1. Según Malakíasi 3:16, ka líburu labürühaboun Heowá, ani ka tílabei?

 BARÜHALI Heowá saragu milu irumu abürüha aban líburu espechalitu le ñein tubéi aban lísüta lau saragu iri. Lau liri Aweli, tagumesera lísüta to le furumiñeti gefenti úaraguati (Luk. 11:50, 51). * Lau lásügürün dan, bürühali Heowá lanwoun iri le tídanbei líburu to, ani guentó aniheinhali saragu míñunu iri tidan. Resibitu líburu to saragu iri tidan Bíbülia, wáwati tun: “Garüdia [...] to ídanboun laritawagúa hawagu ha íchubaña inebesei lun Aburemei” tuma “líburu to lánina ibagari”. Lidan aturiahani le wayusurubei iri, “líburu to lánina ibagari” (aliiha huméi Malakíasi 3:16; Aruf. 3:5; 17:8).

2. Ka iri bürüwañubei tidan líburu lánina ibagari, ani ka gayaraabei wadügüni lun labürüdǘn wiri tidan líburu to?

² Tidan líburu espechalitu to ladarirúa hiri sun ha áhuduragubaña lun Heowá lau óunwenbu inebesei, ani hínsiñeti liri houn. Hemenigitiña heresibirun ibagari magumuchaditi, sielu lan yebe o ya ubouagu. Gayaraati labürüdǘn wiri tidan líburu to, ánhawa adüga aban lubuidun umadaguaü luma Heowá lau wafiñerun luagu sákürifisiu le ladügübei Hesukrístu, le Liráü (Huan 3:16, 36). Ma sun wagía busentiwa lun bürüwañu lan wiri tidan líburu to?

3, 4. a) Anhein bürüwañu liña lubéi wiri tidan líburu lánina ibagari, mini lan san le wawinwanduba lan lun súnwandan? b) Kaba wariha lidan aturiahani le luma lidan le lunbei liabin lárigiñe?

³ Sun san ha bürüwañubei hiri tidan líburu chóuruti san hibihiba  lan ibagari magumuchaditi? Wadarirubei óunabagülei lidan Áfuriduni 32:33, le ñein lubéi lariñaga Heowá lun Moisesi: “Lírirügüba le afigouhati nigibugiñe Nagidara tídangiñe niliburun”. Mini lan le iri lan le bürüwañubei tidan líburu to gayara lan lagururuduniwa ñéingiñe; ítara liña hamuga katei le kamá hamuga lábürüdüñei lan Heowá lau lápisi (Aruf. 3:5). Lunti wachoururuni lasigiruba lan wiri bürüwañu tidan líburu to darime labürüdüni Heowá lun súnwandan.

⁴ Másiñati adüga wamá fiu álügüdahani wóuniwagua. Kéiburi, ka tariñagubei Bíbülia hawagu ha bürüwañubei hiri tidan líburu lánina ibagari luma hawagu ha mabürüdǘnbei hiri tidan? Ídaame hibiha gürigia ha bürüwañubei hiri tidan líburu to lánina ibagari magumuchaditi? Kaba asusereda houn ha machansibaña lun hasubudiruni Heowá lubaragiñe meha hóunwegun? Anihein funa san hiri bürüwañu tidan líburu to? Warihibei óunabagülei lidan aturiahani le luma lidan le lunbei liabin lárigiñe.

KA IRI BÜRÜWAÑUBEI TIDAN LÍBURU TO?

5, 6. a) Según Filipuna 4:3, Ka iri bürüwañubei tidan líburu lánina ibagari? b) Ídaba labürüdǘwa hiri lun súnwandan tidan líburu to?

⁵ Ka iri bürüwañubei tidan líburu to lánina ibagari? Lun gayara lan wóunabuni álügüdahani le, wayanuhaba hawagu seingü hawuyeri gürigia. Añahein hádangiñe gürigia bürüwañu liña hiri tidan líburu lánina ibagari, ani ha híbiri mabürüdǘnti hiri tidan.

⁶ Ha lílana furumiñeti sétanu anuadirúaaña lun harúeihan luma Kristu sielu. Bürüwaali san hiri lílana sétanu le tidan líburu lánina ibagari? Anha. Según le lariñagubei apostolu Pábulu houn íbirigu ha íderagubalin Filipu, bürüwaali hiri kristiánugu anuadirúaaña —ha agunbirahóubaña lun harúeihan luma Kristu sielu— tidan líburu lánina ibagari (aliiha huméi Filipuna 4:3). Gama lumoun, lun gayaraabei lan magidarúniwa lan hiri tídangiñe líburu to, lunti úaraguameme hamá lun Bungiu. Ani, danme  heresibiruni lagumuhóun seyu, lubaragiñe lan yebe hounwen o lubaragiñe lan laduurun óunwenbu asufuriruni, labürüdǘnba hiri lun súnwandan tidan líburu to (Aruf. 7:3).

7. Ida liña líderaguniwa Arufudúni 7:16, 17 asubudirei ídaame lan labürüdǘwa tidan líburu lánina ibagari lun súnwandan hiri saragu gürigia ha ítarabei hagaburi kei mudún?

⁷ Ha lílanabaña libiaman sétanu hádangiñetiña saragu gürigia ha hádangiñebaña amu mudún. Bürüwañu liña san hiri íbirigu ha tidan líburu lánina ibagari? Anha. Lerederamémeba san hiri tidan líburu to lárigiñe hásügürün lídangiñe Arümahedón? Anha (Aruf. 7:14). Ariñagati Hesusu gürigia lan ha ítarabei hagaburi kei mudún, “hibihiba ibagari magumuchaditi” (Mat. 25:46, TNM). Ánhañati ha ásügürübaña lau ibagari lídangiñe Arümahedón meresibirunhaña ibagari magumuchaditi lau lóufudagun. Bürüwañu luba hiri tidan líburu lánina ibagari kamá hamuga lau lápisi. Lídanme Larúeihan Hesusu lánina Milu Irumu “ábame lanügüniña laru duna le íchugubei ibagari”. Ha asigirubalin ladundehan Kristu ani úaragua hagía lun Heowá bürüwañu luba hiri lun súnwandan tidan líburu to lánina ibagari (aliiha huméi Arufudúni 7:16, 17).

8. Kátaña san úabei hiri bürüwañu tidan líburu lánina ibagari, ani kaba asusereda houn?

⁸ Gürigia ha lílana lǘrüwan sétanu hagía ha ítarabaña kei gábara, ha lúnbaña hagünrinchawagun lidan Arümahedón. Úati hiri gürigia ha tidan líburu lánina ibagari. Ariñagati Hesusu “aba lanme hagünrinchawagun lun súnwandan” (Mat. 25:46, TNM). Ariñagati giñe Pábulu lau lubafu sífiri sandu gürigia lan ha heresibiruba lan günringuaü lun súnwandan, “ligíaba habeichúagüle” (2 Tesa. 1:9; 2 Fe. 2:9). Gayaraati giñe wariñaguni ligiaméme hawagu gürigia ha afigouhabaña luagu sífiri sandu lidan burí sun dan le sügühalibei. Heresibiruba günringuaü lun súnwandan, meresibirunhaña ibagari magumuchaditi. Furanguti máguyugunbaña lan (Mat. 12:32; Mar. 3:28, 29; Ebü. 6:4-6). Warihaali guentó buidu buidu hawaguti bián sétanu ha lúnbaña háguyugun ya ubouagu.

HA LÚNBAÑA HÁGUYUGUN

9. Ka san bián sétanu gürigia lúnbaña háguyugun ya ubouagu, ani ka adügübei lun ámuñegueinarügü hamá hawariuagua? (Adügaü 24:15).

⁹ Ayanuhatu Bíbülia hawagu bián hawuyeri gürigia ha lúnbaña háguyugun ha lúnbaña gachansin hamá lun hawinwandun lun súnwandan ya ubouagu: “ha buídubaña” o richaguatiña, hámati ha “wuribabaña” o marichatiña (aliiha huméi Adügaü 24:15). “Ha buídubaña” o richaguatiña hagía meha ha eseriwidubaña lau úaraguni lun Heowá sun meha wínwangiña lan. Ánhañati ha “wuribabaña” o marichatiña hagía gürigia ha meseriwidunbaña lun Heowá lubaragiñe hóunwegun. Lanwoun lira, liibe-agei dan, múaranti meha hagaburi luma lilurudun Bungiu le richabei. Kei le hásaaruba lan bián hawuyeri gürigia ha, mini lan san le anihein lan hiri bürüwañu tidan líburu to lánina ibagari? Lun wóunabuni álügüdahani le, wakutihaali buidu buidu hawaguti bián sétanu gürigia ha aban lárigiñe aban.

10. Ka uagu háguyuguba lubéi gürigia ha “buítiña” o richaguatiña, Ani kaba lubuidun chansi hibiha fiu hádangiñe? (Ariha huméi giñe tidan garüdia to fánreinti le gíribei “Álügüdahani le hadügübei aliihatiña” le ayanuhabei hawagu ha lúnbaña háguyugun ya ubouagu).

¹⁰ Le ligadürün sétanu gürigia ha “buídubaña” ha richaguabaña. Lubaragiñe hóunwegun, bürüwaali meha hiri tidan líburu to lánina ibagari. Gidawati san hiri tídangiñe líburu to dan le hóunwegunbei? Uá, lugundun wínwangiña lidan laritagun Heowá. “Ladüga mama lan habungiute hilaaña Bungiu, habungiute ha wínwangiñabaña, wínwangiña lanügüniña Bungiu sun gürigia” (Luk. 20:38). Mini lan le danme lan háguyugun ha buídubaña o ha richaguabaña lun hawinwandun ya ubouagu bürüwañu luba hiri  tidan líburu to lánina ibagari. Ítara liña kamá hamuga, bürüwañu liña lan lau lápisi (Luk. 14:14). Chóuruti habihiba lan hádangiñe ha lúnbaña háguyugun lubuidun chansi lun heseriwidun kei “lirahüñü urúei lidan sun ubóu” (Sal. 45:16, TNM).

11. Kaba hemegeira ha “wuribabaña” o marichatiña lun labürüdǘniwa hiri tidan líburu to lánina ibagari?

¹¹ Lidan lagumuhóun, ayanuha wamá hawagu haseingün sétanu, gürigia ha lúnbaña háguyugun: ha “wuribabaña” o marichatiña. Kei ibidiñe lubéi lilurudun Heowá houn, manügüntiña meha aban lubuidun ibagari ligibugiñe lubaragiñe hounwen. Ligíati ua lubéi hiri bürüwañu tidan líburu lánina ibagari. Danme le háguyugun, líchuguba Bungiu chansi houn, laume lásügürün dan, ábame labürüdǘn hiri tidan líburu to lánina ibagari. Mégeibaña gürigia ha saragu ídemuei. Lubaragiñe meha hóunwegun añahein meha hádangiñe adügatiña katei le hanarimeti luriban. Ligíati mégeibaña lubéi lun hafurendeirun awinwanda según lilurudun Heowá, lúrudu le richabei. Lun gayara lan híderawagun sun gürigia ha, ladügüba Larúeihan Bungiu lun larufudahóun houn sun gürigia lidan sun ubóu.

12. a) Kátaña san lúnbaña harufudahan houn ha wuribabaña o marichatiña? b) Kaba asusereda houn ha wuribabaña o marichatiña anhein mabusenrun habéi hadügüni le hafurendeirubei?

¹² Kátaña lúnbaña harufudahan houn ha wuribabaña o marichatiña? Gürigia ha hádangiñebaña saragu gürigia ha ítarabei hagaburi kei mudún ha lúnbaña háguyugun. Kati lunbei hadügüni ha wuribabaña o marichatiña anhein busén habéi lun labürüdǘn hiri tidan líburu to lánina ibagari? Mósume gamadagua hamá luma Heowá luma lun hederegeruni habagari lun. Hesusu hama kristiánugu anúadiraaña kei aguseragüdütiña hagíaba etenira lun hawanserun gürigia ha wuribabaña o marichatiña (Aruf. 20:4). Anhein maha somu gürigia lun ídemuei le, lagidarúba lídangiñe paraísu, íbini 100 lan irumu lau (Isa. 65:20). Gayaraati larihinu Heowá luma Hesusu hanigi gürigia, ani hachoururubei lun ua lan ni aban gürigia adügüti wuribani lídanme iseri ubóu (Isa. 11:9; 60:18; 65:25; Huan 2:25).

 ÁGUYUGUNI LUN IBAGARI LUMA ÁGUYUGUNI LUN AGUSERUNI

13, 14. a) Ida liña meha gunfuranda wamani luagu aban dan dimurei le lariñagubei Hesusu le waliihabei lidan Huan 5:29? b) Kaba un wetenira dan le waliihani dimurei burí le?

¹³ Ayanuhati giñe Hesusu hawagu ha lúnbaña háguyugun ya ubouagu. Kei hénpulu, ariñagati: “Ladüga anite dan lun haganbuni sun hilaguaaña lumalali, ábame háfuridunga lídangiñe hamúaha. Ha adügübalin le buídubei, háguyuguba lun habagaridun; ánhañati ha adügübalin le wuribabei, háguyuguba lun haguserawagüdün” (Huan 5:28, 29, TNM). Ka labusenrubei Hesusu lariñagun lau dimurei le?

¹⁴ Luagu meha aban dan afiñetiwa meha dimurei lan le lariñagubei Hesusu layanuhaña lan luagu le lunbei hadügüni ha lúnbaña háguyugun lárigiñe habagaridunya. Mini lan le, ñéinbaña lan meha hádangiñe hadügüba katei buiti lárigiñeme háguyugun, ha híbiri hadügüba lan katei wuribati. Ariha wamuti mariñagun lan Hesusu ha lan áfuridubaña lídangiñe umúahaü hadügüba lan katei buiti o hadügüba lan katei wuribati. Lidan bérusu le layanuhaña Hesusu luagu katei le sügühalibei, ladüga ariñagati “ha adügübalin le buídubei” o “ha adügübalin le wuribabei”. Mini lan le adüga hamani katei burí le lubaragiñe hounwen. Ma furanguti katei le, adián? Le linarün katei, lídanme iseri ubóu migirúnbei ladügǘn wuribani ñein. Ha wuribabaña o marichatiña adüga hamaalime katei wuribati le lubaragiñebei hóunwegun. Ligíati, ka labusenrubei Hesusu lariñagun dan le lariñagunbei “háguyuguba lun habagaridun” luma “háguyuguba lun haguserawagüdün”?

15. Kátaña lúnbaña “háguyuguba lun habagaridun”, ani ka uagu?

¹⁵ Ha buídubaña o richaguatiña, lidan amu dimurei, ha adügübalin katei le buídubei lubaragiñe hóunwegun “háguyuguba lun habagaridun” ladüga aniheinhali hiri bürüwañu tidan líburu to lánina ibagari. Mini lan háguyugun “ha adügübalin katei le buídubei”, le uágubei layanuhóua lidan Huan 5:29, ligiaméme águyuguni le hani ha “buídubaña” o ha richaguatiña ha iridúbaña lidan Adügaü 24:15. Úarati afuranguagüdüni le luma le bürüwañubei lidan Rómana 6:7 le ariñagubei: “Lugundun le hilaalibei furihali lídangiñe figóu”. Dan le hounwen gürigia ha buídubaña, o richaguatiña aba labulieiduni Bungiu hafigoun, gama lumoun mabulieidun lumuti úaraguni le harufudubei dan meha le wínwangiña lubéi (Ebü. 6:10). Inarüni, danme le háguyugun ha buídubaña o richatiña, mósume hasigirun úaraguñu lun Bungiu lun gayaraabei lan magidarúniwa lan hiri tídangiñe líburu to lánina ibagari.

16. Ka mini lubéi “háguyuguba lun haguserawagüdün”?

¹⁶ Kaba asusereda houn marichatiña o ha adügübaña katei wuribati lubaragiñe hounwen? Íbini dan lan le hóunwegun furihaña lídangiñe hafigoun, úati meha úaragua hamá lun Bungiu lubaragiñe hóunwegun. Ligíati ua lubéi hiri bürüwañu tidan líburu to lánina ibagari. Ligíati ha águyugubaña, ha meha “adügübalin le wuribabei” hagiaméme hama ha “wuribabaña o marichabaña” ha iridúbaña lidan Adügaü 24:15. “háguyuguba lun haguserawagüdün”. * Gürigia ha wuribabaña o marichatiña haguseragüdüwaba, mini lan lira larihúba ida liña lan hagaburi (Luk. 22:30). Lanügüba saragu dan lun gayaraabei lan lariñawagúniwa kátaña lan lunbei labürüdün hiri tidan líburu to lánina ibagari. Lun lasuseredun katei le, mósume hígiruni ha wuribabaña o marichatiña luriban meha hagaburi luma lun hederegeruni habagari lun Heowá.

17, 18. Ka lunbei hadügüni ha lúnbaña háguyugun ya ubouagu, ani ka katei lunbei “hadügüni”, le uágubei layanuhóua lidan Arufudúni 20:12, 13, TNM?

 ¹⁷ Meberesenga anhein buidu habéi o richá hamá o wuriba hamá o maricha hamá lidan meha dan le sügühalibei, sun ha lúnbaña háguyugun mósume gaganbadi hamá lun lúrudu le bürüwañubei tidan iseri líburu, to lunboun tadaarawagun lídanme 1,000 irumu. Abürüha lumuti apostolu Huan arufudúni le larihibei, ariñagati: “Aba narihiniña hilaguaaña —wéinamuhaña hama ñǘbürigiña— rara ligibugiñe lala arúeihani, aba tadaarawagun burí líburu. Ábaya giñe tadaarawagun ámuya líburu: líburu lánina ibagari. Aba haguserawagüdün hilaguaaña luagu burí katei le hadügübei, según le bürüwañubei tidan” (Aruf. 20:12, 13, TNM).

¹⁸ Kaba “lébuna” haguserawagüdün ha lúnbaña háguyugun? Ladüga san le meha hadügübei lubaragiñe hóunwegun? Uá. Haritagua waméi dan le lan hóunwegun gürigia furihaña lídangiñe hafigoun. Ligíati layanuhaña ya luagu katei le “hadügübei” lubaragiñe hóunwegun. Le mini lubéi le, ligaburime hóunabun lun arufudahani le lunbei heresibiruni lidan milu irumu. Íbini wügüriña úaraguatiña kei burí Noé, Samueli, Dawidi luma Danieli sun gürigia ha mósume hafurendeirun luagu Hesukrístu luma lun harufuduni afiñe hamá luagu sákürifisiu le ladügübei. Gúbudigiameti ha wuribabaña o marichatiña!

19. Ida luba hagumuchun sun ha máhabaña lun lubuidun chansi le?

¹⁹ Ida luba hagumuchun sun ha máhabaña lun lubuidun chansi? Ariñawagúati lidan Arufudúni 20:15: “Ha mabürüdünbei hiri tidan líburu to lánina ibagari aba hágurun lidoun lagunu lauti watu gemeti”. Ítara luba, hagünrinchawaguba sunsuinagubei lun súnwandan. Ma súdiniti wachoururuni bürüwañu liña lan wiri tidan líburu lánina ibagari, luma lun ñein lan bürüwañu lun súnwandan!

20. Kaba lubuidun dasi adügǘwa lídanme Arúeihani lánina Milu Irumu? (Ariha huméi dibuhu le lídanbei tidáü garüdia).

²⁰ Lídanme Arúeihani le lánina Milu Irumu ábanbei dan le lánina saragu ugundani. Lídanme dan ligía ladügǘba aban óunwenbu dasi lun larufudahóuniwa houn sun gürigia lidan sun Ubóu. Íbini ábanbei lan giñe dan lun larihíniwa hagaburi ha buídubaña o richaguatiña hama ha wuribabaña o marichatiña (Isa. 26:9; Adü. 17:31). Ida luba ladügǘniwa óunwenbu dasi lánina arufudahani le? Lafuranguagüdübei leweñegua aturiahani katei le woun, ani líderagubadiwa giñe lun gebegitima lan katei le woun.