íbirigu apurichiha ñein. Lárigiñe wein irumu añaheinhaña meha 160,000 íbirigu ñein. Furanguti yusu hamuti lan íbirigu dan ligía buidu. Íbini mádura lan darangilaü ligía, sigimémetiña íbirigu eseriwida lau ubebeni ani adüga hamuti sun hayaraati meberesenga le gádanbaliña.

14, 15. Ida liña larufuduni Heowá lubafu luagu lufulesein Asá?

¹⁴ Giribuya wamá lidoun lidaani larúeiha  urúei Asá. Aba meha lagumuchun darangilaü le lídanbei ageiraü Hudá, ladüga aba hebelurun aban míñunu hasudaranigu Etiopíana lun hábürühan hawagun. Chóuruguati meha gumadan Sera lungua lagañeirubaña lan Hudaana. Gama lumoun, afiñeti meha Asá luagu Heowá. Ligía lafurieidunbei lun, lariñaga: “Íderaguabawa lubeiti, Wabungiute Wabureme, ladüga hemenigitiwa buagu, ani lidan biri wayabin awuribuha hama gürigia ha” (2 Kro. 14:11).

¹⁵ Íbini gíbetima hamá hasudaranigu Etiopíana hawéi lisudaranigu Hudá, subudi lumuti meha Asá gabafu lan Heowá lun líderaguniña lumutiña. Ani meyeedun lumuti Heowá. Gañei hamuti lumutiña Heowá wuribu (2 Kro. 14:8-13).

16. Ida liña wasubudiruni lagumuchaguba lan darangilaü le wawinwandubei uguñe?

¹⁶ Íbini ibidiñe lan woun buidu buidu le lunbei lasuseredun lun kada lubúein Bungiu, le wasubudirubei darangilaü lan le wawinwandubei uguñe weyu, lachülürüba lan dan lun lagumuchun. Aritagua waméi ariñaga lan Hesusu lidan lanme lagumuhóun weyu mínsiñebaña lan lánigu disipulugu lun “sun ubóu” (Mat. 24:9). Ariñagati giñe apostolu Pábulu aban katei ítarati: “Inarüni luagu héibaahouba lan sun ha busenbaña habagaridun deregeguañu houngua lun Hesukrístu” (2 Tim. 3:12). Lanwoun lira, lauñein “óunwenbu igañi” Satanási ani libidiounigan au ánhawa asaminara gayara lan wesefurun luéi ligañi (Aruf. 12:12).

17. Ida luba gayara lan lóuchawagun wafiñen?

¹⁷ Ámuñegü, yarafa madise, lóuchawaguba hafiñen sun kristiánugu. Yarafa madise “ñeinbei saragu asufuriruni le úagili libe lúmagiñe lagumeserun ubóu, úabei giñe lárigiñe” (Mat. 24:21). Lídanme dan ligía, másiñati hagarabaaguba lan waduheñu wawagun ani maha hagíame gumadimatiña lun dasi le wadügübei (Mat. 10:35, 36). Álügüda wamá woungua: “Náyeihabei san Asá ani nafiñenruba san luagu líderagubadina lan Heowá ani góunigi láname?”.

18. Según Ebüréu 10:38, 39, kaba íderaguawa lun aranseñu wamá lubá le lunbei liabin?

¹⁸ Busenti Heowá lun aranseñu wama lubá le lunbei liabin ámuñegü, ligíati anihán ederebudagüdei wafiñen guentó. Layusuruñein Heowá “Musu úaraguati” lun líchugun ariñahani  woun le ítarabei kei “éigini”, le lunbei líderaguniwa lun derebugu lan wafiñen (Mat. 24:45). Gama lumoun, le lunbei wadügüni, wederebudagüdüni buidu buidu wafiñen luagu Heowá (aliiha huméi Ebüréu 10:38, 39).

19, 20. Lau gabaroun wamani le lariñagubei 1 Krónikasi 29:17, ka álügüdahani lubéi wadügüni wóuniwagua?

¹⁹ Lunti wáluahani Heowá kei ladügüni urúei Asá (2 Kro. 14:4; 15:1, 2) Gumesetiwa áluahei Heowá dan le wagumeserun asubudirei ani badisei wagía. Meferidiruntiwa ni murusun chansi lun wederebudagüdüni ínsiñeni le wasandirubei luagu. Lun wasubudiruni wadügüñein lan buidu, álügüda wamá woungua: “áfaaguatina san lun nidin lidan sun adamuridaguni?”. Ñein weresibirei gurasu le wemegeirubei lun ítarameme wamá eseriwida lun Heowá luma lun wásügürüni buidu hama wíbirigu (Mat. 11:28). Gayaraati giñe wálügüdagun woungua: “Aturiaha numutu san Bíbülia nábuguarügü? Anhein hama lubéi wagübürigu wawinwanda, adüga wamuti san áhudurawaguni kei iduheñu súnwandan? O anhein wábuguarügü lubéi wawinwanda, díreitiwa san dan lun waturiahan ítara kei hadügüni burí iduheñu? Adüga wamuti san sun wayaraati lun wapurichihan luma lun warufudahan houn amu?”.

²⁰ Ka uagu lunti lubéi wálügüdagun woungua? Ariñagatu Bíbülia aríaaha lani Heowá le lídanbei wasaminan luma le tídanbei wanigi. Ligíati, ma giñe lunti wadügüni ligiaméme (aliiha huméi 1 Krónikasi 29:17). Ánhawa ariha mosu lan wadügün asansiruni lidan le wabusenrubei wadügüni, wagaburi o ligaburi wasaminarun, amuriaha wamá ídemuei luma Heowá. Anihán dan lun waranserun lubá óuchawaguni le lunbei liabin. Ligíati, anhein wawinwanduña lubéi lidan lidaani darangilaü, meferidira waméi chansi lun wayusuruni dan le buidu.