Según 1 Korintuna 15:8 ariñagati Pábulu: “Lárigiñe, aba giñe larufudagun lungua nun, lau sun ítara niña lan kei aban le águrahouti mama lidan lidaani”. Layanuhaña Pábulu luagu dan le larihibei aban arufudúni luagu luéirigun Hesusu sielu. Lidan dan le sügühalibei afuranguagüda wamuti ítara lan kamá hamuga lágurahouña o láguyuguña lan lidan aban ibagari sielu, lubaragiñe lidaani, átiri sígulu lubaragiñe águyuguni sielu. Gama lumoun, lárigiñe waturiahani bérusu le buidu buidu genegeti mégeiwa lan lun wasansiruni ligaburi lafuranguagüdüniwa.

Inarüni layanuhaña lan Pábulu lidan bérusu le dan meha le ladügagunbei lungua kristiánume. Ka labusenrubei lariñagun lau dimurei le “águrahouti mama lidan lidaani”? Anihein saragu resun.

Aban asansiruni sódiniti ani hanarimeti. Liibe-agei dan, sódiniti aban águrahouni le mámati lidan lidaani. Dan le lídinbei Saulu, dan lárigiñe subudiwati kei Pábulu, Damasüku lun léibaahaniña kristiánugu ha lílana uburugu ligía, magurabunti yebe larihibei lan Hesusu lidan aban arufudúni lárigiñe láguyugun. Mámarügüñein lun Pábulu sódini lan asansiruni le ladügübei, sódiniti giñe houn kristiánugu ha lídinbaña éibaaha Damasüku. Hanarimeti le asuseredubei lun darí lun leferidiruni larihin luagu fiu weyu (Adü. 9:1-9, 17-19).

Adügaguati lungua kristiánume “mama lidan lidaani”. Sügügüda tumuti La Traducción Kadosh Israelita Mesiánica de estudio dimurei le ítara: “águrahouatina lidan dan le moun lumuti” dan meha le ladügagun Pábulu lungua kristiánume, giribuhali meha Hesusu sielu. Amu luéi le uágubei layanuhan Pábulu lidan bérusu le lubaragiñebei le, marihin lumuti meha Pábulu Hesusu lárigiñe láguyugun lubaragiñe meha lidin Hesusu sielu (1 Ko. 15:4-8). Lau larihini Pábulu Hesusu sódini, ruti meha lira aban chansi lun lunya larihini, lau sun genege lan mama lan “lidaani lun larihini”.

Layanuhaña meha luougua lau aban igaburi ǘnabuguti. Según fiu sásaamu, dimurei le layusurubei Pábulu lidan bérusu le gayaraati lachoururún kamá hamuga layanuhaña Pábulu wuriba. Anhein layusuruñein lubéi Pábulu dimurei le ítara, saminarügü liña madüna lan lun apostolu lan. Ani ariñagati: “Lugundun au lan ni kátatimabei hadan apostolugu; madünatina ni lun nanügǘn keisi apostolu, lugundun éibaaha numutiña meha tílana liligilisin Bungiu. Gama lumoun ítara nubéi guentó lugundun areidati Bungiu numa” (1 Ko. 15:9, 10).

Ligíati, genegeti le lan labusenrubei Pábulu lariñagun hanarime lan ani sódini ligía larufudagun Hesusu lungua lun, lidan aban arufudúni lidan dan magurabúniwa lan, ligía ladügagun lungua kristiánume o ladüga madüna lani leresibiruni lubuidun arufudúni le. Meberesenga ida liña lan larihini Pábulu katei le, hanarimeti lisudinin sügǘ le lun. Chóurugüda lumuti katei le lun águyugua lan Hesusu. Ligía layanuhanbei súnwandan luagu sügǘ magurabunti le, dan le lapurichiha houn amu luagu águyugua lan Hesusu (Adü. 22:6-11; 26:13-18).